ხიოლი თვისება, ნამუსით ღორონთ მარზენა

ბედნერ ცხოვრება არძას ოკო, მარა ბოლო დღალეფს ხალხ შითმოხვადუ პრობლემეფს ნამუთ „ძნელ გინაღალარ“ რე (2 ტიმ. 3:1). უსამართლობა, ჯამრთელობაშ პრობლემეფ, უმუშევრობა, ოწუხებელ დო შხვა გურიშ გატახალ მიზეზეფ ნამთინეს ჭიჭე-ჭიჭეთ ხიოლს უდინუანს. თინეფ შქას შილებე ღორონთიშ მსახურეფ ხოლო რდან. თქვა ხოლო თაშ ქორეთ-და, მუ მიგეხვარებნა ხიოლიშ დორთინაფას?

თე კითხვას პასუხ ქიმეფჩათინ, დიო ქიგებგათ მუ რე ხიოლ დო მუქ მეხვარ შხვეფს ვაუდინუაფდესკო ხიოლ პრობლემეფიშ დროს? თეშ უკულ გუვარჩიენთ, ჩქი მუ ოკო ვაკეთათ, ნამდა ვა ვოდინუათ თინა დო უმოს მეტ ხიოლ მიღდან.

მუ რე ხიოლი?

მიღდან ხიოლ ვა ნიშნენს, ნამდა უბრალოთ გახარებულეფ ვორდათ. მორთ ქიმიპჸონათ თეცალ მაგალითი: მუჟამსით კოჩ დიშუმუნ, შილებე ჯგირ ხასიათშა ქუმორთას. მარა გეგშიხერზელებუნ, ხასიათ ათირუ დო კინ მუშ პრობლემეფს ართუ. თეცალ ხიოლ დროებით რე დო ვართ ხოლო ნამდვილი (იგავ. 14:13).

თიშ გინაწონს, ნამდვილ ხიოლ გურშე მოურს. თენა რე „გრძნობა, ნამუთ მოუღჷ სასიამოვნო მუდგარენს ვარდა თის, მუჟამსით ჯგირს ველუთ“. ნამდვილ ხიოლ ნიშნენს, მუჟამსით პიროვნება სიტუაციაშ უმკუჯინუო, იშენით ბედნერო დო ჯგირო გინაფლენს დუც (1 თეს. 1:6). შილებე კოჩ შეწუხებულ რდას, მარა გურ იშენით ხიოლით აფდას ეფშა. მაგალთო, ართშა მოციქულეფ მართახით გოლახეს, მუშენდა თინეფ იესოშ გურშენ ქადაქენდეს. მარა მუჭოთ ბიბლია იჩიებუნ, თინეფქ „მიდართეს სინედრიონშე დო ოხიოლდეს, ნამდა თიშ სახელიშ გურშენ შეურაცხყოფაშ ღირსეფქ ქიჸუეს“ (საქ. 5:41). მუშო ოკო რაგად, თინეფს მართახით ლახუა ვახიოლდეს. მოციქულეფ გახარებულეფ თიშენ რდეს, ნამდა ღორონთიშ ართგურეფქ ქუდოსკიდეს.

ხიოლ დაბადებაშე ვეთოპჸუნა, თინა ვართ მუშით რჩქინდუ, მუშენდა თე თვისება ღორონთიშ წმინდა შურიშ ნაყოფ რე. წმინდა შურ მიმეხვარებნა ქუვორდათ „ახალ პიროვნება“, ნამდგაშა ხიოლიშ გავითარება ხოლო მიშურს (ეფეს. 4:24; გალ. 5:22). მუჟამსით თე თვისებას გუვავითარენთინ, უჯგუშო გივორჯგინანთ ირდღაშიან პრობლემეფს.

ბიბლიურ მაგალითეფი

იეჰოვას ოკოდ, ნამდა დედამიწას ჯგირ ოცხოვრებელ პირობეფ ქოჸოფედკო დო ვართ ხოლო თიცალ, მუნერსით ამდღა ვორწყეთ. შხვეფიშ უბადო საქციელიშ უმკუჯინუო, ღორონთ ხიოლს ვადინუანს. ბიბლიას ჭარ: „ძალა დო ხიოლ რე თიშ ოკვირდუს“ (1 მატ. 16:27). თეს გეძინელ, მუშ მსახურეფიშ ჯგირ საქციელ თის გურს უხარენს (იგავ. 27:11).

შემლებნა მივაჸუნათ იეჰოვაშ მაგალითის დო ზედმეტო ვებწუხათ, მუჟამსით მუდგარენ თეშ ვა რე, მუჭოთ მოკონა რდას. თაშ ნამდა, მორთ, ვა ვოდინუათ ხიოლი, ყურადღება გეგნიბღათ თი ჯგირობუაშა, ნამუთ ამდღა მიღნა დო მოთვინებათ ვუჯინათ მომავალს მელნან თი კურთხევეფს.a

ჩქი შემლებნა ქობძირათ ბიბლიურ მაგალითეფ თი კათაშ გურშენ, მით რთულ დროს ხიოლს ვადინუანდჷ. თინეფ შკას რდუ აბრაამი, ნამუშ სიცოცხლე ბრელშა საფრთხეშ თუდო გერდჷ დო შხვეფიშ მიზეზით ბრელ პრობლემას შეხვად (დაბ. 12:10—20; 14:8—16; 16:4, 5; 20:1—18; 21:8, 9). თე სირთულეეფიშ უმკუჯინუო აბრაამს იშენით გურ ხიოლით აფუდ ეფშა. მუჭო ახერხენდჷ თეს? თის ირიათო უღუდ თიშ იმენდ, ნამდა ახალ ქიანას მესიაშ სამეფოშ მართველობაშ თუდო იცხოვრენდჷ (დაბ. 22:15—18; ებრ. 11:10). იესოქ თქუ: „მუათქვან აბრაამი, შურგოტებულო ელუდ ჩქიმ მულაშ დღას“ (იოან. 8:56). ჩქი შემლებნა მივაჸუნათ აბრაამიშ მაგალითის თით, ნამდა ქიფიფქრათ თი კურთხევეფშე, ნამუთ წოხოლე მელნა (რომ. 8:21).

აბრაამცალო მოციქულ პავლეს დო სილას, მთელ ყურადღება ღორონთიშ დუნაპირებშა აფდეს გინოღალირი. თინეფს მანგარ რწმენა უღდეს დო რთულ სიტუაციეფიშ დროს ხოლო ვაუდინუაფნა ხიოლი. ართშა მოციქულეფ მანგარო გოლახეს დო ციხეს ქუდახუნეს, მარა ბიბლია იჩიებ: „შქა სერს პავლე დო სილა ლოცულენდეს დო ღორონც ოდიდებელს უბირდეს“ (საქ. 16:23—25). თინეფ ირიათო ფიქრენდეს ღორონთიშ დუნაპირებშე, მუთ ძალას არზენდ, ქუგურზესკო პრობლემეფს. თეს გეძინელ, იესოშ სახელიშ გურშენ იტანჯებდესინ თიშ რჩქინა, ოხვარუდ ვა უდინუაფდესკო ხიოლი. ჩქი შემლებნა მივაჸუნათ პავლეშ დო სილაშ მაგალითის, მუჟამსით დღას ვეგიბჭყოლიდუანთ თი კურთხევეფს, მუთ ღორონთიშ ართგურო მსახურებას მოჸუნს (ფილ. 1:12—14).

ჩქინ ორგანიზაციას ბრელ და დო ჯიმა რე, ნამუთიქ პრობლემეფიშ დროს ხიოლ ვადინუეს დო თეგვარო ჯგირ მაგალით დომტუეს. მაგალთო, 2013 წანაშ ნოემბერს ფილიპინებიშ ცენტრალურ ნაწილს ტაიფუნ „ჰაიანიქ“ ქიგიოტირხ დუც დო 1 000-შე მეტ იეჰოვაშ მოწმეშ ჸუდექ ეკოცუ. თე სტიქიაქ ქალაქ ტაკლობანს ხოლო გინულუ, სოდეთ ართ ჩქინ ჯიმა, ჯორჯი ცხოვრენდჷ; თიშ ჸუდეშე მუთუნ ვა დოსკილადე. ჯორჯი იშინანს: „მოხვალამირ გლახა ამბეშ უმკუჯინუო, ჯიმალეფ ბედნერეფ რენა. ძნელ რე თი ხიოლიშ სიტყვეფით გინოჩამა, მუდგას ბგინაფლენთ“. მუდგა სირთულეეფს ვეშეფხვადათინ, ხიოლს ვა ვოდინუანთ, მუჟამსით მარდულობათ ეფშა გურით ფიფქრენთ თი კურთხევეფშე, მუთ იეჰოვაშე მიღნა. ხოლო მუ აკეთ იეჰოვაქ ჩქინო, მუთ ხიოლიშ მიზეზის მარზენა?

ხიოლიშ მიზეზეფი

ხიოლიშ არძაშ უმოს დიდ მიზეზ თინა რე, ნამდა იეჰოვაწკუმა ხოლოშიან ურთიერთობაშ საშვალება მიღნა. ჩქი იფჩინენთ უზენაეს ღორონც, ნამუთ ჩქინ მუმა დო მეგობარ რე (ფსალმ. 71:17, 18).

თეს გეძინელ, ვაფასენთ თის, ნამდა შემლებნა გეფხარათ ღორონთიშ ნაჩუქერ სიცოცხლეშ ძღვინით (ეკლ. 3:12, 13). ჩქი მოაზროვნე ქმნილებეფ ვორეთ, ნამუსით იეჰოვაქ საშვალება მუჩეს, ქომღუდესკო თიწკუმა ხოლოშიან ურთიერთობა დო ქუგამგებდესკო, მუ რე ღორონთიშ ნება (კოლ. 1:9, 10). ათეშენ, ჩქინ სიცოცხლეს დასურო უღჷ აზრი. მარა, ხალხიშ უმენტაშის საერთოთ ვა უჩქჷ, მუ რე ცხოვრებაშ აზრი. მუჟამსით თე საკითხიშ გურშენ იჩიებუდუნ, მოციქულ პავლექ ჭარ: «„მუთ თოლს ვა უძირ, ჸუც ვა მურჩქილუაფ დო კოც გურს ხოლო ვა უფიქრებუნ, თინა მამზად იეჰოვაქ მუშ მოჸოროფეეფშო“. ღორონთიქ თენა მუშ წმინდა შურიშ საშვალებათ გამცხადეს» (1 კორ. 2:9, 10). თაშ ნამდა, ჩქინო ხიოლ მოუღჷ იეჰოვაშ ნებაშ დო განზრახვაშ გაგებას.

დეფიფქრათ, ხოლო მუ აკეთ იეჰოვაქ მუშ ხალხშო. ბედნერეფ ვა ვორეთო, ნამდა ღორონთ მზათ რე ქუმაპატუან ჩქინ შეცთომეფი?! (1 იოან. 2:12). იეჰოვაშ ჭყოლოფათ, ახალ ქვეყნიერებას ბედნერ ცხოვრებაშ იმენდ მიღნა (რომ. 12:12). მარა იეჰოვა ამდღა ხოლო მარზენა საშვალებას, გეფხარათ დო თანამორწმუნეეფწკუმა ართო ვემსახურათ თის (ფსალმ. 133:1). ღორონთიშ სიტყვა მარწმუნენა, ნამდა იეჰოვა დოთხილანს მუშ ხალხის სატანა დო თიშ დემონეფშე (ფსალმ. 91:11). უმოს ხიოლ მაღვენუნა, მუჟამსით დეფიფქრებუთ თი კურთხევეფშე, ნამუსით იეჰოვა მარზენა (ფილ. 4:4).

მუჭო შემლებნა უმოს ხიოლ მიღდან?

შილებენო ქრისტიანს თიშე უმოს ხიოლქ ქაშუას, ვინემ ასე უღჷ? იესოქ თქუ: „თე ირფელ თიშენ გიწით, ნამდა ბოლოშა ქიგინათ თი ხიოლი, მუდგას მა ბგინაფლენქ“ (იოან. 15:11). თავრეშე იძირე, ნამდა შეიოლებერ რე მიღდან უმოს ხიოლი. თინა შილებე დაჩხირს შევადარათ. დაჩხირქ ვაშკირტასინ, მითოტურაფა რე საჭირო. თეგვარო, ხიოლქ ვამდინანინ, სულიერობაშ გაუჯგუშება რე საჭირო. ვაგმოჭყორდან, ნამდა ღორონთიშ წმინდა შურ მოხვარნა მიღდან ხიოლი. ათეშენ ირიათო ქოფთხუათ იეჰოვას წმინდა შური, წეპკითხათ ღორონთიშ სიტყვა დო დეფიფქრათ ნაკითხერშე (ფსალმ. 1:1, 2; ლუკ. 11:13).

თეს გეძინელ, ხიოლ ვა ვოდინუათინ, საჭირო რე აქტიურ მონაწილება მიბღათ თიცალ საქმეეფს, ნამუთ იეჰოვას ოსიამოვნჷ (ფსალმ. 35:27; 112:1). მუშენ იფჩიებუთ თეს? მუჭოთ ბიბლიას ჭარუნ, კოჩ თეშ რე გოჭყაფილ, ნამდა ჭეშმარიტ ღორონთშა ოშკურდას დო თიშ მცნებეფ დეცვას, „მუშენდა თენა რე ადამიანიშ ვალდებულება“ (ეკლ. 12:13). შხვანერო ქოფთქუათინ, ჩქი თეშ ვორეთ გოჭყაფილ, ნამდა ღორონთიშ ნება შევასრულათ. ზუსტას თეშ გურშენ მოუღჷ იეჰოვაშ მსახურებას ჩქინო დიდ ხიოლი.b

კურთხევეფ, ნამუთ ხიოლს მოჸუნს

მუჟამსით უმოს ხიოლს გუვავითარენთინ, შხვა კურთხევეფს ხოლო მიბღენთ. მაგალთო, ჩქინ ზეციერ მუმას უმოსო გუვახარენთ, მუჟამსით პრობლემეფიშ უმკუჯინუო ხიოლით გუვაგრძელენთ მსახურებას (კან. 16:15; 1 თეს. 5:16—18). თეს გეძინელ, მუჟამსით ნამდვილ ხიოლ მაღვენუნან, მატერიალურ მიზნეფიშ მეჭირნაფა ჩქინ ცხოვრებას მთავარ ადგილს ვედეკინენს. თეშ გინაწონს, ირნერო ქივეცადებუთ პირველ ადგილს სამეფოშ საქმე ქიგვორნუათ (მათ. 13:44). ჩქი უმოს ხიოლ მაღვენუნა, დუც უჯგუშო იბგინანთ დო შხვეფს ხოლო გუვაბედნერენთ, მუჟამსით ქობძირუნთ, მუ ჯგირ შედეგეფ მოჸუნს სამეფოშ საქმეშ პირველ ადგილს გერნაფას (საქ. 20:35; ფილ. 1:3—5).

ართ მკვლევარქ, ნამუთ ნებრასკაშ (შეერთებულ შტატეფი) უნივერსიტეტის ჯამრთელობაშ გურშენ კვლევეფს ატარენდუნ, თეცალ სიტყვეფ ჭარ: „ამდღა ქორეთ ბედნერეფ დო კმაყოფილეფ-და, მეტ შანს რე, მომავალს ხოლო ჯამრთელეფქ ქიჸუათ“. თიშ სიტყვეფ ზუსტას გინმოჩანს ბიბლიას მოშინაფილ აზრის, სოდეთ პკითხულენთ: „ხიოლით ეფშა გურ მკურნალცალო რე“ (იგავ. 17:22). თაშ ნამდა, მუთ მეტ ხიოლ გიღნან, თით უჯგუშ ფიზიკურ ჯამრთელობა გაღვენუნა.

მართალ რე, ამდღა პრობლემეფით ეფშა დროს ფცხოვრენთ, მარა შემლებნა ნამდვილ დო მარადიულ ხიოლ გუვავითარათ. თენა შემალებენა, მუჟამსით ქოფთხინთ ღორონც წმინდა შურს, ქიდიბგურუანთ დო დეფიფქრებუთ იეჰოვას სიტყვაშე. თეს გეძინელ, უმოს ხიოლს თინა ხოლო მომღანა, მუჟამსით თი კურთხევეფშა გეგნიბღანთ ყურადღებას, ნამუთ ამდღა მიღნა, ქიმვაჸუნუთ შხვეფიშ რწმენაშ მაგალითის დო ვეცადებუთ ღორონთიშ ნებაშ შესრულებას. თეგვარო ჩქინ დუდშა გიმოფცადათ ფსალმუნეფიშ 64:10-ის ენოჭარილ სიტყვეფს: „იეჰოვათ გეხარენს მართალ დო დუც ქექთუფორუანს თის“.