Ododo 92

Yecu Ocero Jo Muto

ANYAKA ma ineno kannyi tye ki mwaka 12. Yecu tye ka mako cinge, dok minne ki wonne gucung cok kenyo. In ingeyo gin mumiyo ginen ma cwinygi yom tutwal? Wanenu kong.

Won anyaka-ni obedo dano mapire tek ma nyinge Yairo. I nino mo acel kom nyare odoko lit, ci kipyele i wi kitanda. Ento twone pe tye ka cang. Twone medde amedda keken. Yairo gin ki dakone gudoko lwor tutwal, pien nen calo latin anyakagi-ni obito woko. En nyagi acel keken. Pi meno Yairo ocito ka yenyo Yecu. En onongo owinyo pi tango mapol ma Yecu tye ka timo.

Ka Yairo onongo Yecu, lwak madwong onongo guguro en i dyere. Ento Yairo odonyo ki i kin lwak ci opoto ka tyen Yecu. En owaco ni: ‘Nyara kome lit adada.’ En okwayo ni: ‘Tim ber, ibin icange.’ Yecu owaco ni ebicito.

Ka gitye ka wot, lwak gumedde ki nyiko cok. Yecu otugi cung woko atura. En openyo ni: ‘Anga ma oguda?’ Yecu owinyo ka teko oa ki ikome, pi meno en ongeyo ni ngat moni ogude. Ento meno mono anga? Man aye dako mo ma kome obedo lit tutwal pi mwaka 12 kulu. En onongo obino ci ogudo bongo pa Yecu, ci dong ocang woko!

Man omiyo Yairo owinyo maberber, pien en dong twero neno ni yot tutwal bot Yecu me cango dano. Ento lakel kwena mo obino. En owaco ki Yairo ni: ‘Pe dong iyel Yecu. Nyari dong oto woko.’ Yecu owinyo man ci owaco ki Yairo ni: ‘Pe ipar. En bibedo maber.’

I ngeye ka guo i ot pa Yairo, dano onongo gitye ka koko ki twon kumo adada. Ento Yecu owaco ni: ‘Wuwek koko obedi. Latin-ni pe oto. En tye ka nino anina mere keken.’ Gunyero kun gituko ki Yecu, pien gingeyo ni en oto woko.

Yecu dong okwanyo won anyaka-ni ki minne kacel ki lukwenane adek oterogi i ot ka ma latin-ni tye obuto iye. En omake ki cinge ka owacce ni: ‘A malo!’ Ci en odoko kwo, kit ma ineno kannyi. Dok en oa malo ci ocako wot! Man aye gin mumiyo minne ki wonne cwinygi yom tutwal-li.

Man aye pe ngat mukwongo ma Yecu ocero ki i to. Ngat mukwongo ma Baibul loko i kome aye wod pa dato mo ma bedo i boma me Nain. Lacen, Yecu bene ocero Lajaro, omin Marita gin ki Maliam, ki i to. I kare ma Yecu biloc macalo kabaka ma Lubanga oketo, en bicero jo muto mapol adada. Meno pe twero yomo cwinywa?

Luka 8:40-56; 7:11-17; Jon 11:17-44.