Ti Maber ki Brocuwa me Yo me Cito i Kwo
1 Dano mapol ma gikwo i kabedo me wang ticwa pud gitye ki cwiny me dini. Pe gubedo calo dano me but lobo ka mukene ma cwinygi tye ka a woko ki i lok me dini. Tam me tic me tekwaro me woro abila ki tim tyet-gu pud tye i wi jo mapol. Lwit tic me tekwaro magi oa ki pwony me goba i kom gin makwo ki tipo. Kadi bed ni brocuwa mogo calo Ngo ma Lubanga Mito ki Botwa? Ki Itwero Bedo Larem Lubanga! gukonyo tutwal, ento brocuwa magi pe guloko matut i kom lok man. I gurewa madit me distrik pi mwaka 2002, wanongo brocuwa ma kiyubo maber me konyo tic me pwony i lobo Afrika, brocuwa ma gilowongo ni Yo me Cito i Kwo ma pe Tum—Dong Inongo? Tika ibedo ka tic kwede maber?
2 Kit me Tic Kwede: Jo mukene pud pe gingeyo kit me tic ki brocuwa man me pwonyo dano. Tika watwero tic kwede me cako kwano Baibul ki dano? Watwero tic kwede. I lobo Tanzania, laneno mo me adwol onongo gitye ka pwony i dog ot ki dog ot kacel ki omego mo ci gunongo ladit mo ma ojologi i ode. Con kono, ladit-ti onongo dag Lucaden mada, ento cwinye onongo olokke woko i kare ma kigero Ot me Ker i kabedo-gi. Laneno man otiyo ki kit me cako kwano Baibul ki dano atir kun tiyo ki dul me pwony me 4, ma waco ni “Kwarowa Gitye Kwene?” Gukwano dul man ducu, med ki lok ma otimme i kom jo mukene ma tye i pot karatac 14. I nge meno cut, ladit man opwoyo ni, “Buk man ber adada! Tito lok i kom pekki ma watye kwede kikome. Ki lok ada, dano ducu ma i kabedo man omyero gukwan lok ma i buk-ki. Buk man ber ma lapore pe!” Ladit man ocuko cwiny ominne madit ma obino ka limme me kwano dul me pwony meno kun wacce ni, “Buk-ki bititti jami maraco ducu ma wan watimo i kabedo man dok bikonyi me wekogi woko.” Ka wutyeko kwano brocuwa me Yo me Cito i Kwo ni, ber dok wumedde ki kwano brocuwa me Mito me wek latin kwan me Baibul-li onge lok i kom kit me kwo ma Lubanga mito.
3 Ka onongo wucako kwano brocuwa me Mito ento latin kwan-ni tye ki lapeny i kom kit ma jo muto gitye kwede. Pingo pe kong icwal cabit mo olo wek wukwan pwony me 3, ma loko ni “Angagi ma Gikwo i Kabedo me Cwiny?” nyo pwony me 4, ma waco ni, “Kwarowa Gitye Kwene?” Nyo ka peny-nye tye i kom tim tyet, itwero tic ki pwony me 5 ma tye ni, “Lok Ada i Kom Tango, Tal, ki Tim Tyet.” Ka dong itwero medde ki pwony i brocuwa me Mito. Brocuwa me Yo me Cito i Kwo, bene loko matut mada i kom woro me ada ki me goba, kitwero tic kwede me konyo jo ma wakwano kwedgi Baibul me a woko ki Babilon Madit ma ogwaro dini goba me lobo-ni ducu.—Yabo. 18:2, 4.
4 Yo me Cako lok: Buk me Reasoning twero miyo kony matek atika, ite wi lok calo, “Kit me Cako Lok ka Watye ka Tito Kwena,” “Kwaro” “Gin Makwo,” ki “Cwiny” ma watwero tic kwede me tero brocuwa me Yo me Cito i Kwo bot dano i kit ma kinyuto kwede eni:
◼ I romo penyo won ot ni, “In mono kong nino mo ipenye kekeni ni, to mono dong obedo agikki me jami ducu? Kece tye gin mo mukene mapat inge to?” [Mine kare wek ogam.] “Baibul gamo peny ducu ma watye kwede i kom to.” (Kwan Latitlok 9:5, 10.) Yab brocuwa me Yo me Cito i Kwo i pot karatac 13 ka wunyam wi lok ma tye ni, “Kit ma jo Muto Gitye Kwede.”
◼ Nyo iromo peny ni, “In mono dong itamo lok i kom kwarowa ma dong guto woko-ni? Gin mono gitye kwene? Gin tika gitwero konyo nyo wanowa?” [Mine kare wek ogam.] “Nen kong gin ma Baibul loko i kom jo ma dong guto woko i Jabuli cura 49.” (Kwan Jabuli 49:10, 17-19.) Ka dong wunyam gin ma tye i pwony me 4 i brocuwa man.
5 Konygi me Nongo Yo Meno: Yecu owaco ni jo manok keken aye gibinongo ‘yo ma tero dano i kwo.’ (Mat. 7:13, 14) Cwinywa yom atika, ni dano mo okonyowa me nongone! Dok wan bene wabedo ki yomcwiny ka wakonyo jo mukene wek gudok jo ma gilubo Yecu ma miyo gibedo ki gen me kwo me labed naka. (1 Tec. 2:19) Brocuwa me Yo me Cito i Kwo ni obedo gin ma konyowa tutwal me laro kwo. Watiyu ki brocuwa man maber.