Le decisión maas importante k-chʼaʼikoʼ letiʼe k-kʼubik k-kuxtal tiʼ Jéeoba utiaʼal k-okol ichil u kaajaloʼ. Jéeobaeʼ u kʼáateʼ tuláakloʼon ka k-chʼaʼ le decisión jeʼelaʼ. ¿Baʼaxten? Tumen u kʼáat ka k-bisba maʼalob tu yéetel bey xan ka yanaktoʼon kuxtal minaʼan u xuul (Deu. 30:​19, 20; Gál. 6:​7, 8). Chéen baʼaleʼ Jéeobaeʼ maʼ tu obligartik mix máak utiaʼal ka u meyajte. Letiʼeʼ ku chaʼik tiʼ cada juntúul ka u chʼaʼtukult baʼax ken u beete. ¿Baʼax unaj u beetik le ancianoʼob wa ku lúubul tiʼ junpʼéel nojoch kʼeban juntúul máax tsʼoʼok u yokjaʼoʼ? Wa maʼ tu arrepentireʼ unaj u jóoʼsaʼal ichil u kaajal Jéeoba (1 Cor. 5:13). Kex beyoʼ Jéeobaeʼ ku tsʼíiboltik ka arrepentirnak le máax kʼebanchajoʼ. Junpʼéel tiʼ le baʼax oʼolal tu tsʼáaj u kuxtal u Hijo t-oʼolaloʼ utiaʼal ka páajchajak u perdonartik le máaxoʼob ku kʼebantaloʼob pero ku arrepentiroʼoboʼ. Jéeobaeʼ yéetel yaabilaj ku yaʼalik tiʼ le máaxoʼob ku kʼebantaloʼob ka arrepentirnakoʼoboʼ (Eze. 1:3; Rom. 2:4; Sant. 4:8). w24.08 pág. 14 § 1, 2

Le ka tu tsʼíibtaj Juan le u yóoxpʼéel cartaoʼ yaan máakoʼob táan kaʼach u kaʼanskoʼob baʼaloʼob maʼ jaajtakiʼ yéetel táan u jatskoʼob le múuchʼuliloʼ. Pero yanchaj sukuʼunoʼob seguernaj «u xíimbaloʼob tu bejil le jaajoʼ». Letiʼobeʼ tu yuʼuboʼob u tʼaan Jéeoba (2 Juan 4, 6). Le baʼax tu beetaj le sukuʼunoʼob chúukpaj u yóoloʼoboʼ tu beetaj u kiʼimaktal u yóol Juan bey xan Jéeoba (Pro. 27:11). ¿Baʼax ku kaʼansiktoʼon? Le chúukaʼan óolaloʼ ku beetik u kiʼimaktal u yóol máak (1 Juan 5:3). Por ejemploeʼ ku kiʼimaktal k-óol k-ojéeltik táan k-kiʼimakkúuntik u yóol Jéeoba. Letiʼeʼ ku kiʼimaktal u yóol le kéen u yil táan k-rechazartik le baʼaxoʼob ku tsʼáaik le yóokʼol kaab utiaʼal k-beetik baʼax u kʼáat. Le ángeloʼob xanoʼ ku kiʼimaktal u yóoloʼob (Luc. 15:10). Tsʼoʼoleʼ toʼon xaneʼ ku kiʼimaktal k-óol le kéen k-il ku chúukpajal u yóol le sukuʼunoʼob yéetel le kiikoʼoboʼ (2 Tes. 1:4). Le kéen xuʼulsaʼak tiʼ le yóokʼol kaabaʼ yaan u kiʼimaktal k-óol tumen chúukpaj k-óol tiʼ Jéeoba. w24.11 pág. 12 § 17, 18

¿Bukaʼaj tiempo unaj u máan antes tiʼ a waʼalik tiʼ wa máax taak a biskaba tu yéetel? Wa ka séeb aʼaliktiʼeʼ maʼ xaaneʼ yaan u tuklikeʼ maʼatech a kutal a tukult baʼax ka beetik (Pro. 29:20). Chéen baʼaleʼ wa uts ta wich, pero jach ku xáantal maʼ ta waʼaliktiʼ mix baʼaleʼ, maʼ xaaneʼ yaan u tuklikeʼ maʼ seguroech wa jach uts ta wichiʼ (Ecl. 11:4). Kʼaʼajaktecheʼ utiaʼal a waʼalik tiʼ wa máax uts ta wicheʼ maʼ kʼaʼabéet wa jach convencidoech yéetel letiʼ kun tsʼoʼokol a beeliʼ. Baʼax tiʼ unaj a convencerkabaeʼ letiʼe wa preparadoech utiaʼal u tsʼoʼokol a beeloʼ bey xan wa le máax uts ta wichoʼ maʼ xaaneʼ letiʼe máax maʼalob utiaʼal ka tsʼoʼokok a beeloʼ ¿Baʼax unaj a beetik wa ka tsʼáaik cuenta yaan máax uts tu yichech? Wa teech maʼ uts ta wicheʼ maʼ unaj a tsʼáaik tuʼux utiaʼal u tuklik jeʼel u páajtal u káajal u biskuba ta wéeteleʼ. Maʼ a beetik u ilusionarkuba wa junpuliʼ maʼ uts ta wichiʼ (Efe. 4:25). w24.05 pág. 22, 23 § 9, 10