Ododo 94

En Maro Lutino Matino

NEN kong Yecu kany ki cinge ma okwako ki latin awobi ma tidi-ni. Itwero niang woko ni Yecu gire ada paro pi jo matino. Co ma gitye ka nene-ni obedo lukwenane. Yecu tye ka waco botgi ningo? Wanenu kong.

Yecu ki lukwenane onongo pud gudwogo adwoga ki i wot mo mabor. Ki i yo lukwena gubedo ka laro lok i kin-gi. Pi meno i nge wot-ti Yecu openyogi ni: ‘Wubedo ka laro lok ango ki i yo?’ I ada, Yecu gire onongo ngeyo lok ma gubedo ka larone. Ento en openyo lapeny man me neno ka lukwenane bititone bote.

Lukwena pe gugamo, pien i yo onongo gubedo ka laro dito i kin-gi keken-gi. Lukwena mogo gimito bedo dit makato luwotgi. Yecu bitito botgi nining ni pe atir me mito bedo dit makato ducu?

En olwongo latin awobi-ni, ci ocibo ocung i nyim gin ducu. Ci dong owaco bot lupwonnyene ni: ‘Amito ni wunge man maber, Ka pe wulokke ci wudoko calo lutino matino, pe wubidonyo i ker pa Lubanga. Ngat madit loyo ki i ker-ri en aye ngat ma doko calo latin man.’ Ingeyo pingo Yecu waco meno?

Ada, lutino matino tutwal gire pe giparo pi bedo dit me loyo jo mukene, nyo pi bedo ngat ma pire tek kato jo mukene. Pi meno lukwena myero gupwony bedo calo lutino i yo ma kit man dok pe myero gubed ka daa pi bedo dit nyo bedo ngat ma pire tek.

Tye kare mukene bene, ma Yecu onyuto kit ma eparo kwede pi lutino matino. Lacen i nge dwe mo manok dano gukelo lutinogi ka neno Yecu. Lukwena gutemo jukogi woko. Ento Yecu owaco bot lukwenane ni: ‘Wuwek lutino gubin bota, dok pe wujukgi, pien ker me polo tye pi jo macalo gin.’ Yecu dong otingo lutino i cinge, ci ogoyo laa i komgi. Pe ber tutwal me ngeyone ni Yecu maro lutino matino?

Matayo 18:1-4; 19:13-15; Marako 9:33-37; 10:13-16.