Goyo Calut i Nyim Bandera, Bolo Kwir, ki Tic Luroni pa Reya

Goyo calut i nyim bandera. Lucaden pa Jehovah gitero kule nyo goyo calut i nyim bandera, ma pol kare timme ma nongo kitye ka wero lubaro me lobo moni calo woro ma nyutu ni larre a ki bot lobo moni nyo lulocce ento pe ki bot Lubanga. (Icaya 43:11; 1 Jo Korint 10:14; 1 Jon 5:21) Laloc acel ma otimo meno obedo Kabaka Nebukadnejar me Babilon. Laloc meno ma onongo tye twon oteka-ni ocweyo cal lubangane mo mabor adada wek jone guur tekone ki mit kome i lok me dinigi, ci en odiyo jo ma en loyogi ki tek ni omyero guryebbe piny guwor cal meno kun nongo kigoyo wer ma tye macalo lubarogi. Ento Luibru adek mo​—Cadrak, Mecak, ki Abednego​—gukwero ryebbe woko piny i nyim cal meno, kadi bed ni pwodde onongo bibedo to.​—Daniel, cura 3.

Lakwed lok me tekwaro Carlton Hayes ocoyo ni, i karewa-ni, “gin ma dong dit ma cung macalo lanyut me niye nyo gin madit me awora i lok me loc lobo obedo bandera.” “Co gikwanyo otokgi woko ka bandera tye ka kato; ki lutino bene giwero wer me pako bandera.” Lobe bene gitye ki “ninogi madongo” calo nino dwe Abongwen me dwe me Apar i Uganda, nino pa “oteka ki pa lucaden remo” ki dok kabedo ma giterogi calo “odi lega” nyo abila-gu ka ma kiworo iye lucaden remo magi. I nino me kwer mo i Brazil, langolkop mo madit me kot pa mony owacci: “Bandera kiworo . . . kit ma kiworo kwede Ngom Kwaro.” Adada, “bandera obedo gin maleng calo yatariya,” man aye ngo ma Encyclopedia Americana mo yam oloko.

Encyclopedia ma kiloko i kome-ni owacci wer lubaro me lobo moni nongo “obedo lok ma a ki i cwiny jo moni-ni pi lobogi dok pol kare obedo lega bot lubanga-gi pi gwoko ki tiro jo-gi nyo lulocgi.” Pi meno, Lucaden pa Jehovah pe gubedo jo ma pe giniang, pi neno kwero nino madongo me lobe ma kigoyo iye calut i nyim bandera kun nongo kiwero iye wer me lubaro me lobo moni-ni calo gin ma obedo dini dini. Ki lok ada, i kare ma buk me The American Character oloko i kom lutino pa Lucaden pa Jehovah ma gukwero woro bandera nyo kwonge me woro lobo America i cukul, buk-ki owaco ni: “Kot Mamalo ma kipido lok man i nyime tyen mapol-li mot mot omoko ni kodi tim man obedo dini dini.”

Kadi bed jo pa Jehovah pe gikwero nino ma gineno ni pe rwatte ki ginacoya, ento gin giworo twero pa jo mukene ma nongo gimito kwerone. Gin bene pe gicayo bandera ento gitero calo gin ma cung pi lobo moni-ni kun bene gitero gamente ma nongo kiketo calo ‘laloc ma loyogi’ ma tiyo macalo “latic pa Lubanga.” (Jo Roma 13:1-4) Pi meno, Lucaden pa Jehovah gilubu cik ma waccigi ni omyero guleg “pi luker ki jo ma tye i rwom ma malo.” Tamwa kono nongo tye ni “wek omi wabed mot labongo ayela, ma waworo Lubanga kun kitwa beco i yo ducu.”​—1 Temceo 2:2.

Bolo kwir i yera me wibye. Lukricitayo me ada giworo twero pa jo mukene me bolo kwir. Gin pe giloko marac i kom bolo kwir, dok gilubu lok pa luloc ma kiyerogi. Ento gin gicung ma pe gicwako tung ka mo keken i lok me wibye me lobo. (Matayo 22:21; 1 Petero 3:16) Lakricitayo myero otim gin ango i lobo ma kidiyo iye dano me bolo kwir nyo ka ma cwiny danone pe mito jo ma pe gicito i kabedo me bolo kwir? Wiwa po ni, Cadrak, Mecak, ki Abednego gucito wa i bar me Dura, Lakricitayo ma tye i peko ma kit meno romo cito wa i kabedo me bolo kwir ka cwinye pe pidde iye. Ento en omyero ogwokke mada pe me cung tung ka mo. En omyero obed ki lok abicel magi i wiye:

1. Lulub kor Yecu pe gubedo “jo me lobo.”​—Jon 15:19.

2. Lukricitayo gicung ma kaka Kricito ki Ker-re.​—Jon 18:36; 2 Jo Korint 5:20.

3. Kacokke pa Lukricitayo gunote i niye, dok mar ma cal ki mar pa Kricito oribo lumembane kacel.​—1 Jo Korint 1:10; Jo Kolocai 3:14.

4. Jami ma ludito mogo-ni gitimo bene kelo lok wa i wi jo ma oyerogi.​—Nen kong cik ma iye lac ma kicoyo i 1 Camuel 8:5, 10-18 ki 1 Temceo 5:22.

5. Jehovah oneno miti pa jo Icrael me bedo ki laloc ma dano calo lanyut ni gin dong gutyeko kwerre woko.​—1 Camuel 8:7.

6. Lukricitayo omyero gubed agonya me lok ki dano me dul me wibye mo keken i kom gamente ma tye i te Ker pa Lubanga.​—Matayo 24:14; 28:19, 20; Jo Ibru 10:35.

Tic luroni pa reya. Lobo mogo mito ni jo ma gikwero tic me mony omyero kiwek guti tic luroni pa reya pi kare mo olo. Ka lok ma kit man obino, omyero waleg pire, nyo wanyam lokke ki Lukricitayo luwotwa ma gucwiny ka dong wacung i niango ma wanongo.​—Carolok 2:1-5; Jo Pilipi 4:5.

Lok pa Lubanga wacciwa ni omyero ‘wamine kenwa i te loc pa luloc, ki wegi twer, me bedo ki winy, ki me yubbe pi tiyo tic mo maber ducu, . . . me bedo jo ma niang.’ (Tito 3:1, 2) Waromo penye kekenwa kun nongo waketo lok man i wiwa ni: ‘Mono ye tiyo tic luroni pa reya-ni balo cungona macalo Lakricitayo ma pe acwako tung ka mo, nyo weko anywene ki dini goba?’ (Mika 4:3, 5; 2 Jo Korint 6:16, 17) ‘Mono timo tic man weko tiyo ticca macalo Lakricitayo doko tek nyo bene dong genga me cobogi?’ (Matayo 28:19, 20; Jo Epeco 6:4; Jo Ibru 10:24, 25) ‘Tiyo kodi ticci mono dok romo miya kare me medo ticca me cwiny, nyo gwok bene romo miya cawa me tiyo tic pi kare malac?’​—Jo Ibru 6:11, 12.

Ka Lakricitayo moni omoko tamme ma lubbe ki kit ma cwinye ngolo kwede, ci oye tiyo tic luroni pa reya me kaka cito i buc, Lukricitayo luwote omyero guwor tamme. (Jo Roma 14:10) Ka kono en otamo ni pe etwero timone, ci jo mukene-ni omyero guwor tam meno bene.​—1 Jo Korint 10:29; 2 Jo Korint 1:24.