Ododo 111

Awobi ma Onino

AI! AI! Gin ango ma tye ka timme kany? Awobi ma obuto piny i ngom-mi owane matek tutwal? Nen! Paulo tye i kin jo ma tye ka kati woko ki i ot-ti do! Itwero neno Temceo bene kunnu? Awobi-ni mono opoto ki i wang dirica?

Ada, meno aye gin ma otimme. Paulo onongo tye ka pwonyo lupwonnye kany i Teroa. En ongeyo ni pe dong ibinenogi doki pi kare malac pien en onongo mito a woko ki yeya orwone. Pi meno en omedde ameda ki lok wa i cwiny dyewor.

Awobi man ma nyinge Yutiko onongo obedo i wang dirica, ci onino. En opoto woko ki i wang dirica oa ki i kicika me adek nio wa piny i ngom! Dong itwero niang pingo dano gitye ki par tutwal. Ka dano guilo awobi-ni malo, kit gin ma onongo gilworo-ni kikome aye otimme. En oto woko!

Ka Paulo oniang ni awobi-ni oto woko, en oryebbe obuto i kome ci okwake. En dok owaco ni: ‘Pe wupar. En tye maber!’ Ci obedo kumeno! Man tango! Paulo odwoke woko cen i kwo! Cwiny lwak obedo yom adada.

Gin ducu doki gudok i kicika ma malo ci gucamo cam. Paulo omedde ki lok nakanaka wa odiko. Iromo ngeyo angeya ni Yutiko pe dong onino doki! I ngeye Paulo, Temceo kacel ki jo ma giwoto kwedgi gudonyo i yeya. In ingeyo ka ma gicito iye?

Paulo onongo dong tye ka tyeko wotte me pwony me adek-ke, dok onongo dong tye i yone me dok paco. I wot man, Paulo obedo i boma me Epeco keken pi mwaka adek. Pi meno wot man obedo bor kato kadi wa me aryo ca woko.

I nge weko Teroa, yeya ocung manok i Mileto. Pien Epeco tye mairo manok keken ki kenyo, Paulo ocwalo kwena Epeco pi lwongo ludongo ma i kacokke me bino Mileto wek elok kwedgi me agikki. Lacen, ka kare me a pa yeya dong oromo, kit ma cwinygi oton kwede me neno ka Paulo cito!

Olo twal yeya odwogo cen i Cecaria. Ka Paulo tye ka bedo kany i ot pa lapwonnye Pilipo, lanebi Agabo ociko Paulo matek. En owaco ni gibitweyo Paulo i mabuc ka oo Jerucalem. Dok i ada, man aye gin ma otimme. Lacen, i nge bedo i mabuc pi mwaka aryo i Cecaria, gitero Paulo Roma me pido i nyim Cecar laloc me Roma. Wanenu kong gin ma timme i wot me cito Roma.

Tic pa Lukwena cura 19 nio wa i 26.