ქულუანთო „რწმენაშ დიდ ფარს“?

1, 2. ა) მუჭოთ ეფესოელეფიშ 6:16-ის ჭარჷ, მუშენ მოსაჭირნა „რწმენაშ დიდ ფარ“? ბ) მუ კითხვეფს გუვარჩიენთ?

ქოიღნანო „რწმენაშ დიდ ფარ“? (წეკითხით ეფესოელები 6:16). მუშო ოკო რაგად, გიღნა „რწმენაშ დიდ ფარ“. მუჭოთ დიდ ფარ იცვენს სხეულიშ უმენტაშ ნაწილს, თეშ რწმენა გიცვენა ქვეყნიერებას რენ თი უზნეობა, ძალადობა დო ირფელშე, მუთ ოწინააღმდეგ ღორონთიშ ნებას.

² ჩქი „ბოლო დღალეფს“ ფცხოვრენთ დო ჩქინ რწმენა ირიათო გიმიცადებ (2 ტიმ. 3:1). მუჭო შეილებნა შეამოწმათ ქორენ დო ვარ მანგარ თქვან რწმენაშ ფარ? დო მუშ კეთება შეილებნა, ნამდა გაგრძელათ თქვან რწმენაშ გამანგარება? მორთ, გუვარჩუათ თე კითხვეფიშ პასუხეფ.

ჯგირო შეამოწმით თქვან ფარ

3. მუჭო ულუანდეს ჯარიშკოჩეფ ფარს დო მუშენ?

³ ბიბლიურ დროს, ჯარიშკოჩეფს უმენტაშო ტყებით ფორილ ფარ უღდეს. თინეფ ზეთის უსვანდეს ფარს, მუშენდა ტყებ ვაჸორადედკო დო რკინა ვა დაჟანგებედკო. ფარ დეზიანებუდ-და, ჯარიშკოჩიქ ოკო იზრუნკო თიშე, ნამდა თინა ირიათო ჯგირ მდგომარეობას ჸოფედკო, მუშენდა ჯარიშკოჩ ირიათო მზათ რდუკო ბრძოლაშო. მუჭო ოკავშირ თე მაგალით ჩქინ რწმენას?

4. მუშენ ოკო შეამოწმათ თქვან რწმენაშ ფარ დო მუჭო შეილებნა თეშ კეთება?

⁴ ჯვეშ დროს მახორუ ჯარიშკოჩეფცალო, თქვა ხოლო ირიათო ოკო შეამოწმათ თქვან რწმენაშ ფარ დო მიკულუათ თის, მუშენდა ირიათო მზათ რდათ ბრძოლაშო. ქრისტიანეფ სულიერ ბრძოლას ბღებულენთ მონაწილებას. ჩქინ ნტერეფ შქას უბადო სულიერ ქმნილებეფ რენა (ეფეს. 6:10—12). თქვან მანგიორო შხვა ვემკაჯინე თქვან რწმენაშ ფარს. მუჭო შეილებნა დერწმუნათ, ნამდა მზათ რეთ რწმენაშ გამოცდეფშო? პირველ, ლოცვას მოხვარა ქოთხით ღორონთის. უკულ გეგმირინეთ ღორონთიშ სიტყვა, ნამდა შეამოწმათ თქვან რწმენა დო ქოძირათ, მუჭო გიჯინენა იეჰოვა (ებრ. 4:12). ბიბლიას ჭარჷ: „ქიმიენდ იეჰოვას მთელ გურით დო სქან ჭკუაშ იმენდო ვადოსქიდა“ (იგავ. 3:5, 6). ასე ქიგიშინით, მუ პრობლემას შეხვადით ბოლოს დო მუჭო მიქცით? მაგალთო, სერიოზულ ფინანსურ პრობლემა ხომ ვაიღდეს? თე დროს ხეთე ქუგგაშინესო ებრაელეფიშ 13:5-ის ინოჭარილ იეჰოვაშ დუნაპირებუქ: „ვა დოიტენქ დო ვემგოტენქ“? დუგარწმუნესო თე მუხლიქ, ნამდა იეჰოვა ქიმგეხვარებდეს? თაშ ქორენ-და, თენა ოძირანს, ნამდა თქვან რწმენაშ ფარ ჯგირ მდგომარეობას გიღნა.

5. მუ შილებე ძირათ, მუჟამსით თქვან რწმენას ამოწმენთ?

⁵ რწმენაშ ჯგირო შემოწმებაშ უკულ, შილებე გუგაკვირან თიქ, მუდგას ძირუნთ. შილებე ქოძირათ, ნამდა მუდგარენ მხარეეფს სისუსტეეფ გიღნა, ნამდგაშ გურშენ ვაიჩქუდეს. მაგალთო, შილებე ქოძირათ, ნამდა ზედმეტ ოფიქრებელქ, ტყურეფქ დო გურიშგოტახუაქ დაზიან თქვან რწმენა. თაშ ქორენ-და, მუჭო შეილებნა დეცვათ თქვან რწმენა უმოს მეტ ზიანშე?

დეცვით დუდ თიშე, მუთ რწმენას დაისუსტენა

6. ნამ საკითხეფშე ფიქრი რე ჯგირ?

⁶ ჯგირ რე, მუჟამსით ნამთინე საკითხშე ფიფქრენთ. მაგალთო, მუჭო ვასიამოვნათ იეჰოვას დო იესოს (1 კორ. 7:32). სერიოზულ ცოდვა ქუმაფნა ჩადენილ-და, თენა მანგარო მოწუხნა დო მოკონა იეჰოვაწკუმა მეგობრობაშ დორთინაფა (ფსალმ. 38:18). თეს გეძინელ, ფიფქრენთ, მუჭო ვასიამოვნათ მეუღლეს დო იბზრუნათ ჩქინ ოჯახიშ წევრეფ დო თანაქრისტიანეფშო (1 კორ. 7:33; 2 კორ. 11:28).

7. ა) მუჭო შილებე ზედმეტ ოფიქრებელქ ჩქინ რწმენა დაზიანას? ბ) მუჭოთ იგავეფიშ 29:25-ის ჭარჷ, მუშენ ოკო ვა მოშქურდან ხალხშა?

⁷ შილებე ზედმეტ ოფიქრებელქ ჩქინ რწმენა დაზიანას. მაგალთო, შილებე ირიათო ბწუხენთ თიშე, ნამდა ქომღუდან საჭირო ოჭკუმალ დო ბარგი (მათ. 6:31, 32). ათეშენ, შილებე ყურადღება ქონებაშ შაყარუაშა გეგნიბღათ დო ფარაშ ჸოროფა ხოლო გუვავითარათ. თეს დუშვენთ-და, ჩქინ რწმენა დესუსტებ დო იეჰოვაწკუმა ურთიერთობა გილმელებნა (მარ. 4:19; 1 ტიმ. 6:10). შილებე, თიშე ქიდიბჭყათ ფიქრი მუს თქუანა შხვეფ ჩქინ გურშენ. ათეშენ, შილებე თიშა უმოსო მაშქურნან, ნამდა ხალხ ქუგმაძიცენა ვარდა თხოზინს ქუდომჭყანა ვინემ თიშა, ნამდა იეჰოვას ვოწყინებაფუანთ. თე საფრთხეშე დუდ დეფცვათინ, იეჰოვას ოკო ქოფთხუათ, ქომჩან რწმენა დო გაბედულება, ნამდა ხალხშა ვა მაშქურნან (წეკითხით იგავები 29:25; ლუკ. 17:5).

8. მუჭო ოკო მიფქცუათ, მუჟამსით სატანაშ ტყურეფშენ ბგებულენთ?

⁸ სატანა, „ტყურაშ მუმა“, მუშ ქვეყნიერებას გიმირინუანს, ნამდა გავრცელას ტყურეფ იეჰოვა დო ჩქინ და დო ჯიმალეფიშ გურშენ (იოან. 8:44). მაგალთო, განდგომილეფ ინტერნეტით, ტელევიზიათ დო შხვა მედია საშვალებეფით ტყურეფს ავრცელენა დო იეჰოვაშ ორგანიზაციაშ გურშენ ფაქტეფს არასწორო გინოჩანა. თე ტყურეფ სატანაშ „დაჩხერმონტებულ ისარეფიშ“ ნაწილ რე (ეფეს. 6:16). მუჭო ოკო მიფქცუათ, მუჟამსით მიდგარენ თეცალ ტყურეფიშ გურშენ ჩქინწკუმა იჭყანს ჩიებას? ჩქი ვა ვურჩქილეთ თინეფს! მუშენდა რწმენას გიმიფრჩქინანთ იეჰოვაშ მიმართ დო ვონდუთ ჩქინ ჯიმალეფს. თეს გეძინელ, მუთუნნერ ურთიერთობა ვა მიღნა განდგომილეფწკუმა. ჩქი მითინს დო მუთუნს, თეწკუმა ართო ვართ ცნობისმოყვარეობას მეფჩანთ საშვალებას, ნამდა ვურჩქილათ განდგომილეფს ვარდა თინეფწკუმა ჩიებას ევაჸუნათ.

9. მუჭო შილებე გურიშგოტახუაქ იმოქმედას ჩქინწკუმა?

⁹ გურიშგოტახუაქ შილებე დასუსტას ჩქინ რწმენა. ჩქი დუდ ვემაჩილითენა ირდღაშიან პრობლემეფშა დო უპასუხიშმგებლობა იჸუაფ თინეფს ყურადღება ვემვაქცუათ. მინშა შილებე თე პრობლემეფქ გურ გომტახან. მარა ჩქინ დუდის ოკო ვემეფჩათ საშვალება, ირიათო თე პრობლემეფშე იფიფქრათ. თაშ ვემიფქცით-და, გუმოჭყორდნა ირფელ ჯგირ, მუდგას იეჰოვა მოპირნა (გამოცხ. 21:3, 4). გურიშგოტახუას შეულებ დასუსტას ჩქინ რწმენა დო იეჰოვაშ მსახურება მიმოტებაფუან (იგავ. 24:10). მარა ჩქი თენა ოკო ვა დუშვათ.

10. მუ დიგურეთ ართ დაშ ნაჭარა წერილშე?

¹⁰ მორთ ქობძირათ, მუჭო ინარჩუნენს მანგარ რწმენას შეერთებულ შტატეფს მახორუ ართ და, ნამუთ სერიოზულ ლახალა ოჭირუნ ფერ ქომონჯის ულუანს. მთავარ სამმართველოშა მეჭარილ წერილს თინა იჩიებ: „მინშა ჩქინ მდგომარეობა მანგარ რთულ რე დო გურს მიტახნა, მარა იმენდ მიღნა. ჩქიმწკუმა მანგარო მოქმედენს თი ირფელ, მუდგას იეჰოვა მარზენა, ნამდა გურშა ელამკინან დო გუვამანგარათ ჩქინ რწმენა. ჩქი მართალო მოსაჭირნა თეცალ რჩევა დო გურიშ ელაკინა. თინა მოხვარნა მიფთვინათ დო ქუგურზათ პრობლემეფს, ნამდგას სატანა ეწომხვამილუანა“. თე დაშ სიტყვეფშე დიბგურეთ, ნამდა შემლებნა ქუგურზათ გურიშგოტახუას! მუჭო შემლებნა თეშ კეთება? პრობლემეფ სატანაშა წინააღმდეგობაშ გაწევაშ საშვალებათ მირჩქინით. რშუდან, ნამდა ირნერ გურიშ ექექაფა იეჰოვაშე მოურს. დაფასით სულიერ საზრდო, ნამდგას თინა გარზენა.

11. მუ კითხვეფ ოკო დუსვათ ჩქინ დუდის, ნამდა შევამოწმათ მუ მდგომარეობას რე ჩქინ რწმენა?

¹¹ თქვან რწმენაშ ფარს გამანგარება ხომ ვასაჭირ? შეგალებუესო ბოლო მუსხირენ თუთას დუდ აურიდითკო ზედმეტ ოფიქრებელს? ვარია ქოთქვითო ქუმოირჩქილუაფდესკო განდგომილეფშა ვარდა ეჩითკო თინეფს თი ტყურეფშენ, ნამდგას ავრცელენა? შეგალებუესო გურიშგოტახუაშა გარზებაქ? თაშ ქორენ-და, თქვან რწმენა ჯგირ მდგომარეობას რე. მარა იშენ კურცხას ოკო ვორდათ, მუშენდა სატანას შხვა საშვალებეფს ხოლო გიმირინუანს ჩქინ წინააღმდეგ.

დეცვით დუდ მატერიალიზმშე

12. მუჭო შილებე მატერიალიზმიქ იმოქმედას ჩქინწკუმა?

¹² მატერიალიზმის შეულებ შხვა მუდგარენშა გეგნმოღალაფუან ყურადღება დო შეასუსტას ჩქინ რწმენა. მოციქულ პავლექ თქუ: „ნამთინ მეომარ ვა რე გინოჸუნელ ირდღაშიან სავაჭრო საქმეეფს, ნამდა თიშ მოწონა დემსახურას, მიდგაქ მეომარეფიშ რიგეფშა მიღჷ“ (2 ტიმ. 2:4). რომაელ ჯარიშკოჩეფს ვა უღდეს უფლება, შხვა საქმეეფ ხოლო უკეთებდესკო. მუ მოხვადუდ, რომაელ ჯარიშკოჩეფ თე მოთხოვნას ვეშეასრულენდეს-და?

13. მუშენ ოკო ვემიღესკო ჯარიშკოჩეფქ სავაჭრო საქმეეფს მონაწილება?

¹³ წერმიდგინით თეცალ სიტუაცია: ოჭმარეს ჯარიშკოჩეფ ყამეფით ვარჯიშენა, მარა ართ ჯარიშკოჩიქ ვემერთჷ ოვარჯიშებშა, მუშენდა ოჭკუმალს გიმოჩანს მაღაზიას. მთელ ონჯუას ჯარიშკოჩეფ ამოწმენა მუნეფიშ ობრძოლებერ იარაღეფს დო ყამეფს ლასირანა. ოჭკუმალს გიმოჩანსინ თი ჯარიშკოჩ მთელ დროს ოჭკუმალიშ მომზადებას მიკახარჯენს, ნამდა მაჟია დღას გეგმოჩას. მაჟია ოჭმარეს, ჯარიშკოჩეფს ნტერეფ მოულოდნელო გიანთხუნა დუდის. ნამ ჯარიშკოჩ იჸუაფ უმოს მომზადებულ ობრძოლებერო დო მის მიწონუანს მეთაურ? პირადო თქვა, მიშ გვერდით მიკორინუანდით გერინას — თიწკუმა, მით ირიათო ემზადებუდ დოვარ თიწკუმა, მიდგას ყურადღება შხვა მუდგარენშა აფუდ გინოღალირ?

14. მუჭოთ ქრისტეშ ჯარიშკოჩეფშო, მუ რე ჩქინო არძაშ უმოს მნიშვნელოვან?

¹⁴ ჯგირ ჯარიშკოჩეფცალო, ჩქი ხოლო ვა მოკონა მთავარ მიზანშე ყურადღება შხვა მუდგარენშა გინიბღათ; ჩქინ მიზან რე ჩქინ მეთაურეფშე — იეჰოვა დო იესოშე მიბღათ მოწონა. ჩქინო თენა უმოს მნიშვნელოვან რე, ვინემ თი ირფელ, მუდგას სატანაშ ქვეყნიერება ფთავაზენა. დარწმუნებულეფ ვორეთ, ნამდა მიღნა საჭირო დრო დო ენერგია, ვემსახურათ იეჰოვას დო ჩქინ რწმენაშ ფარ დო სულიერ საჭურველიშ შხვა ნაწილეფ, ჯგირ მდგომარეობას რე.

15. მუ გაფრთხილება მუჩეს პავლექ დო მუშენ?

¹⁵ ჩქი ირიათო კურცხას ოკო ვორდათ. პავლე მოციქულქ გუმაფრთხილეს, ნამდა „მით ქონებაშ შაყარუაშა მინჭუაფ“ თინა რწმენას ქიდიტენს (1 ტიმ. 6:9, 10). პავლეშ სიტყვეფ თიშა მეუთითენს, ნამდა შილებე ვეცადათ თიცალ ნივთეფიშ ჸიდირს, ნამუთ ვა მოსაჭირნა დო თეშნერო, შხვა მუდგარენშა გეგნიბღათ ყურადღება. თეშ უკულ შილებე ჩქინ გურს „ბრელ უგუნურ დო გლახა სურვილქ“ გევითარას. თიშ მანგიორო, ნამდა თეცალ სურვილეფს ჩქინ გურს გავითარებაშ საშვალება მეფჩათ, ოკო მარჩქილედან, ნამდა თინა სატანაშ იარაღეფშე ართ-ართ რე, მუდგას ჩქინ რწმენაშ შეიოსუსტებელო გიმირინუანს.

16. ნამ კითხვეფშე ოკო დუმაფიქრან მარკოზიშ 10:17—22-ს ინოჭარილ მაგალითიქ?

¹⁶ მაგალთო, თიზმა ფარა მიღნა, ნამდა ბრელ ნივთიშ ჸიდირ შემლებნა. არასწორო იფქციებუთო, მუჟამსით თიცალ ნივთეფს პჸიდულენთ, ნამუთ მოკონა, მარა სინამდვილეს იშენდოიშენ ვა მოსაჭირნა? იშენდოიშენ ვარ. მარა დეფიფქრათ თეცალ კითხვეფშე: მუჟამსით მიღნა საშვალება ქიპჸიდათ მუდგარენ ნივთეფ, ქოღმუნანო თიშ დრო დო ენერგია ნამდა გეგმიბრინუათ დო მიკულუათ თინეფს? თეს გეძინელ, დეფიფქრათ, შილებენო მანგარო ქიმეჸოროფან თე ნივთეფქ? შილებენო მატერიალურ ნივთეფიშ ჸოროფაქ თეშ იმოქმედას ჩქინწკუმა, ნამდა თი ახალგაზრდა კოჩცალო მიფქცუათ, მიდგაქ ვარია თქუ იესოშ შეთავაზებაშე, უმოს გაკეთკო ღორონთიშ მსახურებას? (წეკითხით მარკოზი 10:17—22). ბრელით უჯგუშ რე, უბრალო ცხოვრებათ იფცხოვრათ დო ჩქინ ძვირფას დრო დო ენერგია ღორონთიშ ნებაშ შესრულებას დავუთმათ.

მანგარო ქიმეკიდით ხე თქვან რწმენაშ ფარს

17. მუქ ოკო ვაგმოჭყორდან დღას?

¹⁷ დღას ოკო ვაგმოჭყორდან, ნამდა ომს ბღებულენთ მონაწილებას დო ირნერო მზათ ოკო ვორდათ ირდღას ობრძოლებერო (გამოცხ. 12:17). თანაქრისტიანეფს ვეშულებნა ჩქინ მანგიორო გილეღან ჩქინ რწმენაშ ფარ. პირადო მიღნა პასუხიშმგებლობა, გუვამანგარათ ჩქინ რწმენა.

18. მუშენ ოკო მეკიდესკო მანგარო ხე ჯარიშკოჩეფქ მუნეფიშ ფარს?

¹⁸ ჯვეშ დროს, ჯარიშკოჩის პატის ცენდეს, მუჟამსით ომს გაბედულებას გიმირჩქინანდჷ. მარა ჸუდეშა ფარიშ უმშო დირთუდ-და, ონჯღორეს ქოძირუნდჷ. რომაელ ისტორიკოს ტაციტუსიქ ჭარჷ: „ბრძოლაშ დროს ფარიშ დინაფა მანგარ ონჯღორე რდუ“. თენა რდუ ართ-ართ მიზეზ, მუდგაშ გურშენ ჯარიშკოჩეფქ მანგარო ოკო მეკიდესკო ხე მუნეფიშ ფარს.

19. მუჭო შემლებნა მანგარო მეფთხათ ხე ჩქინ რწმენაშ ფარს?

¹⁹ მუჟამსით ქრისტიანულ შეხვალამეფს რეგულარულო ვოსწრუთ დო შხვეფს ღორონთიშ სახელშე დო თიშ სამეფოშენ ვეჩიებუთ, მანგარო მემითხნა ჩქინ ფარშა ხე (ებრ. 10:23—25). თეს გეძინელ, ირდღას ბკითხულენთ ღორონთიშ სიტყვას დო ბლოცულენთ, ნამდა იეჰოვაქ ქიმმეხვარან გეგმიბრინუათ თი რჩევეფ დო მითითებეფ, მუდგას მარზენა (2 ტიმ. 3:16, 17). თე ირფელიშ უკულ, არძა იარაღის, მუდგას სატანა ჩქინ წინააღმდეგ გიმირინუანს, ვეშიალებე მარადიულ ზიან მომღან (ეს. 54:17). ჩქინ „რწმენაშ დიდ ფარ“ დამცვენა, გაბედულეფ იპჸით დო თანაქრისტიანეფწკუმა ართო მიბგენთ ირდღაშიან ომეფს. თეს გეძინელ, მაღვენუნა პატი, გებდირთათ იესოშ მხარეს, მუჟამსით თინა სატანა დო თიშ მიმაჸუნალეფწკუმა ომს მიგენს (გამოცხ. 17:14; 20:10).