ჩეთხინეთ ირნერ აზრი, ნამუთ ღორონთიშ გურშენ რჩქინას ოწინააღმდეგ!

1. მუ გაფრთხილება მეჩჷ მოციქულ პავლექ ცხებულ ქრისტიანეფს?

მოციქულ პავლექ, პირველ საუკუნეშ ქრისტიანეფ გაფრთხილ: „ვეცხოვრათ ქვეყნიერებაშ ნებაშა“ (რომ. 12:2). მუშენ მეჩჷ პავლექ თეცალ მკაცრ გაფრთხილება ღორონთშა მეძღვინელ დო წმინდა შურით ცხებულ ქრისტიანეფს? (რომ. 1:7).

2, 3. მუჭო ოცად სატანა, გენკმოჸოთან იეჰოვაშ მსახურებას, მარა მუჭო შემლებნა ჩეფთხინუათ არასწორ მიდრეკილებეფ?

² პავლე წუხენდჷ, მუშენდა ნამთინე ქრისტიანწკუმა მოქმედენდჷ სატანაშ ქვეყნიერებას გავრცელებურ არასწორ აზროვნება (ეფეს. 4:17—19). თეცალ მუდგარენქ შილებე ჩქი ხოლო ქუმაღოლან. თე ქვეყნიერებაშ ღორონთ, სატანა შხვადოშხვა მეთოდის გიმირინუანს, ნამდა მუდგათ იჸინ გენკმოჸოთან იეჰოვაშ მსახურებას. თე მიზანიშ მიოჭირნაფალო, სატანა შხვადოშხვა მეთოდის გიმირინუანს. მაგალთო, თიქ შილებე ჩქინ ამბიციეფ, ულირ ცხოვრება, კულტურა ვარდა განათლება გეგმირინუას, ნამდა მუშ მოსაწონ აზროვნება გუვავითარათ.

³ ქორენო შეიოლებერ ჩეფთხინუათ თიცალ მიდრეკილებეფ, ნამუთ ხასიათის მიღნა? (2 კორ. 10:4). ყურადღება ქიმიაქცით, მუს იჩიებ პავლე მოციქულ: „გივორჯგინანთ აზრეფს დო ირნერ სიმაღლეს, ნამუთ ღორონთიშ გურშენ რჩქინას ოწინააღმდეგ, ირნერ აზრის იფთხინუანთ, ნამდა დევემორჩილათ ქრისტეს“ (2 კორ. 10:5). მუშო ოკო რაგად, ღორონთიშ მოხვარათ შემლებნა გივორჯგინათ არასწორ მიდრეკილებეფს. მუჭოთ წამალს შეულებ დუმოსკილიდუან მოწამალუაშე, თეშ ღორონთიშ სიტყვას ხოლო შეულებ დოფთხილუან სატანაშ ქვეყნიერებაშ გლახა შედეგეფშე.

„გეახალით გონება“

4. მუქ გაჸუეს ოთირალქ, მუჟამსით ქიგეგით ჭეშმარიტება დო გინოჭყვიდით იეჰოვაშ მსახურება?

⁴ დეფიქრით, მუქ გაჸუეს ოთირალქ თქვან ცხოვრებას, მუჟამსით ქიგეგით ჭეშმარიტება დო გინოჭყვიდით, ემსახურითკო იეჰოვას. ჩქინდე ბრელქ მიოტუ გლახა საქმეეფიშ კეთება (1 კორ. 6:9—11). მარდულეფ ვორეთ იეჰოვაშ, ნამდა მიმეხვარეს, დუდ დუვანებითკო გლახაშ კეთებას!

5. ნამ ჟირ მოქმედება რე ეჭარილ რომაელეფიშ 12:2-ს?

⁵ დღას ოკო ვეფიფქრათ, ნამდა მეტ მუთუნიშ თირუა ვა მოსაჭირნა. მართალ რე, ნათუაშახ სერიოზულო დაშება მივოტეთ, მარა ირნერო ოკო ვეცადათ, დუდ ევუჩილითუათ ირფელს, მუთ კინ გლახა საქმეეფიშ კეთებას ქუდმოჭყაფუანა. მუ მიმეხვარებნა, ნამდა თექ ვა მოხვადას? პავლე იჩიებ: „ვეცხოვრათ ქვეყნიერებაშ ნებაშა, გეახალით გონება დო დითირით, ნამდა დერწმუნათ, მუ რე ღორონთიშ ნება — ჯგირ, მოსაწონ დო სრულყოფილ“ (რომ. 12:2). თაშ ნამდა, ჟირ მუდგარენიშ კეთება რე საჭირო: პირველ, ოკო ვეფცხოვრათ ქვეყნიერებაშ ნებაშა დო მაჟია, გუვაახალათ ჩქინ გონება, შხვა სიტყვეფით ქოფთქუათინ, დიფთირუათ აზროვნება.

6. მუს ბგურაფლენთ იესოშ სიტყვეფშე, ნამუთ მათეშ 12:43—45-ის რე ინოჭარილ?

⁶ პავლე მუშ სიტყვეფს გარეგნულო თირუაშე უმოსის გულისხმენდჷ. თეშა ჩქინ შინაგან პიროვნებაშ არძა მხარეშ თირუა მიშურს (ქოძირით ჩარჩო „გარეგნულ დო ვარ შინაგან თირუა?“). საჭირო რე დოფთირუათ ჩქინ გონება, მუდგაშა მიშურს ჩქინ დამოკიდებულება, გრძნობეფ დო მიდრეკილებეფ. არძაქ ქოპკითხათ ოკო ჩქინ დუც: ხვალე გარეგნულო დიფთირიო, ნამდა გინიფრთიკო ქრისტიანო დო ვარ შინაგანო ხოლო ვორექ თირელ? თე ჟირ შკას მნიშვნელოვან განსხვავება რე. მათეშ 12:43—45-ის (წეკითხით) იესო იჩიებ, მუ ოკო ვაკეთათ. თაქ ინოჭარილ სიტყვეფ მნიშვნელოვან მუდგარენს მოგურუანა: დასაბაღ ვა რე ხვალე გლახა ფიქრეფიშ ჩათხინაფა; საჭირო რე ჩქინ გონება ღორონთიშ მოსაწონ აზროვნებათ ევოფშათ.

„გეახალით გონებაშ მამოძრავებელ ძალა“

7. მუჭო შემლებნა შინაგან პიროვნებაშ თირუა?

⁷ ქორენო შეიოლებერ შინაგან პიროვნებაშ თირუა? ღორონთიშ სიტყვა მირაგადნა: „გეახალით გონებაშ მამოძრავებელ ძალა დო დითირით ახალ პიროვნებათ, ნამუთ ღორონთიშ ნებათ რე გოჭყაფილ ჭეშმარიტ სიმართლეთ დო ართგურობათ“ (ეფეს. 4:23, 24). მუშო ოკო რაგად, შინაგან პიროვნებაშ თირუა შეიოლებერ რე, მარა თენა ადვილ ვა რე. თეშო დასაბაღ ვა რე ხვალე არასწორ ფიქრეფიშ ჩათხინაფა დო გლახა საქმეეფიშ მეტება. საჭირო რე გუვაახალათ „გონებაშ მამოძრავებელ ძალა“. თეშა მიშურს ჩქინ სურვილეფიშ, მიდრეკილებეფიშ დო მოტივეფიშ თირუა. თენა მუდმივ პროცეს რე დო თეშო მონდომა რე საჭირო.

8, 9. მუჭო იძირე ართ ჯიმაშ მაგალითშე, ნამდა შინაგან პიროვნებაშ თირუა აუცილებერ რე?

⁸ ქობძირათ ართ ჯიმაშ მაგალით, ნამუთ ჯვეშო მოძალადე რდუ. თიქ მიოტუ შუმა დო ძალადობა, დინათ დო მუშ ჯგირ საქციელით იეჰოვაშ სახელს განადიდენდჷ სამეზობლოს. მარა ნათუაშე ჭიჭე ხანშა, ართ ონჯუას, ველუდუნ ფერ გამოცდაშ წოხოლე ქიგედირთჷ. თიშ ჸუჩა შუმილ კოჩიქ ქიმერთჷ დო ჩხუპ ქუდუჭყჷ. დუდშე თე ჯიმაქ მოთვინება გეგმირჩქინ დო ვეიაჸუნ ჩხუპის. მარა, მუჟამსით თიქ იეჰოვაშ სახელ გოლანძღჷ, ჩქინ ჯიმაქ მდგომარეობაშე გიშელ, გეგმორთჷ დო გოლახ თე კოჩ. მუშენ მიქცუ თე ჯიმაქ თაშ? მართალ რე, ბიბლიაშ გურაფაქ მეხვარ თის, მიოტუკო ძალადობა, მარა თის ვაფუდ გაახალებურ გონებაშ მამოძრავებელ ძალა, შხვა სიტყვეფით ქოფთქუათინ, თირელ ვაფუდ შინაგან პიროვნება.

⁹ მარა თე ჯიმას ვემუტებ მონდომა, ნამდა დითირკო (იგავ. 24:16). უხუცესეფიშ მოხვარათ, თინა აგრძელენდჷ წიმიულას დო ჭიჭე ხანშა უხუცესო დენიშნჷ. თეშ უკულ ართ ონჯუას, სამეფო დარბაზიშ წოხოლე თე ჯიმაქ კინ ქეშეხვად თიშნერ სიტუაციას, ნამუთ წანეფიშ წოხოლე უღუდ. ართ შუმილ კოჩის ართ-ართ უხუცესიშ ლახუა ოკოდ. მუჭო მიქცუ თე სიტუაციას ჩქინ ჯიმაქ? თიქ მშვიდას დო თანდაბლურო ქუდურაგადუ შუმილ კოჩის, მუდგაქ სიტუაცია დაწყნარ. ჩქინ ჯიმაქ ჸუდეშა ხოლო ქიმიაზარ თე კოჩ. მუქ მეხვარ თის, ვადინუკო სიმშვიდე დო ვეიაჸუნკო ჩხუპის? თიქ დოთირუ მუშ შინაგან პიროვნება დო გინირთჷ მშვიდ დო თანდაბალ პიროვნებათ. თეცალ მოქმედებათ თიქ იეჰოვაშ სახელ განადიდ.

10. მუშ კეთება რე საჭირო, ნამდა დოფთირუათ შინაგან პიროვნება?

¹⁰ თეცალ ცვლილებეფ ართ უცფას ვა მოხვადუ. თეშო შილებე წანეფიშ დინახალე დიდ მონდომაქ დემესაჭირან (2 პეტ. 1:5). შილებე ბრელ ხან რე ჭეშმარიტებას ვორეთ, მარა თენა ჩქინ შინაგან პიროვნებას ავტომატურო ვა თირანს. ჩქი ირნერო ოკო ვეცადათ, დოფთირუათ შინაგან პიროვნება. მორთ ქობძირათ მუსხირენ კონკრეტულ ნაბიჯ, ნამუშ გინოდგუმა მიმეხვარებნა თეშ კეთებას.

მუჭო გუვაახალათ გონებაშ მამოძრავებელ ძალა

11. მუჭო მიმეხვარებნა ლოცვა შინაგან პიროვნებაშ თირუას?

¹¹ პირველ მნიშვნელოვან ნაბიჯ რე ლოცვა. ჩქი ფსალმუნმაბირეცალო ოკო ფთხუათ ღორონც ლოცვას: „სუფთა გურ ქომუჩ ღორონთ დო ახალ, მტკიცე შურ ქინომიდგჷ“ (ფსალმ. 51:10). ოკო ვაღიარათ, ნამდა ოთირალ მაფნა შინაგან პიროვნება დო თეშო იეჰოვას ოკო ქოფთხუათ მოხვარა. მუშენ შემლებნა ვორდათ დარწმუნებულ, ნამდა იეჰოვა მიმეხვარებნა თე საკითხის? ჩქი გურშა ელამკინანა თი დაპირება, ნამუთ იეჰოვაქ ეზეკიელიშ დროს მახორუ უდუჯერებელ ისრაელეფს მეჩჷ: „ქიმეფჩანქ თინეფს ართ გურს დო ახალ შურს ქინუდგუნქ . . . დო ხორციშ გურს ქინუდვანქ, [ნამუთ მიაჸუნუ ჩქიმ მითითებეფს]“ (ეზეკ. 11:19). იეჰოვა მზათ რდუ ქიმეხვარკო ისრაელეფს, ნამდა დითირესკო დო თინა ჩქი ხოლო მიმეხვარებნა.

12, 13. ა) ფსალმუნიშ 119:59-შ თანახმათ მუშე ოკო დეფიფქრათ? ბ) მუ ოკო პკითხათ ჩქინ დუც?

¹² მაჟია მნიშვნელოვან ნაბიჯ რე ფიქრი. ღორონთიშ სიტყვაშ ირდღაშიან კითხირწკუმა ართო აუცილებერ რე, დრო გეგმვურთათ ნაკითხერშე ფიქრის, ნამუთ მიმეხვარებნა, ქიგებგათ, მუნერ აზროვნება ვარდა გრძნობეფ მაფნა ოთირალ (წეკითხით ფსალმუნი 119:59; ებრ. 4:12; იაკ. 1:25). ჩქი ოკო გაგშეფჩინათ ირნერ მიდრეკილება, ნამუთ სატანაშ ქვეყნიერებას ახასიათენს. თეს გეძინელ, ალალას ოკო ვაღიარათ ჩქინ სისუსტეეფ დო ვადვარკათ მონდომა, ნამდა გივორჯგინათ თის.

¹³ ქოკითხით თქვან დუც: მენჯარიშობას ხომ ვა უღჷ ადგილ ჩქიმ გურს? (1 პეტ. 2:1). ხომ ვეფცქვანქ ჩქიმ წარმოშობათ, განათლებათ ვარდა მატერიალურ მდგომარეობათ? (იგავ. 16:5). ჟიშე ხომ ვეგნვოჯინექ თინეფს, მიდგას ჩქიმდე უმოს დაბალ მდგომარეობა უღჷ ვარდა შხვა ეროვნებაშ რე? (იაკ. 2:2—4). ხომ ვა მობწონს თიცალ მუთუნ, მუდგას სატანაშ ქვეყნიერება ფთავაზენს? (1 იოან. 2:15—17). ხომ ვა მოსიამოვნ თიცალ გართობა, სოდეთ უზნეობა დო ძალადობა რე? (ფსალმ. 97:10; 101:3; ამოს. 5:15). თე კითხვეფშე დაფიქრება მიგოხვამლუანა, ნამ საკითხეფს გოსაჭირნა გაუჯგუშება. აზროვნებაშ თირუათ დო გლახა თვისებეფიშ ჩათხინაფათ ზეციერ მუმას განვადიდენთ (ფსალმ. 19:14).

14. მუშენ რე მნიშვნელოვან ჯგირ მეგობრეფიშ გიშაგორუა?

¹⁴ მასმა მნიშვნელოვან ნაბიჯ ჯგირ მეგობრეფიშ გიშაგორუა რე. ჩქინწკუმა დიდ გავლენა უღნა თინეფს, მიდგაწკუმა ურთიერთობა მიღნა (იგავ. 13:20). სამუშას დო ვარ სკოლას თიცალ ხალხწკუმა მიხვადუნა ურთიერთობა, მიდგას ხე ვეშანწყუე ჩქინდა, გუვავითარათ ღორონთიშ მოსაწონ აზროვნება. მარა თეშ გინაწონს, შემლებნა ქრისტიანულ კრებას დობგორათ ჯგირ მეგობრეფ, მით მიმეხვარებნა გეგმიფრჩქინათ შხვეფიშ ჸოროფა დო ვაკეთათ ჯგირ საქმეეფ (ებრ. 10:24, 25).

გემანგარით რწმენა

15, 16. მუჭო ოცად სატანა, დომთირუან აზროვნება?

¹⁵ რშუდან, სატანაშ მიზან რე დომთირუან აზროვნება. თინა გიმირინუანს ირნერ გავრცელებურ აზრის, ნამდა ღორონთიშ სიტყვას ინოჭარილ ჭეშმარიტებაქ ვემოქმედას ჩქინ აზროვნებაწკუმა.

¹⁶ სატანა ამდღა ხოლო სვენს თიცალ კითხვას, მუნერით ევას კითხჷ ედემიშ ბაღის: „მართალო გიწისო ღორონთიქ . . .?“ (დაბ. 3:1). თე ქვეყნიერებას, ნამდგას სატანა მართუნს, ხშირას იფრჩქილუაფუთ თეცალ ეჭვის ორჩქინანსინ ფერ აზრეფს: „მართალო ვეწონუანსო ღორონთ ართსქესიანეფიშ ქორწინებას? მართალო ვაკონო ღორონც, აღნიშნათ ქირსე დო დაბადებაშ დღა? მართალო გირაგადნანო ღორონთ, ნამდა ვეგნიბათ ზისხირ? მართალო ითხინსო თქვან მოჸოროფე ღორონთ ურთიერთობა მიოტუათ ხოლოშიან პიროვნებაწკუმა, ნამუქით გერიცხჷ?“.

17. მუჭო ოკო მიფქცუათ, მუჟამსით ჩქინ რწმენაშე ეჭვეფს მირჩქინანან ფერ კითხვეფს მისვენა დო კოლოსელეფიშ 2:6, 7-იშ თანახმათ, მუ მაჸუნუ თეს შედეგო?

¹⁷ მნიშვნელოვან რე, ვორდათ დაწმუნებულ თის, მუდგაშ ბწანა. პასუხ ვამჩქუნან ფერ კითხვეფ ქომღუნან-და, თენა სერიოზულ ეჭვეფს გომრჩქინანა. თეცალ ეჭვეფქ შილებე ჩქინ აზროვნებაწკუმა ქიმოქმედას დო რწმენა მემდინუან. მუ ოკო ვაკეთათ, ნამდა თექ ვა მოხვადას? ღორონთიშ სიტყვა მირაგადნა, დიფთირუათ აზროვნება, ნამდა დებრწმუნათ, „მუ რე ღორონთიშ ნება — ჯგირ, მოსაწონ დო სრულყოფილ“ (რომ. 12:2). რეგულარულ გურაფათ, შემლებნა სრულაშე დებრწმუნათ, ნამდა ბიბლიაშე ნაგურეფ ჭეშმარიტება რე. თეს გეძინელ, თიშა ხოლო დებრწმუნებუთ, ნამდა იეჰოვაშ კანონეფ სამართლიან რე. შედეგო ჩქინ რწმენა ხოლო ჩხვიჩხვეფ გოდგუმილ ჯაცალო გემანგარებ (წეკითხით კოლოსელები 2:6, 7).

18. მუ მიმეხვარებნა დუდ ევუჩილითუათ თი გლახა შედეგეფს, ნამუთ სატანაშ ქვეყნიერებას მოჸუნს?

¹⁸ ჩქინ მანგიორო მითინს ვეშულებ ჩქინ რწმენაშ გამანგარება. თენა ჩქინით ოკო ვაკეთათ. ათეშენ გაგრძელით ახალ პიროვნებეფო თირუა. ვემიოტუათ ლოცვა დო ქოთხით ღორონც, ქიმერჩან წმინდა შურ. ჯგირო დეფიქრით ნაკითხერშე დო ქეცადით ქოძირათ მუნერ აზროვნება დო მოტივეფ გიღნა. დოგორით ჯგირ მეგობრეფ დო თიცალ კათაწკუმა დეკინით ურთიერთობა, მით მიგეხვარებნა გავითარათ ღორონთიშ მოსაწონ აზროვნება. თაშ ქიმიქციებუთ-და, შეგალებენა დუდ ეუჩილითუათ თი გლახა შედეგეფს, ნამუთ სატანაშ ქვეყნიერებაშ გლახა გავლენას მოჸუნს დო წარმატებულო „გივორჯგინანთ აზრეფს დო ირნერ სიმაღლეს, ნამუთ ღორონთიშ გურშენ რჩქინას ოწინააღმდეგ“ (2 კორ. 10:5).