In Tika Itye ki Wang Tic ma Megi?
1. Wang tic ma megi obedo gin ango?
1 Wang tic ma megi obedo en ma nongo kimiyo boti me tic iye. Romo bedo mo ma nongo tye ka maber piri ma nongo itwero o iye oyot dok itwero tic iye keni nyo wun ki latit kwena mukene. Kadi bed ni pire tek mada me bedo tye i yub pa kacokke me tic kacel, bedo ki wang tic ma megi ma itwero tic iye i kare mukene-ne romo konyo me miyo caden ma weko ka mo pe dong, tutwalle i kacokke ma nongo gitye ki wang tic mapol adada.—Tic 10:42.
2. Adwogi mabeco ango ma bino pi bedo ki wang tic ma megwa?
2 Adwogi Maber: Jo mukene gunongo adwogi maber pi tito lok me kwena maber i wang tic ma megi ma nongo tye cok ki gang ticgi, i kare me yweyo me dye ceng nyo cut cut i nge tum pa cawa me tic. Jo mukene gunongo adwogi maber me tic kacel macalo jo me ot pi cawa ma romo acel mo i kabedo ma tye i nget gangi-gi, ma nongo peya gucito i Cokke me Kwano Buk. Macalo adwogine, jo ma gunongo ma mitte ni omyero gudok cen botgi nyo lutino kwan me Baibul obedo jo ma gitye cok ki nget gangi-gi, ma man miyo pe gibalo teko, cawa, ki dok centegi. Pien nongo jami mapol twero cobbe i wang cawa mo manok keken, bedo ki wang tic ma obedo pa ngati moni twero konye me tic calo painia pi tutuno kare ki kare nyo bene me tic calo painia marii. Medo i kom meno, tic i wang tic ma megwa kacel ki ngeyo wegi odi ma gitye iye twero konyowa me bedo ki gengi kun miyo wamiyo pwonywa ma nongo lubbe ki mitigi, man weko ticwa me pwony nyako nyige.
3. Ngo ma otimme bot painia acel mo ma obedo ki wang tic ma megene?
3 Painia mo acel ma laneno me adwol ocuko cwinye me bedo ki wang tic ma mege owacci: “An aye tam man, ci cut cut acako ngeyo ki dok mako lurem ki wegi odi ma gitye i wang tic ma mega. Ayubo cawana me cito ka limogi ma rwatte ki cawagi. Macalo adwogine, dok cen ka limma odongo a ki 35 wa i 80 i dwe acel, dok atye ki lutino kwan me Baibul abiro kulu.”
4. I yo ango ma watwero nongo kwede wang tic ma mewa?
4 Kit me Timone: Ka imito ni inong wang tic ma megine ci lok ki ngat ma loyo lok me wang tic. Itwero lwongo latit kwena mo mukene wek wuti wukwede dok igwok rekod pa jo ma pe inongogi paco. Temme me tyeko wang ticci i kine ka dwe angwen. Ka inongo ni timo meno odoko tek, itwero penyo ngat ma neno wi Cokke me Kwano Buk nyo jo mukene me konyi. I agikki me dwe me angwenne, itwero dwoko wang tic meno woko ka otum, ka pe ci itwero penyone wek iti iye odoco. Ento, pe omyero igwok kad me wang tic acelli matwal pien jo mukene nongo bene gimito tic kwede. Ka itye i kacokke ma pe gitye ki wang tic madwong ma romo apoka bot dano, ci iromo penyo pi but wang tic mo ki bot ngat ma neno wi cokke me kwano buk.
5. Ngo ma mitte wek wacob ticwa me tito lok me kwena maber-ri?
5 Tic ma kiminiwa me tito pi kwena maber ‘i wi lobo ducu-ni’ obedo tic ma pire tek mada. (Mat. 24:14) Man mito ribo kero kacel. Medo pwony ma wamiyo i wang tic ma megwa i kom miyo kwena ma wawoto iye kacel ki lwak twero konyowa me tero lok me kwena maber bot dano mapol.