Di Cwinyi i Tito Lok me Kwena Maber
1 Piny dong gunyoni tye marac. Lweny me omego, lweny i kin kakki, can ma poto atura, ki jami mukene maraco dong dwong ata. Man oweko kwena maber dong mitte pi dano me kare-ni ma loyo kit kare mo keken. Ento, inongo ni miti pa dano mapol pe i lok me cwiny aye doki. I kabedo mogo, nongo dano i pacogi tek mada, ka dok me nongo dano ma mito winyo nyo kwano Baibul dong tek ma loyo. Ento omyero wadi cwinywa i tito kwena maber me Ker pa Lubanga ma dong kityeko ketone woko-ni.—Mat. 24:14.
2 Mar pi Dano: Kwena maber ma watito-ni weko dano neno mar pa Jehovah pi dano. ‘Pien en pe mito ni ngat mo orweny woko matwal, ento mito ni jo ducu guo i ningut.’ (2 Pet. 3:9; Ejek. 33:11) Dong en omiyo cik kit macalo Yecu otito ni, ‘myero kong kitit kwena maber bot rok ducu.’ (Mar. 13:10) Lubanga cuko cwiny dano me bino bote wek gubwot ki i can ma bipoto i kom lobo pa Catan-ni. (Joel 2:28, 29, 32; Jep. 2:2, 3) Tika cwinywa yom pi kare ma Jehovah pud oweko botwa-ni?—1 Tem. 1:12, 13.
3 Ripot me tic ma kitimo i mwaka 2004 i wi lobo ducu nyuto ni dano ma romo 6,085,387 gubedo ka kwano Baibul i dwe acel acel, ki dok ni i cabit acel acel, dano ma romo 5,000 gubedo ka nongo batija! Kinongo jo ma gudyere manyen man macalo adwogi me gum ma Jehovah onyo i kom tic matek kacel ki diyo cwiny ma lutit kwena gubedo kwede me lok ki dano ma tye i wang ticgi. Man kelo yomcwiny madit i kacokke, dok obedo twon mot madit botwa me tic kacel ki Lubanga me laro kwo pa dano!—1 Kor. 3:5, 6, 9.
4 Pako Nying Lubanga: Wan wadiyo cwinywa me tito pi kwena maber-ri wek wapak dok wami nying Jehovah obed maleng bot dano ducu. (Ibru 13:15) Catan otyeko obwolo ‘dano ma i wi lobo ducu’ me tamo ni Lubanga goro dok pe romo cobo peko pa dano, dok ni en pe paro pi can ma dano tye ka limone-ni, nyo bene ni Lubanga peke. (Yabo. 12:9) Ka watito lok me kwena maber-ri, nongo wanyuto cwak madit i kom Wonwa maleng ma i polo. Dong wamedde wunu ki pako nyinge kombeddi ki pi naka naka.—Jab. 145:1, 2.