Lub Kit pa Jehovah, ‘Lubangawa ma Layomcwiny’

¹ Jehovah ada mito ni dano gubed ki yomcwiny. Lokke miyo wabedo ma wangwa tye anyim me kuro mot ma mwonya ma en tye ka yubone pi dano. (Ic. 65:21-25) Yomcwiny ma watye kwede myero onen ka maleng bot jo mukene ka watye kanywako kwedgi “lok me kwena maber me deyo i kom Lubangawa ma layomcwiny.” (1 Tem. 1:11, NW) Kit yo ma watito kwede pi kwena me Ker-ri omyero onyut marwa i kom lok me ada meno kacel ki miti ma nongo watye kwede i kom jo ma waloko botgi.—Rom. 1:14-16.

² Ki lok ada, nyuto yomcwiny cawa mukene twero bedo tek. I wang tic mukene, jo manok keken aye gijolo kwena me Ker-ri maber. I kare mukene, romo bedo ni nongo watye ka yelle ki pekki mogo madongo i kwowa. Me bedo ki yomcwiny, omyero wabedu ka lwodo lok i kom kit ma pire tek kwede bot dano ma i wang ticwa me winyo kacel ki niang lok me kwena maber me Ker ma watito pire-ni. (Rom. 10:13, 14, 17) Lwodo lok i kom tam man bikonyowa me medde anyim ki yomcwiny me tito pi yub me kica pa Jehovah me kelo larre.

³ Lok Polle pi Jami Mabeco: Omyero waketu cwinywa i gin ma waloko bene. Kadi bed ni waromo cako lokwa ki tito pi peko nyo lok angeya mo ma pud otimme nyen, omyero pe dong wabed ka lok pi jami me cwercwiny keken. Ticwa obedo tic me kelo “lok maber me gin maber.” (Ic. 52:7; Rom. 10:15) Lok me kwena maber-ri jenge i kom cikke pa Lubanga pi kwo maber i anyim. (2 Pet. 3:13) Pi meno, watiyu ki Ginacoya me “kweyo cwiny jo ma cwinygi cwer.” (Ic. 61:1, 2, NW) Man bikonyo wan ducu ki acel acel me bedo ki yomcwiny.

⁴ Labongo akalakala, dano gibineno yom cwinywa ka watye i tic me nywako kwena maber-ri. Pi meno, walubu kit pa Jehovah, ‘Lubangawa ma layomcwiny,’ kun wanywako kwena maber me Ker-ri ki dano ma i wang ticwa.