ხუჯი ქუდუკინით იეჰოვაშ უზენაესობას!

1, 2. მუს ოკო ვორდათ თითოულ დარწმუნებულ? (ქოძირით სურათ თე გვერდის).

მუჭოთ წოხოლენ სტატიას გენიფხილითინ, სატანა ამტკიცენს, ნამდა იეჰოვა ვა რე სამართლიან მართველ დო კაცობრიობა უჯგუშო იცხოვრენს თიშ მართველობაშ უმშო. ქორენო სატანა მართალ? დავუშვათ, ნამდა თი კათაქ, მიდგაქ იეჰოვაშ ხემძღვანელობაშ უმშო ცხოვრება გინოჭყვიდესინ, შეულებნა იცხოვრან მარადიულო. მარა ქიჸიდესო თინეფ ბედნერ ღორონთიშ მართველობაშ უმშო? ქიჸუაფდითო თქვა ბედნერ სრულ დომოუკიდებლობა დო მარადიულ სიცოცხლე ქოიღუდესკო?

² თე კითხვეფშა პასუხი სქან მანგიორო შხვას ვემიაჩე. თითოულქ პირადო ოკო დეფიქრას თე კითხვეფშე. თაშ ქიმიქციებუთ-და, დერწმუნებუთ, ნამდა ღორონც უღუ უფლება, რდას სამყაროშ უზენაეს მართველ. ბიბლიას მოჩამილ რე თიშ დამამტკიცებელ ფაქტეფი, ნამდა ღორონთშე უჯგუშ მართველ ვა არსებენს მთელ სამყაროს დო თინა იმსახურენს, მთელ გურით თიშ მხარეს გებდირთათ. მორთ, გენიფხილათ, მუჭო ამტკიცენს ბიბლია, ნამდა ხვალე იეჰოვას უღუ უფლება, რდას უზენაესი მართველ.

იეჰოვას უღუ მართველობაშ უფლება

3. მუშენ უღუ ხვალე იეჰოვას უფლება, რდას უზენაესი მართველი?

³ ხვალე იეჰოვას უღუ უფლება, რდას უზენაეს მართველ, მუშენდა თინა რე ირფელიშ შემალებე დო გუმაჭყაფალ ღორონთი (1 მატ. 29:11; საქ. 4:24). გამოცხადებაშ 4:11-ის მოშინაფილ რე ქრისტეშ 144 000 თანამართველიშ სიტყვეფი: „სი ღირს რექ, იეჰოვა, ჩქინ ღორონთი, მიღე დიდება, პატი დო ძალიერება, მუშენდა ირფელ სი გაჭყი, სქან ნებათ არსებენს დო გოჭყაფილ რე“. ნამდვილო, იეჰოვაქ გაჭყუ ირფელ, ათეშგურშენ თის უღუ სრულ უფლება, რდას მუჭოთ კაცობრიობაშ, თეშ არძა სულიერ ქმნილებაშ მართველი.

4. მუშენ რე ღორონთიშ წინააღმდეგ ულა ნებაშ თავისუფლებაშ არასწორო გიმორნაფა?

⁴ სატანას მუთუნ ვაგუჭყაფუ, ათეშგურშენ თის ვა უღუ უფლება, იკორინუას მართველობა. პირველ წყვილქ დო სატანაქ ნირგულო მიქცის, მუჟამსით ღორონთიშ უზენაესობაშ წინააღმდეგ მიდართეს (იერ. 10:23). მართალ რე, თინეფს ნებაშ თავისუფლება უღდეს დო ღორონთშე დამოუკიდებელო ცხოვრება გინოჭყვიდეს, მარა თენა თის ვა ნიშნენდ, ნამდა უღდეს თაშ მოქციებაშ უფლება. ნებაშ თავისუფლება არზენს კათას ირდღაშიან ცხოვრებას მუდგარენ საკითხეფიშ გიშაგორუაშ დო გინოჭყვიდირუაშ საშვალებას. მარა თენა თის ვა ნიშნენს, ნამდა თინეფს უღნა უფლება, მიდართან ღორონთიშ უზენაესობაშ წინააღმდეგ. არგამა რე, ღორონთიშ წინააღმდეგ ულა ნიშნენს ნებაშ თავისუფლებაშ არასწორო გიმორნაფას. ჩქი არძა ოკო ვომორჩილუდათ ღორონთიშ მართველობას დო ხემძღვანელობას.

5. მუშენ შემლებნა დარწმუნებულ ვორდათ, ნამდა ღორონთი ირფელს სამართლიანო გინოჭყვიდუნს?

⁵ არსებენს ხოლო შხვა მიზეზი თიშ, ნამდა ხვალე იეჰოვას უღუ უფლება, რდას უზენაეს მართველ. ძალაუფლებაშ გიმორჩქინაშ დროს თინა სრულყოფილ სამართლიანობას ვეგნურთანს. ღორონთი იჩიებ: „მა ვორექ იეჰოვა, ნამუსით ოსიამოვნუ ჯგირობუაშ, სამართლიანობაშ დო სიმართლეშ გიმორჩქინა დედამიწას“ (იერ. 9:24). იეჰოვას ვასაჭირ არასრულყოფილ კათაშ ნაჭარა კანონეფი, ნამდა გეგნოჭყვიდას, მუ რე სწორ დო სამართლიან. პირიქით, იეჰოვა ადგინენს სრულყოფილ სამართლიან კანონეფს დო არზენს თის კათას. ბიბლიას ჭარ: „სიმართლე დო სამართლიანობაშა რე გერსხილ სქან ტახთი“ (ფსალმ. 89:14; 119:128). თეგვარო, შემლებნა დარწმუნებულ ვორდათ, ნამდა თიშ კანონეფი, პრინციპეფი დო ირფელ, მუდგას გინოჭყვიდუნსინ, სამართლიან რე. თეშ გინაწონს, სატანაქ, ნამუთ ამტკიცენდ, ნამდა იეჰოვაშ მართველობა ვარდ სამართლიან, ვაგამართლუ დო ვამაღინ სამართლიანობაქ.

6. მის უღუ თიშ რჩქინა, ნამდა მართას მსოფლიო?

⁶ იეჰოვას უღუ სიბრძნე დო რჩქინა, იზრუნას სამყაროშენ დო თენა რე ხოლო ართ მიზეზი თიშ, ნამდა ხვალე იეჰოვას უღუ უფლება, რდას უზენაეს მართველ. მაგალთო, დეფიფქრათ თი ფაქტშენ, ნამდა ღორონთიქ მუშ სქუას მეჩ ძალა, დუსქილიდუაფუდკო კათა თიცალ ლახალეფშე, ნამდგას ექიმეფ ვახვარუდეს (მათ. 4:23, 24; მარ. 5:25—29). იეჰოვაშ თოლს თენა ვა რდუ სასწაულ. თის უჩქუ, მუჭო ფუნქციონირენს ჩქინ ორგანიზმი დო შეულებ დუმოსკილიდუან არძანერ ლახალაშე. ღორონც თინა ხოლო შეულებ, ნამდა დურთინუას ღურელეფს სიცოცხლე დო ვა დუშვას სტიქიურ უბედრობეფი.

7. მუშენ რე იეჰოვა არძაშ უმოს ბრძენ?

⁷ სატანაშ ქიანას ამდღა ხოლო ოცადნა დოგორან თიშ შარეფი, ნამდა მაგვარან ჭიჭე დო დიდ კონფლიქტეფი, მარა ხვალე იეჰოვას უღუ თიშ სიბრძნე, ქუმუღას მშვიდობა მთელ მსოფლიოს (ეს. 2:3, 4; 54:13). მუჟამსით იეჰოვაშ რჩქინა დო სიბრძნეშენ ბგებულენთინ, პავლე მოციქულცალო ბგინაფლენთ დუც, ნამუთ იჩიებ: „ო, ღორონთიშ სიმდიდრეშ, სიბრძნეშ დო რჩქინაშ სიტომბე! მუჭო ვენინჭინე თიშ სამართალშა დო ვემიგორე თიშ შარეფშა!“ (რომ. 11:33).

იეჰოვაშ მართველობა არძაშ უჯგუშ რე

8. მუ მორწონა იეჰოვაშ მართველობას?

⁸ ბიბლიაშე იძირე, მუშენ უღუ იეჰოვას მართველობაშ უფლება დო თინა ხოლო მუშენ რე თინა არძაშ უჯგუშ მართველ. ართ-ართ მიზეზი თინა რე, ნამდა იეჰოვა ჸოროფათ მართველენს. გური ხიოლით ემაფშაფნა, მუჟამსით ვორწყეთ, მუჭო გიმირინუანს იეჰოვა მუშ უზენაესობას. თინა „მოჭყოლოფე დო შემაცოდილაფარ რე, რისხვას ვა ჩქარენს დო ხვეიან რე სიკეთეს დო ჭეშმარიტებას“ (გამ. 34:6). ღორონთი მუშ მსახურეფს ღირსუანო ოქცუ დო პატიცემას გიმირჩქინანს. თინა უჯგუშო ზრუნენს ჩქინდე, ვინემ ჩქი შემლებნა თეშ კეთება. სატანა იჩიებ, ნამდა იეჰოვა მუშ ართგურ თაყვანიშმცემელეფს ირფელ ჯგირს უფულუნს, მარა თენა ტყურა რე. მარადიულ სიცოცხლე ქოჸოფედკო ჩქინო შეიოლებერინ, ღორონთიქ მუშ საჸოროფო სქუაშ სიცოცხლე დათმუ (წეკითხით ფსალმუნი 84:11; რომაელები 8:32).a

9. სოვრეშე მიჩქუნა, ნამდა ღორონთი არძას თითოულო აქციენს ყურადღებას?

⁹ იეჰოვას არძა მუშ თაყვანიშმცემელი უჸორს. თეშ გარდა, თინა არძას თითოულო ხოლო აქციენს ყურადღებას. მაგალთო, სუმ საუკუნეშ დინახალე იეჰოვა ამანგარენდ მსაჯულეფს, ნამდა ისრაელიშ ხალხი ურსხებდესკო ნტერშე. თი გაჭირებაშ პერიოდის იეჰოვას ყურადღებაშ უმშო ვადოსკილად რუთი, ნამუთ ვარდ ებრაელი, მარა ბრელ მუთუნ დათმუ მუშ ცხოვრებას დო იეჰოვაშ მსახურო გინირთ. იეჰოვაქ აკურთხუ რუთი ჯგირ ქომონჯით დო ქომოლსქუათ. თეშ გარდა, თიქ ღორონთშე ხოლო უმოს კურთხევეფ მიღუ. ახალ ქიანას რუთი გეთელებუნ, ქიგეგენს, ნამდა მუშ სქუაშ გამნარყშე მორთ მესიაქ. წერმიდგინით, მუჭო გეხარებ, მუჟამს ქიგეგენს, ნამდა თიშ ისტორიაქ იჭარ ბიბლიაშ ართ-ართ წიგნის, ნამუსით მუშ სახელ ჯოხო (რუთ. 4:13; მათ. 1:5, 16).

10. მუშენ შილებე ფთქუათ, ნამდა იეჰოვაშ მართველობა ტირანულ ვა რე?

¹⁰ ღორონთიშ მართველობა ტირანულ ვა რე. თინა თავისუფლებას მარზენა დო ხიოლს უნწყუნს ხეს (2 კორ. 3:17). დავითიქ თენა ათეცალ სიტყვეფით გიმოხანტ: „ღირსება დო ბრწყინვალება რე თიშ [ღორონთიშ] წოხოლე, ძალა დო ხიოლი რე თექ, სოდეთ თინა რე“ (1 მატ. 16:7, 27). ფსალმუნმაბირე ეთანქ ხოლო ჭარ: „ბედნერ რე ხიოლით კიჟინუნან ფერ ხალხი. იეჰოვა, სქან გოსინთელ სახეს გილულა თინეფ. სქან სახელით ხარენა მთელ დღას დო სქან სიმართლეთ რენა ამაღალებულ“ (ფსალმ. 89:15, 16).

11. მუჭო შემლებნა გუვამანგარათ თიშ რწმენა, ნამდა იეჰოვა არძაშ უჯგუშ მართველ რე?

¹¹ იეჰოვაშ სიჯგირეშე ხშირას დაფიქრება გამმანგარენა თიშ რწმენას, ნამდა ღორონთიშ მართველობა არძაშ უჯგუშ რე. ჩქი ფსალმუნმაბირეცალო იბგინანთ დუც, ნამუთიქ თქუ: „ართ დღას სქან ოზეეფს რინა უჯგუ, შხვადო რინას ანთას დღას“ (ფსალმ. 84:10). ჩქინ მოჸოროფე გუმაჭყაფალ იეჰოვას უჩქუ, მუ მოსაჭირნა ნამდვილ ბედნერობაშო დო ირფელს მარზენა თეშო. ირფელ, მუდგას ღორონთი ითხინსინ, ჩქინ საჯგირობუოთ რე დო დიდ ხიოლს მომღანა თიმწკუმა ხოლო, მუჟამსით თიშ მოთხოვნეფიშ შეიოსრულებელო მუდგარენ ოკო დაფთმათ (წეკითხით ესაია 48:17).b

12. მუ რე თიშ მთავარ მიზეზი, მუშენით ხუჯის უკინენთ იეჰოვაშ უზენაესობას?

¹² ბიბლიას ჭარ, ნამდა ქრისტეშ ანთას წანიან მართველობაშ უკულ, ნამთინე იეჰოვაშ უზენაესობაშ წინააღმდეგ მიდურს (გამოცხ. 20:7, 8). მუშენ მიქციებნა თინეფ თაშ? ეშმაკი, ნამუთ ირიათო ეგოისტურო იქციებ, ტყვეობაშე გენთავისუფლებუნ უკულ, კინ ქეცადებ, მიოჩილითუას კაცობრიობა. თინა ქეცადებ ქუდაჯერუას ხალხი, ნამდა შეულებნა მარადიულ სიცოცხლეშ მენჭირნაფა ღორონთიშ მორჩილებაშ უმშო. მუშო ოკო რაგად, თენა ტყურა რე დო თაშ დღას ვამოხვადუ. მარა თითოულქ ქოკითხას ოკო მუშ დუც: ქიდებჯერენქო თეცალ ტყურას? სატანაშ ბრალდებას ვოწინააღმდეგუთ, მუჟამსით იეჰოვას ვომსახურუთ თიშგურშენ, ნამდა მიჸორა, ჯგირ რე დო სამართლიან მართველ რე. ათეშგურშენ, ჩქი მოკონა, იფცხოვრათ მოჸროფე დო სამართლიან ღორონთიშ, იეჰოვაშ მართველობაშ თუდო.

ართგურო ქუდუკინთ ხუჯი ღორონთიშ უზენაესობას

13. მუჭო შემლებნა ხუჯი დუკინათ იეჰოვაშ უზენაესობას?

¹³ ნამდვილო, იეჰოვა იმსახურენს, მთელ გურით ქუდუკინათ ხუჯი თიშ უზენაესობას. მუჭოთ ბძირით, ხვალე თის უღუ მართველობაშ უფლება დო თიშ მართველობა არძაშ უჯგუშ რე. ჩქი შემლებნა ღორონთიშ უზენაესობაშ მხარეს გებდირთათ, მუჟამსით ართგურო ვომსახურუთ თის დო თიშ მოსაწონო იბქციებუთ. თეშ გარდა, საკითხეფიშ გინოჭყვიდუაშ დროს იეჰოვაშ მითითებეფიშ მეჸუნათ ვოძირანთ, ნამდა მიჸორა თინა დო თიშ მართველობაშ მხარეს გივორეთ (წეკითხით ეფესოელები 5:1, 2).c

14. მუჭო შეულებნა უხუცესეფს დო ოჯახიშ დუდეფს, მიაჸუნან იეჰოვაშ მაგალითის?

¹⁴ ბიბლიაშე ბგებულენთ, ნამდა იეჰოვა ჸოროფას გიმირჩქინანს დო მუშ ძალას გლახათ ვეგმირინუანს. თეგვარო, ოჯახიშ დუდეფი დო უხუცესეფი მიდგას უჸორა იეჰოვაშ უზენაესობა, მეჸუნა იეჰოვაშ მაგალითის დო ნაბეტანს ვეთხინა ოჯახიშ დო კრებაშ წევრეფშე. პავლე ხოლო იეჰოვაშ დო იესო ქრისტეშ მაგალითის მეჸუნდ (1 კორ. 11:1). თინა ვანძალენდ შხვეფს, აკეთესკო თინა, მუთ სწორ რდუ. პირიქით, პავლე თხინდ თინეფს, სწორას მიქცისკო (რომ. 12:1; ეფეს. 4:1; ფლმ. 8—10). იეჰოვა ხოლო თაშ მეურე საკითხეფს. თაშ ოკო მიქცუას არძაქ, მიდგას უჸორს იეჰოვა დო ხუჯის უკინენს თიშ მართველობას.

15. მუჭო ოძირანს თეოკრატიულ ხემძღვანელობაშა მორჩილება, ნამდა მიჸორა ღორონთიშ მართველობა?

¹⁵ ჩქი ღორონთიშ მართველობას ხუჯის ვუკინენთ თით, მუჟამსით ფთანამშრომლენთ თინეფწკუმა, მისით ხემძღვანელობა ოვალ. თიმ დროს ხოლო, მუჟამს ნამთინე საკითხ ბოლოშა ვამარჩქილენა ვარდა მუდგარენს ვა ვოთანხმუთ, იშენით მოკონა ხუჯი დუკინათ თეოკრატიას. ქვეყნიერებას თენა თაშ ვა რე, მარა მისით, იეჰოვაშ მართველობაშ თუდო ოკო ცხოვრებან, თაშ ოკო მიქცუას (ეფ. 5:22, 23; 6:1—3; ებ. 13:17). თაშ მოქციება ჯგირობუას მომღანა, მუშენდა იეჰოვა დაინტერესებულ რე ჩქინით დო იფრელ ჯგირ ოკო ჩქინო.

16. მუჭო შემლებნა ჩქინ გინნაჭყვიდირა საკითხეფით ვოძირათ, ნამდა ხუჯის ვუკინენთ ღორონთიშ უზენაესობას?

¹⁶ ხუჯის ვუკინენთ დო ვარ ღორონთიშ უზენაესობას, თით ხოლო გიმორჩქინდუ, მუს მუჭო გინოპჭყვიდუნთ. იეჰოვა ვა მარზენა კონკრეტულ მითითებეფს, მუჭო მიფქციათ არძა სიტუაციას. მარა ღორონთიშ გურაფეფშე რჩქუ, მუ თოლწონუა უღუ თის შხვადოშხვა საკითხიშ გურშენ. მაგალთო, ღორონთ კონკრეტულ მითითებეფს ვა მარზენა, მუ ოკო მიკიფქუნათ დო მუ ვარ. მარა თინა მარზენა მითითებას, ნამდა ჩქინ მიკოქუნაშე დო მეჯინაშე ოკო იძირედას მოკრძალება (1 ტიმ. 2:9, 10). თეწკუმა ართო ღორონც ვაკო, ჩქინ გინნაჭყვიდირა საკითხეფით მიდგაინ დუვაბრკოლათ (1 კორ. 10:31—33). მუჟამსით შხვადოშხვა საკითხეფს ღორონთიშ მოსაწონო გინოპჭყვიდუნთინ, თეთ ვოძირანთ, ნამდა მიჸორა ღორონთ დო ხუჯის ვუკინენთ თიშ მართველობას.

17, 18. მუჭო შეულებნა დაოჯახებულეფს ხუჯი დუკინან იეჰოვაშ უზენაესობას?

¹⁷ მორთ გუვარჩუათ, მუჭო შეულებნა დაოჯახებულ ქრისტიანეფქ, ხუჯი დუკინან იეჰოვაშ უზენაესობას. მუჭო მიქციებუდით თიმ დროს, მუჟამსით დაოჯახებაშ უკულ ცხოვრებაქ უმოსო ძნელქ ქიჸუ ვინემ ელუდით, ვარდა თქვან იმენდეფქ ვა გამართლ-და? დეფიქრით, მუჭო ოქცუდ იეჰოვა ისრაელეფს. იეჰოვა ისრაელეფშო რდუ, მუჭოთ ქომონჯ (ეს. 54:5; 62:4). წერმიდგინით, მუ რთულ იჸუაფუდ თე „ქორწინება“! მარა იეჰოვას ვეგნუჭყვიდირ ხეთეშე მეუტებუდკო თინეფ. ღორონთ ართგურ რდუ დო პატიენდ შეცთომეფს თინეფწკუმა დოდვალირ შეთანხმებაშ საფუძველშა (წეკითხით ფსალმუნი 106:43—45).d თე ირფელიშ რჩქინა მოხვარნა უმოსო მიჸორდან იეჰოვა.

¹⁸ დაოჯახებულეფ, მიდგას უჸორს ღორონთი დო თიშ მითითებეფინ, მეჸუნა იეჰოვაშ მაგალითის. პრობლემეფიშ გინაჭკირალო თიცალ შარას ვეგშიგორუნა, ნამუთ ვათანხმ ბიბლიას. თინეფს არჩქილენა, ნამდა იეჰოვაქ დაოჯახ დო ვაკო დეშორან ართიანს. ბიბლიურო ჩილ დო ქომონჯის ხვალე თიმწკუმა შეულებ ჩეთხუან, მუჟამსით ართ-ართ მეუღლე მრუშენს (მათ. 19:5, 6, 9). დაოჯახებულეფ ირნერო ქაცადნა ურთიერთობეფი გაუჯგუშან-და, თეთ ხუჯის უკინენა იეჰოვაშ მართველობას.

19. მუ შემლებნა ვაკეთათ, მუჟამსით შეცთომეფს ვუშვენთ?

¹⁹ არასრულყოფილებაშ გურშენ, მინშა შილებე ღორონც ვოწყინებაფუათ. თენა ჯგირო არჩქილე თის დო ათეშგურშენ მუშ საჸოროფო სქუაშ იესო ქრისტეშ სიცოცხლე დათმუ. თენა მარზენა საშვალებას, ღორონც ფთხუათ პატიება შეცდომეფიშ დროს (1 იოან. 2:1, 2). თეცალ სიტუაციას დუდიშ გამტყუნებაშ მანგიორო, ჩქინ შეცთომეფშე ოკო დიბგურუათ. იეჰოვაწკუმა ხოლოს ქიპჸით-და, ქუმაპატიენა დო ქიმმეხვარებნა თეცალ სიტუაციეფს მივერუათ (ფსალმ. 103:3).

20. მუჭო შემლებნა უკვე ამდღა, ხუჯი დუკინათ იეჰოვაშ უზენაესობას?

²⁰ ახალ ქიანას იეჰოვაშ მართველობაშ თუდო იფცხოვრენთ დო ქიდიბგურუანთ თიშ სამართლიან შარეფს (ეს. 11:9). იეჰოვა ამდღა ხოლო ბრელ მუთუნს მოგურუანა. მალას მითინ ვეგიორინუანს ეჭვიშ თუდო იეჰოვაშ უზენაესობაშ უფლებას. ამდღა რე თიშ დრო, ხუჯი ქუდუკინათ იეჰოვაშ უზენაესობას ართგურობათ, მსახურებათ დო მონდომათ, ნამდა ირფელს მუსით ვორთუთინ, მივაჸუნათ ღორონთიშ მაგალითის.