Pwony me 1
Lubanga Tika Ada Paro Piwa?
1, 2. Lapeny ango ma dano gipenye kwede i kom Lubanga, dok pingo?
OROMO bedo ni i kare mo i kwoni, in ipenye kekeni ni: ‘Ka ce Lubanga tye ada dok paro piwa, ci pingo en oweko peko tye madwong tutwal?’ Wan ducu dong watyeko limo peko nyo wangeyo ngat mo ma olimo peko.
2 Ada, cakke con ki i tekwaro, dano gulimo can ki cwercwiny ma obino macalo adwogi me lweny, tim gero, turo cik, ngolo kop alenga, can, two, kacel ki to pa danogi me amara. I karewa-ni, lweny oneko dano makato milion 100 kulu. Dano milion miya mapol ata gunongo awano nyo gurwenyo paci kacel ki jamigi. Jami maraco mapol dong otyeko timme i karewa-ni ma okelo cwercwiny bot dano, pig wang madwong, dok orwenyo gen pa jo mapol ata.
3, 4. Dano mapol gitamo ningo i kom Lubanga pi peko ma en oweko ni obed tye-ni?
3 Jo mukene kiniga makogi ma weko gitamo ni ka Lubanga tye ada, ci en dong pe paro piwa. Nyo bene giromo tamo ni Lubanga peke. Me labolle, laco mo ma kiunu matek pi lok me kakane dok lureme ki jo me ode guto iye i kare me Lweny me Wi Lobo me I openyo ni: “Lubanga onongo tye kwene i kare ma onongo watye ka mitte matek tutwal-li?” Laco acel mo ma obwot ki i kin dano milion mapol ata ma jo me Nazi gunekogi i Lweny me Wi Lobo me II, obedo ki arem i cwinye pi peko ma en oneno ma omiyo en owacci: “Ka onongo ngat mo obil gin ma tye i cwinya, kono kwirre oneko woko.”
4 Pi meno, dano mapol pe gitwero niang pingo Lubanga ma kite ber-ri weko jami maraco timme. Miyo gipenye kekengi ka ce en paro piwa nyo ka en tye ada. Dok polgi gitamo ni peko dong bibedo i kwo pa dano matwal.
Ka pe dok kinyutu mapatte, lok ducu kikwanyo ki i Baibul me leb Acholi me Mwaka 1985 pa Bible Society of Uganda, kun kitiyo ki nukuta me kare-ni. Ka ma kiketo iye NW i nge wang tyeng mo, nongo nyutu ni kigonyo oa ki i leb muno me New World Translation of the Holy Scriptures—With References
[Cal ma tye i pot karatac 2, 3]
Lobo manyen ma peko pe iye mono dong tye cok?