Loko Lok ki Tekcwiny kun Wabedo ki Kuc
1 Pol pa dano ma wapwonyogi ki lok me kwena maber-ri nongo pe gitye ki niye ma rwatte ki lok ada me Baibul. Kadi bed ni omyero watit kwena ki tek cwiny, ento wamito ni omyero ‘wabed ki kuc ki dano ducu’ bene wek pe wawang cwinygi. (Rom. 12:18; Tic 4:29) Waromo lok ki tekcwiny kun wabedo ki kuc nining ka watye ka tito kwena me Ker-ri?
2 Yeny Lok ma Wun Ducu Wuye Iye: Dano ma tye ki kuc pe ye laro lok. Pyem i kom pwony ma rwed ot ye iye matek tutwal, twero weko en kwero jolo kwena ma wan wakelo bote woko. Ka ce en oloko gin ma pe tye atir, waromo kelo gin mukene ma nongo wan ducu waye iye. Ka wabedo ka lok i kom gin ma wan ducu waye iye, ci waromo rwenyo tam marac mo keken ma ngat moni twero bedo kwede, dok miyo lokwa gudo cwinye.
3 Mono ka pe waloko i kom tam pa rwed ot ma pe tye kakare-ni, ci nongo watye ka cwako lok ma pe tye ada? Pe. Ticwa macalo Lukricitayo obedo tito pi kwena maber me Ker pa Lubanga, ento pe me bedo ka kelo pyem i kom pwony me goba ducu ma warwatte kwede. (Mat. 24:14) Me ka bedo ka tugo lok pi tam ma pe tye kakare ma kikelo, waromo terone calo kare maber me niang tam pa dano moni-ni.—Car. 16:23.
4 Nyut Woro: I kare mukene mitte ni omyero wabed ki tekcwiny ka watye ka nyuto ni pwony moni obedo goba. Macalo jo ma tye ki kuc, wan pe wangalo nyo watiyo ki leb me cac me lok i kom jo ma giye dok gipwonyo pwony goba. Loko lok ki awaka kwanyo cwiny dano woko ki i komwa, ento loko lok ki mwolo ki kica yabo tam pa jo ma maro lok me ada. Nyuto woro bot jo ma giwinyowa kacel ki nyuto woro pi niyegi miyo giwinyo maber, man weko bedo yot botgi me ye kwenawa.
5 Lakwena Paulo onongo kong tamo i kom niye pa jo ma en pwonyogi ka dong tiyo kwede me tito kwena maber-ri i yo ma miyo gudo cwinygi. (Tic 17:22-31) En oye me lubo “kit ducu ma dano gitye kwede,” wek ‘elar jo mogo i yo ducu.’ (1 Kor. 9:22) Wan bene waromo timone kit meno ka wabedo ki kuc i kare me tito kwena maber-ri ki tekcwiny.
[Box on page 3]
Yub Manyen me Konyowa Wek Wagwokke ki Tic ki Remo
Lukiko Madit dong oye ribo lok ma pigi tego ma tye i karatac me durable power of attorney (DPA) ki kad me Advance Medical Directive/Release wek odok waraga acel ma twero tic wa i nyim kot, ma dong wabilwongone ni kad me DPA.
Omyero ipong kad me DPA me lobo ma ibedo iye. Kad me DPA-ni bitic ka mo keken ki i loboni dok bibedo macalo lok ma tito mitini ka iwoto ka mo keken i wi lobo kulu. I kare mo i anyim, omyero ipong kad me DPA manyen ka (1) nongo imito loko gin mo ki i kad ma megi me DPA, calo tammi, jo ma konyi i lok me yot kom, kabedo, ki namba cim, nyo (2) ka kad ma megi me DPA orweny nyo oballe woko.
Omyero itam i kom kad me DPA man mot kun ilego iye ka ipong ki diro ki gang. Ento ma nongo peya kiketo iye cing, pire tek ni omyero kilub yo me pongone ma lubbe ki kit ma cik mito kwede. Me labolle, ka kinyuto ni caden aryo omyero gunen kit ma iketo kwede cingi, ci omyero jo aryo meno gubed tye ka ibiketo cingi. Lunen wi cokke me kwano buk omyero gubed ka rotone kare ki kare ka gwok nyo tye jo mogo ma nongo peya gupongo kad manyen-ni wek guniang ka gimito kony.
Ma peya ibano kadi me DPA, nen ni itimo potokopi mogo pi jo ma konyi i lok me yot kom, ki doktorni kacel ki ma megi me agwoka. Iromo miyo mogo bene bot jo me pacowu ki bot karan me kacokke bene. Omyero kitim obed tungcel keken i karatac ma cac-ce tye A-4 kun kiweko kad me DPA bedo i dyere. Kom kad me DPA kikome-ni, pe ma obedo potokopi-ni omyero ibed kwede i komi.
Alokaloka mo pe i Identity Card ma kiyubo i 3/99 pi lutino ma peya gunongo batija ma lunyodogi tye Lucaden. Lunyodo myero gunen ni kipongo kad pa latin acel acel maber dok kiketo iye cing dok latin moni myero obed ki mege i kome i kare mupore.
Lutit kwena ma peya gunongo batija giromo tic ki lok ma tye i kad me DPA ki Identity Card ka gimito coyo ma megi kacel ki pa lutinogi. Karan myero omi kad me DPA bot lutit kwena ma pud gunongo batija nyen i mwaka moni-ni.
GWOK MABER