‘En Miyo Teko bot Jo ma Guol’
1 Wan ducu waol kare ki kare. Man pe bino macalo adwogi me tic ma watiyo ki kerowa keken ento bino bene ki i pekki mapol ma warwatte kwede i ‘kare man marac ma kwo tye matek-ki.’ (2 Tem. 3:1) Macalo lutic pa Jehovah, watwero nongo kero ma mitte nining i yo me cwiny wek ticwa me pwony pe okwe woko? Watimo man ki jenge i kom Jehovah ma obedo ngat ma ‘tekone dwong tutwal.’ (Ic. 40:26) En ngeyo ngo ma wan wamito dok tye ki miti me konyowa i ada.—1 Pet. 5:7.
2 Kony pa Jehovah: Jehovah miniwa kero kun tiyo ki cwiny mere maleng, ma obedo teko acel ma en otiyo kwede me cweyo lobo. Cwiny pa Lubanga konyowa me ‘nongo teko odoco’ ka waol. (Ic. 40:31) Penye kong kekeni ni, ‘An mono agiko lego pi cwiny maleng wek omiya teko me cobo ticca macalo Lakricitayo awene?’—Luka 11:11-13.
3 Ka wakwano kun walwodo Lok pa Lubanga nino ducu dok wanongo cam me cwiny ki kwano bukke pa Lukricitayo kare ki kare, ci wabibedo ma komwa yot calo “yat ma odongo i nget kulu, ma nyako nyige i karene kikome, ma pote bene pe two woko.”—Jab. 1:2, 3.
4 Jehovah bene tiyo ki luwotwa muye ma giromo ‘jingo cwinywa.’ (Kol. 4:10, 11) Gijingo cwinywa i kare me cokke ki lok ma gileyo kwedwa, miyo lagam, kacel ki miyo pwony i yo ma dongowa. (Tic 15:32) Tutwalle Lukricitayo ma gubedo luelda aye gimiyo kony me cwiny kacel ki cuko cwiny.—Ic. 32:1, 2.
5 Tic me Pwony: Ka inongo ni icako winyo olo, pe ijuk tito kwena woko! Wot i tic me pwony kare ducu dok medo kerowa ameda, ento pe bedo calo tic mukene ma olowa aola-ni. (Mat. 11:28-30) Nywako kwena maber-ri ki jo mukene konyowa me keto cwinywa i kom Ker pa Lubanga dok weko wabedo ki gen mamwonya me kwo ma pe tum.
6 Tic tye mapol me atiya ma peya kijwero lobo man ma marac-ci. Watye ki tyen lok madit me cung matek i ticwa, kun ‘wajenge i teko ma Lubanga miyo.’ (1 Pet. 4:11) Ki kony pa Jehovah, wabityeko ticwa man pien en ‘miyo teko bot jo ma guol.’—Ic. 40:29.