Kit me Cobo Yoko Wic ma Bedo i Kinwa

Kit ma kicoyo kwede i 1 Jo Korint 6:1-8, lakwena Paulo otito kit me cobo tele ma bedo i kin jo muye. En onyutu cwer cwinye pien Lukricitayo mogo i Korint onongo gitero luwotgi i “pido i nyim jo ma kitgi pe atir.” (Tyeng me 1) Paulo omiyo tyen lok ma pire tek mumiyo Lakricitayo myero pe oter lawote i nyim kot me lobo ento gucob lokke ki i kacokke. Kong dong wanenu tyen lok mumiyo kimiyo tira man ki dong kabedo mogo manok ma tira man pe gudu.

Ka yoko wic tye i kinwa ki luye luwotwa, gin mukwongo ma myero watim en aye me cobo lok man i yo pa Jehovah, ento pe i yowa. (Carolok 14:12) Kit ma Yecu onyutu kwede, bedo ber me cobo lok ma tye i kinwa oyotoyot ma peya onya odoko twon lok madit. (Matayo 5:23-26) Tye me cwercwiny tutwal ni lok i kin Lukricitayo mukene kelo twon tele madit atika, ma weko bene gicito wa i kot. Paulo owacci: “Ka wupido pido i komwu kekenwu kit meno, nongo pe dong wupoto woko?” Pi tyen lok ango? Tyen lok ma pire tek aye ni kodi pido ma kit meno kelo cac i kom nying maber ma kacokke tye kwede kacel ki Lubanga ma waworo. Pi meno bedo ber ka waketo cwinywa i lapeny pa Paulo man ni: “Pingo pe ber botwu me ciro gin marac?”​—Tyeng 7.

Paulo bene otito ni Lubanga omiyo bot kacokke yub maber me cobo pekki mapol. Luelda gubedo Lukricitayo maryek pien gitye ki ngec matut i Ginacoya, ma omiyo Paulo owacci gin aye ‘romo tyeko lok ma tye i kin omego’ ma lubbe ki ‘kop ma mako kwo ma watye iye-ni.’ (Tyeng 3-5) Yecu onyutu ni yoko wic ma kwako bal madito calo balo nying ki kwalo dano i wi ryeko-gu omyero kicobgi i yo adek magi: mukwongo, wutem cobo lok man i kinwu kekenwu wun aryo; me aryone, ka yo me acel-li pe olare, kwany ngat acel nyo dano aryo me bedo macalo caden; me adekke, ter kop man i nyim kacokke ma tere ni terone bot luelda.​—Matayo 18:15-17.

Luelda ma gitye Lukricitayo pe gubedo lupilida nyo lutim biacara dok bene meno pe obedo ticgi. Gin pe gimiyo cik i kit ma myero omego gucob kwede tele ma tye i kingi. Ma ka meno, gin giyenyo yo me konyo jo aryo magi me lubu ngo ma tye i Ginacoya ki cobo yoko wic ma nongo tye i kingi-ni i yo maber. I kom kop mogo matego, gin giromo penyo tam ki bot laneno me adwol nyo Jang Gang Kal pa Lucaden pa Jehovah. Kono tye jami mogo ma tira pa Paulo-ni pe gudu. Mogo gubedo jami ango?

I kare mukene, cito i kot aye nongo obedo yo ma tye me cobo peko moni-ni i yo mupore. Me labolle, kot oromo bedo yo acel keken ma nongo tye ma ngat moni romo tic kwede me keto nyom ma lubbe ki cik, me nongo twero me gwoko latin, yo me ngolo wel ma myero kicul kare ki kare ki dako nyo laco ma nongo dong kenygi oket woko, culo incuareny, ki lok kom wil ma kicoyo pi to. I kine mukene omego mo romo cwalo kokone i kot wek omiye gwok.a

Ka pido ma kit meno pe gitero ki cwiny me akemo, ci nongo pe kituro cik ma Paulo ocoyo-ni.b Kadi bed kit meno, gin ma pire tek loyo bot Lakricitayo aye obedo keto deyo i kom nying Jehovah, kuc ki note pa kacokke. Lulub kor Kricito gingene pi mar ma gitye kwede, dok “mar . . . pe yenyo gin mukemo en kene.”​—1 Jo Korint 13:4, 5; Jon 13:34, 35.