ხიოლით დო მოთვინებათ უჯინით იეჰოვას

თეშ უმკუჯინუო, იეჰოვა ელჷ, ნამდა მოთვინებათ ქუჯინეთ თიშ დანიშნულ დროს. მუშენ ელჷ თინა თეს დო მუ მიმეხვარებუნა, ვა ვოდინუათ ხიოლ?

ᲛᲣᲨᲔᲜ ᲔᲚᲷ ᲘᲔᲰᲝᲕᲐ, ᲜᲐᲛᲓᲐ ᲛᲝᲗᲕᲘᲜᲔᲑᲐᲗ ᲥᲣᲯᲘᲜᲔᲗ?

ბიბლიას ჭარჷ: „იეჰოვა მოთვინებათ იჯინე, ნამდა ქოიჭყოლოფუან დო გემწოდირთუ, ნამდა ქეშეიცოდილუან, მუშენდა იეჰოვა სამართლიან ღორონთ რე. ბედნერ რე არძა, მით ელჷ თის“ (ეს. 30:18). თენა ესაიაქ უდუჯერებელ ებრაელეფიშ გურშენ თქუ (ეს. 30:1). მარა თინეფ შქას ხოლო რდეს ართგურეფ, მიდგაშო თე სიტყვეფ იმენდიშ მუმაჩამალ იჸუაფუდ დო თინა ამდღა ხოლო არზენს იმენდის იეჰოვაშ მსახურეფს.

ათეშენ მოთვინებათ ოკო უჯინათ ღორონთის, მუშენდა მუ ხოლო მოთვინებათ იჯინე. თის დანიშნულ აფჷ თე ქვეყნიერებაშ განადგურებაშ დრო დო უჯინე თი დღა დო საათიშ მოულას (მათ. 24:36). თიმწკუმა გეგმიარგამებ, ნამდა თი ირფელ, მუდგას სატანა დო თიშ მიმაჸუნალეფ ღორონთის აბრალუაფუნა, ტყურა რე. უკულ ღორონთ განადგურენს ქოთ სატანას დო ქოთ არძას, მით თიშ მხარეს დეკინენა, მარა ჩქი ქომჭყოლოფუანა.

თეიშახ იეჰოვაქ შილებე ვემმოჩილითუან განსაცდელეფ, მარა მარწმუნენა, ნამდა ქიმმეხვარებუნა, ვა ვოდინუათ ხიოლ თი დღაშ მოულაშახ. მუჭოთ ესაიაქ თქუ, შემლებუნა ვორდათ ბედნერეფ, ონდო შურ მოლუნან თეშ უჯინეთ უჯგუშობას (ეს. 30:18).a გუვარჩუათ ოთხ საშვალება, მუთ მიმეხვარებუნა ხიოლიშ მეღებას.

ᲛᲣᲭᲝ ᲨᲔᲛᲚᲔᲑᲣᲜᲐ ᲕᲐ ᲕᲝᲓᲘᲜᲣᲐᲗ ᲮᲘᲝᲚ, ᲝᲜᲓᲝ ᲕᲣᲯᲘᲜᲔᲗ ᲘᲔᲰᲝᲕᲐᲨ ᲓᲦᲐᲡ?

ყურადღება დადებითშა გეგნიღით. დავითის ქიანაშ უბადობაქ აჸუ გინაღალარქ (ფსალმ. 37:35). თეშ უმკუჯინუო, თიქ ჭარჷ: „შურუქალუო გერდა იეჰოვაშ წოხოლე დო მოთვინებათ ქუჯინ თის. გურქ ვა მოირთას, მითინ მუშ ეშმაკობათ წარმატებას ქიმიოჭირინუანს-და“ (ფსალმ. 37:7). დავით ცხოვრებას ირინუანდჷ თე რჩევას დო გაჭირებაშ დროს ყურადღება მუშ მარსხებელ ღორონთშა გინუღუდ. თეს გეძინელ, შუდჷ თი კურთხევეფ ხოლო, ნამუთ ზეციერ მუმაშე უღუდ (ფსალმ. 40:5). დავითცალო, ვართ ჩქი მორკუნა სირთულეეფ. მარა ბრელ ჯგირ მუდგარენ ხოლო ხვადუ, ათეშენ, ყურადღებას ჯგირ მუდგარენეფშა გეგნიბღანთ-და, უმოს ადვილ მაჸინა, მოთვინებათ ქუჯინათ იეჰოვას.

ხეშე ვა გუტუათ იეჰოვაშ განდიდებაშ საშვალება. 71-ა ფსალმუნიშ მაჭარალ, ნამუთ მუჭოთ იძირე, დავით რდჷ, იეჰოვას ურაგად: „მარა მა მოთვინებათ გიჯინედენ იჸი დო ხოლო უმოსო განგადიდენქ“ (ფსალმ. 71:14). მუჭო ადიდენდჷ თინა იეჰოვას? შხვეფს ეჩიებუდ იეჰოვაშ დიდებულ საქმეეფიშ გურშენ დო ობირეშეფით ადიდენდჷ თის (ფსალმ. 71:16, 23). დავითცალო, მუჟამსით ხეშე ვა უტენთ იეჰოვაშ განდიდებაშ შესაძლებლობას, თენა მოხვარუნა, ხიოლით უჯინათ თის. იეჰოვაშ განდიდებაშ საშვალება მერზიებუნა მსახურებას, ოჯახიშ წევრეფ დო მეგობრეფწკუმა ურთიერთობაშ ვარდა ღორონთიშ ოდიდებელ ობირეშეფიშ ბირაშ დროს. თაშ ნამდა, ანწ ობირეშიშ ბირაშ დროს ქიდეკვირით თექ მოჩამილ აზრეფს დო თის, მუჭო ელაიკინანა გურშა.

დრო გეგმურთით და დო ჯიმალეფწკუმა ურთიერთობას. ართშა, მუჟამსით რთულ სიტუაციას რდჷ, დავითიქ თეცალ სიტყვეფ უწუ იეჰოვას: „სქან ართგურეფს ქუვოძირანქ, ნამდა სქან სახელიშ მენდით ვორექ“ (ფსალმ. 52:9). და დო ჯიმალეფწკუმა ურთიერთობა გურშა ელამკინანა. მართალ რე, თინეფწკუმა ართო ვორეთ კრებაშ შეხვალამეფს დო მსახურებას, მარა ჯგირ იჸუაფ, მინშა თავისფალ დრო ხოლო გუატარათ თინეფწკუმა ართო (რომ. 1:11, 12).

გემანგარით იმენდ. ფსალმუნიშ 62:5-ის ბკითხულენთ: „შურუქალუო უჯინექ ღორონთის, მუშენდა თიშ იმენდით ვორექ“. ძალიერ იმენდ მანგარ მნიშვნელოვან რე, განსაკუთრებულო თიმწკუმა, თე ქვეყნიერებაშ აღსასრულ ველუდითინ თიშმამალას ვა მოურს-და. დარწმუნებულ ოკო ვორდათ, ნამდა მუზმა ხანქ ვა მაჸუან ოჯინექინ, იეჰოვაშ დუნაპირებუეფ აუცილებერო შისრულებ. მუ მიმეხვარებუნა იმენდიშ გამანგარებას? ღორონთიშ სიტყვაშ გიმორკვიება. მაგალთო, შემლებუნა დეფიფქრათ, მუჭო შისრულ ნამთინე ბიბლიურ წინასწარმეტყველებაქ, მუჭო ოთანხმ ბიბლიაშ შხვადოშხვა წიგნ ართიანს ვარდა მუს მოგურუანა ბიბლიაშ ნამდგაინ მონაკვეთ იეჰოვაშ გურშენ (ფსალმ. 1:2, 3). თეს გეძინელ, ირიათო ოკო იბლოცათ „წმინდა შურით“, ნამდა ვა ვოდინუათ იეჰოვაწკუმა ხოლოშიან ურთიერთობა, ონდო ველუთ დუნაპირებუეფიშ შესრულებას (იუდ. 20, 21).

მეფე დავითცალო, დარწმუნებულ რდათ, ნამდა იეჰოვას უჸორს დო თიშ თოლს ვამკაკორდუ თინეფ, მით მოთვინებათ უჯინენა თის (ფსალმ. 33:18, 22). თაშ ნამდა, ყურადღება ირიათო დადებითშა გეგნიღით, განადიდით იეჰოვა, დრო გეგმურთით და დო ჯიმალეფწკუმა ურთიერთობას დო ირიათო გემანგარით მომავალიშ იმენდ. თენა მიგეხვარებუნა, მოთვინებათ უჯინათ იეჰოვას.