Ngo ma Iromo Wacone bot Laicilam?
1 Tika dong imiyo caden bot Laicilam mo? Ka tye kit meno, ci dong ingeyo ni Luicilam gitye ki niye matek i kom Lubanga. Ento kono, gitye ki ngec manok i kom Paradic ma bibedo i lobo-ni ma lunebi pa Jehovah guloko pire, ci wamito ni wanywak gen man kwedgi. (1 Tem. 2:3, 4) Ngec ma tye piny kany twero konyi me miyo caden maber botgi.
2 Luicilam gitye ki niye i kom Allah, nyo Lubanga, dok giye ni Muhammad aye lanebi pa Lubanga. Bukgi maleng obedo Koran, dok dinigi kilwongo ni Icilam, ma te lokke ni “mine i te loc.” Koran wacci loko lok goba ki woro cal apaya obedo bal, ni Lubanga tye acel, dok ni pe obedo Triniti. Dok bene, pwonyo ni tye gin ma medde ki kwo i nge to pa dano, ni mac me kapiny tye, ki dong ni paradic tye i polo. Luicilam giye ni Baibul onongo Lok pa Lubanga ento lacen kiloko jami mogo ki iye, kun Koran, ma peya kigonyo-ni, aye pud tye buk maleng.
3 Bed Larem, Ti ki Diro, dok ki Niang Matut: Ka itye ka lok ki Laicilam, bed larem dok iti ki diro. (Car. 25:15) Wi opo ni niye pa Luicilam omoko matek adada ento pol pa pwonygi giwero awera ki wigi. Pi meno, nyamo pwony me dini ki niang miti pa Lubanga pe obedo gin ma gitimo me dongo i yo me cwiny. (Rom. 12:2) Me miyo kony bot Luicilam, diyo cwiny ki niang matut mitte.—1 Kor. 9:19-23.
4 Gwokke ki tic ki nyig lok mogo ma twero miyo Laicilam tamo ni itye i dini pa Lukricitayo ata-ni. Tit botgi cutcut ni in pe itye i dini me Katoli nyo Purutanti, dok ni in ipat. Lwong Baibul ni Buk pa Lubanga. Kit ma Luicilam pe gimito winyo lok ni “Wod pa Lubanga,” bedo ber ka pe itiyo ki lok meno nyo inyamo pwony man nio wang ma en dong odongo i yo me cwiny. Ento, itwero lok i kom Yecu, kun nongo ilwonge ni lanebi nyo ngat ma kioro. Gwokke ki laro lok. Ka ineno kiniga ocako make, a woko cutcut ki mwolo.
5 Bedo ber ka iloko ki ngat acel keken ento pe jo ma gucokke i gurup. Pol kare, ber ka mon guloko ki mon, dok co guloko ki co. Ngene kene ni, kare mukene man pe twere, ento myero wati ki diro. Medo i kom meno, pol pa Luicilam gidag neno mon ma nongo rukgi ki kit ma ginen kwede kelo lewic. Lumege myero gunge man.—1 Kor. 10:31-33.
6 Jami ma Itwero Lok Iye: Lok atyer i kom dit pa Lubanga ki marre. Pe ilwor wacce ni in itye ki niye me ada, ni Lubanga tye acel (pe obedo Triniti), dok ni woro cal apaya obedo bal. Lok i kom jami maraco ma tye ka timme i lobo i kare-ni—lweny, kukukuku i kin kaki, adage i kin jo me rok mapatpat, ki goba ma nen woko ka maleng i dini mapol.
7 Brocuwa me The Guidance of God—Our Way to Paradise bimini pwony mukene ma itwero nyamone ki Laicilam. Kiyubo tutwalle pi Luicilam ma gibedo ka ma gitye agonya me kwano Baibul.
8 Ka itye ka cako lok kwedgi, iromo wacci: “Atye ka tute me lok ki Luicilam. Abedo ka kwano lok i kom diniwu dok atamo ni nongo aloko kakare ka awacci Luicilam gitye ki niye i kom Lubanga acel keken ki lunebi ducu. [Mine kare wek ogam.] Amito lok kwedi i kom coc macon pa lanebi mo ma otito kit ma lobo-ni bilokke doko paradic. Atwero kwano boti gin ma lanebi man ocoyo? [Kwan Icaya 11:6-9.] Lok pa lanebi man miyo atamo pi coc mo ma tye i Koran, ma nonge i brocuwa man.” Yab pot karatac 9 i brocuwa me Guidance of God, ci ikwan coc ma kikwoto, ma tito ni jo ma kitgi atir gibileyo lobo. Ka onyuto miti, wumedde ki lokwu kun wunyamo paragraf 7 nio i paragraf 9 ma tye i pot karatac 8. Mi brocuwa bote ci wuyub awene ma ibidok kwede ka lim.—Pi kit me cako lok mukene, nen Our Kingdom Ministry me Febuari 1998, pot karatac 6, paragraf 27.
9 Ka itye ka cuko cwiny dano me nyamo pwony ma i brocuwa me Guidance of God, bedo ber ka ilwongo ni nyamo lok, ento pe kwano Baibul. Ka wutyeko kwano brocuwa man, nongo dong latin kwan tye atera me kwano brocuwa me Kwena Maber nyo buk me Baibul Pwonyo. Jami akwana mukene ma kiyubo tutwalle pi Luicilam aye trak me How to Find the Road to Paradise, buk matidi me The Time for True Submission to God, ki brocuwa me Real Faith—Your Key to a Happy Life.
10 Ki ngec man i kom jami ma Luicilam giye ki jami ma wango cwinygi, watwero tic ki niang matut me yero jami me akwana ma wamiyo bot Luicilam ki kit ma wamiyo kwede caden botgi. Walego ni Jehovah omedde ki goyo laane i tutewa me konyo dano ducu me lwongo nyinge wek gularre.—Tic 2:21.