Yub Manyen me Gure me Cakuit

I kare man me agikki me lobo marac-ci, pire tek piwa me gwoko bongowa me cwiny kacel ki jami ma nyuto-ni wan wabedo Lukricitayo. (Yabo. 16:15) Man dong rwatte mada ki wi lok madit me yub me gure me cakuit pi mwaka 2006 ma wi lokke tye ni ‘Wuruk i Komwu [Kit] Manyen-ni.’—Kol. 3:10.

Nino me Acel: Pwony ma kipoko iye mukwongo, ma wi lokke tye ni “Nyuto Kit Manyen-ni i Kabedo Mapat Pat me Kwowa,” binyuto adwogi mabeco ma wanongo i kwowa pi bedo ki kit manyen-ni. Wan mono wacako bedo ki kit manyen-ni nining? Lok man kibinenone i pwony aryo me agikki me nino me acel, ma wi lokgi tye ni “Pwonye me Bedo ka Lwodo Lok” ki “Pwony Ma Miyo Wadongo Kit Manyen-ni.”

Nino me Aryo: Pwony ma kipoko iye me aryo-ne bilok i kom kit ma kit manyen-ni kubbe kwede ki kit ma watiyo kwede ki lebwa, “Pwonye me Tic ki Lebwa Calo Jo ma Ryek.” “In Mono Itye ka Loyo Larac-ci?” Man aye wi pwony ma kiyubo pi lwak, ma binyuto kit ma omyero wabed kwede ma wangwa twolo i kom diro pa Catan. Wi lok me pwony aryo ma bigiko te gure tye ni, “Bed Labongo Cilo me Lobo-ni” ki “Bedo ka Roco Kwo me Cwinywa Nino ki Nino,” pwony magi bikonyowa me kwero cwiny ki kit ma pe rwatte ki yo ma atir pa Lubanga dok miyo wacung matek i worowa bot Jehovah.

Pud dong watye ka kuro pwony magi ma bicuko cwinywa me ruko ki dok gwoko kit man manyen-ni ya!