Jo Matino ma Gitye Karyeny Calo Lakalatwe
1. Baibul nyuto nining ni kit Lukricitayo dok binen mapat, dok man gudo bulu me kare-ni ma gubedo Lukricitayo nining?
1 Yecu owaco ki lupwonnyene ni: “Wun wuceng me lobo.” (Mat. 5:14, 16) Gin omyero guryeny calo boma ma kigero i wi got ma ryeny calo ceng. I kare-ni, Lukricitayo matino mapol bene ‘gitye ka ryeny i lobo calo lakalatwe’ pi kwogi maber kacel ki miyo cadengi ki mit kom.—Pil. 2:15; Mal. 3:18.
2. Yo mene ma iromo miyo kwede caden bot lupwonye ki lutino kwan luwoti?
2 Ki i Cukul: I yo ango ma itwero miyo kwede caden ki i cukul? Bulu mukene gitiyo ki kare me nyamo lok ma bino i kom tic ki yadi maraco calo jayi-gi, pwony ni kwo ocakke pire kene, nek lumuku mogo-gu, ki mukene mapol mapat pat me miyo caden i kilacigi. Lamego mo otiyo ki kare ma onongo kimiye me coyo lok i kom tim aranyi me miyo caden i kom Ker pa Lubanga calo gen acel keken ma dano tye kwede. Lapwonye cwinye obedo yom pien omiyo ripot me ada, ma meno dok oyabo yo me medde ki miyo caden mukene.
3. In itwero ryeny calo lakalatwe i kiti ki i cukul nining?
3 Yo mukene ma bene iromo ryeny kwede calo lakalatwe obedo kiti kacel ki ruk wa ki yubo komi wek onen maber. (1 Kor. 4:9; 1 Tem. 2:9) Ka lutino kwan nyo lupwonye guneno ni kiti dok pat, ci mukene giromo cako maro lok me ada pi ber kiti ma man romo mini kare me nywako lok me Baibul kwedgi. (1 Pet. 2:12; 3:1, 2) Lubo kit ma Lubanga mito pe obedo gin ma yot, ento Jehovah bimiyi mot madit tutwal. (1 Pet. 3:16, 17; 4:14) Ka imito tugo miti pa dano i lok me kwena maber, iromo bedo ka kwano bukke me Baibul i cawa me yweyo nyo iromo ketone ka mo ma dano giromo nenone.
4. Adwogi ango maber ma bino pi miyo caden i cukul?
4 Bedo ka ryeny calo lakalatwe i cukul jingo niyeni dok miyo i bedo ki awaka i tic pi Jehovah. (Jer. 9:24) Dok bene man bedo macalo kagwokkeni. Lamego mo acel owacci: “Adwogi maber ma anongo pi loko lok i kom niyena i cukul en aye ni lutino kwan pe gitemme me diya me timo gin ma Baibul kwero.”
5. (a) Bulu mukene gitye ka medo ticgi me pwony nining? (b) In itye ki yub me cwiny ango?
5 Med Ticci: Yo mukene ma bulu mapol gitye ka ryeny kwede aye me medo ticgi me pwony. Omego mo oa ocito me bedo ka ma lutit kwena me Ker-ri nok iye i nge tyeko kwanne. En obedo i kacokke mo matidi ma onongo tye ki laelda acel keken. Ocoyo waraga bot lareme mo kun wacce ni: “An atye ka nongo yomcwiny madwong tutwal i kwona kany, tic me pwony pud dong tye ka gonyo koma ya! Waloko pi dakika 20 kulu i doggola acel acel pien dano nongo gimito winyo gin ma iwaco botgi.” En omedde ni: “Ka onongo i tamma, onongo omyero jo matino ducu gubed kit ma an akwo kwede-ni wek guwiny kit ma an awinyo kwede. Pe tye gin mo maber ma kato tic pi Jehovah ki kwowa ducu.”
6. Gin ango ma in imaro ki i kom bulu ma gitye i kacokkewu?
6 Pud dong watye ki awaka madit tutwal pi wun bulu ma wutye ka ryeny calo lakalatwe i lobo-ni ya! (1 Tec. 2:20) Ka itiyo pi Jehovah ki cwinyi, kwoni, tammi, ki tekki ducu, ci ibinongo “lwak jami makato miya i kare man, ka dok i kare me anyim ibinongo kwo ma pe tum.”—Mar. 10:29, 30; 12:30.