Nino pa Jehovah Dong Tye Cok
1 Lukricitayo giketo cwinygi i kuro nino pa Jehovah. Nino ma en bijwero iye yub me jami maraco me kare-ni ducu ka dok bikelo lobo manyen me kit ma atir. (2 Pet. 3:12, 13) Kit ma pe wangeyo awene ma nino meno bibino iye-ni, omyero wabed ma wangwa twolo dok wakony jo mukene bene me bedo kumeno. (Ejek. 33:7-9; Mat. 24:42-44) Lwodo Lok pa Lunebi ma tye i Baibul bijingo cwinywa me bedo ki gen ni “nino madit pa Rwot tye cok.”—Jep. 1:14.
2 Lokke pa Loc Matego me Lobo: Kit ma kicoyo kwede i Niyabo 17:9-11, lakwena Jon oloko pi “luker abiro” ma gicung pi loc abiro matego ma onongo gibibedo ka leyo wadgi i lobo-ni. Jon bene oloko pi ‘kabaka me aborone’ ma i kare-ni cung pi United Nations. Omyero dok watam ni loc matego mukene obibino i lobo-ni? Pe, lok pa lanebi-ni tito ni kabaka man me aboro-ni “bicito woko ci rwenyo matwal,” i nge meno pe dong kiloko i kom kabaka mo mukene me lobo-ni. Tika lok pa lanebi man konyi me ngeyo kare ma dong watye ka kwo iye?
3 Daniel 2:31-45 konyowa me niang kit ma nino pa Jehovah bibino kwede. I lok pa lanebi meno, Nebukadnejar oneno cal madit atika ma onongo nyuto kit ma loc matego me lobo-ni bibedo ka lokke kwede. Loc matego magi dong gubino woko ducu ki acel acel. Loc matek mene mono ma wan dong watye ka kwo i karene? Watye i kare me loc ma kiporo ki tyen cal ca. Lok pa lanebi-ni otito jami ma onongo bitimme i nge meno kore ki kore. Ni kibijwero te loc pa dano woko kwicikwici ci kileyo kakare ki ‘ker ma pe gitwero balone.’ Dong ineno kit ma lok man nyuto kwede ni nino pa Jehovah dong tye cok mada?
4 Lanyut Mukene: Wan wabedo caden ma tye ka neno jami mukene ma nyuto ni nino pa Jehovah dong tye cok ki wangwa. Watye ka neno cobbe pa lok ma lakwena Paulo owaco con i kom kit ma kwo pa dano bibedo kwede “i kare me agikki.” (2 Tem. 3:1-5) Dok bene watye ka nywako tic me miyo caden ma omyero kimi i lobo ducu ma nongo peya agikki obino. (Mat. 24:14) Pi meno, omyero wanyut i ticwa me pwony ni mitte me oyot me lubo lok ma lamalaika owaco ni: “Wulwor Lubanga, wumi deyo bote, pien karene me ngolo kop dong oromo.”—Yabo. 14:6, 7.