Lobo Manyen Me Kuc, Pa Lubanga—in Bene Itwero Bedo Iye

LUBANGA oketo Adam gin ki Kawa i poto me Eden. Kadi bed gin pe gubedo ki winy mumiyo guto, Lubanga oyabo yo bot lutinogi, ma kwako wan bene i kare-ni, me kwo i Paradic pi naka. Baibul ciko ni: “Jo ma kitgi atir gibicamo lobo, dok gibibedo iye matwal.”​—Jabuli 37:29.

Baibul wacciwa pi “polo manyen” ki “lobo manyen.” (Icaya 65:17; 2 Petero 3:13) “Polo” me kare-ni aye gamente pa dano ma tye ka loc kombeddi, ento Yecu Kricito kacel ki jo ma gibiloc kwede i polo aye gibibedo “polo manyen.” Pud dong bibedo mwonya atika ka polo manyen, ma obedo gamente pa Lubanga matir me kuc biloyo lobo ducu!

Ento “lobo manyen” ca kono?— Lobo manyen ca bibedo jo mabeco ma gimaro Jehovah. Ineno, ka Baibul loko i kom “lobo,” i kine mukene nongo tye ka lok i kom jo ma gibedo i lobo ento pe ngom kikome. (Acakki 11:1; Jabuli 66:4; 96:1) Pi meno jo me lobo manyen-ni gibikwo i lobo kany.

Lobo me kare man ma opong ki dano maraco-ni bibedo pe matwal. Wi po ni Pii Aluka me kare pa Nua ca otyeko dano maraco ma onongo gupongo lobo. Dok kit ma wapwonyo kwede, lobo marac me kare-ni kibityekone woko i Armagedon. Kombeddi kong wanen kit ma kwo bibedo kwede i nge Armagedon i lobo manyen pa Lubanga.

Tika imito bedo pi naka i Paradic i lobo manyen me kuc, pa Lubanga-ni?— Pe tye dokto mo ma romo miyo wakwo pi naka. Pe tye yat amwonya mo ma romo gengowa wek pe wato. Yo acel keken ma waromo kwo kwede pi naka obedo nyikke cok bot Lubanga. Dok Lapwony Madit-ti owacciwa kit ma myero watim meno kwede.

Kong wakwany Baibulwa ci wayab Jon cura 17, tyeng 3. Kany wanongo lok pa Lapwony Madit-ti: “Man en kwo ma pe tum, ni ginge in Lubanga acel me ada, ki Yecu Kricito ma yam ioro.”

Pi meno, ngo ma Yecu owacci myero watim wek wakwo pi naka?— Mukwongo, omyero wanong ngec madok i kom Wonwa me polo, Jehovah, ki dong Wode, ma omiyo kwone piwa. Man te lokke ni myero wakwan Baibul. Buk man me Nong Pwony ki Bot Lapwony Madit, tye ka konyowa me timo meno.

Ento pwonyo lok i kom Jehovah mono bikonyowa me kwo pi naka nining?— Kit macalo wamito cam nino ducu, mitte bene ni omyero wapwony lok i kom Jehovah nino ducu. Baibul waco ni: “Dano pe bibedo kwo ki kwon keken, ento bedo kwo ki lok ducu ma a ki i dog Lubanga.”​—Matayo 4:4.

Mitte bene ni myero wanong ngec i kom Yecu Kricito pien Lubanga ocwalo Wode me kwanyo balwa. Baibul waco ni: “Pe tye larre mo i ngat mukene.” Baibul bene waco ni: “Dano ma ye Wod tye ki kwo ma pe tum.” (Tic pa Lukwena 4:12; Jon 3:36) Te lokke ngo me bedo ki “ye” i kom Yecu?— Te lokke ni waye i kom Yecu kun wangeyo ni labongo en pe watwero kwo pi naka. Wan tika waye lok meno?— Ka waye, ci wabimedde ki nongo pwony ki bot Lapwony Madit nino ducu, dok wabitimo gin ma en wacciwa.

Yo acel maber ma waromo nongo kwede pwony ki bot Lapwony Madit aye me kwano buk man teretere kun waneno dok watamo i kom cal ducu ma kiketogi iye. Tem kong gamo lapeny ma kiketogi kacel ki cal magi. Dok bene, kwan buk man kacel ki babani nyo mamani. Ka lunyodoni gipe, kwan ki jo madito ki dong kacel ki lutino mukene. Mono pe bedo mwonya mada ka ikonyo jo mukene me nongo pwony ki bot Lapwony Madit i kom gin ma myero gutim wek gin gukwo pi naka i lobo manyen pa Lubanga?—

Baibul wacciwa ni: “Lobo tum woko ki mitine ducu.” Ento Baibul bene titiwa kit ma waromo kwo kwede pi naka i lobo manyen pa Lubanga. Waco ni: “Ngat ma tiyo gin ma Lubanga mito ri nakanaka.” (1 Jon 2:17) Ngo ma myero watim wek wakwo i lobo manyen pa Lubanga?— Waromo kwo iye ka ce wanongo ngec i kom Jehovah gin ki Wode me amara, Yecu. Ento omyero bene waket i tic gin ma wapwonyo. Wageno ni kwano buk man bikonyi me timo jami magi.