Bok Me Lapeny

◼ “Lagwok ot ma lagen dok maryek” tika ye gurup pa Lucaden mogo ma gicokke kacel pi kwedo nyo laro lok me Ginacoya pigi kengi?—Mat. 24:45, 47.

Pe ye. Ento, inongo ni i kabedo mapol i lobo-ni, lutit kwena mogo ma gutyeko nongo batija gucako gurupgi wek gikwed lok ma dok i kom Baibul pigi kengi. Jo mukene gucako gurup ma cung pire kene pi kwano leb macon me Ibru ki Grik ma kitiyo kwedgi me coyo Baibul pi neno ka ce kigonyo New World Translation kakare. Jo mukene gitye ka kwedo ngec mogo me cayan ma kubbe ki Baibul. Gin guyabo kabedogi i intanet ka ma gitiyo kwede pi gwenyo ki leyo tam i kingi. Gin bene dong gubedo ki cokke mapol dok gucoyo bukke mapol me nyutu ngec ma gin gutyeko nongone kun tamgi tye me medo ngecgi ca i kom ngec ma wanongo ki i cokke pa Lukricitayo kacel ki i bukkewa.

Jo pa Jehovah gitye ka nongo pwony kacel ki cuko cwiny i yo me cwiny i but lobo ducu ki i yub me cokke, i gure matino ki madito, ki dok i bukke ma a ki bot dul pa Jehovah. Jehovah tye ka tic ki cwiny mere maleng kacel ki Lokke me ada, me miyo jami ducu ma mitte wek jone ducu ‘gubed ma guribbe i cwiny ki tam acel’ kun nongo ‘gucung matek i niye.’ (1 Kor. 1:10; Kol. 2:6, 7) Adada, watye ki pwoc madit tutwal pi cam me cwiny ma Jehovah tye ka miniwa i kare man me agikki-ni. Pi man, “lagwok ot ma lagen dok maryek” pe ye bukke, yub me cokke, nyo kabedo mo keken ma kiyabo i intanet ma pe obedo mege—Mat. 24:45-47.

Ber kono gire ka jo moni gimito tic ki ryeko ma gitye kwede me konyo kor tic me tito lok me kwena maber-ri. Ento yenyo ngec pigi kengi-ni pe omyero otang wigi woko ki i kom jami ma Yecu Kricito tye ka cobone kun tiyo ki kacokkene i lobo i kare-ni. I cencwari me acel, lakwena Paulo ociko dano i kom yenyo ngec mogo ma olo kom dok balo cawa nono, calo ‘lubu nying mogo ma kiryeyogi i te kwaro, ma pe konyo yub pa Lubanga ma ocung i kom niye.’ (1 Tem. 1:3-7) Lukricitayo ducu omyero gutute matek me ‘kwero lapeny mogo me mingo mingo i lok kom nying kwaro, daa ki laro lok i kom cik, ma pe gikonyo dok tyen lokke pe.’—Tito 3:9.

Pi jo ma gimito kwano jami mapol nyo kwedo lok ma tye i Baibul, wamiyo tam botgi ni guti ki bukke macalo Insight on the Scriptures, “All Scripture Is Inspired of God and Beneficial,” ki bukkewa mukene-ni, calo mogo ma loko i kom cobbe pa lok pa lunebi me Baibul ma nonge i buk pa Daniel, Icaya, ki Niyabo. Bukke magi miyo ngec mapol me akwano ki lwodo lok me Baibul, ma miyo ‘waniang matut i gin ma Lubanga mito, kun wabedo ki ryeko ki niang ducu ma cwiny maleng miyo wek kwowa obed ma myero bot Jehovah, ma yomo cwinye kun watiyo tic mabeco ma miyo wanyako nyig madwong dok wamedde bene ki ngeyo Lubanga.’—Kol. 1:9, 10.