კურთხევეფ, ნამუთ მშობლიურ ქიანაშა დორთას მოჸუნს

ბრელ ჩქინ და დო ჯიმაქ, მიდგაქ დასავლეთიშ ქიანეფშა გინორთეს ოცხოვრებშა, კინ დართეს მშობლიურ ქიანას. იეჰოვაშ დო მოყვასიშ ჸოროფაქ აღძრჷ თინეფ, თიცალ ტერიტორიეფშა გეგნორთესკო, სოდეთ მაქადაგებელეფიშ მეტ საჭიროება რე (მათ. 22:37—39). მუ მსხვერპლშა იდეს თინეფქ დო მუ კურთხევეფ მიღეს შედეგო? მორთ გუვარჩუათ კამერუნს, დასავლეთ აფრიკას, მახორუ და დო ჯიმალეფიშ მაგალითეფ.

«ჯგირ ადგილ „ჩხომიშ ოჭოფალო“»

ჯიმა ონესიმექ 1998 წანას კამერუნშე შხვა ქიანაშა გეგნორთჷ ოცხოვრებშა. თინა 14 წანას საზღვარგარეთის ცხოვრენდჷ. ართშა კრებაშ შეხვალამას თიქ ქადაგებაშ საქმეშ გურშენ მაგალით მირჩქილუ. მომხსენებელქ თქუ: „ჟირ მეგობარქ მიდართას ოჩხომშა დო ართიქ უმოს მეტ ჩხომ ოჭოფას, ვინემ მაჟიაქინ, მიდგაქ ჭიჭე რაოდენობაშ ჩხომ ჭოფჷ, ვეგნურსო თი ადგილშა, სოდეთ მაჟია ჩხომენს?“.

თე მაგალითიქ ონესიმე დაფიქრჷ, ნამდა დირთუკო კამერუნშა დო მეხვარკო ადგილობრივ მაუწყებელეფს, მუშენდა თექ სულიერო ჩხომუაშ მეტ საშვალება რდუ. მარა ოეჭვუდ, ქეშეალებედ დო ვარ, თესხი წანას საზღვარგარეთის ცხოვრებაშ უკულ, მშობლიურ ქიანაშა მერჩქვანა. თეშ გაგებელო ონესიმექ ამშვ თუთათ გეგნორთჷ კამერუნშა. უკულ, 2012 წანას, გვალო დირთჷ მშობლიურ ქიანაშა.

ონესიმე იშინანს: „თექიან სინჩხეეფშა დო ოცხოვრებელ პირობეფშა მიორჩქვანალ მაფუდ. თეს გეძინელ, დარბაზის კინ უგემურ სკამეფშა მაფუდ გიოხუნალ. მარა, მუთ უმოსო გინომღუდ ყურადღება პროგრამაშა, თით უმოსო მოჭყორდუდ თი კომფორტულ სკამეფ, ნამდგას აიშახ გივოხედ“, გოძიცებულო იჩიებ თინა.

ონესიმექ 2013 წანას ჟერალდინშა დექორწინ, ნამუთ ჩხორო წანას საფრანგეთის ცხოვრენდჷ დო უკულ კამერუნშა დირთჷ. თინეფს პირველ ადგილშა თეოკრატიულ საქმეეფ გეურდეს. მუ კურთხევეფ მიღეს შედეგო? ონესიმე იჩიებ: «ჩქი „სამეფოშ მახარობელეფიშ სკოლა“ გემკოფრთით დო ბეთელს ხოლო ვმსახურენდით. ულირ წანას ჩქინ კრებაშე 20 ბიბლიაშ მაგურაფალქ დინათ. ასე ბგინაფლენქ, ნამდა ჯგირ ადგილს ვორექ „ჩხომიშ ოჭოფალო“» (მარ. 1:17, 18). ჟერალდინ იჩიებ: „ველუდინ თიშე ბრელით უმოს კურთხევეფ მიბღჷ“.

ხიოლ, ნამუთ მოწაფეეფიშ მომზადებას მოჸუნს

ჯუდიტიქ ოცხოვრებშა შეერთებულ შტატეფშა გინორთჷ, მარა მსახურებას მეტიშ კეთება ოკოდ. თინა იშინანს: „კამერუნშე ირ დორთაშ დროს იმგარდჷ, მუშენდა თექ მუსხირენ ბიბლიაშ მაგურაფალს იბტენდჷ“. მარა ჯუდიტი დუდის არიდანდჷ კამერუნშა გინულას. თის ჯგირ ხელფასიან სამუშა უღუდ დო თენა ოხვარუდ მუამუშის უმკურნალკო, ნამუთ კამერუნს ცხოვრენდჷ. მარა ჯუდიტიქ მიენდჷ იეჰოვას დო გეგნორთჷ მშობლიურ ქიანაშა. თინა აღიარენს, ნამდა საზღვარგარეთის კომფორტულ ცხოვრება ონატრუდ. თიქ იეჰოვას ქოთხუ, ნამდა ქიმეხვარკო თექიანობაშ მერჩქვანას. იეჰოვაქ ჯუდიტის რაიონულ ზედამხედველ დო თიშ ოსურიშ საშვალებათ ელუკინ გურშა.

ჯუდიტი იშინანს: „სუმ წანაშ დინახალე ოთხ პიროვნებას მივეხვარ დინათკო“. თიქ სპეციალურ პიონერო მსახურება ქიდიჭყ დო ამდღა, მუშ ქომონჯ სემ-კასტელწკუმა ართო, რაიონულ მსახურებას რე. ჯუდიტიქ დო თიშ ოჯახიქ საზღვარგარეთის თიცალ საავადმყოფო დოგორეს, ნამუთ დაფინანსენდჷ მუამუშიშ ოპერაციას. საბედნეროთ, ოპერაციაქ ჯგირო გეთუ.

ელარნა იეჰოვაშე

ჯიმა ვიქტორქ კანადაშა გინორთჷ ოცხოვრებშა. თიშ უკულ, მუთ „გინაჯინალ კოშკის“ წეკითხჷ სტატია გურაფაშ გურშენ, მუშ განათლებაშე დეფიქრჷ. თიქ უნივერსიტეტის გურაფა გოთირუ პროფესიაშ გურაფაშა. ვიქტორი იჩიებ: „შედეგო სამუშა მალას დობგორ დო თეწკუმა ართო პიონერო მსახურება ქიდიბჭყჷ, მუდგაშ კეთება ბრელ ხან რდუ, მოკოდ“. უმოს გვიანო ვიქტორქ კაროლინშა დექორწინ დო თინეფქ კამერუნშა მიდართეს. თე დროს თინეფქ ფილიალიშ ოძირაფშა ქიმერთეს, სოდეთ ჯიმალეფქ ელუჩეს, ნამდა კამერუნს მსახურებაშ გურშენ ქიფიქრესკო. ვიქტორი იჩიებ: „ჩქი ვარიაშ რაგადიშ მიზეზ ვა მიღდეს, ათეშენ გუვაგრძელით უბრალო ცხოვრება დო მიბღით თე წინადადება“. მართალ რე, კაროლინს ჯამრთელობაშ პრობლემეფ უღუდ, მარა თინეფს გინოჭყვიდილ აფდეს კამერუნშა გინულა.

ვიქტორი დო კაროლინქ სრულ დროთ პიონერო მსახურება ქიდიჭყეს, ნამდა ქიმეხვარესკო თინეფს, მიდგას ჭეშმარიტებაშ გაგება ოკოდ. გარკვეულ პერიოდის თინეფ დანაზოგით ცხოვრენდეს. თეშ უკულ, მუსხირენ თუთას, მუშენდეს კანადას, მუდგაქ საშვალება მეჩჷ, კინ დირთესკო კამერუნშა დო გაგრძელესკო პიონერო მსახურება. მუ კურთხევეფ მიღეს შედეგო? თინეფქ „სამეფოშ მახარობელეფიშ სკოლა“ გემკორთეს, სპეციალურ პიონერეფო მსახურენდეს დო ასე მშენებლობას მსახურენა. ვიქტორი იჩიებ: „კომფორტულ ცხოვრებაშ მეტებაქ მიმეხვარეს, იეჰოვაშე ელარნა ჩქინ დუდშა გეგმოფცადითკო“.

ხიოლ, ნამუთ მოუღ შხვეფშა თიშ მოხვარას, ნამდა დუდ მეუძღვინან იეჰოვას

გერმანიას, 2002 წანას, უნივერსიტეტის გურაფაშ დროს, ალანქ იკითხჷ ბუკლეტ „ახალგაზრდეფ, მუჭო გიმირინუანთ ახალგაზრდობაშ წანეფს?“. თექ მოჩამილ ინფორმაციაქ ალანი აღძრჷ, ახალ მიზნეფ უღუდკო. 2006 წანას თიქ „მსახურებას დახელოვნებაშ სკოლა“ გემკორთჷ დო თეშ უკულ მუშ მშობლიურ ქიანას, კამერუნს, დანიშნეს.

ალანქ თექ გვერდ განაკვეთიან სამუშა ქიშუ. უმოს გვიანო, თიცალ სამუშაქ გემკურჩქინდჷ, სოდეთ მეტის გინუგანდეს, მარა ალანი ფიქრენდჷ, ნამდა მსახურებაშო ჭიჭე დრო დასქიდუდ. მუჟამსით თის სპეციალურ პიონერო მსახურება შეთავაზეს, ხეთეშე დეთანხმჷ. დამსაქმებელქ ალანს უმოს ხელფას მიარზუ, მარა თის მტკიცაშო აფუდ გინოჭყვიდილ სპეციალურ პიონერო მსახურება. უმოს გვიანო, ალანქ სტეფანიშა დექორწინ, ნამუთ წანეფს საფრანგეთის ცხოვრენდჷ. მუ სირთულეეფს შეხვად სტეფანიქ კამერუნშა გინულაშ უკულ?

სტეფანი იჩიებ: „ჯამრთელობაშ პრობლემეფ დო ალერგია მიღუდ, მარა ირიათო წამალეფს ფშუნდჷ დო თექ მიმეხვარ“. იეჰოვაქ აკურთხჷ თინეფ მოთვინებაშენ. ალანი აღნიშნენს: „მუჟამსით ართ-ართ შორ სოფელშა ოქადაგებშა იბდით, ნამდგას კატე ჯოხო, თექ მუსხირენ პიროვნება ბძირით, მიდგას ბიბლიაშ გურაფა ოკოდ. ჭიჭე ხანშა ტელეფონით ქიდიბჭყით თინეფწკუმა ბიბლიაშ გურაფა. ჟირ ბიბლიაშ მაგურაფალქ დინათ დო მაუწყებელეფიშ ჯგუფიქ ჩემეყალიბ“. სტეფანი გეუძინანს: „თიშე უმოს დიდ ხიოლ ვა არსებენს, ნამდა მეხვარე ადამიანეფს, დუდ მეუძღვინან იეჰოვას. თაქ მსახურებაქ ქიანაშ ხიოლ მომღეს“. ამდღა ალანი დო სტეფანი რაიონულ მსახურებას რენა.

„ზუსტას თინა ვაკეთით, მუთ ოკო მიკეთებდესკო“

ჟიზელი იტალიას სამედიცინო სკოლას გურაფლენდჷ, მუჟამსით ინათ. თიშა მანგარო იმოქმედ პიონერ წყვილიშ უბრალო ცხოვრებაქ, მით თის ბიბლიას ოგურუანდჷ. ათეშენ თის მსახურებას მეტიშ კეთება ოკოდ. თაშ ნამდა, ჟიზელქ გურაფაშ თებაშ უკულ სრულ დროთ პიონერო მსახურება ქიდიჭყჷ.

ჟიზელს ოკოდ, კამერუნშა დირთკო დო მეტ გაკეთკო იეჰოვაშო, მარა მუდგარენ ოცილუდ. თინა იჩიებ: „იტალიას ცხოვრებაშ უფლებაშე ვარია ოკო მითქუალუდკო დო ჩქიმ ოჯახ დო მეგობრეფ ოკო ქუდომტებუდკო“. თეშ უმკუჯინუო, 2016 წანაშ მესის ჟიზელქ კამერუნშა დირთჷ. ჭიჭე ხანშა თიქ ლეონსშა დექორწინ. კამერუნიშ ფილიალს თინეფს ელუჩეს, ნამდა გეგნორთესკო ჭიჭე ქალაქ აიოსშა, სოდეთ მაქადაგებელეფიშ საჭიროება რდუ.

მუჭო მიშჷ ცხოვრება აიოსის? ჟიზელი იშინანს: „ხშირას მუსხირენ მარას ვამღუდეს სინთე, ტელეფონეფ ვამატენედეს დო ათეშენ უმენტაშ დროს თინეფ გოთიშილ რდუ. ქიდიბგურე, მუჭო მიკეთებუდკო ოჭკუმალ დიშქაშ ფეჩქით. წყარიშ ეიოჭოფშა ფანარით დო ხეშ კაჭკათ სერით მიფშით, მუშენდა თე დროს წყურგილეს ნაკლებ ხალხ რდუ“. მუჭო მიარჩქვანეს თინეფქ აიოსის ცხოვრებას? ჟიზელი იჩიებ: „იეჰოვაშ წმინდა შურიშ, ჩქიმ მეუღლეშ დო ოჯახიშ დო მეგობრეფიშ გურიშ ელაკინათ დო ფინანსურ მოხვარათ, თე ირფელ გეგნიბღით“.

ქორენო ჟიზელი ბედნერ თით, ნამდა მშობლიურ ქიანაშა დირთჷ? „მუშო ოკო რაგად, ქო!“, იჩიებ ჟიზელი, „დუდშე სირთულეეფ მიღდეს დო გურ მაფდეს გოტახილ, მარა საბოლათ თე ირფელს გივორჯგინით. შედეგო, მა დო ჩქიმ მეუღლექ ქიმეფხვადით, ნამდა ზუსტას თინა ვაკეთით, მუთ ოკო მიკეთებდესკო. ჩქი ვონდუთ იეჰოვას დო ასე უმოს ხოლოშიან ურთიერთობა მიღნა თიწკუმა“. ლეონსი დო ჟიზელქ „სამეფოშ მახარობელეფიშ სკოლა“ გემკორთეს დო დროებით სპეციალურ პიონერეფო მსახურენა.

მეჩხომეცალო, მით შხვადოშხვა სიტუაციას გაბედულებას გიმირჩქინანს, ნამდა ბრელ ჩხომ ოჭოფას, მაუწყებელეფ, მით მშობლიურ ქიანაშა ირთუნა, მსხვერპლშა მეულა, ნამდა ქიმეხვარან გულწრფელ ადამიანეფს, მიდგა სამეფოშ ცნობას ირჩქილუანს. მუშო ოკო რაგად, იეჰოვა ვეგიჭყოლიდუანს თე დუდგინოდვალირ მსახურეფიშ ხანდას დო ჸოროფას, ნამუთ თიშ სახელიშ გურშენ გიმირჩქინეს (ნეემ. 5:19; ებრ. 6:10). საზღვარგარეთის ქოცხოვრენთ დო თქვან მშობლიურ ქიანას მაუწყებელეფიშ საჭიროება ქორენ-და, დირთუთო თექ? თაშ ქიმიქციებუთ-და, ქიანაშ კურთხევა გელნა (იგავ. 10:22).