Bok Me Lapeny

◼ Mono opore me keto adrec ma megwa me e-mail i kom bukke ma waterogi bot dano?

Lutit kwena mukene gimwono adrec ma megi me e-mail i kom magajin nyo trak ma gimiyo bot dano calo citam nyo gigoyo agoya. Man miyo jo ma gigamo bukke magi giromo kubbe ki latit kwena meno pi nongo ngec mukene. Tute me konyo jo ma tye ki miti i yo ma kit meno pe nongo tye pi cwiny marac. Ento, kabedowa ma tye i Intanet dong kityeko ketone woko i nge magajin kacel ki trakwa ducu. Pi meno, bedo ber pe me keto adrec ma megwa me e-mail i kom bukkewa mo keken.

Latit kwena acel acel tye agonya ka ce en mito ni emi karatac mo ma nongo en ocoyo iye lok ma twero konyo me kubbe ki en bot dano i wang ticgi, tutwalle ka ce en odok cen ka lim. Wan aye omyero wayeny yo me dok cen bot jo ma gunyutu miti me ka weko tic me kubbe kwedwa i wigi ka ce gimito ngec mukene. Watwero nyutu miti ma watye kwede i kom dano moni maber ka ce waloko kwede wang ki wang.