Gin ma Nyutu Niye Matek!
1. Jami maraco ango ma Yecu otito pirgi?
1 Lukwena pa Yecu gutero itgi i kare ma en obedo ka tito botgi pi dwogone ki agikki piny. Jami maraco calo lweny, kec, oyengyeng, kacel ki two gemo onongo bipoto i kom dano ducu. I ngeye, Yecu owaco ni kibidago jo ma lubbe, kun giketo can i komgi, dok kibinekogi. Lunebi ma lugoba gibibino ci girwenyo jo mapol. Mar pa jo mapol bikwe woko.
2. Pingo tye me ur tutwal ni kwena maber-ri kitye ka titone i wi lobo ducu?
2 I nge lok meno, lukwena pa Yecu omyero obed ni guuro mada i kare ma en owaco botgi ni lok me kwena maber me Ker pa Lubanga-ni kibititone i wi lobo ducu. (Mat. 24:3-14) I kare-ni watye ka neno cobbe me lok me aura pa lunebi-ni. Lucaden pa Jehovah gitye ka tito pi kwena maber-ri ki mit kom kadi bed gitye ka kwo i kare marac. Mar pa jo me lobo tye ka woto ki kwe woko, ento marwa medde ameda. Kadi bed ‘jo me rok ducu’ gitye ka dagowa, ento pud watito lok me kwena maber-ri i rok ducu.
3. Wel ngo ma inongo ni cuko cwiny i ripot ma kwako wi lobo ducu-ni?
3 Ngiyo tic pa Lucaden pa Jehovah me mwaka me ticwa mukato ma kinyutu i chart ma tye i pot karatac 3 me o i 6 cuko cwinywa tutwal! Pi mwaki 16 mukato angec, kibedo ka tic ki cawa makato bilion acel kulu i tic me tito kwena ki dong loko dano me doko lupwonnye. Man nyutu ni Lucaden pa Jehovah gitye ki niye matek atika! Wel painia omedde ki pacen 5.8, lutit kwena omedde ki pacen 3.1, ki wel lutino kwan me Baibul omedde ki pacen 4.4. Wel jo ma gunongo batija omedde ki pacen 20.1 kulu ka iporo ki me mwaka me ticwa mukato-ni. Yomo cwinywa tutwal me neno ni dano ma romo cok milion abiro kulu gitye ka tic pi Jehovah—man loyo me kare mo keken i tekwaro pa dano! Ka ingiyo jami ma kiryeyogi-ni (chart), ngo ma ineno cuko cwinyi tutwal?
4. Peko ango ma laco mo olwenyo kwede i kare ma en tye ka tute me nongo batija?
4 Kadi bed ni wel magi dongo adada, omyero wiwa opo ni man obino pi jo ma gunyutu niyegi. Nen labol acel. Guillermo odongo i Bolivia. Kinywale i mwaka 1935, en obedo ka tic i poto ma kipito iye jami calo marungi-gu ma onongo en pud tye ki mwaka abongwen keken. Cakke i ka tinone, en obedo ka nyamo pot gin man me wilo wiye ki i kom tic matek ma onongo oromo kome woko. Lacen en ocako mero ki kongo ki mato taa magwa. I kare ma ocako pwonyo ngo ma Jehovah mito ki bote, Guillermo oweko mato taa ki tic ki kongo i yo marac woko. Lweny madit ma en obedo kwede aye me weko nyamo pot gin ca, ma onongo dong odoko kit me kwone pi kare malac-ci. En olego kare ki kare iye ci ojuko tim man. I kare ma oweko tim man, onongo batija. En owaco ni: “Kombeddi dong awinyo ni atye maleng dok cwinywa yom adada”
5. Mitini tye ningo?
5 Jehovah ada tye ki miti i kom dano ducu. Mitine tye ni jo ducu guo i ningut. (2 Pet. 3:9) Meno aye obedo mitiwa bene. Cwinywa myero ocwalwa me timo gin ducu ma watwero pi konyo jo ma gitye ki cwiny me ngeyo ki maro Jehovah.