Pwony me 7

Gin ma Okato Angec ma Ciko Wa

Jehovah pe biyee ni jo maraco gubal Paradic. Lureme keken aye gibikwo kunu. Ngo ma bitimme i kom jo ma lubal? Me nongo lagamme, kong itam gin ma otimme i kom Nua. Nua okwo mwaki alip mapol ma okato angec. En obedo dano maber ma otemme ki tek-ke me timo mitti pa Jehovah. Ento jo mukene ma iwi lobo gutimo jami maraco. Ci Jehovah owaco ki Nua ni En ebicoro pii aluka mapol me tyeko lutim maraco magi. En owaco ki Nua ni opar yeya wek en ki jo me ode pe guto ka Pii Aluka man ocore.​—Acaki 6:9-18.

Nua ki jo ma i ode gupayo yeya. Nua ociko dano ni Pii Aluka bibino, ento gin pe guwinye. Gumede anyim ki timo jami maraco. ikare ma payo yeya otum, Nua otero lee i i yeya, ci en ki jo ma i ode bene gudonyo i iye. Ka dong Jehovah okelo kot ma ayom dene. Kot ocwer pi nino 40 ki dyewor 40. Pii ne omunyo wi lobo ducu.​—Acaki 7:7-12.

Lutim maraco gurwenyo kwogi, ento Nua ki dano ma i ode guloyo. Jehovah okelogi labongo peko mo ki i Pii Aluka ca, i wii lobo ma lutim maraco dong pe iye. (Acakki 7:22, 23) Baibul wacci kare dok tye ka bino aye ma Jehovah bineko jo ma gikwero timo gin matir. Jo ma beco pe gibinekogi. Gin bikwo matwal i lobo me Paradic.​—2 Petero 2:5, 6, 9.

I kare ni dano mapol timo jammi maraco. Lobo opong ki peko. Jehovah cwalo Lucadene aye dok aye me ciko dano, ento polgi pe mito winyo lok pa Jehovah. Pe gimito loko kwogi. Pe gimito yee ngo ma Lubanga wacci atir nyo rac. Ngo ma bitimme i kom jo magi? Gin biloke nino mo? Polgi pe biloke. Kare bibino ma lutim maraco gibityekogi dok pe gibikwo matwal.​—Jabuli 92:7.

Lobo ni pe gibibalone, gibiyubone doko Paradic. Jo ma gidoko lurem Lubanga gibikwo matwal i Paradic i wi lobo.​—Jabuli 37:29.