ახალგაზრდეფ, თქვა შეილებნა გიღდან კმაყოფილებათ ეფშა ცხოვრება

1, 2. მუ ცვლილებეფიშ კეთება რე შეიოლებერ, მუჭოთ თენა ტონიშ შემთხვევაშე იძირე?

ტონიქ მუმაშ უმშო მირდჷ. თინა სკოლაშა გილეშ, მარა გურაფა ბრელს ვაინტერესუდ დო მეტება ოკოდ. საბატონ დო ჟეშხას კინოშ ოჯინშა გილეშ ვარდა მეგობრეფწკუმა ატარენდჷ დროს. ტონი მოძალადე დო ნარკომან ვარდჷ; თის უბრალოთ ცხოვრებაშ აზრი აფუდ დინაფილ. თის თინა ხოლო ოეჭვუდ, ქოარსებენდ დო ვარ ღორონთ. ართ დღას თიქ იეჰოვაშ მოწმეეფს ქეშეხვად დო კითხვეფ ქუდუსვჷ ღორონთიშ არსებობაშენ. თინეფქ ტონის ჟირ ბროშურა ქიმეჩეს „სიცოცხლის წარმოშობა — ხუთი კითხვა, რომელზეც ღირს დაფიქრება“; „თავისით გაჩნდა სიცოცხლე?“.

² მუჟამსით მოწმეეფქ კინ ქიმიაკითხუეს, ტონის მთლიანო აფუდ აზროვნება თირელ. თის თეშ აფუდ თე ბროშურეფ დამუშებულ, ნამდა ჟირხოლო აკოჭყინჭყოლირ რდუ. ტონიქ მოწმეეფს უწუ: „თურმე ღორონთ არსებენს“. თიქ ქიდიჟყჷ ბიბლიაშ გურაფა დო ნაგურეფუშ ცხოვრებას გიმორნაფა. ბიბლიაშ გურაფაშ დოჭყაფაშახ, ტონი სკოლას გლახათ გურაფლენდჷ, მარა თიშ უკულ არძაშ უჯგუშ მოსწავლეთ გინირთჷ. სკოლაშ დირექტორ, ნამუსით გაგებულ აფუდ ტონიშ ახალ რწმენაშენ, გაოცებულ რდუ. თიქ ტონის კითხჷ: „მანგარო რექ თირელ დო უჯგუშო ხოლო გურაფლენქ. თენა იეჰოვაშ მოწმეეფწკუმა დეკინ ურთიერთობან თიშ შედეგ რენო?“. ტონიქ უწუ, ნამდა თაშ რდუ. თეშ უკულ საშვალებაქ ქიმიაჩ, დუმოწმუკო დირექტორს. თიქ ჯგირო გათუ სკოლა დო ამდღა სრულ დროთ პიონერო დო კრებას მომსახურეთ მსახურენს. თეს გეძინელ, ტონი ასე ბედნერ რე, მუშენდა ჸუნს მოჸოროფე მუმა, იეჰოვა (ფსალმ. 68:5).

დემორჩილ იეჰოვას დო სქან ცხოვრება წარმატებულ იჸი

3. მუს ელუჩანს იეჰოვა ახალგაზრდეფს?

³ ტონიშ შემთხვევა ხოლო ართშა გუმოშინანა, ნამდა იეჰოვა ნამდვილო ზრუნენს ახალგაზრდეფშო. თის ოკო, გიღდან წარმატებულ დო კმაყოფილებათ ეფშა ცხოვრება. თინა ელაიჩანა: „რშუდას სქან დიდებულ გუმაჭყაფალ სქან ახალგაზრდობას“ (ეკლ. 12:1). ამდღანერ ქვეყნიერებას თენა ირიათო ადვილ ვა რე. მარა თენა თის ვა ნიშნენს, ნამდა თეშ კეთება ვეგშქალენა. ღორონთიშ მოხვარათ, შეილებნა წარმატებულ რდათ ხვალე ახალგაზრდობას ვარინ, მთელ ცხოვრებას. თე საკითხ უჯგუშო ქიგებგათინ, მორთ, გუვარჩუათ მუქ მუხვარეს ისრაელეფს, დემკვირდესკო დუნაპირებ ქიანა დო მუქ მეხვარ დავითის გიორჯგინკო გოლიათის.

4, 5. მუ გაკვეთილიშ გურაფა შემლებნა ისრაელეფიშ დო დავითიშ მაგალითეფშე? (ქოძირით სურათ 24-ა გვერდის).

⁴ მუჟამსით ისრაელეფქ დუნაპირებ ქიანაშ ხოლოშა ქიმერთეს, ღორონც თინეფშა ვა უთქუალ, ოჩხუპებელო მემზადესკო (კან. 28:1, 2). თიქ ისრაელეფს უწუ, დემორჩილესკო დო მიენდესკო თის (იეს. 1:7—9). შილებე ადამიანურ თვალსაზრისით თე რჩევა გონივრულ ვარდკო. მარა, სინამდვილეს თენა რდუ არძაშ უჯგუშ რჩევა, მუდგაშ საშვალებათ იეჰოვაქ ისრაელეფს გიორჯგინაფუ ქანაანელეფშა (იეს. 24:11—13). ღორონც დევემორჩილათინ, რწმენა რე საჭირო, ნამუთ მიმეხვარებნა ირიათო წარმატებულეფ ვორდათ. თენა თაშ რდუ ჯვეშო დო ამდღა ხოლო თაშ რე.

⁵ ძალიერ დო გამოცდილ მაჩხუპებელ გოლიათ სიმაღლეთ 2.9 მ. რდუ. თეს გეძინელ, თინა ჯგირ შეიარაღებულ რდუ (1 სამ. 17:4—7). მარა თეშ გინაწონს, დავითის ხვალე ჟირ მუდგარენ უღუდ: შურდულ დო იეჰოვაშ რწმენა. რწმენაშ ნაკლებობა უღუდუნ თინეფ ფიქრენდეს, ნამდა დავითიშ მოქმედება გონივრულ ვარდჷ, მარა მეჩირთეს. სინამდვილეს გოლიათ რდუ უგუნურ (1 სამ. 17:48—51).

6. მუს გუვარჩიენთ თე სტატიას?

⁶ წოხოლენ სტატიას გუვარჩით ოთხ მუდგარენ, მუთ მიმეხვარებნა მიღდან ბედნერ დო წარმატებულ ცხოვრება. თენა რე: სულიერ მოთხოვნილებეფიშ დაკმაყოფილება, ჯგირ მეგობრეფ, სწორ მიზნეფ დო ნამდვილ თავისუფლება, ნამუსით ღორონთ მარზენა. მორთ, უმოსო დეფიფქრათ თე საკითხეფშე, მუდგას მა-16 ფსალმუნს მოჩამილ პრინციპეფ მიმეხვარებნა.

დეკმაყოფილით სულიერ მოთხოვნილება

7. ა) მუჭო ეჭარუნდით სულიერ პიროვნებას? ბ) მუ რდუ დავითიშ „წილ“ დო მუჭო იმოქმედ თექ თიშ ცხოვრებას?

⁷ სულიერო მოაზროვნე პიროვნებას ღორონთიშ რწმენა უღჷ დო ოცად ირფელს იეჰოვაშ თოლით უჯინას. თინა მეჸუნს იეჰოვაშ მითითებეფს დო გინოჭყვიდილ აფჷ, დემორჩილას თის (1 კორ. 2:12, 13). თეშ ჯგირ მაგალითის მეფე დავით მარზენა, ნამუქით თქუ: „იეჰოვაშ მსახურება ჩქიმო გიშართილ წილ დო სასმის რე“ (ფსალმ. 16:5). დავით მარდულ რდუ თე „წილშენ“ — იეჰოვაწკუმა ხოლოშიან ურთიერთობა დო დუდიშ გითაფორაფალშენ (ფსალმ. 16:1). შედეგო თინა იჩიებ: „მანგარ ხიოლ მიღჷ“. ნამდვილო, დავითშა ხიოლ მოუღუდ იეჰოვაწკუმა ხოლოშიან ურთიერთობას (წეკითხით ფსალმუნი 16:9, 11).a

8. მუ ოკო ვაკეთათ, ნამდა კმაყოფილებათ ეფშა ცხოვრება მიღდან?

⁸ თინეფ, მიდგას სიამოვნება დო ქონება პირველ ადგილშა გეურენა, დღას ვეგინანა თიცალ ხიოლს, მუნერით მეფე დავითის უღუდ (1 ტიმ. 6:9, 10). ართ კანადელ ჯიმა იჩიებ: „ნამდვილ კმაყოფილება ვა რე თინა, მუდგას თე ცხოვრებაშე ბღებულენთ. ნამდვილ კმაყოფილება რე, მუჟამსით ვორთუთ ირფელს იეჰოვა ღორონთშო, ნამუთ მარზენა ირნერ ძღვინს“ (იაკ. 1:17). ნამდვილო, იეჰოვაშ რწმენაშ გავითარება დო თიშ მსახურება მიგეხვარებნა გიღდან აზრიან დო კმაყოფილებათ ეფშა ცხოვრება. მუჭო შეილებნა რწმენაშ გავითარება? თეშო საჭირო რე დრო გეგმურთათ ბიბლიაშ კითხირს, ღორონთიშ გუნაჭყეფუეფიშ დაკვირვებას დო თიშ თვისებეფშე ფიქრის, მუნერით რე ჸოროფა (რომ. 1:20; 5:8).

9. დავითცალო, მუჭო შეილებნა ღორონთიშ სიტყვას მეჩათ საშვალება იმოქმედას თქვანწკუმა?

⁹ ღორონთიშ ჸოროფა მინშა თით გიმიხანტუ, ნამდა მუმასქუალურ რჩევას მარზენა. მეფე დავითიქ, ნამუქით მიღჷ ღორონთშე რჩევა, თქუ: „განვადიდენქ იეჰოვას, ნამუქით რჩევა მუჩჷ, სერით ხოლო ჩქიმ გიშასწორებას ომსახურ ჩქიმ ღრმა ფიქრეფ“ (ფსალმ. 16:7). დავითი ფიქრენდჷ ღორონთიშ სიტყვეფშე დო ოცადუდ მიაჸუნკო თის. თინა ღორონთიშ აზროვნებას არზენდჷ საშვალებას, იმოქმედკო მუწკუმა დო უჯგუშ პიროვნებათ დოთირედკო. მუჟამსით თქვა ხოლო თაშ ქიმიქციებუთ, იეჰოვაშ ჸოროფა უმოსო გეგემანგარებნა, უმოს მტკიცაშო გაჸინა გინოჭყვიდილ დემორჩილათ თის დო სულიერო მოწიფულ პიროვნებათ ხოლო გინირთუთ. ართ და, ქრისტინა იჩიებ: „მუჟამსით იბრკვიენქ სულიერ საკითხეფს დო ნაკითხერშე ფიფქრენქ, დუც თეშ ბგინაფლენქ, ითამ თენა იეჰოვაქ ხვალე ჩქიმო ჭარკო“.

10. მუჭოთ ესაიაშ 26:3-ს ჭარჷ, მუს მიმეხვარებნა სულიერ აზროვნება?

¹⁰ სულიერ აზროვნება მიგეხვარებნა ქვეყნიერებას დო მომავალს იეჰოვაშ თოლით უჯინათ. თე განსაკუთრებულ რჩქინას დო გაგებაშ უნარს იეჰოვა გარზენა, მუშენდა თის ოკო თქვა ხოლო გიჩქუდან, მუ რე ცხოვრებას მნიშვნელოვან, ნამდა სწორ გადაწყვეტილებეფ მიღათ დო მომავალს იმენდიშ თოლით უჯინათ (წეკითხით ესაია 26:3).b შეერთებულ შტატეფს მახორუ ართ ჯიმა, სახელო ჯოშუა იჩიებ, ნამდა იეჰოვაწკუმა ხოლოშიან ურთიერთობა მოძირანა, მუ რე ცხოვრებას არძაშ უმოს მნიშვნელოვან.

გირჩქინით ნამდვილ მეგობრეფ

11. მუჭო გიშაგორუნდჷ დავით მეგობრეფს?

¹¹ წეკითხით ფსალმუნი 16:3.c მეფე დავითის უჩქუდ, მუჭო გორკო ნამდვილ მეგობრეფ. თის ოსიამოვნუდ თიცალ კათაწკუმა ურთიერთობა, მიდგას უჸორდჷ იეჰოვა. დავითიშ სიტყვეფს, „წმინდეფ“, იგულისხმებუდ ზნეობრივო წმინდეფ. შხვა ფსალმუნმაბირექ ხოლო იგინ თეშნერო დუდ მეგობრეფიშ გიშაგორუაშ დროს. თიქ ჭარჷ: „მიდგას სქან შიშ უღჷ დო სქან ბრძანებეფს ასრულენს, არძა თინეფიშ მეგობარ ვორექ“ (ფსალმ. 119:63). მუჭოთ წოხოლენ სტატიას გუვარჩით, თქვა ხოლო შეილებნა დოგორათ ბრელ ჯგირ მეგობარ თინეფ შკას, მიდგას იეჰოვაშ შიშ უღჷ დო ომორჩილ თის. ვა რე აუცილებერ, თინეფ თქვან მახანეფ რდან.

12. მუშენ რდეს დავით დო იონათანი ჯგირ მეგობრეფ?

¹² დავით ხვალე მუშ მახანეფწკუმა ვა მეგობრენდჷ. ქორშუნანო, მი რდუ თიშ არძაშ უხოლაშ მეგობარ? თის იონათანი ჯოხოდ. თინეფს არძაშ უჯგუშ მეგობრობა უღდეს, მუთ ბიბლიას რე მოშინაფილ. მარა ქოიჩქუდესო, ნამდა იონათანი დავითშე 30 წანათ რდუ უნჩაშ? მუ რდუ თინეფიშ მეგობრობაშ საფუძველ? თინეფს უღდეს ღორონთიშ რწმენა, ართიანიშ პატიცემა დო აფასენდეს გაბედულებას, ნამდგას ჟირხოლო გიმირჩქინანდჷ ღორონთიშ ნტერეფწკუმა ჩხუპიშ დროს (1 სამ. 13:3; 14:13; 17:48—50; 18:1).

13. მუჭო შეილებნა რჸუნდან უმოს მეტ მეგობარ? ქიმიჸონით მაგალით.

¹³ დავით დო იონათანცალო, ჩქი ხოლო დიდ სიამოვნებას მომღანა თინეფწკუმა მეგობრობა, მიდგას უჸორს დო წანს იეჰოვა. კირა, ნამუთ წანეფ რე ომსახურ იეჰოვას, იჩიებ: „მთელ მსოფლიოს შხვადოშხვა ეროვნებაშ დო კულტურაშ კათას დევემეგობრჷ“. თქვა ხოლო თაშ ქიმიქციებუთ-და, ქოძირუნთ, ნამდა ბიბლია დო წმინდა შური ართ ოჯახო გინაშკვანს ღორონთიშ მსახურეფს.

დესახით სწორ მიზნეფ

14. ა) მუ მიგეხვარებნა სწორ მიზნეფიშ დასახვას? ბ) მუს იჩიებ ნამთინე ახალგაზრდა სულიერ მიზნეფიშ დასახვაშენ?

¹⁴ წეკითხით ფსალმუნი 16:8.d დავითშო არძაშ უმოს მნიშვნელოვან რდუ ღორონთიშ მსახურება. თქვა ხოლო გეხარებუთ დო კმაყოფილებათ ეფშა ცხოვრება გაღვენუნა, მუჟამსით სწორ მიზნეფს დესახენთ დო იეჰოვაშ მსახურებას ირიათო პირველ ადგილს ქიგიორინუანთ. ართ ჯიმა სტივენ იჩიებ: „მიზნეფიშ დასახვას, თინეფიშ მეჭირნაფას დო უჯგუშობაშე თირუას ჩქიმდა კმაყოფილება მოუღ“. ახალგაზრდა ჯიმა, ნამუთ გერმანიაშე რე, მარა ასე შხვა ტერიტორიას მსახურენს, იჩიებ: „მუჟამსით დიფრჩინუქ, ვა მოკო თეშ იჸუას, ნამდა მთელ ცხოვრება ხვალე ჩქიმ დუდშო მიცხოვრებ“. თქვა ხოლო თაშ ქოფიქრენთ-და, გეგმირინეთ თქვან შესაძლებლობეფ, ნამდა განადიდათ ღორონთ დო მეხვარათ შხვეფს (გალ. 6:10). დესახით სულიერ მიზნეფ დო ლოცვას ქოთხით იეჰოვას, ქიმგეხვარან თინეფიშ მეჭირნაფას. დარწმუნებულ რდათ, თინა ქუპასუხენს თქვან ლოცვეფს (1 იოან. 3:22; 5:14, 15).

15. მუ მიზნეფიშ დასახვა შეილებნა? (ქოძირით ჩარჩო „პრაქტიკულ მიზნეფ“).

¹⁵ მუ მიზნეფ შეილებნა დესახათ? ქეცადით კრებაშ შეხვალამეფს თქვან სიტყვეფით გაკეთათ კომენტარეფ, იმსახურათ პიონერო ვარდა ბეთელს. შეილებნა ქიდიგურუათ შხვა ნინა დო იმსახურათ თე ნინაშა მორაგადე ტერიტორიას. ართ ახალგაზრდა ჯიმა ბარაკი, ნამუთ სრულ დროთ მსახურენს, იჩიებ: „ირ ოჭმარეს თი აზრით გოკურცხინაფას, ნამდა მთელ ჩქიმ ძალეფს იეჰოვაშ მსახურებას გიმიბრინუანქ, დიდ კმაყოფილება მოუღ. შხვა მუთუნნერ საქმე ვა მომღანს თეცალ ბედნერობას“.

დაფასით ღორონთშე მოჩამილ თავისუფლება

16. მუნერ დამოკიდებულება უღუდ დავითის იეჰოვაშ სამართლიან ნორმეფშე დო მუშენ?

¹⁶ წეკითხით ფსალმუნი 16:2, 4.e მუჭოთ წოხოლენ სტატიაშე ბძირით, ღორონთიშ სამართლიან კანონეფით დო პრინციპეფით ცხოვრება ნამდვილ თავისუფლებას მარზენა. თინა მოხვარნა მიჸორდან ჯგირ დო ბჯოგდან გლახა (ამოს. 5:15). ფსალმუნმაბირე დავითიქ იეჰოვაშენ თქუ, ნამდა „თიშე მოურს ირნერ ჯგირ“. დავით ოცადუდ მიაჸუნკო ღორონთიშ მაგალითის სიჯგირაშ გიმორჩქინას. თის ჯოგუდ თინა, მუთ გლახა რდუ ღორონთიშ თოლს. ართ-ართ რე კერპეფიშ თაყვანიშცემა, ნამუთ ადამიანეფიშ დეგრადაციას უნწყუნს ხეს დო იეჰოვას დიდებას მიდუღანს, მუთ ხვალე თის ოკუთვნჷ (ეს. 2:8, 9; გამოცხ. 4:11).

17, 18. ა) მუს იჩიებ დავით ცრუ თაყვანიშმცემლობაშ შედეგეფშე? ბ) მუშენ გიტახანა ბრელ უბედრობას ამდღა ხალხი?

¹⁷ ბიბლიურ დროს სექსუალურ უზნეობა ცრუ თაყვანიშცემაშ ნაწილ რდუ (ოს. 4:13, 14). თეცალ თაყვანისცემა ბრელს მოწონდჷ, მუშენდა თინეფ იკმაყოფილენდეს მუნეფიშ უზნეო სურვილეფს, მარა ქორდესო ბედნერეფ? მუშო ოკო რაგად, ვარ! დავითიქ თქუ, ნამდა თინეფს, მით შხვა ღორონთეფს ომსახურდეს, ბრელ ოწუხებელ უღდეს. თინეფ სქუალეფს ხოლო სასტიკო ოქცუდეს, მუშენდა მუნეფიშ ღორონთეფს წირენდეს (ეს. 57:5). იეჰოვას ჯოგუდ თინეფიშ სისასტიკე (იერ. 7:31). თი პერიოდის ქოცხოვრენდითკონ, დასურო მარდულეფ იჸუაფდით, თქვან მშობლეფ იეჰოვაშ მორჩილეფ ქიჸუაფდეს-და.

¹⁸ ამდღა ბრელ რელიგიას მიღებულ რე სექსუალურ უზნეობა, თეწკუმა ართო ჰომოსექსუალიზმი. თეცალ კათა ფიქრენა, ნამდა თავისუფალეფ რენა, მარა სინამდვილეს ბრელ უბედრობას გიტახანა დუდშა, მუთ ალბათ თქვა ხოლო გაჸინა შემჩნეულ (1 კორ. 6:18, 19). თაშ ნამდა, ახალგაზრდეფ, ურჩქილით თქვან ზეციერ მუმას. დარწმუნებულ რდათ, ნამდა თიშ მორჩილება კინ თქვა მოიღანა ჯგირობუას. დეფიქრით თი შედეგეფშე, მუთ გლახაშ კეთებას მოჸუნს დო ქოძირუნთ, ნამდა დროებით სიამოვნება ვა ღირჷ თი ირფელშა, მუთ თეცალ საქმეეფს მოჸუნს (გალ. 6:8). ჟიშე მოშინაფილ ჯოშუა, იჩიებ: „მართალ რე, შემლებნა მუჭო მოკონან თეშ გიმიბრინუათ თავისუფლება, მარა თიშ არასწორო გიმორნაფა ჯგირს მუთუნს ვა მომღანა“.

19, 20. მუ კურთხევეფს მიღენა თი ახალგაზრდეფ, მით რწმენას გიმირჩქინანა დო ომორჩილნა იეჰოვას?

¹⁹ იესოქ მუშ მიმაჸუნალეფს უწუ: „ჩქიმ სიტყვას სკიდუთ-და, ნამდვილო ჩქიმ მოწაფეეფ რეთ, ქიგეგენთ ჭეშმარიტებას დო ჭეშმარიტება გუგათავისუფლენა თქვა“ (იოან. 8:31, 32). ჩქი გათავისუფლებულ ვორეთ ცრუ რელიგია, ურჩქინჯობა დო ცრურწმენაშე. თეს გეძინელ, მომავალს ველუთ, „ღორონთიშ სქუალეფიშ დიდებულ თავისუფლებას“ (რომ. 8:21). თე თავისუფლებათ ამდღა ხოლო შეილებნა ისარგებლათ, მუჟამსით ქიმიაჸუნუთ იესოშ გურაფეფს. თეგვარო, „ქიგეგენთ ჭეშმარიტებას“ ხვალე თიშ გურაფათ ვარინ, თიშ თანახმათ ცხოვრებათ ხოლო.

²⁰ ახალგაზრდეფ, დაფასით თავისუფლება, ნამუსით ღორონთ გარზენა. გეგმირინეთ თინა გონივრულო, მუთ ჯგირ მომავალს მოიღანა. ართ ახალგაზრდა ჯიმა იჩიებ: „ახალგაზრდობას თავისუფლებაშ გონივრულო გიმორნაფა უმოს გვიანო მიმეხვარებნა თიცალ მნიშვნელოვან გადაწყვეტილებეფიშ მეღებას, მუნერით რე სამუშაშ გორუა ვარდა თიცალ საკითხიშ გინოჭყვიდუა, დეფქორწინათ დო ვარ“.

21. მუჭო შეილებნა ქუდოსკიდათ „ჭეშმარიტ შარას“?

²¹ თე ქვეყნიერებას ართ მეჯინუთ ჯგირ ცხოვრება ხოლო დროებით რე. ჩქი ვამჩქუნა, მუს მომღანა ჭუმენერ დღა (იაკ. 4:13, 14). ათეშენ გონივრულ იჸუაფ, გუვაგრძელათ თი შარათ გილულა, ნამუთ „ჭეშმარიტ სიცოცხლეშა“ — მარადიულ სიცოცხლეშა მემჸონანა (1 ტიმ. 6:19). მუშო ოკო რაგად, ღორონთ ვა მანძალენა გილაფრთათ თე შარათ. ჩქინდა რე დამოკიდებულ, მუნერ გადაწყვეტილებას მიბღენთ. თაშ ნამდა დაფასით თი „ირფელ ჯგირ“, მუდგას იეჰოვა გარზენა (ფსალმ. 103:5). დარწმუნებულ რდათ, იეჰოვა ქიმერჩანა ხიოლს დო ბედნერობას მარადიულო (ფსალმ. 16:11).