მუს ბგურაფლენთ ღურაშ წოხოლე რაგადებულ იაკობიშ წინასწარმეტყველებაშე? (ნაწილ 1)

1, 2. მუ აკეთ ღურაშახ იაკობიქ დო მუშენ? (ქოძირით სურათ).

ᲡᲝᲓᲒᲐᲠᲔᲜ 17 წანაქ გეთუ, მუთ ღორონთიშ ართგურ მსახურ იაკობიქ ქანაანშე, მუშ ჸუდეშარეფწკუმა ართო, ეგვიპტეშა გეგნორთჷ ოცხოვრებშა (დაბ. 47:28). თენა მანგარ ბედნერ წანეფ რდჷ იაკობშო, მუშენდა მუშ საჸოროფო სქუა, იოსებ, ნამუთ ღურელო მიორჩქუდ, კინ გურშა ქიხუტოლუ დო მუშ არძა სქუას კინ ართათ აკოშაყარელს ორწყედ. მარა ასე გინაფლენს, ნამდა მალას დოღურუ. ათეშენ თინა მუშ ქომოლსქუალეფს იჭანუანს, მუშენდა მნიშვნელოვან მუდგარენ აფჷ თინეფშა ორაგადე (დაბ. 49:28).

² ჯვეშ დროს ოჯახიშ დუდ ღურაშახ მთელ მუშ ოჯახის იჭანუანდჷ დო ბოლო სიტყვეფს უჩინანდჷ (ეს. 38:1). თეცალ დროს თის ხოლო იჩიებუდ, მი იჸუაფუდ მუშ უკულ ოჯახიშ დუდ.

3. მუ განსაკუთრებულ მნიშვნელობა უღჷ დაბადებაშ 49:1, 2-ს ინოჭარილ იაკობიშ სიტყვეფს?

³ წეკითხით დაბადებაშ 49:1, 2. მარა თენა უმოს სერიოზულ ოჯახურ აკოშაყარუა რდჷ, მუშენდა იაკობიქ იეჰოვაშ მოხვარათ იწინასწარმეტყველ, მუ ელუდეს მომავალს მუშ ქომოლსქუალეფს დო თინეფიშ გამნარყის. ათეშენ იაკობიშ თე სიტყვეფ მინშა ღურაშ წოხოლე რაგადებულ თიშ წინასწარმეტყველებათ ხოლო მიშინუაფ.

4. მუს გებგენთ თე სტატიაშე? (ქოძირით ჩარჩო „იაკობიშ ოჯახ“).

⁴ თე სტატიას გუვარჩიენთ, მუ უწუ იაკობიქ მუშ ოთხ სქუას: რეუბენს, სიმონს, ლევის დო იუდას. უკულიან სტატიას ჩიება მაღვენუნა, დანარჩენ ბრუო სქუაშა რაგადებულ თიშ სიტყვეფშე. ქობძირუნთ, ნამდა იაკობიქ ხვალე მუშ ქომოლსქუალეფშე ვარინ, თინეფიშ გამნარყშე ხოლო იწინასწარმეტყველ, მიდგაშეთ საბოლათ ისრაელ ერ გეგშეშ. თე ერიშ ისტორიაშ გარჩიება ქუმოძირანა, მუჭო შისრულ იაკობიშ სიტყვეფქ. თეწკუმა ართო, იაკობიშ წინასწარმეტყველებაშ გარჩიება ქიმმეხვარებუნა თიშ ძირაფას, მუშ კეთება შემლებუნა, ნამდა გურ გაუხარათ ჩქინ ზეციერ მუმას, იეჰოვას.

ᲠᲔᲣᲑᲔᲜᲨᲐ ᲠᲐᲒᲐᲓᲔᲑᲣᲚ ᲡᲘᲢᲧᲕᲔᲤ

5. მუს ელუდუკონ იჸიდ რეუბენ?

⁵ პირველო იაკობიქ რეუბენიშ გურშენ იჩუ დო თის უწუ: „სი რექჷ ჩქიმ პირველ სქუა“ (დაბ. 49:3). რახანს პირველ სქუა რდჷ, რეუბენ ალბათ ელუდ, ნამდა მუამუშიშ ქონებაშე, მუშ ჯიმალეფიშ კარს, ჟირ თიზმას მიღენდ. თინა თის ხოლო ფიქრენდუკონ იჸიდ, ნამდა იაკობიშ ღურაშ უკულ თინა იჸუაფუდ ოჯახიშ დუდ დო თე პატი მუშ გამნარყის ხოლო გეგნაჩამუდ.

6. მუშენ ოდინუ რეუბენქ თი ირფელ, მუთ ოკუთვნუდ, მუჭოთ პირველ სქუას? (დაბ. 49:3, 4).

⁶ მარა რეუბენ ვემიღენდ თი ირფელს, მუთ პირველ სქუას ოკუთვნუდ (1 მატ. 5:1). მუშენ? მუშენდა, თიქ მანგარ არასწორო მიქცუ, მუჟამსით წანეფიშ წოხოლე მუამუშიშ ხარჭაწკუმა, ბილჰაწკუმა, ქიდინჯირ. ბილჰა იაკობიშ საჸოროფო ოსურიშ, რახელიშ, მოსამსახურე რდჷ, ნამუთ ღურელ აფუდ (დაბ. 35:19, 22). იაკობის რეუბენ მაჟია ოსურშე, ლეაშე, ჸუნდჷ. შილებე რეუბენქ ბილჰაწკუმა სექსუალურ ურთიერთობა თიშენ დეკინ, ნამდა ვაკოდ, იაკობის თიქ დიამუშშე უმოსო ქეჸოროფუკო. ვარდა ხოლო, შილებე მოწონდჷ ბილჰა დო გეიაჸუნ არასწორ სურვილეფს. მუჭოდგა ვა რდუკონ, რეუბენქ ქოთ მუამუშიშ დო ქოთ იეჰოვაშ წოხოლე მანგარ გლახათ მიქცუ (წეკითხით დაბადებაშ 49:3, 4).

7. მუჭო შისრულ იაკობიშ სიტყვეფქ რეუბენშა დო თიშ გამნარყშა? (ქოძირით ჩარჩო „ღურაშახ რაგადებულ იაკობიშ წინასწარმეტყველება“).

⁷ იაკობიქ რეუბენს უწუ: „სქან ჯიმალეფშე უმაღალაშ ვეჸუაფუქ“. თე სიტყვეფქ ქოთ შისრულ. ბიბლიას სოთინ ვა ჭარჷ, ნამდა რეუბენიშ გამნარყშე ნამდგაინქ მეფექ, მღვდელქ ვარდა წინასწარმეტყველქ იჸუ. მარა იაკობის გვალო ხაზ ვეგნუსუმალ მუშ სქუაშა დო რეუბენშე ისრაელიშ ართ-ართ ტომქ გიშელ (იეს. 12:6). რდჷ შემთხვევეფ, სოდეთ რეუბენქ ჯგირ თვისებეფ ხოლო გიმირჩქინ. თეწკუმა ართო, ბიბლიას სოთინ ვა პკითხულენთ, ნამდა თიქ კინ გემეორ გლახა საქციელ დო უზნეობა ჩედინ (დაბ. 37:20–22; 42:37).

8. მუს ბგურაფლენთ რეუბენიშ მაგალითშე?

⁸ მუს ბგურაფლენთ? ოკო ვებრძოლათ არასწორ სურვილეფს დო გინოჭყვიდილ მაფუდან, მუთუნით ვეჩებდინათ სექსუალურ უზნეობა. ცდუნებაშ წოხოლე ქიგებდირთით-და, ოკო დეფიფქრათ, მუჭო უწყუნუანს გურს ჩქინ საქციელ იეჰოვას, ჩქინ ოჯახიშ წევრეფს დო შხვეფს. ვართ თიქ ოკო გუმოჭყორდან, ნამდა „კოჩ მუდგას თასუნს, თის გეჭოფუნს“ (გალ. 6:7). რეუბენიშ შემთხვევაშე იეჰოვაშ ჭყოლოფა ხოლო იძირე. მართალ რე, იეჰოვა ვა ფთხილანა ჩქინ არასწორ საქციელიშ გლახა შედეგეფშე, მარა ქომნარღენთ დო გიშასწორებას ქუვოცადუთ-და, თინა ქუმაპატიენა დო ქიმმეხვარებუნა.

ᲡᲘᲛᲝᲜᲨᲐ ᲓᲝ ᲚᲔᲕᲘᲨᲐ ᲠᲐᲒᲐᲓᲔᲑᲣᲚ ᲡᲘᲢᲧᲕᲔᲤ

9. მუშენ გაუდღან იაკობიქ სიმონ დო ლევის? (დაბ. 49:5–7).

⁹ წეკითხით დაბადებაშ 49:5–7. თეშ უკულ იაკობ სიმონ დო ლევიშა გინურს დო თინეფს მანგარო უდღანს. წანეფიშ წოხოლე იაკობიშ ოსურსქუა დინა, ქანაანელ კოჩიქ, შექემქ, გაუპატიურ. იაკობიშ ქომოლსქუალეფქ მანგარო გერისხეს თიშ გურშენ, მუთ მუნეფიშ დას ღოლუეს დო თენა ვართ რე გასაკვირ. თინეფქ დაღორეს შექემ დო თიშიანეფ დო უწუეს, ნამდა თექიან ქომოლკათა წინადაცვეთას გეკეთენდ-და, მუთუნს ვა დუშენდეს დო მშვიდობიანო იჸუაფუდეს. თე ხალხიქ ხოლო ქუდაჸუნ. მუჟამსით თინეფს წინადაცვეთაშ გურშენ დიო ხოლო ჭუეფ უღუდეს, სიმონ დო ლევიქ ყამეფ ქიხვამილუეს, გემნიტყობეს ქალაქშა დო „გეშაჭყვიდეს არძა ქომოლკოჩ“ (დაბ. 34:25–29).

10. მუჭო შისრულ სიმონ დო ლევიშ გურშენ რაგადებულ იაკობიშ წინასწარმეტყველებაქ? (ქოძირით ჩარჩო „ღურაშახ რაგადებულ იაკობიშ წინასწარმეტყველება“).

¹⁰ იაკობის მანგარო აფუდ გურ მოულირ მუშ ჟირ ქომოლსქუაშ თეცალ უდუნდებელ საქციელიშ გურშენ. თიქ თინეფს უწუ, ნამდა თინეფიშ გამნარყ მთელ ისრაელს აკოფაჩილო იცხოვრენდ. თე წინასწარმეტყველებაქ 200 წანაშ უკულ შისრულ, მუჟამსით ისრაელეფქ დუნაპირებ დიხაშა გემნორთეს. სიმონიშ ტომს იუდაშ ტომიშ ტერიტორიას ექი-აქო უღუდ ქალაქეფ (იეს. 19:1). ლევიშ ტომიშ ხალხ ისრაელიშ 48 ქალაქის რდჷ გოფაჩილ (იეს. 21:41).

11. მუ ჯგირ საქმეეფ აკეთეს სიმონიშ დო ლევიშ ტომეფქ?

¹¹ სიმონიშ დო ლევიშ გამნარყეფს მუნეფიშ ჯვეშეფცალ შეცდომეფ ვა დუშვებუნა. ლევიშ ტომ ხუჯის უკინენდჷ წმინდა თაყვანიშმცემლობას დო იეჰოვაშ ართგურ რდჷ. მუჟამსით მოსექ სინაიშ გვალას იეჰოვაშე კანონ მიღჷ, ბრელ ისრაელქ ოქროშ გინიშ თაყვანიშცემა ქიდიჭყჷ, მარა ლევიანეფქ ხუჯ ქუდუკინეს მოსეს დო ქიმეხვარეს კერპთაყვანიშმცემელეფიშ მოსპუალას (გამ. 32:26–29). იეჰოვაქ ლევიშ ტომიშ ქომოლკათას მეჩჷ პატი, იმსახურესკო მღვდელეფო (გამ. 40:12–15; რიცხ. 3:11, 12). მუშ რაგად შილებე სიმონიშტომელეფშე? იეჰოვაშ ნებათ თინეფქ იუდაშ ტომწკუმა ართო გეგშართეს ქანაანელეფიშ წინააღმდეგ ობრძოლებშა დო მეხვარეს დუნაპირებ დიხას მუნეფიშ ტერიტორიაშ მეღებას (მსაჯ. 1:3, 17).

12. მუს ბგურაფლენთ სიმონიშ დო ლევიშ მაგალითეფშე?

¹² მუს ბგურაფლენთ? დუდ ოკო იპჭოფათ დო დღას ოკო ვემეფჩათ რისხუას საშვალება, იმოქმედას ჩქინ გადაწყვეტილებეფშა დო საქმეეფშა. მუჟამსით მიდგაინ ჩქი ქუდამშენა ვარდა ჩქინ საჸოროფო ადამიანს მექციებუნა მანგარ გლახათ, გასაკვირ ვა რე, გურქ მომირთან დო გებრისხათ (ფსალმ. 4:4). მარა ოკო ფშუდან, ნამდა იეჰოვა დღას ვემიწონუანს, ჩქინ სიტყვათ ვარდა საქმეთ გურ უწყუნუათ თის, მიდგაქ მოწყინებაფუეს (იაკ. 1:20). მუჟამსით მიდგაინ უსამართლოთ მოქცუნა, ვა უღჷ მნიშვნელობა, თინა ომსახურ დო ვარ იეჰოვას, ოკო მივაჸუნათ ბიბლიურ პრინციპეფს დო ვეცადათ, იეჰოვაშ მოსაწონო მიფქცუათ. თენა მიმეხვარებუნა, ვევაჸუნათ რისხუას დო გლახა ემოციეფქ თეშ ვეპჭოფან, ნამდა ჩქინ სიტყვათ ვარდა საქციელით დუვაზარალათ შხვეფ (რომ. 12:17, 19; 1 პეტ. 3:9). ხოლო მუს ბგურაფლენთ? სქან მშობლეფ იეჰოვაშ მოსაწონო ვექციებუნან-და, თინეფიშ გლახა მაგალითიშ მეჸუნაშ მანგიორო, სი შეილებ თინა გაკეთე, მუთ ღორონთიშ თოლს სწორ რე. ვეფიქრა, ნამდა რახანს თინეფ გლახათ იქციებუნა, სი ხოლო ვაიღ მოწონა იეჰოვაშ თოლს დო ვემგაღებე თიშე კურთხევეფ. იეჰოვა აუცილებერო მიგეხვარებ სწორას მოქციებას დო სქან მონდომას ხოლო აკურთხენს.

ᲘᲣᲓᲐᲨᲐ ᲠᲐᲒᲐᲓᲔᲑᲣᲚ ᲡᲘᲢᲧᲕᲔᲤ

13. მუშენ შილებე ნერვიანენდუკო იუდა თიშე, მუს უწინდ მუამუშ?

¹³ სიმონ დო ლევიშ უკულ იუდაშ დროქ ქუმორთჷ. თინა ირჩქილედ თი ირფელს, მუთ მუშ უნჩაშ ჯიმალეფს იაკობიქ უწუ დო ათეშენ ალბათ ნერვიანენდუკონ იჸიდ, მუს უწინდ მუამუშ თის, მუშენდა მუს ხოლო ბრელ გლახა საქმე აფუდ ნაკეთებ. მაგალთო, მუჟამსით ლევიქ დო სიმონქ შექემს მახორუ ქომოლკათა გეშაჭყვიდეს, იუდაქ მუშ ჯიმალეფწკუმა ართო გოხირ თი ქალაქ (დაბ. 34:27). ხვალე თენა ვარინ, ზუსტას იუდაშ დუდ რდჷ იოსებიშ მონათ გიმოჩამა დო მუშ ჯიმალეფწკუმა ართო თიქ ხოლო დაღორ მუამუშ, იოსებ ნადირქ ჭკუმუა (დაბ. 37:27, 31–33). თეწკუმა ართო, იუდაქ უზნეობა ჩედინ მუშ ნოსა, თამარწკუმა, ნამდგაშეთ იფიქრჷ, ნამდა მეძავ რდჷ (დაბ. 38:15–18).

14. მუ უღუდ ჯგირ იუდას დო მუ უწუ იაკობიქ თის? (დაბ. 49:8, 9).

¹⁴ მარა იუდას ბრელ ჯგირ ხოლო უღუდ. მაგალთო, ართ შემთხვევაქ ქაძირუ, ნამდა თინა ნერვიანენდჷ ხანშამიშულირ მუამუშიშ გურშენ დო მანგარო ვაკოდ, თის გურქ ქაწყუნუკო. თეწკუმა ართო, ქიძირ, ნამდა მანგარო უჸორდჷ მუშ უკლაშ ჯიმა, ბენიამინ, მუშენდა ეცოდ თიქ დო მზათ რდჷ, თიშ მანგიორო მუქ ქიჸუკო მონაქ (დაბ. 44:18, 30–34). ათეშენ იაკობიქ თის ღორონთიშ შთაგონებათ, ხვალე ოცქუ დო უწუ, მუ კურთხევეფ ელუდ (წეკითხით დაბადებაშ 49:8, 9).

15. მუჭო შისრულ იუდაწკუმა დაკავშირებულ წინასწარმეტყველებაქ?

¹⁵ იაკობიქ იუდას უწუ, ნამდა მუშ ჯიმალეფ შქას თინა იჸუაფუდ აწმაჸვენჯ. თე წინასწარმეტყველებაშ შესრულებაშახ ძალამ ხანქ გემკორთჷ. თიშ დუდობაქ პირველო თე სიტყვეფიშ რაგადშე სოდგარენ 200 წანაშ უკულ გემკორჩქინდჷ, მუჟამსით უდაბნოს, ეგვიპტეშე გიშულირ ისრაელეფს დუნაპირებ დიხაშა იუდაშ ტომ აწოჸუნდჷ (რიცხ. 10:14). წანეფიშ უკულ ხოლო, დუნაპირებ დიხაშ ეჭოფუაშ დროს, ირიათო იუდაშ ტომ აწოჸუნდჷ ისრაელეფს ქანაანიშ წინააღმდეგ ბრძოლას (მსაჯ. 1:1, 2). თეს გეძინელ, იუდაშ ტომშე გიშართჷ ისრაელიშ ბრელ მეფექ. თინეფშე პირველ რდჷ მეფე დავით. იაკობიშ რაგადებულ წინასწარმეტყველებაქ ხოლო ბრელნერო შისრულ.

16. მუჭო შისრულ დაბადებაშ 49:10-ის მოჩამილ წინასწარმეტყველებაქ? (ქოძირით ჩარჩო „ღურაშახ რაგადებულ იაკობიშ წინასწარმეტყველება“).

¹⁶ იაკობიქ თინა ხოლო თქუ, ნამდა მთელ კაცობრიობაშ მარადიულ მმართველ იუდაშ გამნარყშე მიშჷ (წეკითხით დაბადებაშ 49:10 დო სქოლიო). თე მმართველ იესო ქრისტე რე, ნამდგას იაკობ „შილოს“ უძახ. იესოშ გურშენ ანგელოზიქ თქუ: „იეჰოვა ღორონთ თის დავითიშ, თიშ მუმაშ, ტახტის ქიმეჩანს“ (ლუკ. 1:32, 33). თეწკუმა ართო, ბიბლიას იესო მიშინუაფ, მუჭოთ „ლომ იუდაშ ტომშე“ (გამოცხ. 5:5).

17. მუჭო შემლებუნა იეჰოვაცალო უჯინათ შხვეფს?

¹⁷ მუს ბგურაფლენთ? სერიოზულ შეცდომეფიშ უმკუჯინუო, იეჰოვაქ იშენით აკურთხჷ იუდა. შილებე თიშ ჯიმალეფს უკვენდესკო, მუ ძირჷ იეჰოვაქ თეცალ იუდაშ პიროვნებას, ნამდა იშენით ვა მურკებ თიშა კურთხევეფ. ზუსტას ვა მიჩქუნა, მუს ფიქრენდეს იუდაშ ჯიმალეფ, მარა ფაქტ რე, იეჰოვაქ მუდგარენ ჯგირ ქოძირ დო თეშ გურშენ აკურთხჷ იუდა. მუჭო შემლებუნა მივაჸუნათ იეჰოვაშ მაგალითის? მუჟამსით ნამდგაინ თანაქრისტიან მნიშვნელოვან პასუხიშმგებლობას ღებულენს, შილებე უცფას თიშ არასრულყოფილებაშე მაფიქრუაფუდან დო მიკვენდან, მუშენ მიღჷ თე პასუხიშმგებლობა, მარა ჯგირ იჸუაფ, თეცალ დროს ქიგიფშინათ, ნამდა იეჰოვაქ ქოძირ დო მოწონს თიშ ჯგირ თვისებეფ. იეჰოვა ჯგირ თვისებეფს გორუნს მუშ მსახურეფიშ პიროვნებას, ათეშენ მორთ ჩქი ხოლო ირნერო ვეცადათ, თაშ მიფქცუათ.

18. მუშენ მოსაჭირუნა მოთვინება?

¹⁸ ხოლო ართ გაკვეთილ, მუდგას იუდაშ შემთხვევაშე ბგურაფლენთ, თინა რე, ნამდა მოთვინება მოსაჭირუნა. მართალ რე, იეჰოვა ირიათო ასრულენს მუშ სიტყვას, მარა ირო თი დროს დო თეშ ვართჷ თეს, მუჭოთ ჩქი ველუთ. იუდაშ გამნარყეფ ხოლო ხეთეშე ვეგნორთენა ღორონთიშ ხალხიშ ხელმძღვანელეფო, მარა თინეფ ართგურო უკინენდეს ხუჯის თინეფს, მით იეჰოვას აფუდ გერნაფილ თე საქმეშო, იჸუაფუდუო თენა ლევიან მოსე, ეფრემელ იესო ნავეშ სქუა დოვარ ბენიამინელ მეფე საულ. მორთ ჩქი ხოლო ირნერო ვეცადათ, ხუჯ ქუდუკინათ თინეფს, მით იეჰოვას აფჷ ამდღა გიშაგორილ ხელმძღვანელობაშო (ებრ. 6:12).

19. მუ დიბგურეთ ღურაშახ რაგადებულ იაკობიშ წინასწარმეტყველებაშე?

¹⁹ მუ დიბგურეთ ღურაშახ რაგადებულ იაკობიშ წინასწარმეტყველებაშე? არგამა რე, ნამდა „ღორონთ თეშ ვა უჯინე, მუჭოთ ადამიან“ (1 სამ. 16:7). იეჰოვა ბრელს თვინებულენს დო მპატიებელ ღორონთ რე. მართალ რე, თინა ვეწონუანს გლახა საქციელს, მარა ვართ სრულყოფილებას ელჷ მუშ მსახურეფშე. თიქ შილებე თიცალ ადამიანეფ ხოლო აკურთხას, მიდგაქ ულირს სერიოზულ შეცდომეფ დუშვეს, მარა მთელ გურით ინარღეს დო ასე ირნერო ოცადუნა სწორას მოქციებას. უკულიან სტატიას გუვარჩიენთ, მუ უწუ იაკობიქ დანარჩენ ბრუო სქუას.