Kimako Yecu

Yecu kacel ki lukwenane guwoto ki i Nota me Kidron ci guito Got Jeituni. Onongo dong cwiny dyewor okato woko dok dwe tye ka caro piny maleng. I kare ma guo i poto me Gececemane, Yecu owaco botgi ni: “Wubed ka kiyo piny kany.” Ka dong Yecu ocito anyim manok ci ogungo oryebbe piny. Kadi bed Yecu onongo tye ki par madwong, ento en olego bot Jehovah ni: “Wek gin ma imito otimme.” Ci Jehovah ocwalo lamalaika me cuko cwiny Yecu. I kare ma Yecu odok cen bot lukwenane, en onongo gin ducu gunino woko. En owaccigi ni: ‘Wua malo! Man pe cawa me nino! Cawa dong onyiko cok ma kibimiya i cing lumonena.’

I nge kare manok, Juda oo ki lwak ma gumako pala lucwan ki odoo-gu. En onongo ngeyo ka ma Yecu tye iye pien onongo con kong gubedo ka bino kany. Juda onongo owaco ki lumony ni ebinyuto botgi Yecu. Dong, en ocito atir bot Yecu, owaco ni: ‘Lapwony, itye!’ ci onoto lemme. Yecu owaco ni: ‘Juda, in imiya i cing lukworra ki noto lema?’

Yecu obino anyim ci openyo lwak ni: “Wuyenyo anga?” Gugamo ni: “Yecu me Najaret.” En odok iye ni: “An a en,” ci joni gujer ki ngegi gupoto piny. Yecu dok openyogi ni: “Wuyenyo anga?” Gudokke iye ni: “Yecu me Najaret.” Yecu owaco ni: ‘Atyeko tittiwu ni an a en. Wuwek jo man guciti.’

I kare ma Petero oniang gin ma tye ka timme, en owoto pala lucwan, otongo ci onguno it Maliko, ma obedo opii pa lalamdog madit. Ento Yecu ogudo it laco-ni ci ocang woko. I ngeye, en owaco ki Petero ni: ‘Dwok pala lucwanni kakare. Ka ilwenyo ki pala lucwan, ci in bene ibito ki pala lucwan.’ Lumony gumako Yecu ci gutweyo cinge, ento lukwenane gungweco woko. I ngeye, lwak gutero Yecu bot lalamdog, Anac. Anac openyo Yecu ki lapeny mapol ci ocwale i ot pa Lalamdog Madit ma nyinge Kayapa. Ento gin ango ma otimme i kom lukwena?