Pwony me 5

Lurem Lubanga Gibibedo i Paradic

Paradic pe bibedo calo lobo ma wakwo iye kare-ni. Lubanga pe omito ni lobo opong ki peko, kumo, arem ki deno can. I anyim, Lubanga biyubo lobo doko paradic. Paradic obibedo nining? Kong wanenu ngo ma Baibul waco:

Dano mabeco. Paradic obibedo gang pa lurem Lubanga. Gin bitimo jami mabeco bot luwotgi. Gin bikwo i yoo matir pa Lubanga.​—Carolok 2:21.

Cam madwong. I Paradic, kec bibedo pe. Baibul wacci: “Cam bene myero ocek mabup i lobone.”​—Jabuli 72:16.

Odi mabeco ki tic ma kelo yomcwiny. I wii lobo me Paradic, jo me odi ducu bibedo ki odi mamegi. Dano ducu bitiyo tic ma kelo yomcwiny me ada.​—Icaya 65:21-23.

Kuc iwii lobo ducu. Dano dong pe bilweny ki to i mony. Lok pa Lubanga wacci: “[Lubanga] juko lweny woko.”​—Jabuli 46:8, 9.

Yot kom. Baibul ciko ni: “Pe tye dano mo ma bedo i lobowa [Paradic] ma biwaco ni, ‘An koma lit’” (Icaya 33:24) Ki bene, ngat mo pe bibedo langolo, nyo lato wang nyo lading it nyo lato leb.​—Icaya 35:5, 6.

Agiki me arem, kumo, ki to. Lok pa Lubanga wacci: “To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.”​—Niyabo 21:4.

Dano maraco bibedo pe. Jehovah cikke ni: “Jo maraco gibityekogi woko ki i lobo meno, ki jo ma gungayo wang rwot pi bal . . . gibiputogi macalo giputo doo.”​—Carolok 2:22.

Dano bimare ki dok gibiworo luwotgi. Ngolo kop alenga, dic, woro ki adega dega bibedo pe. Dano biribe kun gibikwo ma rwatte ki yo matir pa Lubanga.​—Icaya 26:9.