Yeny Yo me Tito Kwena
1 Kacokke pa Lukricitayo ocoko dano ma gitye i kit me kwo mapat pat. Ento wan ducu watye wanotte i tam acel me pako Jehovah. (Jab. 79:13) Ka two nyo peko mo mukene gengowa tito lok me kwena maber-ri, ci watwero yenyo yo me tito pi kwena nining?
2 I Tic me Nino Ducu: Yecu otiyo ki karene me kwo ki dano nino ducu me miyo caden botgi. En oloko ki Matayo i kare ma en tye ka kato ki i nyim opic me jogo mucoro, oloko ki Jakayo i kare ma tye ka wot i yo, dok oloko ki dako me Camaria i kare ma en tye ka yweyo. (Mat. 9:9; Luka 19:1-5; Jon 4:6-10) I ticwa me nino ducu, wan bene watwero weko boko lokwa ki dano doko lok me miyo caden. Bedo ki Baibul kacel ki trak nyo brocuwa mogo biweko wabedo atera me tito pi gen ma watye kwede.—1 Pet. 3:15.
3 Mono goro me wot oweko pe itwero cito i tic me pwony i doggola-ki-doggola? Ka kumeno ci bed atera me miyo caden bot ludaktari nyo bot jo mo keken ma gitye. (Tic 28:30, 31) Ka nyo gin mo omiyo ibedo gang pol kare, ci mono dong itemo miyo caden kun itiyo ki cim nyo waraga? Lamego mo onongo coyo waraga bot luganggi ma pe gubedo Lucaden kare ki kare. En onongo loko i kom jami mogo ma tye i Baibul ma cuko cwiny ki dok gin mogo ma nongo otimme i kare ma en tye ka miyo caden.
4 I Kabedo me Tic nyo i Cukul: Miti ma watye kwede me pako Jehovah biweko wayenyo yo me coyo kodi me lok ada i kabedo me ticwa nyo i cukul. Latit kwena mo ma tye ki mwaka aboro oloko pi gin ma onongo en okwano ki i Awake! i kom dwe bot jo ma i kilacine. I kare ma lapwonye oniang ka ma en onongo iye ngec man, ci ocako gamo Watchtower ki Awake! kare ki kare. Ka waketo buk me Baibul Pwonyo ka ma jo mukene gitwero nenone i kabedo me ticwa ci weko giromo penyo lapeny ma twero yabbiwa yo me cako miyo caden.
5 Itwero tamo kong pi yo mo i kwoni me nino ducu ma weko iromo tito pi kwena? Ka watiyo ki kit me kwo moni ma watye iye-ni maber, ci wabitemme me ‘miyo pakwa bot Lubanga’ nino ki nino.—Ibru. 13:15.