Gin Mumiyo Timo Gin Maber Tek

I KARE ma Caulo obedo ka timo jami maraco, anga ma cwinye obedo yom?— Catan Larac-ci. Ento ludito dini pa Lujudaya bene cwinygi obedo yom. I ngeye ma Caulo odoko lapwonnye pa Lapwony Madit kun kilwonge ni Paulo, ludito dini magi gucako dage. Dong iromo niang pingo timo gin maber tek bot lapwonnye pa Yecu?—

I nino mo acel, lalamdog madit ma nyinge Anania ociko dano ni gudong Paulo. Anania bene otemo keto Paulo i buc. Paulo odeno can mapat pat i kare ma en odoko lakwena pa Yecu. Me laporre, jo ma kitgi raco gugoyo Paulo dok gutemo neke ki godi madongo.​—Tic pa Lukwena 23:1, 2; 2 Jo Korint 11:24, 25.

Jo mapol gibitemo diyowa wek watim jami ma pe yomo cwiny Lubanga. Dong lapeny ma tye aye ni, In mono imaro gin maber ma rom mene? Imaro matek adada ma weko ibitimone kadi bed jo mukene gidagi pire? Timo meno mito tekcwiny, pe kumeno?—

Iromo tamone ni, ‘Pingo dano dagwa pi timo gin maber? Cwinygi mono pe myero onongo obed yom aye?’ Iromo tamone kumeno. Pol kare, dano gumaro Yecu pi jami mabeco ma en otimo. I nino mo acel, jo ducu ma i gang mo gucokke i doggola me ot ka ma en onongo tye ka bedo iye. Gin gubino pien Yecu obedo ka cango jo ma komgi lit.​—Marako 1:33.

Ento i kine mukene dano onongo pe gimaro gin ma Yecu pwonyo. Kadi bed en onongo pwonyo gin matir kare ducu, jo mukene gunyutu adage i kome pien en onongo loko lok ada. Man otimme nino mo acel i Najaret, kabedo ma Yecu odongo iye. En ocito i kacokke, ka ma Lujudaya gigure iye ka woro Lubanga.

Ki kunnu, Yecu omiyo pwony mucwiny adada mua ki i Ginacoya. I acakkine, dano gumaro pwonye. Guuro lok mabeco mua ki i doge. Gunongo tek tutwal me ye-ni man aye obedo latin awobi ma odongo ki i kabedogi.

Ento Yecu dok oloko gin mukene. En oloko i kom kare ma Lubanga onyutu cwakke bot jo ma pe gubedo Lujudaya. I kare ma Yecu oloko lok meno, kiniga omako jo ma i kacokke matek. Ingeyo pingo?— Gin onongo gitamo ni gin keken aye gitye ki cwak pa Lubanga. Gin onongo gitamo ni rwomgi dit loyo pa jo mukene. Pi meno, gin gudago Yecu pi lok ma en oloko. Tika ingeyo ngo ma gutemo timone i kome?—

Baibul tito ni: ‘Gumako Yecu ci gutere woko ki i gang. Gutere i wi got kun gimito core piny wek gineke woko! Ento Yecu okato woko ki i kingi’​—Luka 4:16-30.

Ka gin meno otimme i komi kono, tika iromo dok cen bot jo meno me lok i kom Lubanga?— Timo meno mito tekcwiny, pe kumeno?— Ento, ma romo kine ka mwaka acel, Yecu odok cen i Najaret. Baibul waco ni: “[En] opwonyogi i kacokkegi.” Yecu pe oweko loko lok ada pi lworo dano ma pe gimaro Lubanga.​—Matayo 13:54.

I nino mukene ma obedo Ceng Cabat, Yecu onongo tye i kabedo mo ma laco ma bade otal tye iye. Yecu onongo tye ki teko ma oa ki bot Lubanga me cango laco meno. Ento co mogo ma kunnu onongo gimito kelo ayela i kom Yecu. Ngo ma Lapwony Madit otimo?— Mukwongo en openyogi ni: ‘Ka romo-ni opoto i bur madit i Ceng Cabat, pe ibiywayo woko ka maleng?’

Gibiywayo romo meno woko ka maleng, kadi wa i ceng cabat, ma obedo nino ma myero guywe iye. Pi meno Yecu owacci: ‘Kit ma dano pire tek kato romo-ni, konyo dano i nino me Cabat ber ma loyo!’ Onen ka maleng ni Yecu myero okony laco-ni ki cange!

Yecu owaco bot laco-ni ni orye bade. Bade ocang woko cutcut. Laco-ni pud dong obedo ki yomcwiny ya! Ento co mukene ca kono? Tika cwinygi obedo yom?— Pe. Gumedde ameda ki dago Yecu. Gucito woko ci gucako yubo kit ma myero gineke kwede!​—Matayo 12:9-14.

Rom aroma bene i kare-ni. Kadi bed watim ngo, pe waromo yomo cwiny dano ducu. Dong myero wamok tamwa i kom nga ma wamito yomo cwinye. Ka wamito yomo cwiny Lubanga Jehovah ki Wode, Yecu Kricito, ci kare ducu myero walub pwonygi. Ento ka walubu, nga ma bidagowa? Nga ma biweko timo gin maber doko tek botwa?—

Catan Larac-ci. Ki dok angagi mukene?— Jo ducu ma Larac-ci obwologi ma oweko pe dong giye jami matir. Yecu owaco bot lutela dini me karene ni: “Wun wua ki bot wonwu, Catan, wumito cobo gin ma wonwu mito.”​—Jon 8:44.

Tye dano mapol ma Larac-ci marogi. Yecu olwongogi ni “lobo.” In itamo ni “lobo” ma Yecu oloko iye-ni obedo gin ango?— Wayab Jon cura 15, tyeng 19, wek wanen kong. Wakwano lok pa Yecu kany ni: “Kono wun jo me lobo, kono lobo omaro wun jone; ento wun pe me lobo, ento ayerowu ki i lobo; pi meno lobo kwerowu.”

Dong lobo ma dag lupwonnye pa Yecu-ni tye iye jo ducu ma pe gilubu kor Yecu. Pingo lobo-ni dag lupwonnye pa Yecu?— Tam kong iye. Nga ma tye laloc me lobo?— Baibul waco ni: “Lobo ducu tye i te loc pa Larac.” Larac-ci aye Catan.​—1 Jon 5:19.

Tika dong ineno ngo mumiyo timo gin maber tek tutwal-li?— Catan kacel ki lobone gimiyo bedo tek. Ento tye dok tyen lok mukene. Wi po tyen lok meno?— I Dul me 23 i buk man, wapwonyo ni wan ducu kinywalowa ki bal. Mono itamo ni pe ber ka bal, Larac-ci, kacel ki lobone gijwayogi woko?—

Baibul ciko ni: ‘Lobo bitum woko.’ Man tere ni jo ducu ma pe gilubo kor Lapwony Madit gibityekogi woko. Lubanga pe biweko gikwo pi naka. Nga ma bikwo pi naka?— Baibul medde ni: “Ngat ma tiyo gin ma Lubanga mito ri nakanaka.” (1 Jon 2:17) Jo ma gitimo gin maber keken, ma gitiyo “gin ma Lubanga mito,” aye gibikwo i lobo manyen pa Lubanga. Pi meno, kadi bed timone tek, wamito ni wabed ka timo gin maber, pe kumeno?—