Ka Rwod Ot Loko Leb Mapat
1. Pingo note mitte tutwal ka kacokke mapol gitye ka tic i wang tic acel?
1 I but lobo ducu, lutit kwena me Ker-ri kare ki kare ginongo jo ma gitye ki miti ma giloko leb mapat ki ma kiloko i kacokkegi. Me konyo jo magi i yo me cwiny, jang gang kal mapol gitye ka cako gurup ki kacokke me leb mapat pat. Romo bedo ni kiloko leb mapat pat i wang tic moni-ni, pi meno, kacokke mapol me leb mapat pat guromo tiyo tic me pwony i wang tic acel meno. Kacokke mapat pat-ti giromo note nining wek gunen ni tic me pwony owot kore ki kore?—1 Kor. 14:33.
2. Ka watye ka tic i doggola ki doggola, waromo note ki gurup nyo kacokke me leb mapatte ma i kabedowa nining?
2 Note Maber: Ka latit kwena moni tye ka tic i teng gudu nyo miyo caden ma pe oyubbe pire, en myero obed agonya me lok ki ngat mo keken, kadi wa jo mogo ma giloko leb mapat, dok omi bukke i leb ma ngat moni-ni maro kwanone. Ento ka en tye ka tic i ot ki ot i kabedo ma kacokke nyo gurup me leb mapatte bene gitiyo, ci latit kwena-ni myero oket cwinye i gangi pa jo ma giloko leb me kacokkene. Pire tek mada me gwoko rekod me tic me pwony maber ka ce inen kacokke mapat pat gitiyo i kabedo acel. Lunen wi tic me pwony omyero gukubbe i kingi kun giyubo yub ma miyo rucurucu bedo pe. (Car. 11:14) Ento, ka ce latit kwena mo onongo ngat mo ma loko leb mapat i kare me tic i doggola ki doggola kun pe tye kacokke mo ma loko leb meno i kabedo meno, ci latit kwena-ni myero otute me miyo caden dok omedde ki dongo miti pa ngat meno.
3. Omyero watim ngo ka ce warwatte ki lutit kwena me gurup nyo kacokke me leb mapatte i wang tic acel-li?
3 Watimo En Tic Acel-li: Ngo ma myero kitim ka ce lutit kwena me kacokke mapat pat gitye ka tic i kabedo acel-li i nino acel-lu bene? Mar pa Lukricitayo myero obed gin ma pire tek kato apokapoka me leb ma giloko, dok gin ducu myero gupar pi dano ma i wang tic meno. (Jon 13:34, 35) Pi meno, lunen wi tic omyero gunyut niango ki mar me neno ka gurup moni kong twero tic i wang tic mukene mapatte.—Yak. 3:17, 18.
4. Lok pa lanebi ango ma tye ka cobbe i kare-ni?
4 Baibul otito con ni dano me leb mapat pat ducu gibiwinyo lok me kwena maber-ri. (Yabo. 14:6, 7) Ka ce note tye i kinwa, ci tic i kabedo acel ma jo me leb mukene pud oa ka tiyone bedo pe dok miyo watero kwena maber-ri bot jo manyen mapol, kadi wa jo ma loko leb mapatte.—Ep. 4:16.