Kit me Medde ki Bedo ki Mit Kom

¹ Mit kom ma Apolo obedo kwede i tic me tito pi kwena maber-ri poyo wiwa i kom Lukricitayo luwotwa me kare-ni ma gitito lok me kwena maber-ri ki mit kom. (Tic 18:24-28) Tye kono ni wan ducu kicikowa ni: “Komwu obed mit labongo wackom wubed lyet wa i cwinywu.” (Rom. 12:11) Ngo ma twero konyowa me bedo ki mit kom i ticwa me pwony macalo Lukricitayo?

² Ngec Medo Mit Komwa: I kare ma Yecu onen bot lulub kore aryo ci “ogonyo botgi lok ducu ma i Ginacoya ma mako kome,” gin guloko lacen ni: “Cwinywa nakanen pe obedo ka pukke i kare ma en tye ka lok kwedwa i wangayo?” (Luka 24:27, 32) Wan kono cwinywa pe pukke ka wamedo ngecwa i Lok pa Lubanga? Adada ngec dongo niye. Jo Roma 10:17 wacci: “Niye bino pi winyo lok ma gitito.” Ka cwinywa opong ki gen i kom cikke pa Jehováh pe watwero ling mot ma pe waloko pi jami ma wapwonyogi!—Jab. 145:7; Tic 4:20.

³ Pe watwero jenge i kom ngec ma nongo wanongo ki i jami ma wakwano con ni en aye omyero odong marwa pi Lubanga dok omi wabed ki mit kom i ticce. Omyero wabed ka medde ki dongo ngecwa ki marwa i kom Jehováh kare ducu. Ka pe kumeno ci mot mot wabitimo ticwa ma nongo cwinywa pe iye. (Yabo. 2:4) Lok pa Lubanga cikowa ni ‘wumedde anyim ki dongo i ngec matir pa Lubanga.’—Kol. 1:9, 10.

⁴ Kwano Kwan Piwa Kenwa: Ber kong me ngiyo kit ma wakwano kwede kwan piwa kenwa. Me lapore oromo bedo ni nongo watwero ngolo te lagam ma tye i Watchtower weng maber dok wamiyo lagam ma tye kakare. Ento tika wayabo ka wakwano ginacoya ma nongo kicimo ento pe kicoyo kun walwodo lok ma tye iye me neno kit ma watwero ketone i tic i kwowa? Ma lubbe ki yub me kwano Baibul cabit ki cabit tika wayelle me kwedo tyen gin ma wakwano ka watye ki kare dok walwodo pwony ma nongo tye i iye? (Jab. 77:11, 12; Car. 2:1-5) Bedo ber mada me keto cwinywa i lwodo Lok pa Lubanga! (1 Tem. 4:15, 16) Kwan ma kit man dongo mitiwa dok miyowa teko me bedo ma nongo “watye ki miti madwong me tiyo tic mabeco.”—Tito 2:14.