მუჭო მიღუდან ჯგირ ურთიერთობა ჩქინ ხოლოშიანეფწკუმა, მით ვამსახურუნა იეჰოვას

1, 2. მუშენ შილებე გილმელან ურთიერთობაქ ხოლოშიანეფწკუმა, მუჟამსით ჭეშმარიტებას ბგებულენთ?

ᲘᲔᲡᲝᲥ ართ კოჩის, ნამდგას ოკოდ, თიშ მიმაჸუნალო გინირთუკო, თეცალ მუდგარენ უწუ: „მეუ ჸუდეშა სქან ნათესეეფშა დო ქოუწი ირფელ, მუ აკეთ იეჰოვაქ სქანო“ (მარ. 5:19). იესოქ თე კოჩის თენა თიშენ უწუ, ნამდა უჩქუდ, მუჭოთ წესინ, მუჟამსით ადამიან ჯგირ ამბეს გებულენს, მანგარო ოკო, თინა მუშ საჸოროფო ადამიანეფს ხოლო ქეჩუას.

² მუჟამსით სახიოლო ამბე გეგით, ალბათ შურ გოლუდეს, მუჟამ ეჩიებუდით თიშ გურშენ თქვან ხოლოშიანეფს. მარა შილებე თინეფს შურო ვემეწონეს თე ამბექ ვარდა ხოლო შილებე თეშ გაჸუეს თინეფშა ენწყუმილქ თქვან რწმენაქ, ნამდა თექ გაღიზიან თინეფ. მუ ოკო ვაკეთათ, ნამდა ოჯახიშ წევრეფწკუმა დო ნათესეეფწკუმა ურთიერთობაქ ვეგლმელან დო გილალუაფირ ქუმაფუნან-და, მუჭო გიშვონწყუათ თინეფწკუმა ურთიერთობა თეშ, ნამდა იეჰოვა ხოლო ვა ვოწყინუათ?

3. მუს გუვარჩიენთ თე სტატიას?

³ თე სტატიას ჩიება მაღვენუნა, 1) მუჭო მიმეხვარებუნა ჩქინ ნათესეეფიშ მდგომარეობაშე ფიქრ, ყურადღება ქიმვაქცუათ თინეფს თიმწკუმა ხოლო, მუჟამსით ვაინტერესუნა ჭეშმარიტება, 2) მუ მიმეხვარებუნა, გურ ვეგნუჸუნუათ თინეფს, ჸინჩას ქომრაგადუნა ვარდა ქუმოქცუნან-და, 3) მუჭო შილებე მოთვინებათ ჯინათ დო იმენდ ვა ვოდინუათინ თეთ ქიმვეხვარათ ჩქინ ნათესეეფს ჭეშმარიტებაშ გაგებას დო 4) მუჭო შემლებუნა ქუვოგინაფუათ თინეფს, ნამდა მანგარო მიჸორა.

ᲓᲔᲤᲘᲥᲠᲘᲗ ᲗᲘᲜᲔᲤᲘᲨ ᲛᲓᲒᲝᲛᲐᲠᲔᲝᲑᲐᲨᲔ

4. მუს ორთუდ იესო, მუჟამსით ხალხ ხეთეშე ვა ღებულენდჷ სახიოლო ამბეს?

⁴ იესო ვეიჸოთანდჷ გურს თინეფიშ მოხვარაშა, მით ხეთეშე ვა ღებულენდჷ სახიოლო ამბეს. თიქ მუშ დუდ მებინეხეს შეადარ, ნამდგაქ ქიანაშ უსოფუ ურგებელ ლუღიშ ჯას, ნამდა გემკაღალაფუკო (ლუკ. 13:6–9). თე მაგალით მიჸონუნ თიმწკუმა უკვე სუმ წანა რდჷ მიკულირ, მუთ იესო ოცადუდ, იუდეველეფს რწმენა გოურჩქინუკო დო მუშ მიმაჸუნალეფო გინაშქვუკო. მუშენ აგრძელენდჷ თინა თე ხალხიშ მოხვარას? იესოს უჩქუდ, მუ მდგომარეობას რდჷ თე ხალხ, ოცოდუდ თინეფ დო ათეშენ გურ ვეუოლუდ თინეფიშ მოხვარაშა.

5. მუშენ ოცოდუდ იესოს იუდეველეფ?

⁵ იესოს ოცოდუდ იუდეველეფ, მუშენდა რელიგიურ ლიდერეფ ვახვარუდეს თინეფს ღორონთიშ გაჩინებაფას. თინა ორწყედ, ნამდა ხალხ „უჭყიშე შხურცალო“ რდჷ (მარ. 6:34). ღურაშახ ჭიჭე ხანით ადრე, იესო იერუსალიმს გიანგარდჷ, მუშენდა უჩქუდ, ნამდა თექიან მახორუეფიშ უმენტაშ რწმენა ვა უღუდუნ თიშენ დოღურუდ (ლუკ. 19:41–44). თეშნერო, მუჟამსით ჩქი ხოლო დეფიფქრებუთ, მუ მდგომარეობას რენა ჩქინ ნათესეეფ დო ოჯახიშ წევრეფ დო მუნერო ოსაჭირუნა სახიოლო ამბეშ გაგება, უმოსო მუმაკორინენა თინეფიშ მოხვარა.

6. მუშენ ოკო ვემიოლან გურქ ჩქინ ხოლოშიანეფიშ მოხვარაშა? (გალ. 6:9).

⁶ წეკითხით გალატელეფიშ 6:9. შილებე ჩქინ ხოლოშიანეფს იეჰოვაშ გაჩინებაფა ამდღა ვაკოდან, მარა გურ ოკო ვეიპჸოთათ დო იშენით გუვაგრძელათ თინეფშა ჯგირიშ კეთება. მუჭოთ მიჩქუნა, დრო რე საჭირო თიშო, ნამდა კოჩიქ ჩეთხინუას თი ირფელ, მუთ ძელ დო ძვალს უღჷ დო გურჩქინდას ღორონთიშ რწმენაქ. ართ დროს შილებე თქვა ხოლო „უიმენდოთ დო უღორონთეთ რდითჷ“ (ეფეს. 2:12). მარა ამდღა ღორონთის იჩინენთინ თენა თიშ ჭყოლოფა რე, ნამდა მიდგარენს გურ ველაფ თქვან მოხვარაშა. თაშ ნამდა, მონდომას ვა დარკენთ-და, შილებე თქვა ხოლო ქუმგაჩან საშვალებაქ, გაჩინებაფუათ იეჰოვა ნათესეეფს დო ოჯახიშ წევრეფს.

ᲛᲣ ᲝᲙᲝ ᲕᲐᲙᲔᲗᲐᲗ, ᲸᲘᲜᲩᲐᲡ ᲥᲝᲛᲠᲐᲒᲐᲓᲣᲜᲐ ᲕᲐᲠᲓᲐ ᲥᲣᲛᲝᲥᲪᲣᲜᲐᲜ-ᲓᲐ?

7. მუ შილებე ოცილუდუკო იესოშ ჸონერ ჯიმალეფს ჭეშმარიტებაშ მეღებას?

⁷ იესოშ ჯიმაჸონერეფს ხოლო გაგებულ აჸიდეს თი სასწაულეფიშ გურშენ, ნამუთ იესოქ გალილეას აკეთ (ლუკ. 4:14, 22–24). მარა დუდშე თინეფს ვა წანდეს იესოშ (იოან. 7:5). საინტერესო რე, მუშენ? თენა ბიბლიას ვა ჭარჷ. მარა, მუჭოთ ღორონთიშ სიტყვაშე ბგებულენთ, ნამთინე იუდეველს ჭეშმარიტებაშ მეღებას თინა ოცილუდ, ნამდა ხალხშე წინააღმდეგობაშ დო თხოზინიშ ოშქურუდ (იოან. 9:18–22). შხვეფ ხოლო იესოს ბაღანობაშე იჩინენდეს დო უჭირდეს თიშ დაჯერა, მუნერო შილებედ თინა მესია ჸოფედუკო (მარ. 6:1–4). ვა რე გამორიცხულ, იესოშ ჯიმალეფშა ხოლო თე ირფელ მოქმედენდუკო. ეგება, თქვან ნათესეეფს ხოლო თეცალ მუდგარენეფ ოცილუდან ჭეშმარიტებაშ მეღებას.

8. მუშენ შილებე ჩქინ ოჯახიშ წევრეფ ჸინჩას მეჩიებუდან დო მოქცუდან?

⁸ ქეცადით, ქინანჭათ, მუშენ შილებე გეჩიებუდან დო გოქცუდან ჸინჩას. ვა რე გამორიცხულ, იესოშ ჯიმალეფ ხოლო ოკათუდესკო თიშ ნათესეეფს, მით თიშ გურშენ იჩიებუდეს, „ჭკუაშე გინულებუნია“ (მარ. 3:21). მუშენ შილებე თინეფ თაშ ფიქრენდესკო? კონტექსტშე იძირე, ნამდა იესოს თიზმა ამბე უსოფუანდჷ, ოჭკუმშა ხოლო ვა ჩოდუდ (მარ. 3:20). შილებე იესოშ ნათესეეფ ფიქრენდეს, ნამდა თინა ნაბეტან ფანატიკურო იქციებუდ. ეგება, ჩქინ ნათესეეფ ხოლო თაშ რდანჷ დო ფიქრენდან, ნამდა გვალო გინოჸუნელ ვორეთ ჩქინ რწმენას. თაშ ქოფიქრენან-და, ჯგირ იჸუაფ, ჩქინ საქმეეფით ქუვოძირუათ, ნამდა, მართალ რე, ჩქინ რწმენა მანგარ მნიშვნელოვან რე ჩქინო, მარა თენა ვა ნიშნენს, ნამდა თიშ მეტ შხვა მუთუნ ვა მოინტერესუნა.

9. მუქ შილებე მეხვარას ოჯახიშ წევრეფს, დითირუან აზრ ჩქინ გურშენ? (1 პეტ. 3:1, 2; ქოძირით სურათეფ).

⁹ თქვან საქმეეფქ იქადაგას. გემუანო ქივეჩიებუთ დო ჭკვერულო ქიმუდირთუთ-და, შილებე ხოლოშიანეფქ დითირუან აზრ ჩქინ გურშენ (წეკითხით 1 პეტრეშ 3:1, 2). მაგალთო, წერმიბდგინათ ჩქინ და, ნამდგას იეჰოვაშ მოწმე ვა რენ ფერ ქომონჯ ჸუნსჷ. შილებე თინა კრებეფშა დო მსახურებაშა გილურსინ თიშ გურშენ, ქომონჯ იღიზიანებუდას ვარდა ხოლო ფიქრენდას, ნამდა მუშ ოსურ დღას მუწკუმა ვა რე. მუშო ოკო რაგად, ჩქინ დას ვაკო, მუშ ქომონჯ თაშ გინაფლენდას დუდის. ათეშენ, თიქ შილებე დოთირუას მუშ სულიერ საქმეეფიშ განრიგ, ნამდა უმოსო რდასჷ ქომონჯწკუმა. მაგალთო, შილებე თიცალ დროს დაგეგმას მსახურება, მუჟამსით ქომონჯის ხოლო ვა ჩოდჷ ვარდა ჸუდეს ვა რე. თეცალ ჭკვერულ მერინაქ დო დოხუჯაფაქ შილებე ქიმეხვარას ჩქინ დაშ ქომონჯის, აზრ დითირუას ჩქინ რწმენაშე.

10. მუჭო გიმმოდირთუნა იესოშ მაგალით, მუჟამსით ჩქინდე გლახას იჩიებუნა?

¹⁰ ვეფიქრათ, ნამდა თინეფიშ არძა სიტყვას პასუხ ოკო მეჩათ. მუჟამსით იესოს ეკაწამეს, შუმა-ჭკუმუას რენია გინოჸუნელ, თის მუთუნიშ მტკიცება ვა დუჭყაფ. თეშ მანგიორო, ხალხის ელუჩ, ფაქტეფს ქიდეკვირესკო (მათ. 11:19). იესოშ საქმეეფ ოძირანდჷ, ნამდა თინა გაწონასწორებულ რდჷ ირნერ საკითხის – ვართ ირფელშე იჩიებუდ ვარიას დო ვართ დროშტარებას რდჷ გინოჸუნელ (იოან. 2:2, 6–10). თეშნერო, თქვა ხოლო, ვეფიქრათ, ნამდა თქვან ხოლოშიანეფიშ ირ ნარაგადის პასუხ ოკო მეჩათ. თეშ მანგიორო, საქმეთ ქაძირეთ, ნამდა ირნერ საკითხის გაწონასწორებულ რეთჷ დო ბედნერ ცხოვრება გიღუნა დო უკულ მუნეფქ გეგშეღან დასკვნა. თეშნერო, შილებე თინეფქ ქიმეხვადან, ნამდა ტყურა რე თინა, მუთ ჩქინ გურშენ გაუგებუნა.

ᲛᲝᲗᲕᲘᲜᲔᲑᲐᲗ ᲓᲝ ᲘᲛᲔᲜᲓᲘᲐᲜᲝ ᲥᲣᲯᲘᲜᲘᲗ ᲗᲘᲜᲔᲤᲡ

11. მუჭო ოქცუდ იესო მუშ ჯიმალეფს?

¹¹ სახარებეფს მოჩამილ შემთხვევეფშე იძირე, ნამდა იესო მოთვინებათ უჯინედ მუშ ჯიმალეფს. მაგალთო, მუჟამსით თიქ კანას პირველ სასწაულ აკეთ, მუჭოთ იძირე, მუშ ჯიმალეფ ხოლო თექ რდესჷ (იოან. 2:11, 12). სასწაულიშ ძირაფაშ უკულ ხოლო თინეფს იშენით ვა ჯერდეს, ნამდა იესო მესია რდჷ. მარა იესო თეშ გურშენ ვა დანდურებ თინეფს. ბიბლიას პკითხულენთ, ნამდა კანას პირველ სასწაულიშ კეთებაშე სოდგარენ სუმ წანაშ უკულ ხოლო თინა გემუანო ეჩიებ მუშ ჯიმალეფს (იოან. 7:5–8).

12. მუშ ინონჭაფა მიმეხვარებუნა, ვა ვოდინუათ იმენდ, ნამდა ჩქინ ხოლოშიანეფქ შილებე აზრ დითირუან?

¹² მუთ უმოს უჯგუშო ქიგებგენთ, მუნერ მოჭყოლოფე რე იეჰოვა, თით უმოსო მაღვენუნა იმენდ, ნამდა შილებე ჩქინ ოჯახიშ წევრეფქ ვარდა ნათესეეფქ ართ დღასით ქიდიჭყან თიშ მსახურება. მუჭოთ მიჩქუნა, დიდ გაჭირებაშ დოჭყაფაშ უკულ ხოლო შილებე თინეფს მიაჩან საშვალებაქ, იეჰოვაშ მხარეს ქიგედირთან. ტყურა რელიგიეფიშ განადგურებაშ დროს, ჩქინ ნათესეეფს ვარდა ოჯახიშ წევრეფს შილებე ქუგაშინან თი ირფელქ, მუდგას ურაგადუდით, დო იეჰოვაშ მსახურება გეგნოჭყვიდანa (გიმოცხ. 17:16). მარა, ონდო თე დრო მიშას, მოკონა, ირნერო ქელუდირთათ ჩქინ ხოლოშიანეფს, მუჟამსით თინეფს მუდგარენ პრობლემეფ აღვენუნა, მუშენდა ჩქინდე ჸოროფაშ დო ელარნაშ ძირაფაქ შილებე გინაჭყვიდირაფუას თინეფს ბიბლიაშ გურაფაშ დოჭყაფა.

ᲥᲐᲫᲘᲠᲔᲗ, ᲜᲐᲛᲓᲐ ᲛᲗᲔᲚ ᲒᲣᲠᲘᲗ ᲒᲘᲸᲝᲠᲐ

13. თიშ უმკუჯინუო, ნამდა ბრელს ფხანდენთ იეჰოვაშო, მუქ ოკო ვეგშამირთან?

¹³ მართალ რე, ჩქი ბრელს ვორთუთ იეჰოვაშო, მარა თეშ ოკო ვეგშამირთან, ნამდა ჩქინ ხოლოშიანეფს დუდ თეშ ვოგინაფუათ, ითამ დრო ვა მიღუნა თინეფშო ვარდა ვა მიჸორა (მათ. 7:12). მუჭო ვოძირუათ თინეფს, ნამდა არძაართ ვა რენა ჩქინო? მორთ ქიფჩუათ მუსხირენ მხარეშე.

14, 15. მუჭო შემლებუნა ვოძირუათ ჩქინ ხოლოშიანეფს, ნამდა მიჸორა თინეფ? ქიმიჸუნით მაგალით.

¹⁴ ვადინუათ თინეფწკუმა ურთიერთობა დო ქაგინაფეთ ჸოროფა. ნათესეეფს დო ოჯახიშ წევრეფს თქვან ჸოროფას ქაგინაფუანთ, მუჟამსით ხშირას ქიმიკითხანთ დო ქეჩიებუთ, მუ ამბე გიღუნა. შეილებუნა ქიმეჭარათ დო მუსხირენ სურათ ხოლო ქიმუჯღონათ თიშ ოძირაფალო, ბოლო დროს სო რდითჷ დო მუს ორთუდით. უბრალო საჩუქარქ ვარდა რეკუაქ შილებე მანგარო იმოქმედას თინეფშა დო თქვან შქას უჯგუშ ურთიერთობას შეუნწყუას ხე. მუჟამსით თეცალ მუდგარენეფიშ ოკეთებელო პირველ ნაბიჯის გეგნოდგუნთ, თინეფ ქიგინანა, ნამდა მანგარო გიჸორა.

¹⁵ გუვარჩუათ ჩქინ ართ სომეხ დაშ, ანაშ შემთხვევა. თიშ ნათესეეფ დო ოჯახიშ წევრეფ ხშირას იშაყარუნა ართო, განსაკუთრებულო, მუჟამსით დაბადებაშ დღას ვარდა მუდგაინ დღახუს აღნიშნენა. თიშ უკულ, მუთ ანაქ ჭეშმარიტება გეგჷ, თიშ ხოლოშიანეფ ფიქრენდეს, ნამდა თე ახალ რელიგია თინეფს ანაწკუმა ურთიერთობას გილულუანდ. თეწკუმა ართო, თიშე ხოლო ნერვიანენდეს, ნამდა მუშ რწმენა თიშ მომავალშე გლახათ იმოქმედენდ. მუ აკეთ ანაქ, ნამდა ვეგლელუკო ურთიერთობა მუშ ხოლოშიანეფწკუმა? თინა მეჩიებუნა: „მუჟამსით ჩქიმ ნათესეეფს მივაკითხანქ, ვეჩიებუქ, მუ ამბე მიღჷ დო მუს ვორთუქ. თინეფს ჩქიმ ჸუდეშა ხოლო ვაპატიჟენქ დო ჩქიმ მეგობრეფს ვოჩინებაფუანქ. შედეგო იჩინენა თინეფს, მიდგაწკუმა ხოლოს ვორექ დო თავისფალო გინაფლენა თინეფწკუმა დუდის. ჩქიმ ნათესეეფშე ბრელ იჩიებ, ნამდა ორწყენა, მუნერ ბედნერ ვორექ დო ათეშენ ვა ნერვიანენა ჩქიმ გურშენ“.

16. მუჭო ოძირუ იესოქ, ნამდა ფიქრენდჷ მუშ ჯიმაჸონერ იაკობშე? (ქოძირით სქოლიო).

¹⁶ ქაგინაფეთ, ნამდა გოინტერესუნა თინეფიშ ამბე. გათელებაშ უკულ იესოქ გეგმეცხად იაკობის, მუდგათ ქაძირუ თის, ნამდა მანგარ ძვირფას რდჷ თიშო (1 კორ. 15:7). წერმიდგინით, მუს იგინანდ იაკობ, მუჟამსით ქიმეხვადუდ, ნამდა ირფელიშ უმკუჯინუო, იესო იშენით ფიქრენდჷ თიშე. შილებე ზუსტას თეშ უკულ დერწმუნუკო იაკობიქ, ნამდა დასურო იესო რდჷ მესია. ვა რე გამორიცხულ, ნამდა იესოშ ძირაფაშ დო თიწკუმა დორაგადაფაშ უკულ, იაკობიქ მუშ ოჯახიშ შხვა წევრეფს დო ნათესეეფს ხოლო მეხვარუკო თიშა დარწმუნებას, ნამდა იესო რდჷ მესიაb (საქ. 1:14).

17. მუჭო შემლებუნა გიმიბრინუათ რომაელეფიშ 12:15-ის მოჩამილ პრინციპ? (ქოძირით სურათ).

¹⁷ წეკითხით რომაელეფიშ 12:15. მუჟამსით ჩქინ საჸოროფო ადამიანეფს ქოთ ჯგირს დო ქოთ ფურს ქელუდირთუთ დო ქუვოგინაფუანთ, ნამდა ფიფქრენთ თინეფშე, შილებე თეშნერო ქიმვეხვარათ ჩქინ მიმართ დამოკიდებულებაშ თირუას.c მაგალთო, ბაღანაქ ქეშეძინეს-და, ჯგირ იჸუაფ, ქიმვახვამათ დო მუდგაინ ქუვაჩუქათ თიშ ოძირაფალო, ნამდა ჩქი ხოლო მოხიოლუნა თინეფიშ ხიოლ. მუჟამსით თინეფს საჸოროფო ადამიან დუღურუნა, შემლებუნა ჩქინ გემუან სიტყვეფით გურშა გეუქექუათ, ქუწუათ, ნამდა მზათ ვორეთ თინეფიშ მახვარებელო ვარდა შხვანერო ქელუდირთათ. მუშო ოკო რაგად, ოკო ვაგმოჭყორდან თიქ ხოლო, ნამდა ხშირას ქიმიპკითხუათ ჩქინ ოჯახიშ წევრეფ დო ნათესეეფ, განსაკუთრებულო თიმწკუმა, მუჟამსით მუდგარენ პრობლემა უღუნა.

18. მუჭო შემლებუნა ანდრიაცალო მიფქცუათ?

¹⁸ გაჩინებაფეთ თინეფს თანაქრისტიანეფ. მუჟამსით ანდრიაქ ქიგეგ, ნამდა იესო მესია რდჷ, მუშ ჯიმას, პეტრეს, ხოლო გაჩინებაფუ თინა (იოან. 1:40–42). ჩქი ხოლო შემლებუნა თეცალ მუდგარენიშ კეთება. მაგალთო, შემლებუნა ჩქინ ოჯახიშ წევრეფ ვარდა ნათესეეფ მინშა კრებაშ შეხვალამაშა ვარდა მეგობრულშა ქუდვაპატიჟათ. მუჟამსით თინეფ გეჩინებაფუანა ჩქინ თანაქრისტიანეფს, შილებე ქოძირან, ნამდა იეჰოვაშ მოწმეეფ ხოლო ჩვეულებრივ ადამიანეფ რენა დო ირკოჩის ჯგირო ოქცუნა.

19. ჩქინ რწმენას ბოლოშა ვენანჭანინ ხოლო, მუჭო ოკო მივექცუათ ჩქინ ხოლოშიანეფს? (1 პეტ. 3:15).

¹⁹ წეკითხით 1 პეტრეშ 3:15. მუდგანერო ვევეცადათინ, ჩქინ ოჯახიშ წევრეფქ დო ნათესეეფქ შილებე ბოლოშა დღას ვენანჭან, მუშენ იფჩიებუთ მუდგარენეფშე ვარიას. მარა თინეფს მუთუნით ვა გაჭყორდუნა ჩქინ გიმორჩქინელ პატიცემა დო თინეფშა კეთებულ ჯგირ საქმეეფ. თიშ ძირაფა ხოლო ჯგირო იმოქმედენს, მუჭო ვოცადუთ, დრო გეგშურთათ თინეფწკუმა რინას. მაგალთო, მართალ რე, ბიბლიას ვემურენ ფერ დღახუეფს ვაბღნიშნენთ თინეფწკუმა ართო, მარა შემლებუნა შხვა დროს მივაკითხუათ, აკობდოხოდათ დო საჩუქარეფ ხოლო ქუვაჩუქათ.

ᲓᲦᲐᲡ ᲕᲐᲓᲘᲜᲣᲐᲗ ᲘᲛᲔᲜᲓ

20. მუშ იმენდის მარზენა იაკობიშ მაგალით?

²⁰ მართალ რე, იაკობიქ მიოდინუ თიშ პატი, ნამდა იესოშ დედამიწაშ ცხოვრებაშ დროს ჸოფედუკო თიშ მიმაჸუნალ, მარა საბოლათ იშენ გინირთჷ იესოშ მოწაფეთ დო, მუჭოთ იძირე, ჯგირო ქიდიგურუ თი ირფელ, მუდგას იესო დედამიწას რდუნ თიმწკუმა ოგურუანდჷ (გალ. 1:18, 19; 2:9). მაგალთო, მუშ წერილს თის მოშინაფილ აფჷ თი აზრეფ, ნამუთ იესოქ გვალას ქადაგებაშ დროს თქუ.d

21. მუშენ ოკო ვოქცუდათ ჯგირო ჩქინ ხოლოშიანეფს დო ვორდათ იმენდიანო?

²¹ მუდგანერო ვევეცადათინ, იეჰოვაშ მოწმე ვა რენან ფერ ნათესეეფქ ვარდა ოჯახიშ წევრეფქ შილებე იშენით ვემიღან ჭეშმარიტება დო იშენით ჸინჩას მოქცუდან. თეშ უმკუჯინუო, მუშენ ოკო მივექცუათ თინეფს ჯგირო? მუშენდა, მუჟამსით თეს გუვაკეთენთ, ქუვოძირანთ, ნამდა ჩქინ მოჭყოლოფე ღორონთცალო დო თიშ სქუაცალო იფქციებუთ (ლუკ. 6:33, 36). დროშ ულაწკუმა ართო, ჩქინ ჯგირ საქციელქ შილებე თინეფს დათირაფუას დამოკიდებულება დო შილებე ქუგაშინან თიქ, მუთ იეჰოვაშ დო თიშ დუნაპირებუშ გურშენ თეიშახ მითქუალუნა. ირფელს გუვაკეთენთ დო იმენდის ვა ვოდინუანთ-და, შილებე ართ დღასით მაშუან თიშ ბედნერობაქ, ნამდა ჩქინ საჸოროფო ადამიანეფწკუმა ართო ვემსახურათ იეჰოვას.