Waraga Ma Oa ki Bot Lukiko Madit

Bot Omegiwa ki Lumegiwa me Amara:

I Watchtower mukwongo ma kiyubo pi lwak ma okatti i Januari 1, 2008, kicako keto pwony mamwonya manyen ma wiye tye ni “Lub Lanengi me Niye.” Cakke i kare meno, dong kiketo pwony manyen ma kit meno i nge dwe adek adek, dok man yomo cwinywa mada!

Jo ma gikwano pwony magi guwacci ngo? I nge kwano lok i kom Marita, lakwan mo acel owacci: “Anyero mada i nge kwano lok man pien an bene atye kit meno​—pol kare amito ni abed ka gwoko welo ki tiyo tic mapol ento kare mukene wiya wil woko ni pire tek me kwanyo kare me boko lok kwedgi.” Anyaka me mwaka 15 owaco kit man i nge kwano lok i kom Esta: “Aniang ni i kare mukene watwero keto cwinywa tutwal i cital me bongo ki jami mukene mukatti nyen. Omyero warukke maber; ento pe i yo mukato kare woko.” En omedde ni: “Jehovah paro pi ngat ma wabedo i iwa.” Pwony ma kwako lakwena Petero oweko dako mo ma Lakricitayo owaco ki yamo kome ni: “Lok man ogudo cwinya matut adada. Obedo calo onongo atye kunnu! Atiyo ki wiya me pongo ngec mukene ma pe kimiyo.”

Lukwan pwony man kacel ki jo mukene ma gucoyo me miyo pwoc pi pwony ma kati kare ki kare-ni gimoko lok ma lakwena Paulo owaco wa con ni: “Gin ducu ma yam gicoyo i kare macon ca onongo gicoyo me pwonyowa.” (Rom. 15:4) Ada, Jehovah omiyo kicoyo lok magi i Baibul wek wanong pwony ma konyowa. Wan ducu, kadi bed dong warii i ada pi mwaki mapol nyo pe, watwero nongo pwony ki bot jo magi.

Wacuko cwinywu me kwano buk man cutcut i nge nongone. Wuket obed i yubwu me Woro pi Jo me Ot​—biyomo cwiny lutinowu adada! Ka kacokke tye ka kwanone i Cokke me Kwano Baibul, pe ikeng kadi cabit acel mo! Pe irune; kwan mot kun iwoto ki lwodone. Ti ki tammi, kun igoyo cal jami ma tye ka timme. Tem winyo kit ma jo me Baibul guwinyo kwede, dok inen gin ma guneno. Por kit ma gudok i jami mutimme ki kit ma in onongo ibidok iye.

Cwinywa yom mada me nywako buk man kacel kwedwu. Walego ni obed mot madit piri ki pi jo me otti. Wacwalo botwu mot ki marwa,

Lukiko Madit pa Lucaden pa Jehovah