Cukul ma Konyowa me Keto Pwony ma Wanongo i Tic
1 Ka watye ka nongo pwony ki i jami ma kiketogi i Yub me Cukul me Tiokraci pi mwaka 2006, omyero waket tek me nongo ber pa pwony ma a ki i Ginacoya ki keto pwony man i tic ma lubbe ki ticwa maleng kacel ki i kwowa me nino ducu. Omyero wanenu ni walubo pwony ma wanongo.—Jon 13:17; Pil. 4:9.
2 Miyo Lokwa: Yub me mwaka-ni medo dok dakika acel mukene bot lwak me miyo lokgi i kom lok ma tye i ka ma kikwano ki i Baibul. Man te lokke ni omego ma bimiyo pwony man omyero onen ni etyeko pwonye i dakika abic ento pe abicel. Jo ma gibimiyo lokgi ki i kin lwak bene omyero gugwok cawa. Ngat ma mito miyo lok ka kong otamo gin ma en obiloko-ni con ci twero miyo tam ma konyo macek pi cekon 30 keken. Dano ma romo apar kulu twero miyo lokgi i dakika abic ma kimiyo ki lwak-ki.
3 Pwony ma Konyo: Pwony me ka ma kikwano ki i Baibul ki pwony me 1 omyero ocung i kom jami mabeco ma watwero tic kwede i ticwa me pwony ki dok i kwowa me nino ducu. Lami pwony man pe omyero otug cwiny dano me timo gin ma kipwonyo-ni keken. En omyero onyut gin ango ma myero kitim, ki kit ma kitwero timone kwede, dok omyero okony dano me neno ber ma a ki i timone. En romo wacci, “Man aye kit ma ginacoya man tirowa kwede,” nyo ni, “Man aye kit ma watwero tic kwede ki wang tyeng magi i ticwa me pwony.” Luelda ki lukony kor tic ma gingeyo kwo ma nongo tye omyero gumi pwonygi ma rwatte ki kit kwo ma nongo tye-ni kikome ka ce twere.
4 Tic ki lanen ma tye i Baibul twero miyo kony madit i kit me keto pwony moni-ni i tic. I nge miyo lanen moni ma tye i Ginacoya-ni, lami pwony-nyi twero wacci, “In bene iromo nongo ni itye kiti en-ni.” En omyero onen ni kit me tic ki lanen mo keken ma en ekwanyo ki i Baibul omyero orwatte ki pwony moni-ni, ki pwony ducu me Baibul, dok orwatte ki gin ma “lagwok ot ma lagen dok maryek” ocoyo.—Mat. 24:45.
5 Ryeko obedo kero me tic ki ngec kacel ki niango i yo maber. ‘Ryeko obedo gin maber makato ducu.’ (Car. 4:7) Wamedde wunu anyim ki dongo i kit me poko ngec ma konyo ma wanongo ki i Cukul me Tiokraci bot jo mukene.