“Lok ma Wuloko Myero Obed . . . ma Kado Oromo Maber”
1. ‘Loko lok ma kado oromo maber’ tyen lokke ngo?
1 “Lok ma wuloko myero obed lok mamit ma kado oromo maber, wek omi wunge kit ma myero wudok kwede i peny pa ngat acel acel.” (Kol. 4:6) Ka waloko lok ma kado oromo iye maber nongo tyene ni wayero lokwa ayera kun waloko i yo ma winyone mit bot dano. Pire tek mada me timo man ka watye i tic me pwony.
2. Ngo ma omiyo otwere bot Yecu me miyo caden bot dako ma Lacamaria-ni?
2 Lanen pa Yecu: I kare ma Yecu tye ka yweyo i nget wang it mo, en ocako lok ki dako mo me Camaria ma onongo obino ka twomo pii. Tyen mapol i kare me leyo lokgi, dako-ni obedo ka loko lok ma nyutu mone ma onongo tye i kin Lujudaya ki Lucamaria. En bene owaco ni Lucamaria gubedo likwayo pa Yakobo, kadi bed Lujudaya onongo gitamo ni Lucamaria gubedo likwayo pa jo me rok ata-ni. Me ka kwero lok pa dako-ni, Yecu odok i lokke i yo maber. Macalo adwogine, en obedo ki kare me miyo caden ma okonyo dako meno kacel ki jo me boma meno.—Jon 4:7-15, 39.
3. Wan watwero lubu lanen pa Yecu-ni nining ka watye ka pwony?
3 Ka watye ka pwony mitiwa omyero obed me tito “lok me kwena maber” me jami mabeco. (Rom. 10:15) Omyero wanywak ki rwod ot tam mabeco ma a ki i Baibul dok ma weko en dongo, ento pe wami en otam ni watye ka kwero niyene. Ka en oloko gin mo ma pe tye atir, pe omyero warune ka kwerone oyotoyot. Mono tye gin mo i lokke-ni ma watwero ye iye nyo tic kwede me pwoye? Nyo kong waromo lok i kom ginacoya ma wamito kwanone ni, “In onongo mono itamo ni man tye gin ma twere?”
4. Omyero watim ngo ka rwod ot otiyo ki leb marac?
4 Ka ce rwod ot-ti otiyo ki leb marac nyo mito mere laro lok keken kono? Omyero wamedde ki nyutu kica ki mwolo i kitwa ki lokwa. (2 Tem. 2:24, 25) Ka ngat meno pe onyutu miti i kwena me Ker-ri, ci waromo juko lokwa i wi diro.—Mat. 7:6; 10:11-14.
5. Lamego mo acel onongo adwogi maber pi gamo lok i yo me mwolo nining?
5 Adwogi Maber: I kare ma lamego mo otemme me miyo caden bot jiranine mo, dako ca otokke i kome ki gero kun tiyo ki leb maraco. Ki mwolo laminwa-ni owacce ni: “Timma kica pe onongo angeyo ni obiwango cwinyi, dong maber.” I nge cabit aryo, dako-ni odwongo doggola pa lamego-ni, okwayo kica pi gin mutimme, dok onyutu miti me winyo lok pa lamego-ni. Gamo lok i yo me mwolo pol kare kelo adwogi mabeco!—Car. 15:1; 25:15.
6 Tute me tic ki lok ma kado oromo iye maber ka itye ka tito lok me kwena maber. Kadi bed rwod ot pe ojolo lokki, en oromo jolone i nino mukene ma nongo Lucaden pa Jehovah gulimme.
6. Pingo pire tek botwa me tic ki lok ma kado oromo maber ka watye i tic me pwony?