Ododo 99

I Kicika ma Malo

NINO aryo dong okato, dok kombeddi dong dyewor me Ceng Angwen. Yecu ki lukwenane 12 gubino i kicika man malac ma malo-ni me camo cam me Kato. Laco ma ineno tye ka cito ca-ni aye Juda Lakeriot. En tye ka wot me tito bot lulam dog kit me mako Yecu.

Pud nino acel keken i ngec, Juda onongo ocito botgi ci openyo ni: ‘Wubimiya gin ango ka akonyowu me mako Yecu?’ Gin guwaco ni: ‘Cente ma nyige ryal pyeradek.’ Pi meno Juda kombeddi dong tye ka cito me rwatte ki jo magi ka wek dong etergi bot Yecu. Meno pe rac tutwal?

Cam me Kato dong otum woko. Ento Yecu kombeddi dok ocako cam mukene mapat. En omiyo mugati bot lukwenane ci owaco ni: ‘Wucam, pien man cung pi koma ma kibimiyo piwu.’ I ngeye en omiyo botgi kikopo me vino ci owaco ni: ‘Wumati, pien man cung pi remona, ma kibionyo piwu.’ Baibul lwongo man ni ‘cam me otyeno pa Rwotwa.’

Luicrael gucamo Kato me poyo wigi pi kare ma lamalaika pa Lubanga ‘okato ki i wi’ odigi i Ejipt, ento oneko lutino kayo i odi pa Luejipt. Ento kombeddi Yecu mito ni jo ma lube gupo pi en, ki kit ma emiyo kwone kwede pigi. Man aye gin mumiyo en tito botgi me kwero cam man mapat-ti mwaka ki mwaka.

I nge camo Cam me Otyeno pa Rwotwa, Yecu owaco bot lukwenane me bedo ki tekcwiny kacel ki niye matek. Me agikki, guwero wer bot Lubanga ka dong gucito. Kombeddi cawa onongo dong owoto mada, nen calo okato cwiny dyewor woko. Wanenu kong ka ma gicito iye.

Matayo 26:14-30; Luka 22:1-39; Jon cura 13 nio wa 17; 1 Jo Korint 11:20.