ვა ვოდინუათ და დო ჯიმალეფწკუმა მეგობრობა

1. სო შეილებუნა მიოგორუათ ნამდვილ მეგობრეფს?

„ᲑᲒᲝᲠᲣᲜᲓᲷ დო ქობძირ ღორონთიშ ხალხ. მა ვორწყექ დო ბგინაფლენქ თინეფიშ ჸოროფას. ასე მიღჷ, მუდგას ბნატრენდჷ გურით, მეგობრეფშე მეტ პჸუნსჷ იეჰოვაშ ოჯახის“. ქათანხმუთო თე სიტყვეფს, ნამუთ ეჭოფილ რე ობირეშშე „იეჰოვაშ ოჯახ“? მართალო მუშმადიდა კურთხევა რე, იეჰოვაშ ხალხ შქას ნამდვილ მეგობრეფ პჸუნან! (ფსალმ. 119:63). იეჰოვაშ თე დიდ ოჯახის ჸოროფა მაერთიანენა.

2. მუნერ მეგობრობა მოკონა, თანაქრისტიანეფწკუმა მიღუდან?

² ჩქი მოკონა, სულიერ და დო ჯიმალეფწკუმა უბრალოთ ჯგირო ვა ვორდათინ, მუთ შილებენ ხოლოშიან ურთიერთობა მიღუდან თინეფწკუმა, მუშენდა თენა რე ნამდვილ მეგობრობა. ჩქი იეჰოვაშ თაყვანიშმცემელეფიშ ოჯახიშ ნაწილ ვორეთ – ოჯახიშ, სოდეთ არძას იეჰოვაშ დო იესოშ ჸოროფა მაერთიანენა (იოან. 13:35). მარა თეცალ მეგობრობა მუშით ვა მოურს, თის ხანდა ოსაჭირ. სანარღოთ, ჟირ არასრულყოფილ მეგობარ შქას მინშა მუდგარენ პრობლემეფ ხოლო ირჩქინანს დუდის.

3. მუშენ შილებე მინშა რთულ რდასჷ, ვადინუათ მეგობრობა შხვეფწკუმა?

³ თქვა შილებე მიდგარენწკუმა მანგარ ხოლოს რდათჷ დო მიდგარენწკუმა – ვარ. მუშენ ხვადუ თაშ? მუშენდა მიდგაწკუმა ხოლოს რეთინ თის დო თქვა შილებე ართნერ ინტერესეფ დო ხასიათ გიღუდან. მარა შხვა და დო ჯიმალეფწკუმა ხოლო მეგობრულ ურთიერთობა გიღუდანინ თენა, შილებე რთულ რდასჷ, მუშენდა მინშა ვათანხმუთ ართიანს დო განსხვავებულეფ რეთინ თიშენ შილებე გურ ვემგალედან თიწკუმა ართო რინაშა. თეწკუმა ართო, თანაქრისტიან სერიოზულ ფიზიკურ ვარდა ემოციურ ლახალას ქაბრძოლუნ-და, თექ ხოლო შილებე მეგობრობას ეცილას. გუვარჩუათ, მუჭო მიგეხვარებუნა იესოშ მაგალით, თეცალ სირთულეეფიშ დროს ვადინუათ თანაქრისტიანეფწკუმა მეგობრობა. მარა თეიშახ თიშე ქიფჩუათ, მუჭო მიგეხვარებუნა თეს ქრისტიანულ თვისებეფ.

ᲥᲠᲘᲡᲢᲘᲐᲜᲣᲚ ᲗᲕᲘᲡᲔᲑᲔᲤ ᲛᲘᲒᲔᲮᲕᲐᲠᲔᲑᲣᲜᲐ, ᲕᲐᲓᲘᲜᲣᲐᲗ ᲐᲠᲗᲘᲐᲜ ᲨᲥᲐᲡ ᲛᲔᲒᲝᲑᲠᲝᲑᲐ

4. მუჭო შეილებუნა მეგობრობაშ გამანგარება?

⁴ შხვეფიშ ჯგირს ქიდეკვირებუთ-და, თენა მიგეხვარებუნა მეგობრობაშ გამანგარებას. და დო ჯიმალეფშა დროშ გიმორთუალა არძაშ უჯგუშ საშვალება რე თიშ ოძირაფალო, მუ ჯგირ თვისებეფ უღუნა თინეფს. პავლე მოციქულს მანგარო ოკოდ და დო ჯიმალეფწკუმა რინა, ათეშენ თესალონიკელეფს მეჭარ: „ირნერო ვოცადუდით, კინ ქორძირითკო“ (1 თეს. 2:17). ბრელქ ქოძირ, ნამდა მეგობრობაშ გამანგარებელო პირისპირ ჩიებაშ მაჯგირა მუთუნ ვა რე. თეშ ოკეთებელო ბრელ საშვალება გიღუნა. თენა შეილებუნა მსახურებას, კრებაშ შეხვალამეფს დო კონგრესეფს. მარა თინა ხოლო ოკო გარჩქილედან, ნამდა ართიანს დროს გიმურთუნთინ თენა ვა ნიშნენს, ნამდა დღას მუთუნ პრობლემა ვა გაშინა ვარდა, ქოიღუნან-და, მუშით მიგვარებ.

5. მუ მიგეხვარებუნა, პრობლემას ვემეჩათ საშვალება, ეკოირღვან თანაქრისტიანწკუმა მეგობრობა? (კოლ. 3:12).

⁵ ქრისტიანულ თვისებეფ მიგეხვარებუნა, პრობლემას ვემეჩათ მეგობრობაშ ეკორღვაფაშ საშვალება (წეკითხით კოლოსელეფიშ 3:12). თანდაბლობა, მოთვინება, სიკეთე დო შხვეფიშ გაჭირებაშ გურშა მეღალა რე თი თვისებეფ, ნამუთ მიგეხვარებუნა, გიორჯგინათ პრობლემას, ნამდგაქ შილებე ეკოირღვან მეგობრობა. მუჭოთ ზეთ თხილანს მანქანაშ მატორს დო ოხვარ თის, ჯგირო ქიმუშუას, თეშ ქრისტიანულ თვისებეფ თხილანს თქვან მეგობრობას. მორთ გუვარჩუათ სუმ სირთულე, მუდგაქ შილებე ეცილას თანაქრისტიანწკუმა მეგობრობას. თითოეულ სირთულეშ გარჩიებაშ დროს თიშე ხოლო ქიფჩიებუთ, მუჭო მიგეხვარებუნა იესოშ თანდაბლობაშ, მოთვინებაშ, სიკეთეშ დო შხვეფიშ გაჭირებაშ გურშა მეღალაშ მაგალითიშ მეჸუნა, ვადინუათ ართიან შქას მეგობრობა.

ᲛᲣᲟᲐᲛᲡᲘᲗ ᲒᲐᲜᲡᲮᲕᲐᲕᲔᲑᲣᲚ ᲐᲖᲠ ᲛᲘᲦᲣᲜᲐ

6. მუჭო შილებე განსხვავებულ აზრიქ ეკარღვას მეგობრობა?

⁶ სირთულე. მუჟამსით ჟირ ადამიანს განსხვავებულ აზრ უღჷ, თითოეულ დარწმუნებულ რე, ნამდა მუშ აზრ რე სწორ. წერმიდგინით ჟირ ჯიმა, მიდგაქ ვეკინწყუეს სამქადაგებლო ჯგუფიშ ორგანიზებაშ საკითხის. თითოეულს მუშ აზრ მიორჩქ უჯგუშო. თეცალ დროს შხვადოშხვა აზრ უღუნან თექ ადვილო შილებე თი ზომაშა ქიმერთას, ნამდა გეკუცუან ურთიერთობაქ. თინეფქ შილებე მთელ ყურადღება მუნეფიშ აზრიშ დამტკიცებაშა გეგნიღან დო ვართ ხოლო მეგობრობაშ შენარჩუნებაშა, მუთ სიამაყეშ მაძირაფალ იჸუაფ. თეშ გურშენ ალალას ვეჩუეს დო ართ აზრშა ვეშეთანხმეს-და, გურიშმოულაშა გინილენა. დროშ ულაწკუმა ართო, შილებე ართიანშე შორს დეკინან დუდ დო საბოლათ მეგობრობაქ მეუდინან. წერმიდგინით, თე ირფელქ შილებე ართ ჭიჭე ამბეს გეიაჸუნას.

7. მუჭო ოძირუ იესოქ მუშ მოწაფეეფს, ნამდა თანდაბლობა აუცილებერ რე უთანხმოებაშ მაგვარებელო?

⁷ იესო – თანდაბლობაშ მაგალით. იესოქ დაგურუ მუშ მოწაფეეფს, მუ რე აუცილებერ უთანხმოებაშ მაგვარებელო. თენა რე თანდაბლობა. მუდგარენ პერიოდის მოწაფეეფ თიშე ნირზენდეს, მი რდჷ თინეფ შქას უდიდაშ. თეცალ არასწორ აზროვნებას თინეფიშ გურს ტომბას აფუდ ჩხვიჩხვეფ გოდგუმილ. იესოქ თეშ გიშასწორებელო მოწაფეეფს ეუნწყჷ, ნამდა საჭირო რდჷ, შხვეფ მუნეფიშ უმოსეფო მირჩქინესკო (მათ. 20:25–28). თინა მოწაფეეფს ოგურუანდჷ, მუჭო გიმირჩქინესკო თანდაბლობა. ინა ვარ, ღურაშ წოხოლენ სერს თიქ თანდაბლობაშ მაგალით ხოლო ქიმეჩ თინეფს დო თიცალ საქმე აკეთ, მუთ, მუჭოთ წესინ, მოინალეს ოვალუდ – კუჩხეფ უბონ თინეფს (იოან. 13:3–5, 12–16). თეშნერო თიქ ქაძირუ, მუჭო შეულებუდეს ხე შეუნწყუესკო ართიან შქას ჯგირ მეგობრობას. მოწაფეეფ შხვეფს მუნეფიშ უჯგუშეფო ქიმირჩქინანდეს-და, უმოს ადვილ აჸიდეს თინეფიშ აზრიშ დოჸუნა დო, თეწკუმა ართო, უმოს ადვილ აჸიდეს, განსხვავებულ აზრ აღვენუდესინ თიმწკუმა ხოლო ვადინუესკო ხოლოშიან მეგობრობა.

8. მუჭო შეულებ თანდაბლობას მიგეხვარან, მეგობრეფო ქუდოსქიდათ თიმწკუმა ხოლო, მუჟამსით შხვადოშხვა აზრ გიღუნა? (კოლ. 3:13; ქოძირით სურათეფ).

⁸ მუჭო შეილებუნა ვადინუათ მეგობრობა? თანდაბლობა მიგეხვარებუნა, აკაბცხაშენ ვენირზათ დო მთელ გურით აპატუათ შხვეფს (წეკითხით კოლოსელეფიშ 3:13). თე თვისება მიგეხვარებუნა, ხეთეშე ვა მოირთან გურქ დო ჯგირ ურთიერთობა ვადინუათ შხვეფწკუმა (ფსალმ. 4:4). თანაქრისტიანს მუთუნქ გლახათ ქაჸუ რაგადებულქ-და, ოკო რშუდან, ნამდა მინშა არძას მარაგადუაფუნა თიცალ მუდგარენ, მუდგას უკულ მნარღენთ (ეკლ. 7:21, 22). დეფიქრით: „ჩქიმ სიმართლეშ დამტკიცება უმოს მნიშვნელოვან რე დოვარ მეგობრობა?“. მინშა შილებე ისხუნუათ, ქუდაჸუნათ შხვაშ აზრის დო, თე საკითხის იშო-იშო ხოლო ვა დართუთ-და, გურ მშვიდას გაჸინა.

9. მუჭო მიგეხვარებუნა თანდაბლობა, მუჟამსით უთანხმოება ვეგვარებ? (იგავ. 17:9).

⁹ თანდაბლობა თი დროს ხოლო გოხვარუნა, მუჟამსით უთანხმოება ვეგვარებ. ჯგირ იჸუაფ, ვენირზათ თიშ დამტკიცებელო, ნამდა თქვან აზრ რე მართალ (წეკითხით იგავეფიშ 17:9; 1 კორ. 6:7). მიზანო გიღუდან, ვეკოიცუან მეგობრობაქ. თექ ბრელს შეიალებუ მაჟია მხარეწკუმა პრობლემაშ მაგვარებელო გემუან ჩიებათ (ფსალმ. 34:14). შილებე თაშ უწუათ: „ჩქინ თეზმახანიშ მეგობრობაშ ხათრით, ქიფჩუათ თიშ გურშენ, მუდგაქ მოხვად“. მზათ რდათჷ, თიშ ორაგადეთ, ნამდა მუდგარენეფ თქვან ბრალ რდჷ, გარჩქილენა, მუს გინაფლენს დო ბოდიშ ქუწუათ. ბოდიშ აშო ქოიწუეს-და, თანდაბლურო ქაპატით (ლუკ. 17:3, 4). რშუდან, თქვან მიზან თინა ვა რე, დამტკიცათ, მი რე მართალ დო მი – მტყუან, თქვან მიზან რე, უთანხმოება ულირს ქუჸუნუათ დო ართიანწკუმა მეგობრობა ვადინუათ (იგავ. 18:24).

ᲛᲣᲟᲐᲛᲡᲘᲗ ᲒᲐᲜᲡᲮᲕᲐᲕᲔᲑᲣᲚᲔᲤ ᲕᲝᲠᲔᲗ

10. მუშენ შილებე გაიჭირდან შხვეფწკუმა დამეგობრებაქ?

¹⁰ სირთულე. შილებე გიჭირდან თიცალ და დო ჯიმალეფწკუმა ურთიერთობა, მით თქვანდე განსხვავებულ რე. ნამთინეს შილებე თიცალ ხასიათ ვარდა ჩვევა უღუდას, მუთ გაღიზიანენა. ნამთინეშენ შილებე ფიქრენდათ, ნამდა ჭიჭე უცნაურ რე, მუშენდა ვა უჸორს ჩიება ვარდა პირიქით, ბრელს იჩიებ. თე ირფელიშ მიზეზ შილებე თინა რდასჷ, მუდგაქ ცხოვრებას აჸუ მიკაულარქ, ვარდა კულტურა, ნამდგას ირდჷ. შილებე თქვა მანგარო გიჸორდან ხალხწკუმა ურთიერთობა, მარა მიდგარენ მორდებუან რდასჷ, ვარდა პირიქით, თქვა რდათჷ მორდებუან დო შხვა რდასჷ აქტიურ.

11. მუქ მეხვარ იესოს, თიცალეფიშ მეგობარ ჸოფედუკო, მით მუშე განსხვავებულეფ რდესჷ?

¹¹ იესო – მოთვინებაშ მაგალით. იესო თიცალ ხალხწკუმა მეგობრენდჷ, მიდგას მუშე განსხვავებულ ხასიათ უღუდ. მაგალთო, იაკობიქ დო იოანექ იესოს ღორონთიშ სამეფოს განსაკუთრებულ ადგილეფ თხუეს, მუდგათ ოძირუეს, ნამდა ნაბეტან წარმოდგენა უღუდეს მუნეფიშ დუდშე (მარ. 10:35–37). მარა იესოქ პირიქით, თანდაბლურო ქიდიტუ ზეცას საპატიცემლო ადგილ დო დედამიწაშა ქუმორთჷ (ფილ. 2:5–8). არგამა რე, თინეფ მანგარო გენესხვავებუდეს იესოშე. მარა იესო უთვინენდჷ ქოთ იაკობის დო იოანეს დო ქოთ შხვა მოციქულეფს.

12. მუქ მეხვარ იესოს, მუთვინუკო მუშ მეგობრეფს?

¹² იესო სრულყოფილებას ველუდ მუშ მოწაფეეფშე დო ვა ფიქრენდჷ, ნამდა ირფელშენ სწორ დამოკიდებულება აღვენუდეს. თის უჩქუდ, ნამდა, იაკობ დო იოანეცალო, ბრელ მოწაფეს ოკოდ დიდებაშ მეღება (მარ. 9:34). იესოქ ხოლო თიცალ კულტურას ირდჷ, სოდეთ ხალხ მანგარ ყურადღებას აქციენდჷ სახელს დო მდგომარეობას, მუდგაშ გურშენ ჯგირო არჩქილედ მოწაფეეფიშ. ათეშენ თინა უთვინენდჷ მოწაფეეფს დო არზენდჷ დროს, გურშე გეშეჸოთესკო სიამაყე დო დიდებაშ მეღებაშ სურვილ, მუთ წანეფიშ დინახალე აფუდეს გავითარებულ (მარ. 10:42–45).

13. მუჭო მიგეხვარებუნა მოთვინება, ვადინუათ მეგობრობა? (ეფეს. 4:2).

¹³ მუჭო შეილებუნა ვადინუათ მეგობრობა? ქეცადით, ირფელ გაკეთათ თიშო, ნამდა ქუგუგათ თი თანაქრისტიანეფს, მიდგაშ თვისებეფ დოვარ ხასიათ გაღიზიანენა დო თეშნერო მუთვინათ თინეფს (იგავ. 14:29). არძას ჩქინ-ჩქინ ხასიათ დო ჩვევა მიღუნა. მუშო ოკო რაგად, თენეფ არძა გლახა ვა რე, უბრალოთ ჩქინ პიროვნებაშ ნაწილ რე. ჩქი ხომ მანგარო ვაფასენთ, მუჟამსით შხვეფ მიგენა?! (წეკითხით ეფესოელეფიშ 4:2). მნიშვნელოვან რე, თქვა ხოლო და დო ჯიმალეფ მუნერ ხასიათიშ რენან თიცალეფ გიჸორდან დო ვეცადათ, თინეფ თქვან სტანდარტეფს ენახუნუათ. მაგალთო, დეფიქრით, მუ რთულ რე თინეფშო, მით მორდებუან დო წყნარ რე, შხვეფწკუმა ურთიერთობა დო ჩიება. თეცალეფწკუმა ურთიერთობაშ დროს შილებე მოთვინებაქ დეგესაჭირან. მოთვინება თინეფწკუმა ხოლო გოსაჭირუნა, მიდგას უჸორს შხვეფწკუმა ურთიერთობა დო ჩიება. თქვა ოკო ველუდათ, ნამდა თითოეულშო არძაშ უჯგუშ მეგობარ იჸუაფუთ, მარა ართ მუდგარენ ოკო რშუდან: თიცალ ქრისტიანეფწკუმა ხოლო შეილებუნა გემუანო ითანამშრომლათ, მით თქვანდე მანგარ განსხვავებულეფ რენა.

14. მომთმენეფ ქიჸუაფუთ-და, მუშა გინიღანთ ყურადღებას?

¹⁴ მოთვინება გოხვარუნა, ყურადღება და დო ჯიმალეფიშ ჯგირ თვისებეფშა გეგნიღათ. თე შემთხვევას განსხვავებულობას ნაკლებო მირჩქინანთ შხვეფწკუმა მეგობრობაშ მოცილეთ. მაგალთო, იაკობ დო იოანეს ეგოისტურ სურვილ უღუდეს დო დიდებაშ მეღება ოკოდეს, მარა თინეფიშ საქციელშე თიქ ხოლო გემკორჩქინდჷ, ნამდა ღორონთიშ სამეფო თინეფშო რეალურ რდჷ. ზუსტას თეს მიაქცუ იესოქ ყურადღება დო დაფას თინეფიშ რწმენა. თეშნერო, მუჟამსით ყურადღება თქვან მეგობრეფიშ ჯგირ მხარეეფშა გაჸინა გინოღალირ, მიაჸუნუთ იესოშ დო იეჰოვაშ მაგალითის.

15. მის ოკო თხუათ მოხვარა, ნამდა ვაიდინან მეგობრულ ურთიერთობაქ თინეფწკუმა, მით თქვანდე განსხვავებულეფ რენა?

¹⁵ არძაშ უმოს მთავარ, მუდგაშ კეთება შეილებუნან, თინა რე, ნამდა ქილოცათ დო იეჰოვას თხუათ, მეგობრულ ურთიერთობაქ ვაიდინან თიწკუმა, მით თქვანდე განსხვავებულ რე. დეფიქრით, მუ სიტუაციეფს შილებე თქვან მოთვინებაქ გეგმიცადას დო წინასწარ ქილოცით, ნამდა სიმშვიდექ ვაიდინან. ვაგგოჭყორდან, ჩქინ გუმაჭყაფალს, იეჰოვას, არჩქილე, ნამდა არძა შხვადოშხვანერეფ ვორეთ. ათეშენ რჯერდან, თის ჯგირო უჩქჷ, მუ გოსაჭირუნა თიშო, ნამდა ვადინუათ მოთვინება. მუჟამსით გიჭირა მოთვინებაშ გიმორჩქინა, ქოთხით იეჰოვას წმინდა შურ, ნამდა შეგალებუან თქვან ემოციეფიშ გაკონტროლებაქ (ლუკ. 11:13; გალ. 5:22, 23).

ᲛᲣᲟᲐᲛᲡᲘᲗ ᲓᲐ ᲓᲝ ᲯᲘᲛᲐᲚᲔᲤᲡ ᲤᲘᲖᲘᲙᲣᲠ ᲕᲐᲠᲓᲐ ᲔᲛᲝᲪᲘᲣᲠ ᲯᲐᲜᲛᲠᲗᲔᲚᲝᲑᲐᲨ ᲞᲠᲝᲑᲚᲔᲛᲐ ᲣᲦᲣᲜᲐ

16. მუქ შილებე მაჸუნას, მუჟამსით და დო ჯიმალეფს ფიზიკურ ვარდა ემოციურ ჯანმრთელობაშ პრობლემა უღუნა?

¹⁶ სირთულე. მუჟამსით თანაქრისტიანს ფიზიკურ ვარდა ემოციურ ჯანმრთელობაშ პრობლემა უღჷ, შილებე თიცალ მუდგარენ თქუას ვარდა თეშ მიქცუას, მუდგაშ მიკოშქუმალაქ გაიჭირდან. მაგალთო, თის შილებე ხვალე რინა უსხუნუდას, აკაბცხაშე გურ ელაჭვუდას ვარდა თქვა ველუთინ ფერ რეაქცია უღუდას მუდგარენეფშენ. შილებე თიქ მუშ ნარაგადით ვარდა საქციელით გურ გიწყუნუან (იობ 6:2, 3). რახანს ბოლოშა ვა გარჩქილენა, მუ გინმუღ დო მუშა აფჷ თის გარზებელ, შილებე ნაბეტანს ელუდათ თიშე.

17. მუს გებულენთ იესოშ გურშენ თევრეშე, მუჭო მეუდირთჷ თიქ ბარტიმეოსის?

¹⁷ იესო – სიკეთეშ დო შხვეფიშ გაჭირებაშ გურშა მეღალაშ მაგალით. იესო რდჷ კეთილ დო გურშა მეუღუდ თინეფიშ გაჭირება, მით იტანჯებუდ. თაშ თინეფს ხოლო ოქცუდ, მიდგას პირველო ორწყედ. მაგალთო, ქიგიფშინათ ბარტიმეოსიშ შემთხვევა, მით თოლს ვარწყედ. მუჟამსით თიქ ქიგეგ, ნამდა იესო მიშჷ, ხონარმაღალო ქიდიჭყჷ ძახინ, ნამდა თიშ ყურადღება მიქცუკო. ხალხშე ნამთინე თის ურაგადუდ, გაჩერდია, მარა თიქ ხოლო უმოსო ეუკინ ხონარს, მუშენდა მანგარო ოკოდ, იესოქ დასქილიდუკო. შილებე ნამთინექ გეღიზიანუკო თიშ უცნაურ საქციელიშ გურშენ. მარა ბიბლიას ჭარჷ, ნამდა იესოს „მანგარო ეცოდ“. თე ფრაზა თის ნიშნენს, ნამდა იესოქ მიშელ თე კოჩიშ მდგომარეობაშა (მათ. 20:34; მარ. 10:46–52). თიქ გემუანო დურაგადუ ბარტიმეოსის, ქაცქუ მუშ გიმორჩქინელ რწმენაშ გურშენ დო თოლსინთე დურთინუ.

18. მუჭო ოკო მექცუე მეგობარს, ნამდგას პრობლემეფ უღჷ? (1 თეს. 5:14).

¹⁸ მუჭო შეილებუნა ვადინუათ მეგობრობა? რდათჷ კეთილეფ დო გურშა მიღით შხვეფიშ გაჭირება. თე თვისებეფ მიგეხვარებუნა, გურშა ეუქექუათ თი და დო ჯიმალეფს, მიდგას ფიზიკურ დოვარ ემოციურ ჯანმრთელობაშ პრობლემა უღუნა (წეკითხით 1 თესალონიკელეფიშ 5:14). რშუდან, ნამდა ნამდვილ მეგობრეფ ირო მზათ რენა, მეხვარან ართიანს, განსაკუთრებულო გაჭირებაშ დროს (იგავ. 17:17). თეცალ მეგობარ შხვაშ გაჭირებას ხვალე გურშა ვემიღანსინ, ირფელ გაკეთენს, ნამდა ქელუდირთას ემოციურო, იჸუაფუნო თენა გურიშემაკინალ სიტყვეფით დოვარ პრაქტიკულ მოხვარათ.

19. მუჭო შეილებუნა სიკეთე უკეთათ თანაქრისტიანს დო გემშართათ თიშ მდგომარეობაშა? (ქოძირით სურათეფ).

¹⁹ მუ პრაქტიკულ ნაბიჯეფით შეილებუნა მეგობარს სიკეთე უკეთათ დო თიშ მდგომარეობაშა მიშართათ? მუშო ოკო რაგად, თქვა ვა გასქილიდენა თანაქრისტიან ლახალაშე, მარა შეილებუნა ირნერო ქეცადათ, მიშელათ თიშ მდგომარეობაშა (მათ. 7:12; 1 პეტ. 3:8). მთელ გურით ქურჩქილით, მუჟამსით მუშ პრობლემაშენ გეჩიებუნა. სიტუაციას ქუხუჯანს-და, ქუწით მუდგაინ, მუთ გურშა ეუქექუანს თის (იგავ. 12:25). ფრთხილას რდათჷ, ნამდა არასწორ დასკვნეფიშ გიშაღალაქ ვეგშაირთან (იგავ. 18:13). ქეცადით, მუთვინათ დო ნაბეტანს ველუდათ თიშე (ეფეს. 4:32).

20. მუნერ მეგობარ გოკონა, რდათჷ?

²⁰ არძა მანგარო ვაფასენთ თი მეგობრეფს, მით ქრისტიანულ საჯიმალოს პჸუნა. მარა, რახანს არასრულყოფილეფ ვორეთ დო, თეწკუმა ართო, ჩქინდე ბრელს გლახა მუდგარენეფ მაფუნა გინნაღელ, მინშა თიცალ მუდგარენს ვორთუთ ვარდა იფჩიებუთ, მუდგათ გურს უწყუნუანთ შხვეფს. თე დროს მანგარ მარდულ ვორეთ თი და დო ჯიმალეფიშ, მით ახრებულო ვეკარღვანა ჩქინწკუმა მეგობრობას, მუშენდა რენა თანდაბალეფ, მომთმენეფ, კეთილეფ დო მიშულა ჩქინ მდგომარეობაშა. მორთ ირფელ გუვაკეთათ, ნამდა ჩქი ხოლო თეცალ მეგობარ ვორდათ შხვაშო.