Ziova Ŋɔwala-wala-laai Koyaŋ Fe Ma

1. Mose e nɛ leŋ a gɛɛ e kɛ a naa a Ziova gɛɛ Eezuɛ-ŋai kulai Ize?

IBULU kɔlɔi e lono e pilaŋ nua tamaa dia nyii-ŋai laa-la e kɛ diyeei. Nuai ŋi dɔnɔ ɓe kɛ a Mose nyii laa-la su kpanaŋɔɔ e kɛ nyeei. (Ib. 3:​2-5; 11:​23-25) E nɛ a gɛɛ laa-la e kɛ nyeei tãi e Eezuɛ-ŋai kula la Izei. Ve nɛɛ ni naa a gɛɛ Felo da ŋɔsoyaŋ-ŋai di maa yao. E gili tɔɔ Ziova ma a nii kelee, e Eezuɛ-ŋai teniŋ-tɔɔ a gɛɛ di tɛɛ Nyuo Kpɔlui su; nyaŋ naa polu ma e di teniŋ tɔɔ Vɛ̃ɛ-kpalaŋ su. (Ib. 11:​27-29) Eezuɛ-ŋai tamaa ɣele di kpera laai la a gɛɛ Ziova a pai dimɛi kaai, kɛlɛ Mose e kɛ a naa la a gɛɛ a pɔri gili tɔɔi Ɣala ma. Nyaŋ e gɛ ti, kpɛni fei Ziova e mii-sɛŋ da ya tɛɛ Eezuɛ-ŋai pɔ di kɛɛ vɛ̃ɛ-kpalaŋ su.—Ɛs. 15:​22-25; Ŋu. 78:​23-25.

2. Le ɓe gɛ Ɣala kɛ Mose mare kɛ nyɛɛi: “Gaa ikili-ŋa a gɛɛ ŋawala-wala-laai koyaŋ kaa ma?” (Nɔŋba 11:​21-23)

² Berei maŋ laa-la su kpanaŋɔɔ e kɛ la Mose yeei, kɛlɛ koraŋ tɔnɔ tɛɛ polu ma gɛɛ Ziova aa Eezuɛ-ŋai ŋuŋ maa ɓo Ize lɔii sui, Mose e pɛlɛ gili-ŋa siai a kɛ Ziova e kɛ pai pɔri sua tɛɛi Eezuɛ-ŋai pɔ yɛɛ berei e mo lai. Eezuɛ-ŋai dikɛ a nuu ŋɔmiliyɔŋ tamaa, nyaŋ mii-sɛŋ kelee ta fe kɛ ni vɛ̃ɛ-kpalaŋ su. Gɛ ni pere sii kɛɛ leŋ ɓe Ziova e kɛ pai pɔri sua tɛɛi la nuai ŋi kelee pɔ nyii kɛ pai dilii laai? Ziova e Mose mare kɛ nyɛɛi: “Gaa ikili-ŋa a gɛɛ ŋawala-wala-laai koyaŋ kaa ma?” (Nɔŋba 11:​21-23 lono.) Ŋooi ‘Ziova ŋɔwala-wala-laai’ sukulai ɓa ŋɔmɔleŋ maa waai nyii a tii kɛ la a gɛɛ e nĩa-mɛni kɛi. Mɛni ma e kɛ yɛɛ Ziova a kɛ moi Mose ma nyɛɛi: ‘Wala-wala-laa kaa nyeei a gɛɛ ŋa mɛnii kelee kɛ ŋa ŋwɛlii ŋa gɛi.’

3. Le mɛni ɓe nɛlɛɛi la a gɛɛ ku kukili-ŋa sia e pilaŋ mɛnii ma nyii kɛ a Mose da Eezuɛ-ŋai?

³ Ya ta wɔlɔ ikili-ŋa sia a kɛ Ziova a pai zãai maa kpaaŋ kaa ya ka ikaayɔɔi mai tɛɛi kapɔ? A kɛ bere ɓe gaa la, gɛ ni kwaa Mose da Eezuɛ-ŋai dimɛni-kɔɔŋ-maai kaa nyii-ŋai dife laa ni la a gɛɛ Ziova e kɛ pai zãai maa kpaaŋ e kɛ diai tɛɛi dipɔ. Dɔ̃ya-ŋuŋ-ŋai ŋala-kɔlɔ-kpua-ŋai ŋi sui a pɔri kpɔni kua a gɛɛ ku kulaa-lai su kpanaŋ Ziova kponoi a gɛɛ ŋɔwala-wala-laai koyaŋ fe ma.

MƐNI MAA-KƆRI MOSE DA EEZUƐ-ŊAI DIMƐNI-KƆƆŊ-MAAI SU

4. Tãi ta, le ɓe gɛ Eezuɛ-ŋai tamaa ɣele dikɛ pɛlɛ dikili-ŋa siai a kɛ Ziova e kɛ pai zãai maa kpaaŋ e kɛ diai tɛɛi dipɔ?

⁴ Kwaa mɛnii kaa nyii kɛi. Eezuɛ-ŋai da ‘nua takpɛni-ŋa’ nyii-ŋai dife kɛ ni a Eezuɛ-ɓela dikɛ dikie ma a tãi su koyaa vɛ̃ɛ-kpalaŋ su dikɛɛ lii Gono-tee Lɔii su. (Ɛs. 12:38; Du. 8:15) Nuai nyii-ŋai dife kɛ ni a Eezuɛ-ɓelai, fii e kpɛɛ manai mii. Nyaŋ berei nɔ ɓe Eezuɛ-ŋai tamaa ɣele di gɛ la, di too nuai ŋi pɔ di pɛlɛ diŋuŋ su woo saai Mose ma. (Nɔ. 11:​4-6) Nuai ŋi di pɛlɛ dikili-ŋa siai e pilaŋ mii-sãa takpɛni-ŋai dia da kaa mii Izei. Ee nuai dikɛ diŋuŋ su woo saai Mose mai, nyiŋi e gɛ e pɛlɛ gili-ŋa siai e pilaŋ ɓɛi ma a pɔri sua kaa naai nuai ŋi mɛni mai, kɛlɛ ve kɛ ni a ɓɛi kɔlɔŋɔɔ a pɔri lii naai.—Nɔ. 11:​13, 14.

5-6. Le ɓe kwa pɔri maa-kɔrii mɛnii su nua takpɛni-ŋai tua-pere e gɛ a Eezuɛ-ŋai tamaa ɣele?

⁵ Nua takpɛni-ŋai nyii-ŋai dife kɛ ni a Eezuɛ-ŋai, dife yee-see-mu lɛ ni mɛni-ŋai kelee mɛni ma nyii Ziova e gɛ diɛi, nyaŋ Eezuɛ-ŋai di pɛlɛ dikili-ŋa siai nɔ yɛɛ dia. Mɛni tɔnɔi ti a pɔri saa kɛi a kua. Kwa kɛ nua sama nyii-ŋai yee-see-mu fe diyeei, kua maŋ kwa pai pɛlɛi kuŋɛi naɣiŋ ni mɛni lɛlɛɛ-ŋai mɛi Ziova a gɛi kuɛi. Nyiti a pɔri kɛi a kɛ kwa pɛlɛ kukili-ŋa siai e pilaŋ berei ma kukɛ-ɣeniɛi e kɛ la a bɔlɔi, zãai kɛ kuyeei kpaa a kɛ kwa pɛlɛ tolo kulai nua dia diyeei sãa mɛni ma. Kɛlɛ kulii a pai kɛi a nɛ̃ɛ a kɛ kulii laai zãai kuyeei mɛni ma, a nɛɛ maŋ kpiŋ kukɛ-ɣeniɛi maa e faleŋ.

⁶ Maa nɛ̃ɛi kɛ Eezuɛ-ŋai di dikili-ŋa sia e pilaŋ gono-teei ma Ɣala e gɛ diɛi. E mo dia a gɛɛ dikɛ pai kɛ-ɣeniɛ lɛlɛɛ ŋaa nɛ̃ɛ kulai da seri Gono-tee Lɔii su. Ve mo ni dia a gɛɛ mɛni lɛlɛɛi ŋi e kɛ pai kɛi vɛ̃ɛ-kpalaŋ su. Bere sii tɔnɔi ti su, a pai kɛi a nɛlɛɛ a gɛɛ ku kukili-ŋa sia e pilaŋ mɛni lɛlɛɛ-ŋai dia Ziova aa gono tee a gɛɛ a pai gɛi kuɛ ŋeniɛ ninai su, e tɛɛ la kuŋɛi kɛɛ ma zãai dia nyii-ŋai ve kuyeei ŋeniɛi ŋi sui. Kwa pɔri ŋɔnɔ kukili-ŋa siai e pilaŋ ɣala-kɔlɔ-kpua-ŋa dia nyii-ŋai pai kpɔnii kua a gɛɛ ku kulaa-lai su kpanaŋ Ziova kponoi.

7. Le mɛni ɓe kwa pɔri laai la a gɛɛ Ziova ŋɔwala-wala-laai koyaŋ fe mai?

⁷ Tãi Ziova e mɛnii gaa Nɔŋba 11:23 sui ɓo la Mose mai, tãi ta e kɛ ŋwɛlii Mose e gili-ŋa e pilaŋ mɛni feerɛi ŋi ma: (1) Ŋɔwala-wala-laai koyaŋ fe ma. (2) A pɔri tii kɛi a ŋɔwala-wala-laai kwaa kelee ta ma. Mɛni ma berei maŋ Eezuɛ-ŋai dikɛ la vɛ̃ɛ-kpalaŋ sui, Ziova e kɛ pai pɔrii sua tamaa tɛɛi dipɔ. Ɣala “ŋɔwala-wala-laai” sarai, e nɛ a gɛɛ a pɔri kpɔŋ maa tɛɛi ŋɔnuai pɔ kwaa kelee ta ma. (Ŋu. 136:​11, 12) Mɛni ma, kwa kɛ tɛɛi mɛni-kpanaŋ kelee ta su, kwa pɔri laai la a gɛɛ wala-wala-laa kaa Ziova yeei a gɛɛ e kpɔŋ maa tɛɛ kupɔ tɛitɛi ɓɛi kelee kukaa naai.—Ŋu. 138:​6, 7.

8. Le ɓe pai kpɔnii kua a gɛɛ kufe bɔara-mɛni-maa tɔnɔi kɛ nyii Eezuɛ-ŋai di gɛ vɛ̃ɛ-kpalaŋ sui? (Ya pɔri ŋɔnɔ votooi kaai.)

⁸ Ziova e ŋɔkono-teei ŋaa-see kɛ; e kpuyiri kpaa ŋɔni tamaa tɛɛ ŋɔnuai mɛni ma. Eezuɛ-ŋai tamaa ɣele dife Ɣala sɛɣɛi fe ni ŋɛi-kɛ-maai ŋi mɛni ma. Kɛlɛ di nɛɛ naa a gɛɛ mii-sɛŋ wɛli e dilii laa fɛɛ. Nuai dikɛ nɔ ŋɔnii ŋi tamaa ɣele ŋaa tɛi gie ma a folo tɔnɔ da gbura. Ziova lii e ŋwana “vɛnɛ-ɓelai” ŋi dia e di kula maa kɛ. (Nɔ. 11:​31-34) Kwa pɔri mɛni maa-kɔrii dimɛni-kɔɔŋ-maai su. Kwa ŋwɛlii ku tãi siɣe a gɛɛ kufe kɛ a sɛŋ-wɛli-ɓela. Kɛlɛ a kɛ kukaa a tɔɔ-ɓela kpaa kolo-ɓela, kwa ŋwɛlii ku kuŋɛi kɛ ‘kutɔɔ-sãai laai kɛɛ ma ɣala-taa,’ zukulai ɓa laoi-laa su kpanaŋɔɔ kɛɛ a Ziova da Zisɛ. (Mf. 6:​19, 20; Luu 16:9) Kwa gɛ ti, kwa pɔri laai la a gɛɛ Ziova a pai zãai maa kpaaŋ kaa kuai tɛɛi kupɔ.

9. Le ɓe kwa pɔri kɛi a ku laa lai?

⁹ Ziova a ŋwɛlii a gɛɛ e kpɔŋ maa tɛɛ ŋɔnuai pɔ. Kɛlɛ nyiŋi fe nɛi a gɛɛ kapa kpaa mii-sɛŋ mɛni fe pai wɔlɔ kpanani kua.a Kwa pɔri laai la a gɛɛ Ziova fe pai wɔlɔ nĩai kua. A pai kpɔŋ maa tɛɛi kupɔ kwa kɛ tɛɛi mɛni-kpanaŋ takpɛni-ŋa su. Kwa pɔri nɛi leŋ a gɛɛ ku laai la a gɛɛ Ziova a pai zãai maa kpaaŋ kaa kuai tɛɛi kupɔ? Kwaa mɛni-ŋuŋ feerɛ kaa; (1) kapa mɛni a kpanaŋ kua da (2) kwa kɛ mɛni-kpɛtɛɛ kɛi lonii ma e pilaŋ berei ma kwa pɔri kapa tamaa laai kɛi la tinaa-tuɛ-pere mɛni ma.

KAPA MƐNI A KPANAŊ KUA

10. Mɛni-ŋa kɛɛ leŋ ɓe a pɔri gɛi kapa mɛni e kpanaŋ kuai?

¹⁰ Ŋele-ŋai gbɛɛ-ŋa tãi ŋi su, gɔmɛti mɛni takpɛni-ŋa, kɔ-mɛni, mɛni-kpulu sii takpɛni-ŋa, kpaa kɔlɔ-fela a pɔri kɛ-ɣeniɛ kpanani kua. Da pɔri kutii kulai kuyeei kpaa ku kuyeei sãa kelee laŋ; yɛɛ kupɛrɛi. Nyaŋ a pɔri kɛi a gbanaŋɔɔ a gɛɛ ku kpiŋ zãai maa kpaaŋ kaa kuai sɔlɔ ɓo. Tãi ta a pai kɛi kua a kpa a gɛɛ ku tii nina kɔri ɓɛi kukaa naai, kpaa ku li a kukaayɔɔi kwaa takpɛni ma ɓɛi kwa pɔri kapa tamaa sɔlɔ ɓoi naa a gɛɛ ku pɔri dimɛi kaai. Le ɓe pai kpɔnii kua a gɛɛ ku mɛni-kpɛtɛɛ-ŋa kɛ nyii pai nɛi a gɛɛ ku laai a Ziova ŋɔwala-wala-laai?

11. Le ɓe a pɔri kpɔnii ya kapa mɛni a kpanaŋ ya? (Luu 12:​29-31)

¹¹ Mɛni-ŋuŋ lɛlɛɛi maa-ŋuŋ ya pɔri gɛi ɓa I ilii-sɛlɛŋ mɛni-ŋai ɓo Ziova ma ɣala-fɛliɛ su. (Tá. 16:3) Mare kɛ tare mɛni ma a gɛɛ I mɛni-kpɛtɛɛ lɛlɛɛ-ŋa kɛ, da kpɔŋ maa a gɛɛ ‘ilii fe sɛlɛŋ’ a ŋanaa e pilaŋ mɛnii ma ya tɛɛi zui. (Luu 12:​29-31 lono.) Kanaŋ vɛlii a gɛɛ e kpɔŋ ya a gɛɛ ilii e kɛ a naa zãai iyeei mɛni ma. (1 Te. 6:​7, 8) Lia-woo lɛlɛɛ takpɛni-ŋa kɔri kukɔlɔ-ŋai su a pa mɛnii ma ya pɔri gɛi kapa mɛni a kpanaŋ ya. Nua tamaa daa mo a gɛɛ vilo da zɛŋ-lɛɛ takpɛni-ŋai jw.org fãai ŋai nyii bilaŋɔi kapa mɛni mai, aa kpɔŋ maa tamaa tɛɛ dipɔ.

12. Mare-kɛɛ-ŋa kɛɛ leŋ ɓe a pɔri kpɔnii Korai-nuu ta ma a gɛɛ e mɛni-kpɛtɛɛ lɛlɛɛ kɛ ŋɔkaayɔɔi mɛni ma?

¹² Nua taŋa daa diyee see tii-ŋa mu nyii aa gɛ daa kula dikaayɔɔi kɔlɛ da li kwaa koyaa ma. Kɛlɛ di tamaa ɣele daa gaa a gɛɛ nyiŋi fe kɛ ni a mɛni-kpɛtɛɛ lɛlɛɛ. Mɛni ma, I lɛɛ pai iyee seei tii nina kelee ta mu, ife ikili-ŋa sia nɔ e pilaŋ gapai ma ya pai gɛi; kɛlɛ ikili-ŋa sia a kɛ a pai nɛɛi naa a gɛɛ ka ikaayɔɔi katɔɔi e lɛɛ a gbanaŋɔɔ dɔ̃yai su. (Luu 14:28) Ikpiŋ mare kɛ: ‘Le ɓe pai kɛi a ŋatua-laai a kɛ mve mbɔŋ kɔlɛ? Ŋa pai pɔrii lii goyaŋ-ŋai kelee su, ŋala-woo-ɓo tii su, ŋa tãi siɣe gie ma a ŋabɔlɔ da sisɛ-ŋai?’ A kɛ nĩa-pɛlɛɛ kaa iyeei, ya pɔri ŋɔnɔ ikili-ŋa siai e pilaŋ mare-kɛɛ mɛni-kpanaŋɔɔi ŋi ma: ‘Ŋa pai pɔrii ŋanĩa-pɛlɛɛi tɔɔi leŋ Ziova ‘ŋɔsɛŋ-lɛɛi da ŋɔyao-maai su’ a kɛ mve dikɔlɛ?’ (If. 6:4) Ya kɛ mɛni-kpɛtɛɛ kɛi, tii kɛ a Ŋala-kɔlɔi ŋɔtɔ̃ya-ŋuŋ-ŋai, kɛɛ ikaayɔɔi da ilaoi-ni dikili-ŋa-siai fei.b Kwaa Tony ŋɔmɛni-kɔɔŋ-maai kaa nyii kula Asia lɔii sui. E tii lɛlɛɛ takpɛni-ŋa sɔlɔ ɓo lɔii-ŋuŋ takpɛni su nyii kɛ pa kapa tamaa tɛɛi bɔi. Kɛlɛ gɛɛ aa ɣala-fɛlii, gɛ ni da bɔŋ di lono e pilaŋ mɛnii ŋi mai, e mɛni-kpɛtɛɛ kɛ a gɛɛ ve pai nyee seei dii-ŋai ŋi ta mu. Tony da bɔŋ di mɛni maa faleŋɔɔ-ŋa kɛ a pa berei ma da tii kɛ la a kapai. E mo nyɛɛi: “Mɛni-kpɛtɛɛ ŋi e kpɔŋ ma a gɛɛ ŋa pɔri kpɔŋ maa tɛɛi nua tamaa pɔ a gɛɛ di Ziova kɔlɔŋ, nyaŋ Ziova wɛli kpɔɔi kaa kunĩa-pɛlɛɛi dia. Kwaa naa gaa a gɛɛ kwa sia a nia-wooi nyii gaa Maafiu 6:33 sui, Ziova a pai kumɛi kaai.”

KWA KƐ MƐNI-KPƐTƐƐ KƐI LONII MA E PILAŊ TINAA-TUƐ-PERE MƐNI MA

13. Le ɓe kwa pɔri gɛi lonii ma a gɛɛ kapa e kɛ kuyeei kukpiŋ mɛi kaa mɛni ma kwa pɔlɔ?

¹³ Kwa pɔri ŋɔnɔ nɛi a gɛɛ ku laai a Ziova kwa kɛ mɛni-kpɛtɛɛ-ŋa kɛi e pilaŋ tãi ma kwa pai pɔlɔi lai. Ŋala-kɔlɔi a ku fɔrɔi a gɛɛ ku tii kɛ a gbanaŋɔɔ a gɛɛ ku pɔri kukpiŋ mɛi kaai tinaa-tuɛ-pere. (Tá. 6:​6-11) Tɔ̃ya ma kapa a kumaa kɔ̃ɔ. Mɛni ma gaa a tare mɛni a gɛɛ a kɛ pere kaa naa, ku kukapai ta laai kɛ tinaa-tuɛ-pere mɛni ma. (Ik. 7:12) Kɛlɛ kufe wɔlɔ ŋwɛlii ku kapa mɛni pu fulɔi kukɛ-ɣeniɛi su.

14. Ibulu 13:5 a pɔri kpɔnii leŋ kua a gɛɛ kulii fe sɛlɛŋ a ŋanaa?

¹⁴ Zisɛ e mɛni-pele ta ɓo nyii nɛ a gɛɛ ve a tare mɛni a gɛɛ nuu e kapa tamaa laai kɛ, a kɛ ve Ziova nĩa-mɛni kɛi. (Luu 12:​16-21) Kufe mɛnii kɔlɔŋ nyii pai kɛi tinaa-tuɛ-perei. (Tá. 23:​4, 5; Zĩ. 4:​13-15) Zisɛ e ŋɔnɔ mo a gɛɛ diai kelee ŋwɛlii dikɛ a bolu-ɓelai, maa nɛ̃ɛi di ‘dipolu tɔɔ dikɔ̃liŋ kelee ma.’ (Luu 14:33) Mɛni tɔnɔi ŋi nɔ ɓe kɛ a Korai-ɓelai nyii-ŋai kɛ Zuda zia-ɓelai ditãi ma. Dikɛ a di kpɛtɛɛ a gɛɛ di dipolu tɔɔ diyeei sãa kelee dia. (Ib. 10:34) Saa, kubɔlɔ-ŋai tamaa ɣele daa diyeei sãa kelee laŋ kpɛni fei dife faa ni ma a gɛɛ di diyee pu gɔmɛti mɛni kelee ta su. (Mɛ. 13:​16, 17) Le ɓe aa kpɔŋ dia a gɛɛ di nyiti kɛi? Di laai a gono-tee ŋi nyii Ziova e gɛi. E mo nyɛɛi: “Fe pai wɔlɔ teei ya, kpaa maŋ fe pai nyee kulai imu.” (Ibulu 13:5 lono.) Mɛni ma kwa kɔ a pere sii kelee a gɛɛ ku mɛni-kpɛtɛɛ kɛ tinaa-tuɛ-pere mɛni ma, nyaŋ ku laai la a gɛɛ Ziova a pai kumɛi kaai a kɛ mɛni ta a kɛ nyii kukili fe kɛ ni mai.

15. Kili-ŋa-sia lɛlɛɛ kɛɛ leŋ ɓe maa nɛ̃ɛi e kɛ loŋ-laa-ɓela yeei dinĩa-pɛlɛɛi mɛni ma? (Ya pɔri ŋɔnɔ votooi kaai.)

¹⁵ Lɔii-ŋuŋ taŋa su, loŋ-kaa-ɓela da nĩa-pɛlɛɛ maa sɔlɔ ɓo kpɛni fei da ŋwɛlii a gɛɛ da pɔlɔ, dinĩa-pɛlɛɛi di pɔri dimɛi kaai. Ŋala-kɔlɔi e mo a gɛɛ maa nɛ̃ɛi loŋ-kaa-ɓela di dinĩa-pɛlɛɛi mɛi kaa. (2Kl. 12:14) Tɔ̃ya ma, loŋ-kaa-ɓela da pɔri kpɔŋ maa sɔlɔ ɓoi dinĩa-pɛlɛi yeei da kɛ pɔlɔi, nyaŋ nĩa-pɛlɛɛ tamaa da ŋwɛli di mɛni-kpɛtɛɛ kɛ a gɛɛ di kpɔŋ maa tɛɛ dikaa-ɓela pɔ. (1 Te. 5:4) Kɛlɛ loŋ-kaa-ɓela nyii-ŋai da dikili tɔɔ Ziova mai, da gaa a gɛɛ da lii-nɛ̃ɛ tamaa sɔlɔ ɓo da kpɔŋ maa tɛɛ dinĩa-pɛlɛɛi pɔ a gɛɛ dikɛ a Ziova fɛli-ɓela. Ve dikili-ŋa a gɛɛ da kpɔŋ maa tɛɛi nɔ dinĩa-pɛlɛɛi pɔ a gɛɛ di pɔri dimɛi kaai tinaa-tuɛ-pere.—3 Zɔŋ 4.

16. Loŋ-kaa-ɓela da pɔri kpɔnii leŋ dinĩa-pɛlɛɛi dia a gɛɛ di pɔri dikpiŋ mɛi kaai tinaa-tuɛ-pere? (Ifisiɛŋ 4:28)

¹⁶ Ya kɛ sɛŋ lɛi inĩa-pɛlɛɛi dia a pa berei ma da pɔri dikpiŋ mɛi kaai la tinaa-tuɛ-pere, nɛ a zu ponoɔ imɛni-kɔɔŋ-maai su a gɛɛ I laai a Ziova. Tãi dikaa nii la a nuu-tɔɔi, tii kpanaŋ kɛ pere lɛ dia. (Tá. 29:21; Ifisiɛŋ 4:28 lono.) Da kɛ ɓɔrɔi, kpɔŋ maa tɛɛ dipɔ a gɛɛ di dikɔlɔ pɛrɛ mu mɛnii siɣe a gbanaŋɔɔ. Loŋ-kaa-ɓela da pɔri mɛni maa-kɔrii e pilaŋ Ŋala-kɔlɔi ŋɔtɔ̃ya-ŋuŋ-ŋai dia, di tii kɛ la a gɛɛ di kpɔŋ maa tɛɛ dinĩa-pɛlɛɛi pɔ a gɛɛ di pɔri mɛni-kpɛtɛɛ lɛlɛɛ kɛi e pilaŋ kɔlɔ kɔlɔŋɔɔ ma. Nyiŋi a pai kpɔnii nĩa-pɛlɛɛi dia a gɛɛ di pɔri dikpiŋ mɛi kaai, di ŋɔnɔ pɔri tii tamaa kɛi ŋala-woo-ɓo tii su.

17. Le ɓe kwa pɔri kɛi a ku laa la?

¹⁷ Ziova fɛli-ɓela da pɔri laai la a gɛɛ Ziova a pai zãai maa kpaaŋ kaa diai tɛɛi dipɔ, nyaŋ a ŋwɛlii e gɛ ti. Ŋele-ŋai gbɛɛ-ŋa tãi ŋi su, kwa pɔri laai la a gɛɛ mɛni tamaa a pai kulaa-lai Ziova kponoi su kɔɔni. A nɛ̃ɛ maŋ le e kɛ, kwa ŋwɛlii kukɛ a ku laa la a gɛɛ Ziova a pai tii kɛi a ŋɔwala-wala-laai a gɛɛ e zãai maa kpaaŋ kaa kuai tɛɛ kupɔ. Kwa pɔri laai la a gɛɛ Ziova ŋɔwala-wala-laai koyaŋ fe ma a gɛɛ e kpɔŋ maa tɛɛ kupɔ.