მიანდ პასუხიშმგებლობეფი ართგურ ქომოლკათას
„მიანდ ართგურ ქომოლკათას, ნამუთ გიმოდირთუნა თიშო, ნამდა ოგურუან შხვეფს“ (2 ტიმ. 2:2).
ობირეშეფი: 123, 53
1, 2. მუს ფიქრენს ბრელ მუშ საქმეშ გურშენ?
ხშირას ხალხი მუნეფიშ დუც მუ საქმეს ორთუნ თით აფასენს. ბრელ ფიქრენს, ნამდა პირად ღირსებაშ გრძნობა დამოკიდებულ რე თიშა, მუ საქმეს ორთუ ვარდა მუ მდგომარეობა უკინებ. ნამთინე კულტურას კოჩის გაჩინებაფაშ დროს ოკითხუნა: „სო მუშენქ?“.
2 მინშა ბიბლიას სახელწკუმა ართო კოჩიშ პროფესია ხოლო რე მოშინაფილ, მაგალთო, „გადასახადეფიშ ემაშაყარალ მათე“, „მეტყებე სიმონი“ დო „საჸოროფო ექიმ ლუკა“ (მათ. 10:3; საქ. 10:6; კოლ. 4:14). ნამთინე კოჩიშ სახელწკუმა ართო თიშ თეოკრატიულ დავალება ვარდა პასუხიშმგებლობა ხოლო რე მოშინაფილ, მაგალთო, მეფე დავითი, წინასწარმეტყველ ელია დო მოციქულ პავლე. თე ქომოლკათა აფასენდეს ღორონთშე მოჩამილ პასუხიშმგებლობეფს. ჩქინდა ხოლო ქორე მენდებულ მუთუნ თეოკრატიულ პასუხიშმგებლობა-და, ჩქი ხოლო ოკო დუვაფასათ თინა.
3. მუშენ ოკო ოგურუან ხანშამიშულირ ჯიმალეფქ ახალგაზრდეფს? (ქოძირით სურათ თე გვერდის)
3 ჩქინდე ბრელს მოწონს თეოკრატიულ დავალებეფიშ კეთება დო მოკონა ირიათო ვაკეთათ თინა. სამწუხაროთ, ადამიშ დროშე მოჸუნაფილ ჯვეშ თაობას ახალ თაობა თირანს (ეკლ. 1:4). ბოლო პერიოდის თექ ახალ სირთულეეფი გოურჩქინ ღორონთიშ მსახურეფს. იეჰოვაშ ხალხიშ საქმიანობა უმოს მაშტაბურ რე დო ბრელ საქმეშ კეთებას ითხინს. ახალ პროექტეფიშ დოჭყაფა ნიშნენს ახალ მეთოდეფიშ დოგურაფას, ნამუთ ითხინს თანამედროვე ტექნოლოგიეფიშ გიმორინაფას. ნამთინე ხანშამიშულირ ჯიმაშო ეფი ვარე თეცალ სიახალეეფიშ მერჩქვანა (ლუკ. 5:39). თაშ ვარდასინ ხოლო, ახალგაზრდეფს მეტ ძალა დო ენერგია უღუნა, ვინემ ხანშა მიშულირეფს (იგავ. 20:29). ათეშგურშენ ხანშამიშულირ ჯიმალეფ ჸოროფას გიმირჩქინანა, მუჟამსით ახალგაზრდეფს ამზადენა, მიღან მეტ პასუხიშმგებლობეფი (წეკითხით ფსალმუნიშ 71:18).
4. მუშენ უჭირს ნამთინეს პასუხიშმგებლობეფიშ შხვეფშა გინოჩამა? (ქოძირით ჩარჩო „მუშენ უჭირს ნამთინეს პასუხიშმგებლობეფიშ შხვეფშა გინოჩამა“).
4 პასუხიშმგებელ ჯიმალეფშო შილებე ეფი ვარდას მუნეფშა მენდებულ საქმეშ ახალგაზრდეფშა გინოჩამა. შილებე თინეფს ოშკურდან, ნამდა მიოდინუანა თის, მუდგას მანგარო აფასენა. ნამთინე დარწმუნებულ რე, ნამდა ახალგაზრდეფს ჯგირო ვეშიასრულებენა თე საქმე, ათეშგურშენ ოკონა ირფელ მუნეფქ აკონტროლან. მინქ ხოლო შილებე თქუას, ნამდა შხვაშ ოგურაფალო დრო ვა უღუ. ახალგაზრდეფქ მოთვინება ოკო გეგმირჩქინან, მუჟამსით უმოს მეტ პასუხიშმგებლობეფი ვეგნაჩამუნა.
5. მუ კითხვეფს გუვარჩიენთ თე სტატიას?
5 მორთ გუვარჩუათ თე საკითხი ჟირ მხარეთ. მუჭო შეულებუნა ხანშამიშულირ ჯიმალეფს, მეხვარან ახალგაზრდეფს მეტ პასუხიშმგებლობაშ მეღებას დო მუშენ რე თენა მნიშვნელოვან? (2 ტიმ. 2:2). მუშენ რე მნიშვნელოვან ახალგაზრდეფს უღუდან სწორ დამოკიდებულება, მუჟამსით ოხვარუნა გამოცდილ ჯიმალეფს დო გურაფლენა თინეფშე? მორთ, ქობძირათ მუჭო ოხვარუდ მეფე დავითი მუშ სქუას მნიშვნელოვან დავალებაშ შესრულებას.
დავითიქ მამზად დო ქელუდირთ სოლომონს
6. მუშ კეთება ოკოდ მეფე დავითის, მარა მუ მითითება მეჩ იეჰოვაქ თის?
6 სოიშა დავითი მეფეთ გინირთუდ დო კომფორტულ ჸუდეს იცხოვრენდუნ, თინა წანეფიშ დინახალე ნტებულ რდუ. თინა წუხენდ, მუშენდა ვაარსებენდ იეჰოვაშ „ჸუდე“ ვარდა ტაძარი დო ოკოდ თინა აშენკონ. დავითიქ წინასწარმეტყველ ნათანს უწუ: „მა კედარიშ ჸუდეს ბცხოვრენქ, იეჰოვაშ შეთანხმებაშ კიდობანი ხოლო კარავს რე“. ნათანქ უპასუხ: „გაკეთ, მუდგა გურს გიღუნ, ჭეშმარიტ ღორონთი სქანწკუმა რე“. მარა იეჰოვაქ შხვანერ მითითება მეჩუ. თიქ ნათანიშ პიჯით უწუ დავითის: „სი ვეიაშენენქ ჩქიმ ჸუდეს“. თეშ უმკუჯინუო, ღორონთიქ დარწმუნ დავითი, ნამდა ირიათო აკურთხენდ, მარა თინა ხოლო უწუ, ტაძარს მუშ სქუა სოლომონი აშენენდუნ. მუჭო მიქცუ დავითიქ? (1 მატ. 17:1—4, 8, 11, 12; 29:1).
7. მუჭო მიღუ დავითიქ იეჰოვაშ მითითება?
7 დავითის ვარია ვაუთქუალ სოლომონიშ ელარინაშენ; თინა ვართ თიშენ წუხენდ, ნამდა თე ტაძარი მუშ სახელით ვეიშენებუდ. შენებაქ გეთუნ თიშ უკულ, თე ტაძარს სოლომონიშ ტაძარს უძახუდეს დო ვართ ხოლო დავითიშ. დავითი შილებე გურგოტახილ რდუკო, მუშ სურვილქ ვეშიასრულებუნ თიშენ, მარა თინა ირნერო ელურდ სოლომონს ტაძარიშ აშენებას. თიქ შურდოგურით ქიზრუნ სამუშა ჯგუფეფიშ ორგანიზებაშენ, თეშ გარდა რკინაშ, სპილენძიშ, ოქრო-ვარჩხილიშ დო საჭირო ჯაშ მასალაშ შაყარუაშენ. თეშ გარდა, სოლომონს გურიშემაკინალ სიტყვეფ უწუ: „ასე, ჩქიმ სქუა, იეჰოვა რდას სქანწკუმა, წარმატება გაღვენუ დო აშენენქ სქან ღორონთ, იეჰოვაშ ჸუდეს, მუჭოთ თის აფუ ნათქუელ სქანიშ გურშენ“ (1 მატ. 22:11, 14—16).
8. მუშენ შილებედ დავითიქ იფიქრუკონ, ნამდა სოლომონს ვეშიალებედ ტაძარიშ შენება, მარა მუჭო მიქცუ თიქ?
8 წეკითხით 1 მატიანეშ 22:5. დავითი შილებედ ფიქრენდკონ, ნამდა სოლომონს ვა უღუდ გამოცდილება დო ვახემძვანელებედ თე საქმეშა. ტაძარქ „არძაშ უმოს დიდებულქ“ ოკო იჸუკო, მარა სოლომონი დიო ახალგაზრდა რდუ დო გამოცდილება ორკუდ. თეშ უმკუჯინუო, დავითის ჯერდ, ნამდა იეჰოვა ქიმეხვარებუდ სოლომონს თე საქმეშ კეთებას. თაშ ნამდა, დავითიქ მთელ ყურადღება თიშა გეგნიღ, ქიმეხვარუკო სოლომონს დო დიდ რაოდენობათ ოშენებელ მასალა დუშაყარუ.
შხვეფიშ გურაფას ხიოლ მოუღ
სასიამოვნო რე თიშ ძირაფა, ნამდა ახალგაზრდეფი ეჭოფუნა მეტ პასუხიშმგებლობეფს (ქოძირით აბზაცი 9)
9. მუჭო მოუღ კმაყოფილება ხანშამიშულირ ჯიმალეფშო პასუხიშმგებლობეფიშ შხვეფშა გინოჩამას? ქიმიჸონით მაგალით.
9 ხანშამიშულირ ჯიმალეფქ გურ ვეგიტახან ოკო, მუჟამსით საჭირო რე, მუნეფიშ დავალებეფიშ ახალგაზრდეფშა გინოჩამა. სინამდვილეს, საქმე ჯგირო იკეთებუაფ, მუჟამსით ახალგაზრდეფს ამზადენა პასუხიშმგებლობეფშო. პასუხიშმგებელ ჯიმალეფ კმაყოფილეფ რდან ოკო, მუჟამსით ახალგაზრდეფი, მიდგას თინეფქ ოგურუეს, მზათ რენა, ხე ქიმეთხან საქმეს. დეფიფქრათ მუმა დო სქუაშ მაგალითშენ. მუჟამსით სქუა ჭიჭე რენ, თინა ოკვირ მუშ მუმას, მუჭო გილაჸუნს მანქანა. ჭიჭეს გემწირდუნ უკულ, მუმა უხსნენს, მუს ორთუნ. სრულწლოვანო გინირთუნ, მუ იჭყანს მანქანაშ გილაჸონაფას დო მუმა მითითებეფს არზენს. დუდშე შილებე მანქანაშ გილაჸონაფას ართიანს ოთირუდან, მარა დრო-ხანიშ უკულ მუშ მოხუცებულ მუმაშ მანგიორო, ხვალე მუქ ქიდიჭყას მანქანაშ გილაჸონაფა. გონიერ მუმას ოსიამოვნ, ნამდა თე საქმე მუშ სქუას ქიმიანდ დო ვა ფიქრენს თის, მუჭო მუშ გემოშა ვარე. თეგვარო, ხანშა მიშულირ ჯიმალეფს ხოლო ოამაყუნა, მუჟამსით ოხვარუნა ახალგაზრდეფს თეოკრატიულ პასუხიშმგებლობეფიშ ეჭოფუას.
10. მუს ფიქრენდ მოსე დიდება დო ავტორიტეტშენ?
10 ხანშამიშულირ ჯიმალეფ ვარდან ოკო მენჯარიშეფ. ყურადღება ქიმვაქცუათ, მუნერ რეაქცია უღუდ მოსეს, მუჟამსით ისრაელიშ ბანაკის ნამთინექ წინასწარმეტყველება დიჭყუ (წეკითხით რიცხვეფიშ 11:24—29). მოსეშ მსახურქ, იესო ნავეშ სქუაქ თინეფიშ გაჩერება მინდომუ. თინა ფიქრენდ, ნამდა თეთ მოსეშ სახელს დო ავტორიტეტის დეცვენდ. მარა მოსექ უწუ თის: „ჩქიმ ართგურობა გორაგადაფუანსო თეს? ნოტე იეჰოვაშ ხალხშე არძა წინასწარმეტყველ ქოჸუას, იეჰოვა მუშ შურს ქიმეჩანდ თინეფს!“ მოსექ ქოძირ იეჰოვაშ ხემძღვანელობა თე საქმეს. მოსეს ვაკოდ მუშ დუდიშ განდიდება, თის ოკოდ მუს უღუდუნ თიცალ სულიერ ძღვინ იეჰოვაშ არძა მსახურს უღუდკო. მოსეცალო ჩქი ხოლო ვამოხიოლდანიო ოკო მუჟამსით შხვეფ ღებულენა პასუხიშმგებლობეფს, ნამუქით შილებედ ჩქი ქუმაშუესკო?
11. მუ თქუ ართ ჯიმაქ პასუხიშმგებლობეფიშ შხვეფშა გინოჩამაშ გურშენ?
11 ამდღა ხოლო ქიანაშ მაგალით მიღუნა თი ჯიმალეფიშ, მით ბრელ ხან რე ორთუნა მუნეფიშ საქმეს დო შხვეფს ხოლო ამზადენა პასუხიშმგებლობეფშო. მაგალთო, ართ ჯიმა პიტერ სრულ დროთ 74 წანაშე მეტ ხანს მსახურენდ; თავრეშე 35 წანას ევროპაშ ართ-ართ ფილიალს მსახურენდ. ამარდეშა თინა სამსახურებრივ განყოფილებაშ ზედამხედველ რდუ. ასე თე პასუხიშმგებლობას ასრულენს ახალგაზრდა ჯიმა პოლი, ნამუთ პიტერწკუმა ართო მსახურენდ მუსხირენ წანას. მუჟამსით პიტერს ქოკითხეს, მუს ფიქრენდ მუშ დანიშნულებაშ თირუაშენ, თიქ თქუ: „მანგარო მოხიოლ, ნამდა რენა მომზადებულ ჯიმალეფ, ნამუთ ჯგირო ასრულენა მუნეფშა მენდებულ საქმეს“.
დაფასით ხანშამიშულირ ჯიმალეფ
12. მუს ბგურაფლენთ რობოამიშ მაგალითშე?
12 სოლომონიშ ღურაშ უკულ თიშ სქუაქ, რობოამქ გინირთ მეფეთ. მუჟამსით რობოამს დესაჭირ რჩევაქ, ნამუთ მუშ პასუხიშმგებლობეფიშ შესრულებას ოხუდ, თიქ ხანშა მიშულირ ქომოლკათას ქელაკითხუ, მარა ვეგეთვალისწინ თინეფიშ რჩევა. თეშ მანგიორო, რჩევა მუწკუმა ართო ირდუდესინ ფერ ახალგაზრდეფს ქელაკითხუ, ნამუთ მუშ მსახურეფ რდეს. თეს უბედრობაქ ქუმაჸუნ (2 მატ. 10:6—11, 19). მუს ბგურაფლენთ თავრეშე? უმოს ჭკვერულ რე ხანშამიშულირ გამოცდილ ჯიმალეფს ქელვაკითხუათ დო გეფთვალისწინათ თინეფიშ აზრი. ვა რე აუცილებერ ახალგაზრდეფქ ზუსტას თეშ აკეთან ირფელ, მუჭოთ ადრე ხანშამიშულირეფ ორთუდეს. მარა ჯგირ იჸუაფ, დაფასან თინეფიშ აზრი დო ვეჩქარან თიშ თქუალა, ნამდა ვეგმადირთუნა თინეფიშ რჩევეფი.
13. მუჭო შეულებუნა ახალგაზრდეფს ითანამშრომლან ხანშამიშულირეფწკუმა?
13 მინშა ახალგაზრდეფს შილებე თიცალ პასუხიშმგებლობეფი უღუდან, ნამდგაშა მიშურს ხანშამიშულირ გამოცდილ ჯიმალეფიშ საქმეშ ხემძღვანელობა. მუჟამსით ახალგაზრდას მდგომარეობა ათირუნ, მუთუნიშ გინოჭყვიდუაშახ, თიქ იშენით გეთვალისწინას ოკო ხანშამიშულირეფიშ სიბრძნე დო გამოცდილება. მაგალთო ჟიშე მოშინაფილ ჯიმა პოლქ, ნამუთ პიტერიშ მანგიორო ზედამხედველენს სამსახურებრივ განყოფილებას ბეთელსინ, იჩიებ: „მა ხშირას ელვაკითხანქ რჩევას პიტერს დო ჩქიმ განყოფილებას შხვეფს ხოლო ურაგადუქ, თაშ მიქცუან“.
14. მუს ბგურაფლენთ ტიმოთე დო პავლეშ თანამშრომლობაშე?
14 ახალგაზრდა ტიმოთე ბრელით უკლაშ რდუ მოციქულ პავლეშე, მარა თინეფ წანეფიშ დინახალე მსახურენდეს ართო (წეკითხით ფილიპელეფიშ 2:20—22). პავლექ კორინთელეფს მეჭარ: „თქვანდა მივაშკვანქ ტიმოთეს, ჩქიმ საჸოროფო დო ართგურ სქუას უფალს. თინა ქუგგოშინანა, მუჭო ვოგურუანდ ქრისტე იესოშ გურშენ, მუდგას ამდღარ დღაშა ვორთუქ ირდიხას, არძა კრებას“ (1 კორ. 4:17). პავლეშ თე ნარაგადშე იძირე, მუნერ ხოლოშიან ურთიერთობა უღუდეს ართმაჟიაწკუმა. პავლე დროს გიმორთუნდ თიშო, ნამდა ოგურუკო ტიმოთეს ქრისტე იესოშ გურშენ. ტიმოთექ ჯგირო ქიდიგურუ ირფელ დო პავლე ხოლო კმაყოფილ რდუ; თინა დარწმუნებულ რდუ, ნამდა ტიმოთე ქიზრუნენდ კორინთელ ქრისტიანეფიშ სულიერობაშენ. მუშმაჯგირა მაგალით რე თენა უხუცესეფშო, მით ამზადენა შხვეფს, ნამდა ქუხემძღვანელან კრებას შხვადოშხვა საქმეს.
არძას მუშ ადგილ უღუ
15. მუჭო მიმეხვარებუნა რომაელეფშა მეჩამილ რჩევა, მუჟამსით ცვლილებეფ პირადო ჩქი მოხუნა?
15 ჩქი მანგარ მნიშვნელოვან დროს ფცხოვრენთ. იეჰოვაშ ორგანიზაციაშ მიწიერ ნაწილ შხვადოშხვა მხარეთ ირდუ, ათეშგურშენ, საჭირო რე ბრელ მუთუნიშ თირუა. შილებე მუთუნიშ თირუაქ ჩქი პირადო შემეხუან, ათეშგურშენ მოსაჭირუნა თანდაბლობა, ნამდა პირველ ადგილს იეჰოვაშ ინტერესეფი ქიგვორინუათ დო ვართ ხოლო ჩქინ. თენა ართობას უნწყუნს ხეს. რომაელ ქრისტიანეფს პავლექ მეჭარ: „გირაგადუთ არძას: თქვან დუდშე თიშე უმოსო ვეფიქრათ, ვინემ ოკო ფიქრენდათინ, პირიქით თეშ იფიქრით, ნამდა საღ აზროვნება გიღუდან, არძაქ თი ზომათ, მუ ზომათ ღორონთიქ გოინაწილეს რწმენა. ართ სხეულს სხეულიშ ბრელ ნაწილ მიღუნა, მარა არძა ნაწილს ართ დანიშნულება ვა უღუ. მართალ რე, ბრელ ვორეთ, მარა ჩქი ხოლო ართ სხეული ვორეთ ქრისტეწკუმა ართობას“ (რომ. 12:3—5).
16. მუჭო ოკო მიქცუან ხანშამიშულირეფქ, ახალგაზრდეფქ დო გათხილ დალეფქ, ნამდა ხე ქეშუნწყუან მშვიდობას დო ართობას იეჰოვაშ ორგანიზაციას?
16 მუდგა მდგომარეობას ვა ვორდათინ, მორთ, ირიათო ხუჯი ქუდუკინათ იეჰოვაშ სამეფოშ ინტერესეფს. ხანშამიშულირ ჯიმალეფ, ქუდაგურეთ ახალგაზრდეფს თი საქმეეფი, მუდგას თქვა ორთუთ. ახალგაზრდეფი, გეჭოფით პასუხიშმგებლობეფი, რდათ მოკრძალებულეფ დო პატიცით ხანშამიშულირ ჯიმალეფს. დალეფ, თქვა ხოლო, მით დაოჯახებულეფ რეთ, მიაჸუნით აკვილაშ ოჯახობაშ, პრისკილაშ მაგალითის, ნამუთ ირიათო მუშ ქომონჯიშ გვერდით რდუ დო არძანერ სიტუაციას ხუჯის უკინენდ თის (საქ. 18:2).
17. მუშა რდუ დარწმუნებულ იესო დო მუ საქმეშო მამზად თიქ მუშ მოწაფეეფი?
17 შხვეფიშ მომზადებაშ დო გურაფაშ არძაშ უჯგუშ მაგალითის ირზენს იესო. იესოს უჩქუდ, ნამდა თიშ მსახურება დედამიწას მალას დესრულებუდ დო თე საქმე შხვეფქ ოკო გაგრძელესკო. მართალ რე, თიშ მოწაფეეფ ვარდეს სრულყოფილეფ, მარა იესო დარწმუნებულ რდუ თინეფშა დო უწუ, ნამდა მუშე უმოს საქმეს გაკეთენდეს (იოან. 14:12). იესოქ მოწაფეეფ ჯგირო მამზად დო თინეფქ თიმ დროს ირდიხას გავრცელეს სახიოლო ამბე (კოლ. 1:23).
18. მუ მელუნა მომავალს დო მუ ოკო ვაკეთათ ამდღა?
18 იესოქ მუშ დუდი მსხვერპლო შეწირუნ თიშ უკულ, ღორონთიქ აღადგინ თინა ზეცაშ ოცხოვრებელო დო ქიმეჩ მეტ პასუხიშმგებლობა. თეშ გარდა ქიმიაჩ ძალაუფლებაქ „არძა მთავრობაშა, ხელისუფლებაშა, ძალაშა [დო] ბატონობაშა“ (ეფეს. 1:19—21). არმაგედონშა ცოცხალო ვემმართინეს-და, ღორონთი დომრთინუანა სიცოცხლეს ახალ სამართლიან ქიანას, სოდეთ ბრელ საქმე მელუნა, ნამუთ კმაყოფილებას მომღანა; მარა თეშ გურშენ, საჭირო რე, ართგურეფ ქუდოფსკიდათ. ამდღა არძაშ უმოს მნიშვნელოვან საქმე, ნამდგას მონაწილება ოკო მიბღათინ, სახიოლო ამბეშ ქადაქება დო მოწაფეეფიშ მომზადება რე. მორთ არძაქ, ახალგაზრდაქ დო ხანშამიშულირქ, ირიათო ბრელ იფხანდათ უფალიშ საქმეს (1 კორ. 15:58).