ხელმძღვანელ საბჭოშ ჟირ ახალ წევრ

2024 ᲬᲐᲜᲐᲨ 5 ᲝᲥᲢᲝᲛᲑᲔᲠᲡ ირწანიან შეხვალამას მანგარ სახიოლო განცხადებაქ იკეთინ: ჯიმალეფქ, ჯოდი ჯედელიქ დო ჯეიკობ რამფიქ, იეჰოვაშ მოწმეეფიშ ხელმძღვანელ საბჭოშ წევრეფო დენიშნეს. ჟირხოლო ჯიმა წანეფ რე, ართგურო ომსახურ იეჰოვას.

ჯიმა ჯოდიქ დებად მისურიშ შტატის (აშშ). თიქ იეჰოვაშ მოწმეეფიშ ოჯახის ირდჷ. ჯოდიშ ოჯახ თიცალ ტერიტორიაწკუმა ხოლოს ოხორანდჷ, ნამუთ იშვიათო იმუშებუდ. ათეშენ, თის მუშ ქიანაშ შხვადოშხვა კუნთხუშე მოულირ ბრელ და დო ჯიმაწკუმა უხვადუდ ურთიერთობა, მით თექ ოქადაგებშა ენიშეს. თინეფიშ ართობაშ დო ჸოროფაშ ძირაფაქ მანგარო იმოქმედ თიშა. ჯიმა ჯოდიქ 1983 წანაშ 15 ოქტომბერს, მოზარდ რდუნ თეშ, დინათ. თის მანგარო უჸორდჷ მსახურება, ათეშენ სკოლაშ თებაშ უკულ, 1989 წანაშ სექტემბერს, პიონერო ქიდიჭყჷ მსახურება.

ბაღანობას ჯოდი დო მუშ და მშობლეფს ბეთელშა გილაჸუნდეს, მუდგაქ თექ მსახურებაშ სურვილ გოურჩქინ თინეფს. თე მიზანს ჟირხოლო და დო ჯიმაქ ქიმიოჭირინუ. ჯიმა ჯოდიქ 1990 წანაშ სექტემბერს უოლკილიშ ბეთელს ქიდიჭყჷ მსახურება. თინა დუდშე „დასუფთებაშ განყოფილებას“ რდჷ დო უკულ „სამედიცინო მომსახურებაშ განყოფილებას“.

თიმ პერიოდის თი კუნთხუს ესპანურ კრებეფიშ ძინა მიშჷ დო ჯიმალეფ რდესჷ საჭირო. თაშ ნამდა, ჯიმა ჯოდიქ ართ-ართ ესპანურ კრებაშა გილულა დო ნინაშ გურაფა ქიდიჭყჷ. მალას თიქ გეჩინებაფუ პიონერ და, დამარის, ნამუთ თი რაიონს მსახურენდჷ. თინეფქ დექორწინეს დო დამარისიქ ხოლო ჯოდიწკუმა ართო ქიდიჭყჷ ბეთელს მსახურება.

2005 წანას თინეფს ბეთელშე აჸუეს ოულარქ, ნამდა მშობლეფს მიკულუესკო. თე პერიოდის პიონერეფო მსახურენდეს. ჯიმა ჯოდი „პიონერულ მსახურებაშ სკოლეფს“ ოგურუანდჷ დო თეწკუმა ართო, მსახურენდჷ „საავადმყოფოეფწკუმა თანამშრომლობაშ კომიტეტის“ დო „რეგიონალურ სამშენებლო კომიტეტის“.

2013 წანას თე ჩილ დო ქომონჯ კინ მიწვიეს ბეთელშა უორიკიშ სამშენებლო პროექტშო. თეშ უკულ თინეფ პატერსონს დო უოლკილს ხოლო ქომსახურენდეს. ჯიმა ჯოდი მსახურენდჷ „ადგილობრივ საპროექტო-სამშენებლო განყოფილებას“ დო „სამედიცინო მომსახურებაშ საინფორმაციო ცენტრის“. უკულ, 2023 წანაშ მარტის, თიქ სამსახურებრივ კომიტეტიშ დამხმარეთ დენიშნჷ. მუშ დანიშნულებეფს იშინანსინ, ჯიმა ჯოდი იჩიებ: „მუჟამსით ახალ დანიშნულებეფს ღებულენქ, შილებე ნერვიანენდე, მარა თე დროს ოკო ქიგიშინე, ნამდა იეჰოვას ოკო მიენდე, მუშენდა თის შეულებ გინმოშქვან თით, მუთ საჭირო რე მუშ საქმეშ ოკეთებელო“.

ჯიმა ჯეიკობიქ კალიფორნიაშ შტატის დებად (აშშ). ბაღანობას დიამუშ არააქტიურ რდჷ, მარა იშენით ოგურუანდჷ სქუალეფს ჭეშმარიტებას. თეწკუმა ართო, თინა ირ წანას ბებშა მიშჷ, ნამუთ ართგურო ომსახურუდ იეჰოვას. ბებიქ გოურჩქინ ჯეიკობის ჭეშმარიტებაშ ინტერეს დო თიქ 13 წანერ რდუნ თეშ ბიბლიაშ გურაფა ქიდიჭყჷ. 1992 წანაშ 27 სექტემბერს ჯიმა ჯეიკობიქ დინათ. საბედნეროთ, თიშ დიდაქ ხოლო გეაქტიურ, ოჯახიშ შხვა წევრეფქ ხოლო სულიერო წიმი მიდართეს დო დინათეს.

მოზარდობაშ წანეფს ჯეიკობ ორწყედ, მუნერ ხიოლ მოუღუდ პიონერეფშა მსახურებას. ათეშენ, სკოლაშ თებაშ უკულ, 1995 წანაშ სექტემბერშე, მუქ ხოლო ქიდიჭყჷ პიონერობა. 2000 წანას თიქ გეგნორთჷ ეკვადორშა, სოდეთ მანგარ საჭიროება რდჷ. თექ გეჩინებაფუ კანადელ პიონერ და, ინგა, მიდგაშათ დექორწინ. თინეფ ართო მსახურენდეს ეკვადორიშ ართ-ართ ქალაქის ჭიჭე ჯგუფის. ამდღა თე ჯგუფ დიდ კრებათ რე გინორთელ.

დროშ ულაწკუმა ართო თე ჩილ დო ქომონჯიქ დიო სპეციალურ პიონერეფო დენიშნეს დო უკულ რაიონულ მსახურება ქუდავალეს. 2011 წანას თინეფ მიწვის „გალაადიშ“ 132-ა კლასშა. სკოლაშ უკულ თინეფ მსოფლიოშ შხვადოშხვა კუნთხუს მსახურენდეს დო შხვადოშხვანერ დავალებეფს ასრულენდეს. მაგალთო, რდესჷ ბეთელს, მისიონერულ მსახურებას დო რაიონულ მსახურებას. ჯიმა ჯეიკობის უღუდ პატი, „სამეფოშ მახარობელეფიშ სკოლას“ ოგურუკო.

კოვიდ-19 პანდემიაშ გურშენ რამფეფქ შეერთებულ შტატეფშა დირთეს. თინეფ უოლკილიშ ბეთელშა მიწვის, სოდეთ ჯიმა ჯეიკობიქ მომზადება მიკილ „სამსახურებრივ განყოფილებას“, მუდგაშ უკულ თინეფ კინ ეკვადორიშ ფილიალს დანიშნეს, სოდეთ ჯეიკობ ფილიალიშ კომიტეტის მსახურენდჷ. 2023 წანას თე ჩილ დო ქომონჯ უორიკიშ ბეთელს დანიშნეს. 2024 წანაშ იანარს ჯიმა ჯეიკობ რამფიქ სამსახურებრივ კომიტეტიშ დამხმარეთ დენიშნჷ. მუშ დანიშნულებეფიშ გურშენ თინა იჩიებ: „მთავარ თინა ვა რე, სო ომსახურუქ იეჰოვას, მთავარ რე თი ხალხ, მიდგაწკუმა ართო მსახურენქ“.

მანგარო ვაფასენთ თე ძვირფას ჯიმალეფიშ ხანდას (ფილ. 2:29).