Gin Gunyuto Lanen Maber me Niye
1 I mwaka 1937, tic pi kare malac ma kite dok pat ocakke—tic macalo painia keken. Co ki mon ma gitye ki ngec i tic me pwony pa Lukricitayo, guye me cito ka tic ka mo keken ma dul ma neno wi ticwa oorogi iye labongo dic mo. Cakke wa i mwaki-ca nio wa i kare-ni, painia keken pud gitye ka medde ki nyuto lanen maber me niye ma pore me aluba.—Ibru 6:12.
2 Gin Aye Gutelo Yo: I acakki, painia keken aye onongo gitelo yo i tic me pwony kun onongo gitiyo ki rekod pleya macon-ni i nyim doggola pa dano me keto dwan ma nongo dong kimako woko con. Gin bene onongo gitiyo ki dwan mogo ma nongo dong kimako woko macalo gin me nyamo pwony me Baibul i kare me dwogo cen ka lim. Man onongo kitimo i boma mogo madongo ma nongo dong kacokke ocakke woko i igi. Lacen dong, kicako cwalo painia keken i kabedo mogo ma nongo lutit kwena me Ker mitte iye matek. Gin gubedo kadok cen ka limo jo ducu ma nongo gunyuto miti kun gikwano Baibul kwedgi. Kacokke miya ki miya ocakke macalo adwogi me yellegi matek. Yellegi me tito lok me kwena maber-ri omiyo dulwa-ni odongo odoko dit kit ma waneno kwede i komkare-ni. (Ic. 60:22) Painia keken pud gitye ka medde ki timo tic ma pire tek me tito kwena maber-ri ‘bot jo ducu ma gitye i te polo.’—Kol. 1:23.
3 Lanengi Myero me Aluba: Painia keken mukene dong gutyeko rii i kodi tic macalo meno pi mwaki mapol dong. Niye pa co ki mon ma lugen magi obedo ka medde ki doko tek pi jami mapol ma obedo ka timme i kwogi i mwaka mapol ma obedo ka kato-ni. (1 Pet. 1:6, 7) Gin gujalo jami me kom woko wek gibed ki kare me tic i kabedo mogo ma nongo lutic mitte iye. I kingi tye jo mukene ma dong guti woko dok komgi dong pe yot, nyo gitye ki pekki mukene mapat pat. (2 Kor. 4:16, 17) Ento ‘kadi bed guti pud gimedde ki nyak.’ (Jab. 92:14) Gin giketo gengi i kom Jehovah dok ginongo mot ki bote.—Jab. 34:8; Car. 10:22.
4 Painia keken gimyero me nongo pwocwa. Ka jo ma gitiyo calo painia keken gitye i kacokkewu, ci kwany kare me bedo kwedgi wek gunywak kwedi jami ma nongo otimme i kwogi. Nyut pwocci pi tic ma gitimo calo lutit kwena me Ker ma lugen. Nong cuko cwiny ki i lanengi maber me diyo cwiny. Jo ducu ma gilubo lanengi me niye-ni gibinongo cwak ki mot pa Jehovah pien en “cwinye bedo yom i kom jo ma gitiyo ki gen.”—Car. 12:22.