ჸუც ვა მარჩქილედუნ თინა ვა მოცილუდ, ქუვოგურეკო შხვეფს

ჩქიმ მშობლეფქ 1910 წანას საქორთუოშ დედაქალაქ ქართშე პელიშა (სასკაჩევანი, კანადა) გეგნორთეს ოცხოვრებშა. თინეფ ტრამალეფს, ფერმას რდუნ ფერ ჸუდეს ცხოვრენდეს. დებაბდი 1928 წანას დო ამშვ და დო ჯიმაშე არძაშ უკლაშ ვორდი. მუაჩქიმქ ჩქიმ დაბადებაშახ ამშვ თუთათ ადრე ღურ დო დიო ხოლო თოთო ბაღანა ვორდინ თეშ, დიდაქ ხოლო დომღურ. თეს არძაშ უნჩაშ დაშ, ლუსიშ ღურაქ ქიგიაძინ, ნამუთ 17 წანერ რდუ. თეშ უკულ, ბიძია ნიკიქ ბაღანეფ მუშ ჸუდეშა მიდამჸონეს.

ართ დღას, მუჟამსით გილულა ახალ დოჭყაფილ მაფუდუნ, ჩქიმ ოჯახიშ წევრეფქ თოლ ქუმომკინდეს, მუჭო ვუზინდუანდ კუდელს ართ ცხენს, ნამუთ ფერმას პჸუნდეს. თინეფს აშქურნეს ცხენქ ტორ ვამმოგუკონ დო ხონარმაღალო ქიგმოძახეს, ხე გუტეკონ, მარა მა თინეფშე ოჭიშით გივორდ დო მუთუნ ვა გამგონებ. საბედნეროთ, გინოფსქიდ მარა ჩქიმ ოჯახიქ თიმ დღას გეგ, ნამდა ჸუჯიშ რჩქილა ვა მიღუდ.

ოჯახიშ ართ მეგობარქ ჩქიმეფს ელუჩ, ყრუ-მუნჯეფიშ სკოლაშა ქიმემჸონესკო. თაშ ნამდა, ბიძია ნიკიქ თე სკოლაშა გემშამჸონ, ნამუთ სასკატუნს (სასკაჩევანი) რდუ. სოდგა ფცხოვრენდინ თევრეშე, სკოლაშა მუსხირენ საათიშ ოულარ შარა რდუ. მოშკურუდ, მუშენდა ხუთ წანერ ვორდ; თე შარა ჩქიმო შორ რდუ, ათეშგურშენ ჸუდეშა ხვალე დღახუეფიშ დო ზარხულიშ არდადეგეფიშ დროს მიფში. საბოლათ, ქიდიბგურე ჟესტეფიშ ნინა დო მოხიოლუდ თექიან ბაღანეფწკუმა ლაჸაფი.

ბგურაფლენქ ბიბლიურ ჭეშმარიტებას

1939 წანას უნჩაშ და მერიანქ ბილ დანილჩუკის მიდაჸუნ ოსურო. თინეფქ დო მა დო ჩქიმ და ფრანსის მუნეფშა მიდამიჸონეს. ჩქინ ოჯახშე პირველო თინეფქ დეკავშირეს იეჰოვაშ მოწმეეფს. ზარხულიშ არდადეგეფიშ დროს, თინეფ მთელ შურ დო გურით მეჩიებდეს თის, მუდგას ბიბლიაშე გურაფლენდეს. ჩქიმო ეფ ვა რდუ თინეფწკუმა ურთიერთობა, მუშენდა ვა უჩქუდეს ჟესტეფიშ ნინა. მარა თინეფქ ქოძირეს, მართალო მოინტერესუდ სულიერ საკითხეფი. მა ვორწყედ, ნამდა თინეფ ირნერო ოცადუდეს, თეშ უცხოვრებდესკო, მუჭოთ ბიბლია ოგურუანდ დო მა ხოლო მიდაფრთ თინეფწკუმა ართო ოქადაქებშა. მოკოდ მალას იმნათკონ დო 1941 წანაშ 5 სექტემბერს ბილიქ დომნათ ფოლადიშ ცილინდრის, ნამუთ ეფშა რდუ ინჭაშე ეშნაკაჩა წყარით. წყარ ჸურუმქუაცალ რდუ.

1946 წანაშ ზარხულს ჸუდეშა დიბრთ დო ქიდვესწრით კლივლენდის (ოჰაიო, აშშ) კონგრესის. კონგრესიშ პირველ დღას პროგრამას ვეკობსქიდიკონ თიშენ, ჩქიმ დალეფ ფურცელშა გემჭარანდეს თემეფს. მაჟია დღას ქიგებგ, ნამდა ცალკე რდუ ყრუ-მუნჯეფიშ ჯგუფი, ნამუსით თარჯიმან ჸუნდ. საბოლათ, დიდ ხიოლით ქიმიფრჩქილე პროგრამა ჩქიმ ნინაშა დო მუთ იჸუნ, ბიბლიურ ჭეშმარიტებას ბოლოშა ქინვანჭი!

ვოგურუანქ ჭეშმარიტებას

მაჟია მსოფლიო ჩხუპ ახალ თებულ რდუ, მუჟამსით ნაციონალიზმიშ ტალღაქ მოლართ. კონგრესშე დიფრთინ, უკვე გინოჭყვიდილ მაფუდ, სკოლას ჩქიმ რწმენა დამცვებუდკონ. თაშ ნამდა, ვართ დროშას ვარზენდ სალამს დო ვართ ჰიმნის იბიბრდი. დღახუეფიშ მონაწილებაშე ხოლო ვარია ქოფთქვი დო ვართ ეკლესიას სავალდებულო მსახურებას ვოსწრუდი. სკოლაშ მასწავლებელეფს ვემეწონეს ჩქიმ ახალ რწმენაქ დო ოცადუდეს შქურინაფათ დო ტყურაშ ღორებათ ჩქიმდა აზრი დუთირდესკო. თე ირფელქ თანაკლასელეფიშ წოხლე უხერხულ მდგომარეობას ქენმოჸოთ, მარა თინეფწკუმა ქადაქებაშ საშვალებაქ ქუმმაჩ. ჩქიმ თანაკლასელეფქ — ლარი ანდროსოფიქ, ნორმან დიტრიკიქ დო ემილი შნაიდერქ — მიღეს ჭეშმარიტება დო ამდღარშახ ართგურო ომსახურნა იეჰოვას.

შხვა ქალაქეფშა მიფშინ, ირო მოკოდ ჸუც ვარჩქილედესინ ფერ კათაშა მიქადაქებუდკო. მაგალთო, მონრეალს ყრუ-მუნჯეფიშ კლუბის ართ ახალგაზრდა კოჩის, ედი ტაგერს ვუქადაქი, ნამუთ ყრუ-მუნჯეფიშ ჯგუფიშ წევრ რდუ. თიქ ულირ წანას ღურ. ღურაშახ თინა მსახურენდ ყრუ-მუნჯეფიშ კრებას ლავალის (კვებეკი). გეფჩინებაფე ხოლო ართ პიროვნება ხუან არდანესი, ნამუთ სიმართლე ქუგუგებუდკონ თიშენ ბერეელეფცალო მთელ გურით ირკვიენდ ბიბლიას (საქ. 17:10, 11). თიქ ქიგეგ ჭეშმარიტება დო ონდო ცოცხალ რდუნ, ართგურო მსახურენდ უხუცესო ოტავას (ონტარიო).

1950 წანას გეგნოფრთ ვანკუვერშა. მანგარო მიჸორდ ყრუ-მუნჯეფწკუმა ქადაქება, მარა დღას ვაგმოჭყორდუ შემთხვევა, მუჟამსით ქუჩას ქეშეფხვად ჸუც არჩქილედუნ ფერ ოსურკოჩის, კრის სპაისერს. თიქ ჟურნალეფიშ გიშაჭარუაშე დემეთანხმ დო მიკორინუ მუშ ქომონჯის, გარის ხოლო ქუდურაგადეკო. მა ქიმეფრთ თინეფიშ ჸუდეშა დო ფურცელეფს გივოჭარანდითინ თეშ გვარიან ხანს იფჩიებუდით. თეშ უკულ, თინეფს ვეშეფხვალამუქ, მარა მუსხირენ წანაქ გემოკორთ დო შურო ვეველუდითინ თეშ ართიანს გევაზადით კონგრესის ტორონტოს (ონტარიო). გარიქ თიმ დღას ინათ. თე ძვირფას შემთხვევა გუმოშინანს, მუშმადიდა მნიშვნელობა უღუ ქადაქებას, მუშენდა ვამჩქუნა ჭეშმარიტება, მუჟამს გიმიღანს ნაყოფის.

მუსხირენ ხანიშ უკულ სასკატუნშა დიფრთი. თექ ქეშეფხვად ტყუპეფიშ დიდას, ნამუქით ქოფთხუ, ბიბლია ქუდომგურუაფუდკო მუშ ცირეფშა, ჯინი დო ჯოანა როზენბერგერეფშა, ნამუთ ყრუ-მუნჯეფ რდეს. თინეფ გურაფლენდეს ყრუ-მუნჯეფიშ თი სკოლას, სოდეთ ართ დროს მა ხოლო გილეფშ. თე ცირეფქ ხეთეშე ქიდიჭყეს მუნეფიშ კლასელეფწკუმა ქადაქება. საბოლათ, თინეფიშ კლასშე ხუთ ძღაბიქ იეჰოვაშ მოწმეთ გინირთ. თინეფშე ართ-ართ რდუ ევნიკე კოლინი. თინა პირველო ყრუ-მუნჯეფიშ სკოლას ბძირი, მუჟამსით სკოლას ვათენდი. თი დროს თიქ კანფეტ ქომუჩ დო მიწუ, ქიშილებედ დო ვარ მეგობრეფქ ქიპჸითკონ. მუსხირენ ხანიშ უკულ, თიქ ჩქიმ ცხოვრებას მნიშვნელოვან ადგილ ქიდეკინ დო ჩქიმ მეუღლექ ქიჸუ.

ევნიკეშ დიდაქ ქიგეგ, ნამდა თინა ბიბლიას გურაფლენდ დო სკოლაშ დირექტორ ქეთირჩქინუ, ნამდა თის გეგნაფიქრებაფუკო გურაფაშ გაგრძელება. დირექტორქ ევნიკეს ბიბლიაშ ოგურაფალ წიგნეფ ხოლო მიდუღ, მარა თის ყურადღება იეჰოვაშა რდუ მენდებული. მუჟამსით გაცხად, ნათუა ოკოდუნ, მშობლეფქ უწის: „იეჰოვაშ მოწმეთ გინირთუქ-და, ჸუდეშე გაჸი ოულარ!“. ევნიკექ 17 წანერ რდუნ თეშ ჸუდე ქიდიტუ დო თექ ცხოვრენდუნ ფერ ართ იეჰოვაშ მოწმე ოჯახიქ მიდეჸონ ჸუდეშა. თიქ გაგრძელ ბიბლიაშ გურაფა დო დინათუ. ჩქი 1960 წანას დებქორწინით. ევნიკეშ მშობლეფქ ჩქინ ქორწილშა ვა მორთეს, მარა წანეფქ გემკორთ დო თინეფქ დუმაფასეს ჩქინ რწმენაშენ დო ბაღანეფს ჯგირო ბრდუნდით თიშენ.

იეჰოვა ვა მარკენდ ყურადღებას

ჩქი ჸუც არჩქილედეს ფერ შქვით ქომოლსქუაქ ქუმაშის. თენა ჩქინო პრობლემა რდუ, მარა ბაღანეფწკუმა თავისფალ ურთიერთობა ქომღუდესკო დო ჭეშმარიტება ქუვოგურეთკო თიშენ, ჟესტეფიშ ნინა ქუდვოგურეთ. კრებაშ და დო ჯიმალეფ მანგარო მოხვარდეს. მაგალთო, ართ-ართ მშობელქ დომჭარეს, ნამდა ჩქინ ართ სქუა სამეფო დარბაზის გლახა სიტყვეფს იჩიებუდ. ჩქი ხეთეშე ქიმუვაქცით თეს ყურადღება. ჩქინ ოთხ სქუა — ჯეიმზი, ჯერი, ნიკოლას დო სტივენი მუნეფიშ ოჯახეფწკუმა ართო ართგურო ომსახურნა იეჰოვას. თინეფ ოთხოლო უხუცესო მსახურენა. ნიკოლას დო მუშ მეუღლე დებორა კანკალეშა ოხვარნა ჟესტეფიშ ნინაშა თარგმნუას ბრიტანეთიშ ბეთელს. სტივენ დო მუშ ოსურ შანონი მსახურენა ამერიკაშ ბეთელს, ჟესტეფიშ ნინაშ მთარგმნელობით განყოფილებას.

ართ თუთათ ადრე, სოიშახ ქორწინებაშ 40 წანაშ დუდ მაღვენუდესინ, ევნიკეს სიმსივნეშა ვა გარზინ დო ხეს ქეშმოღურ. მთელ თე გაჭირებაშ დროს თის გურ ვა გოტახუ დო აღდგომაშ რწმენა ამანგარენდ. მივახიოლანქ თი დღაშ მულას, მუჟამსით თის კინ ქობძირუნქ.

2012 წანაშ ფრევალს ქუდუვანთხ დო ბარძაყიშ ძვალქ მეპტირხ დო არგამა რდუ, ხვალე ვა მაცხოვრებედ. თაშ ნამდა, ოცხოვრებშა ჩქიმ სქუა დო ნოსაშა გეგნოფრთ. ასე კალგარიშ კრებას ვორეთ, ნამუთ ჟესტეფიშ ნინაშა იტარებუ, სოდეთ უხუცესო ვაგრძელენქ მსახურებას. ცხოვრებას პირველო ვორექ კრებას, ნამუთ ჟესტეფიშ ნინაშა რე. 1946 წანაშე მოჸუნაფილ ირიათო ინგლისურ კრებას ვორდი დო წერმიდგინით, მუჭო იპჸიდ სულიერო. იეჰოვა მუშ პირობას ვეგნურთანს დო ყურადღებას ვემიარკენს მუმა ვაჸუნსინ ფერ ბაღანეფს (ფსალმ. 10:14). მარდულ ვორექ და დო ჯიმალეფიშ ხანდაშე, მუშენდა თინეფ ირო მზათ რდეს, მიმეხვარესკო: თინეფ ფურცელს გემჭარანდეს თეშ მოგებეფუანდეს, ჟესტეფიშ ნინას გურაფლენდეს დო მუჭო შეალებედესინ თეშ მითარგმნუნდეს.

მართალ ქოფთქუენ, რდუ დრო, მუჟამსით იმენდ მაფუდ დინაფილ, მუშენდა ვეშემლებუდ მუდგას იჩიებდესინ თიშ გაგება დო ფიფქრენდ, ნამდა მოხვარა მოსაჭირუდუნ თის ვა გებულენდეს. თეცალ დროს გუმაშინედ პეტრეშ სიტყვეფი, ნამუთ იესოს უწუ: „უფალი, მიშა იბდათ? სი გიღუ მარადიულ სიცოცხლეშ სიტყვეფი“ (იოან. 6:66—68). ჩქიმ თაობაშ ბრელ ყრუ-მუნჯ და დო ჯიმალეფცალო, მა ხოლო დიბგურე მოთვინება. ქიდიბგურე იეჰოვაშა დო თიშ ორგანიზაციაშა მენდება დო თინა ხოლო, მუჭო შემლებუდ თეცალ მოქმედებაშე სარგებელიშ მეღება. სულიერ საზრდო ასე ხვეიანო მიღუ ჩქიმ ნინაშა დო უკვე შემლებ სასიამოვნო ურთიერთობა მიღდას და დო ჯიმალეფწკუმა კრებას დო კონგრესეფს, ნამუთ იტარებუ ამერიკულ ჟესტეფიშ ნინაშა. მართალო ბედნერ ვორექ დო კურთხევეფით ეფშა ცხოვრება მიღ, მუშენდა ვომსახურუქ ჩქინ დიდებულ ღორონთ იეჰოვას.