Lapeny Pa Lukwan Bukkewa

I kare ma Catan owaco bot Kawa ni en pe bito ka ocamo nyig yat me ngeyo gin maber ki gin marac, tika en onongo tye ka kelo i wi Kawa tam man ma onya i kare-ni ni tye gin mo i kom dano ma bwot i nge to?

Catan pe owaco ki Kawa ni ka en ocamo nyig yat ma Lubanga ogengo-ni, kome bito ento tipone bimedde ki kwo ka mo. Kun tiyo ki twol me lok, Catan owaco ni ka Kawa ocamo nyig yat meno, ‘en pe bito’ matwal. Catan onongo tye ka waco ni Kawa bimedde ki kwo kun nongo mit pa kwo i wi lobo, kwo labongo jenge i kom Lubanga.​—Acak. 2:17; 3:3-5.

Ka tam man ni tipo pa dano pe to pe ocakke i poto me Eden, ci ocakke awene? Pe watwero waco awene kikome. Ento wangeyo ni woro me goba kong kijwero woko i Pii Aluka me kare pa Nua. Kit macalo Nua ki lupacone keken aye ma gubwot ki i Pii Aluka dok gin ducu onongo gitye i woro me ada, ci onongo pe tye ngat mo ma onongo pwonyo pwony me dini goba.

Pi meno, pwony man ni dano tye ki gin mo ma pe to-ni nen calo ocakke i nge Pii Aluka. I kare ma Lubanga onyweno leb dano i Babel dok guket “guromo lobo ducu,” labongo akalakala mo gin guket ki tam man ni dano tye ki tipo ma pe to. (Acak. 11:8, 9) Labongo paro pi awene ma tam man ma pe tye atir-ri ocakke iye, watwero bedo ki gen ni “won goba,” Catan Larac, aye tye i nge tam man dok tye ki yomcwiny me neno ka pwony man nya.​—Jon 8:44.