Bok Me Lapeny
◼ Ka watye ka kwano Baibul ki dano i nyim doggola omyero kong wacak ki lega?
Kit ma kwo pa dano pat pat-ti omyero ngat ma doro kwan oti ki ryeko me neno ka ce twere me cako kwano Baibul i nyim doggola ki lega. Gin ma omyero oniang iye maber aye kit latin kwan meno. Our Kingdom Ministry me Marci 2005 pot karatac 4 waco ni: “Ka kwan man dong omoko maber omyero kicak dok kigik ki lega. Waromo timo man i nino me acel me cako kwanwa ki jo ma nongo gubedo ludini. Ento bot jo mukene-ni omyero kong wanen awene ma romo bedo ber me cako lega kwedgi.”
Gin mukene ma omyero wiwa opo iye aye kabedo ma nongo wakwano ki iye. Ka olo tye ka ma dano pe pol iye ci wuromo cakone ki gikone ki lega i wi diro. Ento ka ce timo man romo ywayo tam pa dano i komwu nyo weko latin kwan pe winyo maber ci omyero ikur kong wang ma wunongo kabedo maber ka dong wutwero cako lega.
◼ Lamego mono omyero obo wiye ka ce guwoto gin ki latit kwena ma laco ka kwano Baibul ki dano i nyim doggola?
Tye kumeno. Ka lamego mo kwano Baibul ki dano mo kare ki kare teke latit kwena ma obedo laco tye en myero obo wiye woko. (1 Kor. 11:3-10) Man bene mitte kadi wa i kwano Baibul ki dano ki i paco i nyim doggola nyo i kabedo mo mukene. Watchtower me Julai 15 mwaka 2002 pot karatac 27 tito ni: “Man nongo obedo pwony ma kiyubo con dok ngat ma doro kwan meno nongo en aye obidoro. Kwan ma kit meno nongo rom nyo okube ki tic me kacokke. Ka Lacaden ma dako ma dong onongo batija aye tye ka doro kwan man kun Lacaden ma laco ma onongo batija tye ci en omyero obo wiye.” Man rom aroma bene ka gucito kacel ki latit kwena me Ker ma laco ma peya onongo batija.
Ki tungcel kono ka kwano Baibul ki i nyim doggola-ni peya omoko ci pe mitte ni en omyero obo wiye kadi bed ni gitye kacel ki latit kwena me Ker ma laco kadi bed ni tyen lok me dok cen ka lim-mi onongo obedo me nyuto kit me kwano Baibul nyo me nyamo lok i kom buk mo ma kiye ni omyero kiti kwede me kwan ki dano. Kit ma kwan ki i nyim doggola cakke mot mot kun nongo omyero kidok ka lim tyen mapol-li mitte ni lutit kwena omyero gunen dok gumok maber awene ma boyo wic bimitte iye.