მუშენ მოსაჭირუნა რჩევეფ?

1. მუ მიმეხვარებუნა, ჭკვერულ გადაწყვეტილებეფ მიბღათ დო ჩქინ გეგმეფქ ჯგირო მიდართას? (იგავ. 13:10; 15:22).

ᲐᲠᲫᲐᲡ მოკონა, ჭკვერულ გადაწყვეტილებეფ მიბღათ დო ჩქინ გეგმეფქ ჯგირო მიდართას. ღორონთიშ სიტყვა მირაგადუნა, მუ მიმეხვარებუნა თეს (წეკითხით იგავეფიშ 13:10; 15:22).

2. მუს მოპირუნა იეჰოვა?

² მუშო ოკო რაგად, ჩქინდა არძაშ უჯგუშ რჩევეფიშ მოჩამა ჩქინ მუმას, იეჰოვას, შეულებ, ათეშენ ლოცვას ოკო ქოფთხუათ თის სიბრძნე. იეჰოვა მოპირუნა, ნამდა მიმეხვარებუნა. თინა მირაგადუნა: „გოკვირუდენ იჸი დო რჩევას ქიმერჩანქ‘‘ (ფსალმ. 32:8). თე სიტყვეფშე იძირე, ნამდა იეჰოვა ზუსტას მოსაჭირუნან ფერ რჩევეფს ქომუჩანა დო თინეფიშ გიმორნაფას ხოლო ქიმმეხვარებუნა.

3. მუს გუვარჩიენთ თე სტატიას?

³ თე სტატიას პასუხის ქიმეფჩანთ ოთხ კითხვას: 1) ნამ თვისებეფ მოსაჭირ, ნამდა ქეშმალებუას რჩევაშ გიმორნაფაქ? 2) მის მაჩინე ჯგირ რჩევა? 3) მუჭო ოკო ვოძირუე, ნამდა მართალო მთელ გურით მოკო რჩევაშ მეღება? დო 4) მუშენ ოკო ვა ფთხუე შხვეფს, ჩქიმ მანგიორო მიღან გადაწყვეტილებეფ?

ᲜᲐᲛ ᲗᲕᲘᲡᲔᲑᲔᲤ ᲛᲝᲡᲐᲭᲘᲠ?

4. ნამ თვისებეფ მოსაჭირუნა რჩევაშ მეღებაქ დო გიმორნაფაქ ქეშმალებუანინ?

⁴ რჩევაშ მეღებაქ დო გიმორნაფაქ ქეშმალებუანინ, თანდაბლობა დო მოკრძალება მოსაჭირუნა. ოკო მარჩქილედან, ნამდა ირნერ საკითხის ვა მაღვენუნა დასაბაღ რჩქინა დო გამოცდილება, ნამდა შხვეფშა ელაკითხირიშ უმშო მიბღათ ჭკვერულ გადაწყვეტილებეფ. თე ჟირ მნიშვნელოვან თვისება ვა მიღუნან-და, იეჰოვას ვემეფჩანთ ჩქინდა მოხვარაშ საშვალებას. შედეგო, ბიბლიაშ კითხირიშ დროს თეშ გემკიფშქვანთ თიშ რჩევეფს, ნამდა შურო ვემეფხვადუთ გიმარნაფალ მაფუნან (მიქ. 6:8; 1 პეტ. 5:5). მარა თანდაბალეფ დო მოკრძალებურეფ ქუვორეთ-და, ხეთეშე ქელებრჩქილუანთ დო გეგმიბრინუანთ ბიბლიაშა გერსხილ რჩევეფს.

5. მუ დო მუს შეულებუდ გაამაყუკო დავით?

⁵ გუვარჩუათ, მუშ გურაფა შემლებუნა მეფე დავითშე. ბრელ მუდგარენს შეულებუდ თინა ამაყო გინაშქვუკო. მეფეთ გინორთაშახ ბრელ ხანით ადრე, თის ჯგირ მუსიკოსიშ სახელ გეძუდ. დავით თიშმაჯგირას მიოგანდჷ, ნამდა მეფე საულიშ მუსიკოსო ქიგიორინუეს (1 სამ. 16:18, 19). თიშ უკულ, მუთ იეჰოვაქ თინა მეფეთ გიშეგორ, მუშ წმინდა შურით გეიოფშჷ (1 სამ. 16:11–13). მუჟამსით დავითიქ ბრელ ნტერს, თინეფ შქას ფილისტიმელ გოლიათის გიორჯგინ, ხალხიქ თინა მანგარო ქიჸოროფუ (1 სამ. 17:37, 50; 18:7). ამაყ კოჩ თეზმა მუდგარენიშ მეჭირნაფაშ უკულ იფიქრენდ, ნამდა მითინშე მუთუნიშ ელაჩამა ვასაჭირუდ. მარა დავით თეცალ ვა რდჷ.

6. სოვრეშე მიჩქუნა, ნამდა დავით ირო ღებულენდჷ რჩევეფს? (ქოძირით სურათ).

⁶ მეფეთ გინორთაშ უკულ დავითიქ თიცალ ხალხ გეგშეგორ მეგობარო, მიდგას ჯგირ რჩევეფიშ მეჩამა შეიალებედ თიშა (1 მატ. 27:32–34). ხვალე გამეფებაშ უკულ ვარინ, დავით თეიშახ ხოლო ირო მზათ რდჷ შხვეფიშ აზრიშ მიოღებელო. თინა რჩევეფს ხვალე ქომოლკათაშე ვა ღებულენდჷ; მუჭოთ ფშუნა, დავითიქ ართშა თანდაბლურო ალერჩქილუ აბიგაილიშ ჭკვერულ ნარაგად დო შედეგო სერიოზულ შეცდომას ეუჩილითუ დუდ. არგამა რე, თინა ვა გუდჷ აბიგაილიშ ქომონჯის, ნაბალს, ნამუთ ჸინჩ, უმარდულ დო ეგოისტ კოჩ რდჷ (1 სამ. 25:2, 3, 21–25, 32–34).

7. მუშ გურაფა შემლებუნა დავითიშ მაგალითშე? (ეკლ. 4:13; ქოძირით სურათეფ).

⁷ დავითიშ მაგალითშე ბრელ მუდგარენიშ გურაფა შემლებუნა. მაგალთო, შილებე უნარიან ვორდათ ვარდა მუდგაინ პასუხიშმგებლობას ვასრულენდათ, მარა ოკო ვეფიფქრათ, ნამდა ირფელ მიჩქუნა დო მითინშე ვა მოსაჭირუნა რჩევა. დავითცალო ირიათო მზათ ოკო ვორდათ რჩევაშ მიოღებელო, თიშ უმკუჯინუო, მი მარზენა თის (წეკითხით ეკლესიასტეშ 4:13). თაშ ქიმიფქციებუთ-და, შილებე ეიფჩილითუათ თიცალ პრობლემეფ, ნამუთ ქოთ ჩქი დო ქოთ შხვეფს ონერვიანებელს გურჩქინანს.

ᲛᲘᲡ ᲨᲔᲣᲚᲔᲑ ᲩᲥᲘᲛᲓᲐ ᲯᲒᲘᲠ ᲠᲩᲔᲕᲐᲨ ᲛᲝᲩᲐᲛᲐ?

8. მუშენ შეულებუდ იონათანს დავითშა ჯგირ რჩევაშ მეჩამა?

⁸ მორთ ხოლო ართ მხარეშე ქიფჩუათ, მუდგაშ გურაფა შემლებუნა დავითიშ მაგალითშე. თინა რჩევას თიცალ კათას ელაკითხანდჷ, მიდგას ქოთ იეჰოვაწკუმა უღუდ ჯგირ ურთიერთობა დო ქოთ თი საკითხ არჩქილედ ჯგირო, ნამდგას მუს მოხვარა ოსაჭირუდ. მაგალთო, მუჟამსით ოინტერესუდ, გერიგებუდ დო ვარ თის მეფე საულ, დიო თიშ სქუაშ, იონათანიშ, აზრ ქიგეგ. მუშენ შემლებუნა თიშ რაგად, ნამდა იონათანს მართალო შეულებუდ ჭკვერულ რჩევაშ მეჩამა დავითშა? მუშენდა იონათანს ქოთ იეჰოვაწკუმა უღუდ ჯგირ ურთიერთობა დო ქოთ მუამუშის იჩინენდჷ მანგარ ჯგირო (1 სამ. 20:9–13). მუშ გურაფა შემლებუნა თავრეშე?

9. მიშა იჸუაფ უჯგუშ რჩევაშ ელაკითხირ? გენწყით (იგავ. 13:20).

⁹ მუჟამსით რჩევა მოსაჭირუნა, ჯგირ იჸუაფ, თიცალ ადამიანს ქელვაკითხუათ აზრ, მიდგას ჯგირ ურთიერთობა უღჷ იეჰოვაწკუმა დო, თეს გეძინელ, თი საკითხ ხოლო ჯგირო არჩქილე, მუდგას მოხვარა მოსაჭირუნაa (წეკითხით იგავეფიშ 13:20). მაგალთო, წერმიდგინით, ნამდა ახალგაზრდა ჯიმა დაქორწინებაშე ფიქრენს დო თე საკითხიშ გურშენ რჩევეფ ოსაჭირ. მის მიაჩინე თიშა ჯგირ რჩევა? მუშო ოკო რაგად, თის დაუქორწინებელ მეგობარიშ რჩევეფ ხოლო გეგმადირთუ, თინა მუშ ორაგადეს ბიბლიურ პრინციპეფშა ქიგიორსხუანს-და. მარა, ალბათ თე ახალგაზრდაშა ბრელით უმოს კონკრეტულ დო პრაქტიკულ რჩევეფ სულიერო მოწიფულ ჩილ დო ქომონჯის მიაჩინე, მით ძალამ ხან რე ართო ცხოვრენს, ბედნერ ოჯახ უღჷ დო თე ჯიმას ხოლო ჯგირო იჩინენს.

10. მუს გუვარჩიენთ ანწიან აბზაცეფს?

¹⁰ ჟიშე გუვარჩით, ნამ ჟირ თვისება მოსაჭირუნა რჩევეფიშ მიოღებელო დო თინა ხოლო ქობძირით, მიშა უჯგჷ რჩევაშ ელაკითხირ. მორთ ასე თიშე ქიფჩუათ, მუშენ რე მნიშვნელოვან, გურს მართალო რჩევაშ მორჩქილაფა მოკოდან დო ვართ ხოლო თიცალ ადამიანიშ გორუა, მით მონწყუნან ფერ აზრის მიწინა. უკულ თიშე ხოლო ქობრაგადუათ, მუშენ ოკო ვა ფთხუათ შხვეფს, ჩქინ მანგიორო მიღან გადაწყვეტილებეფ.

ᲛᲣᲭᲝ ᲨᲔᲛᲚᲔᲑ ᲕᲝᲫᲘᲠᲣᲔ, ᲜᲐᲛᲓᲐ ᲛᲐᲠᲗᲐᲚᲝ ᲠᲩᲔᲕᲐᲨ ᲛᲝᲠᲩᲥᲘᲚᲐᲤᲐ ᲛᲝᲙᲝ?

11, 12. ა) მუქ შილებე მინშა მაღოლან? ბ) მუ აკეთ მეფე რობოამქ, მუჟამსით მნიშვნელოვან გადაწყვეტილებაშ წოხოლე გერდჷ?

¹¹ მინშა შილებე თეშ იძირედას, ნამდა მიდგარენს რჩევა ოინტერეს, მარა სინამდვილეს, გურს ირფელ გინოჭყვიდილ აფჷ დო უბრალოთ თიცალ ადამიანს გორუნს, მით მუწონუანს მუშ აზრის. გიშურს, თის მთელ გურით ვაკო რჩევაშ მორჩქილაფა. თეცალ კოჩიქ გურ ოკო ქუგუჩას, მუქ აღოლ მეფე რობოამს.

¹² რობოამქ ისრაელიშ ტახტშა მეფე სოლომონიშ უკულ ეშართჷ დო აყვავებულ ქიანა ჩებარ. მარა ხალხ ფიქრენდჷ, ნამდა სოლომონ ნაბეტანს ომუშებაფუანდჷ თინეფს. ათეშენ რობოამს ეხვეწეს, ოღალშა ჭიჭე გემქექეთია. რობოამქ თინეფს უწუ, ჭიჭე დრო ქომუჩით დო პასუხის უკულ ქიმერჩანთია. თიქ დუდშე ჭკვერულო მიქცუ დო რჩევა თი უნჩაშ კათას ქელაკითხუ, მით თეიშახ სოლომონს ოხვარუდეს (1 მეფ. 12:2–7). მარა თიქ ველერჩქილუ თე გამოცდილ კათაშ რჩევა. მუ შილებე რდუკო თეშ მიზეზ? შილებე რობოამს გურს უკვე გინოჭყვიდილ აფუდუკო ირფელ დო უბრალოთ თიცალ მიდგარენს გორუნდუკო, მით მუწონუანდ მუშ აზრის. რახანს ონწყუნდუნ ფერ პასუხიქ უნჩაშ კათაშე ვემიაღებუ, თიქ მუშ ახალგაზრდა მეგობრეფს ქელაკითხუ რჩევა, მიდგაქ თიცალ პასუხ ქიმეჩეს, მუნერით მუს ოკოდ (1 მეფ. 12:8–14). რობოამქ ხალხის ზუსტას თი პასუხ მეჩჷ, მუთ მუშ ჯიმაკათაქ ელუჩ. ათეშენ ხალხიქ ებუნტჷ, ქიანაქ გირთჷ დო თინეფქ მუნეფიშ მეფე ქიგირინუეს. თეშ უკულ რობოამს პრობლემეფშე ვეგთართინ (1 მეფ. 12:16–19).

13. ნამ კითხვაშე დაფიქრება მიმეხვარებუნა თიშ ძირაფას, მართალო გურით მოკონან დო ვარ რჩევაშ მორჩქილაფა?

¹³ მუშ გურაფა შემლებუნა რობოამიშ მაგალითშე? მუჟამსით შხვეფს რჩევას ელვაკითხანთ, მართალო ოკო მოინტერესუდან დო მოკოდან თინეფიშ აზრიშ მორჩქილაფა. მუ მიმეხვარებუნა თაშ მოქციებას? ჩქინ დუდის ოკო ქოპკითხათ: რჩევას თიშ გურშენ ხომ ვემკიფშქვანქ, ნამდა თინა ვამწუეს, მუდგაშ მორჩქილაფა მოკოდ? მორთ თეწკუმა დაკავშირებით გუვარჩუათ ართ მაგალით.

14. მუ ოკო ფშუდან, მუჟამსით შხვეფს რჩევას ელვაკითხანთ? ქიმიჸუნით მაგალით (ქოძირით სურათ).

¹⁴ წერმიბდგინათ თეცალ სიტუაცია: ართ ჯიმას ჯგირ ხელფასის მეჩანან ფერ სამუშა მიარზის. ონდო თე სამუშას დეთანხმებუდ, თინა უხუცესშა მეურს დო რჩევას ელაკითხანს. თე ჯიმა თის ურაგად, ნამდა სამუშაშ გურშენ ოჯახ ბრელ ხანით აჸი დატებელ. უხუცეს თის გაშინანს ბიბლიურ პრინციპის, ნამდა თიშ, მუჭოთ ოჯახიშ დუდიშ, მთავარ პასუხიშმგებლობა ოჯახიშ სულიერ საჭიროებეფშე ზრუნვა რე (ეფეს. 6:4; 1 ტიმ. 5:8). თე ჯიმას ვახუჯ უხუცესიშ ნარაგად, ათეშენ კრებას შხვეფშა აგრძელენს ელაკითხირს თეიშახ, ონდო მიდგაინ მუს ონწყუნსინ ფერ აზრის ვა უწინს. მუჭო ფიქრენთ, თე ჯიმას მართალო რჩევაშ მორჩქილაფა ოკონო დოვარ უკვე მეღებულ აფჷ გადაწყვეტილება დო თიცალ მიდგარენს გორუნს, მით მუწონუანს მუშ აზრის? დღას ოკო ვაგმოჭყორდან, ნამდა ჩქინ გურ უდუნდებელ რე (იერ. 17:9). მინშა შილებე ზუსტას თი რჩევა მოსაჭირუდან, ნამდგაშ მორჩქილაფა არძაშ უმოს ნაკლებო მოკონა.

ᲝᲙᲝ ᲤᲗᲮᲣᲔᲜᲘᲝ ᲨᲮᲕᲔᲤᲡ, ᲩᲥᲘᲛ ᲛᲐᲜᲒᲘᲝᲠᲝ ᲛᲘᲦᲐᲜ ᲒᲐᲓᲐᲬᲧᲕᲔᲢᲘᲚᲔᲑᲔᲤ?

15. მუ ოკო ვა ვაკეთათ დო მუშენ?

¹⁵ მუჭოთ ჟიშენ აბზაცეფს გუვარჩით, ჭკვერ ადამიან გადაწყვეტილებაშ მეღებაშახ რჩევეფს ღორონთიშ სიტყვას დოგორუნს დო მოწიფულ ქრისტიანეფს ხოლო ქელაკითხანს. მარა ფრთხილას ოკო ვორდათ, ნამდა შხვეფს ვა ფთხუათ, ჩქინ მანგიორო მიღან გადაწყვეტილებეფ. ნამთინექ შილებე შხვას, მიდგას მანგარო ონდჷ, პირდაპირ კითხას: სი მუს აკეთენდჷ ჩქიმ ადგილს ქორდენ? ნამთინექ ხოლო შილებე შურო ვედეფიქრასინ თეშ, შხვაშე მუდგას ორწყენ, მუქ ხოლო თინა გინოჭყვიდას. ვაგმოჭყორდან, თითოულს მიღუნა პასუხიშმგებლობა, ჩქინით მიბღათ გადაწყვეტილებეფ (გალ. 6:4, 5).

16. მუ სიტუაცია რდჷ კერპეფშა შეწირულ ხორცწკუმა დაკავშირებით კორინთის დო მიქ ოკო გინოჭყვიდუკო, შილებედ დო ვარ თეცალ ხორციშ ჭკუმუა? (1 კორ. 8:7; 10:25, 26).

¹⁶ ქიგიფშინათ, მუ სიტუაცია რდჷ პირველ საუკუნეს კორინთიშ კრებას თი ხორციშ ჭკუმუაწკუმა დაკავშირებით, ნამუთ შილებედ კერპეფშა ჸოფედუკო შეწირულ. პავლექ თინეფს მეჭარ: „ჩქი მიჩქუნა, ნამდა კერპ მუთუნ ვა რე დო სინამდვილეს ღორონთ ართ რე“ (1 კორ. 8:4). ათეშენ, კრებას ნამთინექ გინოჭყვიდ, ნამდა შეულებუდ ბაზარს იჸიდუკო დო ჭკუმუკო თი ხორც, ნამუთ შილებე თეიშახ კერპეფშა რდუკო შეწირულ. მარა ნამთინეს სინდის ვარზენდჷ თეშ კეთებაშ უფლებას (წეკითხით 1 კორინთელეფიშ 8:7; 10:25, 26). თე საკითხ არძაქ მუშით ოკო გინოჭყვიდუკო. პავლეს ვა უთქუალ კორინთელეფშა, შხვეფიშ მანგიორო მიღესკო გადაწყვეტილება ვარდა თინა აკეთესკო, მუდგას შხვა გაკეთენდ. არძას მუშ დუდიშ გურშენ „[მეთხიებუდ] პასუხ ღორონთიშ წოხოლე“ (რომ. 14:10–12).

17. მუ იჸუაფ შედეგ, მუდგარენს შხვა ორთუნ თიშენ ქუვორთუთ-და? ქიმიჸუნით მაგალით (ქოძირით სურათეფ).

¹⁷ მუჭო შილებე თეცალ მუდგარენქ ამდღა ხოლო ქუმოხვადას? მაგალთო, ქიფჩუათ ზისხირიშ ფრაქციეფიშ გურშენ. მუჭოთ მიჩქუნა, არძა ქრისტიანქ მუშით ოკო გინოჭყვიდას, დეთანხმებ დო ვარ ფრაქციეფიშ გიმორნაფას მკურნალობაშ დროს.b შილებე ზისხირიშ თემა ადვილ ინანჭაფალ ვა მაფუდან, მარა ოკო მარჩქილედან, ნამდა თე საკითხ არძაქ პირადო ოკო გინოჭყვიდას; თაშ ქოფთქუათინ, თენა თი „ოღალშა“ მიშურს, ნამუთ არძაქ მუშით ოკო „იღას“ (რომ. 14:4). მუდგაინს შხვა ორთუნ თიშენ ქუვორთუთ-და, სინდის დემესუსტებუნა, მუშენდა თინა ხვალე თი შემთხვევას იმანგარებ დო ილასირუ, მუჟამსით იბრინუანთ დო ჩქინით ბღებულენთ გადაწყვეტილებეფს (ებრ. 5:14). იმწკუმა, მუჟამ ოკო ელვაკითხუათ მოწიფულ ქრისტიანს რჩევა? მუჟამსით ნამ შემლებუდესინ გეგმიბრკვით, მარა იშენით მოსაჭირუნა მოხვარა, ნამდა ქინვანჭათ, მუჭო მეურე ბიბლიურ პრინციპეფ ჩქინ სიტუაციას.

ᲕᲔᲛᲘᲝᲢᲣᲐᲗ ᲠᲩᲔᲕᲐᲨ ᲙᲘᲗᲮᲘᲠ

18. მუ აკეთ იეჰოვაქ ჩქინო?

¹⁸ იეჰოვაქ მანგარო მენდეს, მუჟამსით მუჩეს უფლება, ჩქინით მიბღითკო გადაწყვეტილებეფ. თეს ქიმმეხვარესკონ თიშენ, თიქ მუჩეს მუშ სიტყვა, ბიბლია. თიშ ჭყოლოფათ პჸუნა ჭკვერ მეგობრეფ ხოლო, მით მოხვარუნა ქინვანჭათ, მუჭო გიმიბრინუათ ბიბლიურ პრინციპეფ. თეშნერო ჩქინ მოჸოროფე მუმა ასრულენს მუშ პასუხიშმგებლობას დო ზრუნენს ჩქინდე (იგავ. 3:21–23). მუჭო შემლებუნა მარდულობა გიმოფხანტათ თიშ მოხვარაშენ?

19. მუჭო შემლებუნა იეჰოვაშ გურიშ გახარება?

¹⁹ არძა მშობელს ოხიოლ, მუჟამსით ორწყე, ნამდა მუშ სქუალეფ ირდუნა, იჭკვერებუნა დო თიცალ ქრისტიანეფო გინირთუნა, მიდგას იეჰოვა შხვეფიშ მახვარებელო ირინუანს. თეშნერო, იეჰოვას ხოლო მანგარო ოხიოლ, მუჟამსით სულიერო იბრდუთ, შხვეფს ელვაკითხანთ რჩევეფს დო ბღებულენთ თიცალ გადაწყვეტილებეფს, ნამუთ თის განადიდენს.